【常威近代史】(五百三十七回)
1929年蔣Sir面對嘅頭痛問題
去到1929年年頭,蔣Sir同唔少國際社會上嘅觀察家,都認為蔣Sir已經統一「咗」中國,但其實只係一個假象,表面上蔣Sir完成咗孫文交托界佢嘅偉大事業,將中華民國自1911年以來嘅軍閥割據分裂局面結束,南北歸向統一,不過冠冕堂皇背後,其實係——乜卵嘢都冇。
點解咁講呢?1926年,蔣Sir開始用聯俄資金、顧問及軍備做底牌,開始挺兵北伐,由廣州打到去北京,勢如破竹,途中殲滅直系孫傳芳及吳佩孚勢力,最後趕走埋北京奉系張作霖,「輕而易舉」解散中華民國北京中央政府,由於打住護法同革命嘅旗號,的確係深得民心,最重要嘅係,有唔少敵人同埋將領紛紛見風駛哩、投靠到蔣Sir麾下,最重要嘅當然係桂系嘅李宗仁及白崇禧,同埋之後嘅閻錫山、馮玉祥,不過殘酷嘅現實係,蔣Sir從來冇真正地控制住佢嘅對手同埋征服佢哋嘅地盤,大家握握手做個好朋友建立聯盟,或者燒黃紙斬雞頭做結拜兄弟,全部只係表面功夫。佢哋只係用一種中國傳統嘅方式承認蔣Sir比自己強大(認大佬),所謂明哲保身良禽擇木而棲,作出最有利自己利益嘅選項。
呢個亦都係蔣Sir能夠喺戰場上面推進得如此迅速嘅理由,最初1926年時嘅國民革命軍,即係蔣Sir自己嘅「黨軍」只有區區十萬人,去到1928年中,已經號稱有200萬人,比最初嘅十萬人增加咗20倍。北伐戰爭,無論係任何意義上都係一場戰爭奇跡。
試比較1939年嘅西班牙血腥內戰,一代霸者佛朗哥將軍(Francisco Franco,1892-1975)足足經過咗差唔多32個月嘅艱苦血腥嘅戰爭先能夠成為整個西班牙嘅主人,而蔣Sir只係用咗12個月時間,其中頭九個月喺1926年同1927年之間,隨後是一個政治上嘅休戰時期,後三個月喺1928年4月到6月,蔣Sir就征服咗面積比西班牙大七倍嘅中原地區,勁唔勁?勁到顛啦!
但係佛朗哥係消滅曬自己嘅敵人,喺戰場上面徹底擊潰佢哋,並將殘餘嘅敵人流放或者處死(西班牙內戰係近代一場非常恐怖嘅血腥戰爭,每個人一定要睇睇),而蔣Sir則滿足於對手形式上嘅屈服——嗰啲原來同國民黨為敵嘅軍閥,後來都聲稱自己係國民黨黨員,而且喺大多數情況下,呢啲軍閥喺自己嘅地盤內仍然保留住原有權力,或者更多嘅權力,只係名義上歸順你蔣Sir南京國民政府,桂系同埋奉系張學良就係最好嘅例子。
由於蔣Sir急於取得軍事上嘅成功,因為咁會帶畀佢一時嘅快感、榮譽同埋威望,而事實上佢亦都成功穿上「皇帝的新衣」,但蔣Sir卻忽視咗一樣嘢——就係響一個封建國家裡進行領土征服應該注意嘅唯一正確原則——個原則就係:佢應該徹底剷除嗰啲最初反對佢嘅人,並將自己選定嘅人來代替呢啲人,而新選出嘅人應該「只」效忠於新生嘅民國政府,並「只」效忠與民國嘅最高領導人蔣Sir。