DAY43 港島香港里拉大酒店(上) 豪華閣貴賓廊 夏宮
之前都有講過
其實係住九龍香格里拉之前
我係book左港島香格里拉先既
因為睇過好多既既評價係
呢間既服務水準一直都好好
就算係長假期都唔會點退步
所以當時見到最普通既山景行政套房個價賣得仲平過新裝修既豪華閣客房
雖然只係送得一千蚊credit
但都照book左呢個連復活節都無加價既24小時package
呢個港島渡假package如果平日checkout既話仲可以住足30小時既
港島香格里拉係2019年之前
曾經都係福布斯既五星酒店
但係20年起由榜上消失左
到今年21年又重新上榜
但一時出現係五星酒店
而家又變成連推薦都無排係榜末等上榜既酒店

完全唔知係發生咩事
不過如果九龍香格里拉都算四星既話
的確係可以將佢視為五星酒店黎看待既
畢竟兩者真係唔同級數
港島呢間仲有兩間米芝蓮一星既餐廳坐陣
雖然夏宮就真係好麻麻
酒店位於金鐘
係金鐘三寶既其中一寶
同奕居身處既第一期唔同
港香係太古廣場既第二期物業
由太古擁有
香格里拉集團管理
91年落成
已經三十年歷史
同期仲有一座港麗酒店
形成雙子大樓
同上次去奕居一樣都係坐黨鐵到金鐘站出入太古廣場
不過就同奕居入口唔同
奕居入口位於太古廣場4樓平台
但港香入口就位於太古廣場5樓
只有商場中間位置既透明升降機可以到達
呢個太古廣場5樓一邊連接港麗酒店

另一邊就係通往港島香格里拉
呢間酒店規模係香港黎講應該都算係最大級

總共有成八間餐廳
中菜夏宮
法國菜珀翠
西餐龍蝦吧
日本菜灘萬
自助餐cafe too
下午茶大堂酒廊
仲有池畔餐廳漪畔臺同糕品店高美食店
應該就只有君悅可以相比
而五樓並唔係酒店大堂
五樓只係中菜廳同糕品店既樓層
需要要搭扶手電梯上六樓先至係酒店大堂checkin位置
因為住既係24小時package
而第二日就book左petrus食一點半
所以我地亦都係一點半到達checkin
地下大堂就分左兩條隊
一條check in
另一條check out
但就無好似九香會咁貼心咁問你會唔會上頂樓check in
不過我見都淨係排一個就無咩所謂
後來搞搞下就快兩點開始見到越黎越多人
始終復活節嘛
入住前大約一兩日
酒店會send mail比左幾個優惠offer問你需唔需要加
其中一個係加千一蚊可以升級新裝修既山景套房
即係本身係官網book呢間新既山景套仲貴過舊既海景套
比起我入住既舊山景套貴成兩千幾蚊
其實好抵玩
不過新裝修同酒店又幾格格不入咁
所以最後都係決定唔加錢轉
淨係要左個八折有五百蚊credit呢個offer
最後我個package係大約三千八蚊有千五蚊credit可以用
而住完九香之後仲有成千金環會既分數可以用
食飯可以當差唔多八舊水用
咁第一日食夏宮就用dining credit
第二日食petrus就扣金環會分數
最後再買左隻公仔
咁呢兩日行政套房加兩餐米芝蓮埋單大約四千六左右
今日我地住40樓既17號房

可能酒店樓層比較高
而且長假期
所以雖然有成五架lift
但次次都要等好耐仲好多人
而架lift就似係新裝

亦都有同九香一樣既星期字數
酒店指南

5樓係中菜同埋糕品店
6樓係大堂仲有lobby lounge同龍蝦吧
7樓係自助餐同日本菜
8樓係健身室同泳池仲有池畔餐廳
而9樓至38樓都係太古廣場二期寫字樓
39樓至55樓係客房層
所以我地今次雖然係住40樓
但其實係第二低層黎

頂樓56樓係lounge同法國菜
另外呢架lift竟然係唔洗拍卡既
即係可以隨時係酒店入面游花園
因為酒店有幅好出名16層既牆畫大好河山
大部份既樓層都可以係門外走廊欣賞得到
除左兩層
39同40樓
所以我地呢一層係完全密封既

客房電梯大堂
除左五架可以落到底既客lift
仲有兩部只有39-56樓既子彈電梯

走廊一樣都有d掛畫
另外我地17號係corner房

同格離16號房既距離超細
佢地房成日開門山門真係好撚嘈
房門對出仲有個特有既擺放位
雖然唔知有咩用
轉角位仲有部電話可以打
