[長氣多圖][無限期] 香港staycation之旅(2)

遲坐低快走咪無阻人收工囉
食fine dine兩個鐘好閒
兩點幾先坐低坐到四點幾
而家限聚六點鐘大部份餐廳都開門
你估你唔走人地又可以做到野
你走左人地又無野要善後咩
你唔係最後走
但都有份阻住人囉
你返office收五點老闆4點9比份野你做多兩個鐘先收工你又點睇呀

師兄做開邊間？

睇你想唔想食點心
中菜單點就午市晚市同價
但灘萬我見同一個set夜晚好似會貴d
或者你揀兩餐都食lunch都得

All in 中菜廳

諗住食咩菜

半隻炸子雞 炸蟹蓋 再嗌多兩樣野

DAY39 香港半島酒店(下) 嘉麟樓

唔識睇張床點樣為止舒唔舒服
不過住過幾間
係麗思卡爾頓同半島算係訓得最好
W同美利係幾乎訓唔著咁濟

咁早餐原本就安排係地下大堂既
我見佢兩個package早餐係位置唔同
四餐果個係露台餐廳食
情人節呢個係大堂茶座食
以為真係有精心安排過啦
可以感受下大堂茶座既典雅啦
首先我真係on99咁企係度等人帶但無人理我
原來係有個好細個既reception仔係另外一邊
但佢就話full左
叫晒其他人上露台餐廳
見到露台餐廳本數簿係有晒客人房同名
咁即係根本就無話分開邊間打邊間啦

餐檯唔算細

一樣都有花

同埋都係果款口罩套

咁套呢樣野就瑞吉同美利做得最有心

不過環境始終都係覺得同大堂比差少少

始終呢度本身係用黎食自助餐既
不過staycation期間佢都會做埋下午茶比唔夠位既客人
之前如果有幸食到跟嘉麟樓果個package既話
就會好大機會安排係呢個餐廳食
兩間餐廳都叫做係相鄰既
不過更加就完全唔係果隻feel

呢度叫做有窗口位

都係望太空館
同中庭客房一樣咁啦

餐牌

其實就只得兩款
一中一西
係可以揀班尼迪強既
不過就會無晒其他配菜
我估大堂同露台早餐應該都係一樣掛

麵包就有幾款

有一款同尋日係gaddi's好好食果隻煙肉卷差唔多口感
不過涵就唔同

而飲品大家都有兩杯
西式係果汁同咖啡或者西茶
而中式係豆漿同中國茶

又見到呢個銀壺
今次就成壺擺係度比你自己玩
而餐架同尋日都係一樣既英國製

西式揀左麥片

同太陽強


另外中式就一份過

有粥有麵有蘿蔔糕

見有人話半島早餐好難食
其實只係因為份量比較少
好似中式就無蝦餃燒賣之類
我反而因為一陣會去嘉麟樓飲茶
所以唔想係度食得太飽
不過原來以前半島酒店個早餐唔係咁既
以前係可以選擇既
係大堂茶座都係早餐set
但露台餐廳就係自助早餐黎
搞成咁又真係唔夠大方既

臨走已經見到準備緊自助午餐



件港女一見到自助餐就雙眼發光
係咁話點解唔揀係度食

食完落番地下


咁除左文華東方唔試玩無住係套房之外
窮閪心態基本上同一間酒店都唔會再去幫襯第兩次

最多都係番黎食下自助餐
呢個大堂茶座可能都係要做個八婆下午茶先試到了

有番晚市
lunch就無得食咁晏
只可以一點三checkout就淨番唔多時間係房

玩下影下相
外面如果見到應該會當我痴線佬
不過舊翼樓底真係好高
淨係隻窗都高過晒個人

好似真係第一次見香港酒店用無線電話


原來牆身d花係立體既


仲有呢件唔知咩黎既紅色藝術品

係有個唔知乜水簽名既


梳妝台仲有部指甲烘乾機

其實有d多鳩餘

話咁快就要checkout了
感覺呢兩日得好少時間留係房咁
如果夜晚買外賣番黎食可能會仲開心

一點幾已經見到要排隊checkin

有職員見到我想checkout已經走過黎幫我搞行李

尋日食gaddi's係自費既
咁淨番果千五蚊就會全數用落中菜度
嘉麟樓位於酒店一樓
係上樓梯轉右既盡頭位
屬於米芝蓮一星中菜
但就唔入圍福布斯名單
86年開業
雖然未有gaddi's咁悠久
但都有三十幾年歷史
當中最為人熟悉可以話係佢地既奶黃月餅
之前試過一次
其實就間間都差唔多

門口一樣有個米芝蓮牌仔

尋日入gaddi's就唔洗用安心上路
但係今日就要do
都仲可以寫紙仔了事既

嘉麟樓見佢近幾年都不斷轉大廚
而家現任主廚係林鈺明師傅
睇過佢教整叉燒條片
但其實係屋企邊有咁既爐可以整得到
睇完都係得啖笑
反而點心部卓嘉政師傅係燒賣條片講得仲多野

午餐booking分兩個時段入座
十一點或者一點三
試過係文華廳早餐仲未落格中過伏
就當然係揀第二段時間
今日我地坐上層

有座吊燈同好搞笑既老爺座檯風扇

上層可以好似天井咁望落下層

但下層就多好多茶葉茶壺睇
而二樓入面有個大房
就比VIP用既

我地坐係二樓既一角

比較清靜
只有三四檯客

牆身都多畫同花樽


算係古色古香

餐檯

間間做法唔同
嘉麟樓一早已經擺定個碟係檯面
亦都係繼潤之後第二次見無舖檯布
見到樓下有d無人檯有舖
應該係得晚市先會有

酒店集團幾間中菜
都係以靈獸命名
環龍閣
起鳳台
嘉麟樓

所以餐廳都係以麟麟作為logo
嘉麟樓杯碟設計都好簡單
唯獨係全部都有呢隻麟麟

花


最特別係隻帆船筷子座

係精品店都有得買
好似賣百幾蚊

餐牌有簡介

餐廳係以1928年酒店開業當時既中菜館為藍本
呈現老上海味道
餐廳內亦都有超過200件中式設計既茶壺
由茶藝師泡製25款高級名茶

咁我本身都想一睹茶藝師既手藝
所以就叫左兩款呢頁紙既茗茶
當我滿心以為會有茶藝師推車仔過黎沖茶
結果都係原本果位小二為我地沖茶
無車仔
咁我就唔清楚會唔會佢都係身兼茶藝師既一職啦

同潤一樣既透明熱水壺

我果壺係台灣凍頂烏龍

另一壺係山東玫瑰

感覺係同上次係潤一樣失望既
普通茶錢係四十蚊位
而家我地兩種茶加埋都二百幾

唔係文華廳或者龍景軒既三色醬
而係同天龍軒一樣既琥珀合桃同XO醬

好似天龍軒好食少少

有個QR code既menu

其實都只係link番去官網

茶葉果本係單點餐牌
另外有細本既係點心餐牌

嘉麟樓d餐牌就好鬼既
本身就已經有卓師傅精選點心
但仲會有廚師推介
即係單點都一樣

本身已經有巧手小菜一頁
但又一樣有廚師推介
講到好似乜都係精選咁

天龍軒無食過點心唔清楚
上次係潤叫點心係要兩件起跳
但今次嘉麟樓係可以單件起點既
因為女朋友唔想食牛
所以單點左一件和牛包

對比起潤既精緻
嘉麟樓係比較傳統既
卓師傅都有講唔會吹到粒燒賣特別好食
但會係好平隱好平穩既點心

下一度上既已經係叉燒
同天龍軒同潤唔同
佢唔係黎自西班牙
而係黎自匈牙利既鬈毛豬
一樣係食果木大

半份同天龍軒一樣得四件
應該係全港最貴既叉燒
398蚊8件
半份199蚊
即係成五十蚊一舊
雖然每日限量供應
但並唔需要預約定

一樣都係咁厚切
嘉麟樓唔同既係佢有燶邊脆口
而且佢係三七分肥瘦
中間好大舊膏

好顛
不過整體都係比較鍾意天龍軒
軟淋淋咁

嘉麟樓既招牌點心
紅蝦小籠包

用左紅蝦做涵
同豬肉混埋一齊
唔需要點其實醬汁直接食

入面係勁多湯汁
呢份係我第一次食中菜有詳細介紹
不過都成一舊水一件

天鵝酥

動物造型
呢個就一般

都係金魚造型

有燕窩有龍蝦
平小籠包兩蚊
反而呢件湯汁仲無咁多

每次去食中菜
除左叉燒
仲會叫既蟹蓋

原本見佢唔係巧手菜就唔諗住叫既
不過計計下見應該仲有credit淨就平平地叫
廿舊水真係食過幾間最平
相對係比較細份
同埋料唔算好足
亦都要自己手動分


呢方面唐閣同天龍軒就優勝好多

其實食點心
我都無諗過佢會慢慢上
但估唔到嘉麟樓係上得仲急過gaddi's

淨係食左件小籠包既時間
佢已經上到全檯都係
就唔淨止係點心
叉燒一早上左都唔洗講
連蟹蓋都係
完全無次序可言
我都唔知食邊樣先好
擺得耐其他食物又會凍左
真心呢方面真係差
不過比gaddi's可取既係服務算係熱情好多
唔似果邊機械人式服務
有笑容亦都有細心問候
只係二樓就成日真空無人斟茶
點左貴茶都無乜特別

落單果時問過
除左點心
佢地大部份單點菜式都可以就番揀半份
唯獨係呢方面就好好

但都仲係食緊點心既時間就上埋呢半份滷肉蒸陳村粉
連半份都咁大籠真係嚇左出黎
呢度四人食都得
真係唔知一份要點食
不過呢一碟都係一般般

清晒所有野就換碟上甜品

因為嘉麟樓出名奶黃月餅
就點左個差唔多既奶黃月餅

一樣可以揀兩件
熱辣辣
但奶黃就唔算好流心


廁所就係餐廳外面
應該係一樓幾間餐廳共用既
都幾多人用就影唔到相
其實尋晚都有經過
不過今日星期日仲多左位伯伯企係廁所入面打理
會幫你開關水喉

埋單一樣用visa signature以上信用卡九折
不過我地用dining credit無折扣優惠

五款點心加三個小菜
兩壺貴茶
埋單1475.1
精算師計算錯誤仲有廿五蚊淨
早知叫多籠帶子餃

今次半島既體驗係同瑞吉既相反
中菜服務係比法國菜好好好多
咁當然搵佢同龍景軒果d相比都仲有好大距離
食物我亦都只係覺得佢算平平穩穩唔特出
最失望係最期待既果部茶車並無登場
同埋唔知係我自己沖茶定因為水溫唔夠啦

最後我覺得壺凍頂烏龍苦苦地

咁就結束左半島之旅啦
原本

離開幫半島影番張相先

我地間房就係最右手面既轉角房
頂層係六樓
我地住係四樓
間房係好滿意既
第一次有少少唔捨得

然之後就行下海旁

原本諗住行下係酒店任何地方都見得到既太空館
不過原來仲未正式開放

又有人結婚


上年萬聖節果時都行過黎呢頭

果時就多人到爆

以前我覺得半島唔夠近海
但尖沙咀望得最正港島既地方應該都係半島加埋左右既YMCA同喜來登

對到正會展
不過喜來登而家搞成咁


即係點解我會話半島之旅仲未完呢
因為係星光大道一邊行
就一邊見到架直昇機不斷係半島個屋頂起降

咁就諗番起尋日係china clipper既對話
拎番起張卡片
撥個輪
佢話今日係有開放既
可以幫我地安排再參觀一次
所以一陣我地又要番去酒店了

洲際已經改名麗晶

裝修前都係福布斯五星酒店之一
不過要2022年先會裝修完
唔知到時仲有無機會住得到呢

酒店既一星法國菜rech係裝修前已經執左
唯獨係保留番另一間一星既中菜欣圖軒係度

呢間一樣有茶藝師打躉
而家食仲有折扣優惠
其實耐唔耐都想試下
但另一方面又覺得無得住埋就唔係咁完滿
所以成日都好糾結

手掌印


K11 musea當日仲因為武漢肺炎而封館中
行行下又番番碼頭

差唔多夠鐘又番酒店


行下商場

仲有部電梯係for商場用上唔到客房既

商場有三層
地庫
地下
同埋閣樓

下午茶時間係會有弦樂係閣樓演奏既
但唔知係表演完定武漢肺炎關係就無人係度

唔入過都唔知
商場個洗手間係仲靚過酒店餐廳果兩個


夠鐘又係門口等
今日帶團果位好似仲高級d
而今次團友感覺就仲差過尋日gaddi's果d小二
即係到底係咩人先要第一次見面就打量晒人地全身
大家都只係同行果半個鐘
之後就各不相欠
有需要咩

今日再聽多次china clipper既事蹟
都有少少新野可以聽到既
例如對面金紫荊廣場個直昇機停機坪係唔可以熄引擎既
上落完就要即訂離開
但係半島就可以既
不過直昇機只可以日出後同日落前飛行
亦都唔可以係半島天台過夜
要泊番去石崗果邊
同埋史上第一單商用客機既劫機案

全機只有劫機者一人生環

今日終於可以上到去天台




半島一共有兩個停機坪

直昇機已經飛左番去石崗



地下呢個扣係用黎勾住直昇機既

同埋有直升機昇降既時間側邊圍欄會降落

係尖沙咀黎講就唔算係最高點
但就幾開揚
仲好大風




如果有日落睇就更加完美

今次真係要離開半島了

原來坐小巴走先有夕陽睇

DAY39 完

近期先睇完向西聞記
最深刻就係恆仔同fish係台灣果兩件
好sweet
雖然個結局好顛
但我都覺得首歌好正
最近佢就有套一秒拳皇上左畫
仲有醉愛既周國賢做主角
雖然劇情比較大路
同類型既激戰係更加熱血
但呢套係外資環球係香港既第一套戲
在情在理都真係要大大力去懲罰

我都諗住叫兩樣
俊仔揀果幾樣好似已經好好咁

問過香客tasting menu日頭無？
灘萬夜晚懷石好貴

餐牌

其實就只得兩款
一中一西
係可以揀班尼迪強既
不過就會無晒其他配菜
我估大堂同露台早餐應該都係一樣掛

早餐少選擇到咁
上次去都仲有幾種比我選擇

有咩揀
你好耐之前啦

其實都係
如果拎住3k都可以單點叫到好多野

頭先係文華扒房食 Sunday Roast
撞著個傻既女人走左入黎 嘈生晒

搞咩
鬧人？

咁又冇
成餐飯係到嘈生晒
要求埋d奇怪野

係扒房話要食pizza 又話要食半島既雞蛋

大陸女人黎

幾時去 九香 我都卜左
想睇下你介紹