「睇樓mannerism 入屋脫鞋的反思
上次講到喺英國賣家親自帶睇樓同地產經紀帶既分別，又講到如果係賣家親自帶要有禮貌 (https://www.bnopathway.com/post/買樓鄰居質素呢件事)，其中一樣我覺得可以做的，係入屋前問下需唔需要除鞋。大家覺得喺香港，呢個問題絕對喺多餘，但喺英國呢個問題係好有趣既，可以同大家講下。
先從一般英國人既習慣講一講，畢竟我曾經同過好多人share flat, 大部分20幾30歲，曾經有過既英國人flatmates 數唔清、澳洲人兩個、意大利四個、日本人一個、香港人兩個。喺入屋除鞋呢件事上，我覺得我真係可以講下。首先係，大部分我曾同住過既白人都會唔除鞋，返到屋企，直接上樓梯入房（樓梯同房都有地氈，污糟咗好難清潔) ，包括我老公一開始拍拖時都係，鞋會放在床邊。我覺得大部分香港人都應該幾頂唔到呢點，解釋佢聽咁好污糟，又搞到地氈好污糟，最後有轉化到佢，但其他flatmate 就無辦法了。咁多個flatmates 黎睇過樓，唯有兩個英國人、同日本and 香港人入屋前有問過要不要除鞋，好感大增。
講返睇樓，不論係賣家定estate agent，每個人既做法都唔同。有啲estate agent 直接踩入屋(不管有無地氈), 咁我地會照跟。都有啲會除鞋，當然跟。如果係賣家帶睇樓就要問了，首先大部分英國賣家一開門係會著住鞋的, 呢個我認為係因為個人形像同呢件事有幾重要既問題。要了解呢個有趣文化，就要先記得，第一，喺英國入屋除鞋非必須。
第二，重要節日、宴客時，不會要求客人除鞋。即使我去in law 家平時大家都會除，聖誕節、新年，要著靚衫時絕對不會，衣衫要襯一套，而且啲女士著咁靚嘅裙一定要襯返對靚鞋，啲男士著西裝都要襯返，所以為顯示對宴會同主人既尊重，鞋會著住。
最後，都同呢個人同你既關係有幾親有關。如果係不熟既人，好似我們去睇樓，對業主黎講係陌生人，通常不會要求除鞋，非旦不會，仲會自己著好先開門，保持形象好緊要。咁喺呢個時候，你作為入人屋企既陌生人，你都係應該要問需唔需要除鞋，佢唔要求係一件事，你問唔問又係另一件事。
地氈既清理不容易，有時英國人會喺聖誕宴客前請人用大型機器洗地氈。同樣地，俾人入屋睇樓前至少都會清潔下，而如果即時踩污糟都幾心痛，所以係應該要問。有一次，我地問咗，個屋主都話好呀，if you don’t mind 如果你不介意就除啦，然後佢自己都除鞋🤣大部分人都會話no, you don’t need to, 但你一樣可以堅持(好似飲茶爭俾錢一樣😅) 但去到睇garden，都係要去拎返鞋黎著，草地有泥，所以入屋前記得除返。
講返轉頭，其實英國人對地氈都幾care, 咁點解我啲flatmate 個個都著鞋入房呢，因為唔係自己地方囉。第二，20歲30歲，以前同屋企人住，有阿媽清潔嘛😅 到有自己物業又唔同了，不過整體黎講，英國人對入屋除鞋既重視程度，同我們or日本人完全不在同一level，所以唔好expect人地同我地一樣啦！」
https://www.facebook.com/groups/324408762047512/permalink/500880841066969/
