[長氣多圖][無限期] 香港staycation之旅(2)

叫佢去老蘭食啦

今個星期去
有排寫

我上星期去完 好正
Book 城景房 upgrade 去海景房

等你寫下評價

樓豬好有錢

食左邊間？

擺明唔係

LM
好想睇奕居
追蹤定先

九香今次都唔錯 優惠只係有1600蚊回贈 無早餐晚餐包 我兩個唔好自助餐又細食 因為都係千篇一律都係食所謂野
下面就有幾間餐廳 睇OpenRice 一早簡好 晚上食西班牙菜 第日下午就意大利餐廳 完全不能同自助餐比
大家都應該食過高級西餐 好精緻好靚好好食

加埋酒店麵包店 未食過咁好食牛角包🥐

上個po寫左
29頁#714

未爬晒文，多謝樓主

自助餐以前食過一次
都ok既唔太特別
呢次食早餐當去左
睇下最後有無銀兩淨去餅店睇下先
有無撻賣？

DAY40 ○de▽鯛白湯らーめん 海山樓 Dough Kitchen Bistro Bon

呢期無乜貨交
就全部炒埋一碟黎寫下

之前去支航換機票果日
就去左九如坊食拉麵
鯛白湯拉麵
呢間之前alfred都有介紹過
佢另一個名叫做圓形de三角
係日本只係新大阪站附近一間
tabelog3.67分數就唔算太高
未fact check到係香港有無代理

九如坊其實都真係美食零集
行過見到另外間米芝蓮推薦既周月就好多人排隊
岩岩拎左亞洲五十大餐廳第一名同米芝蓮一星既大班樓都係果一帶
仲有法國菜louise同belon
上過viutv大廚背後都係果度

鯛白湯開係斜路

上面係元創坊
一個人就無乜特別行過去

以為拉麵舖無人排就諗住行入去
點知原來條隊係格離條後巷
時間大約一點半
等左五分鐘左右就入得

落單就係門口部機
唔收現金
只可以用八達通或者信用卡

我自己基本就淨係食沾麵
當然係揀左佢招牌鯛沾麵
都成148蚊一碗
好似係我人生食過最貴既拉麵
再加多15蚊隻糖芯強


拉麵店就只得大約十零個位
L形BAR檯再加一張四人檯
限聚關係就一人坐左個兩人位


口罩套


現場見到有三位師傅同一位小二
全部都係香港人

見到服飾同上網睇大阪站都好似差唔多
打番個煲呔
就唔係話歧視香港人
不過見佢地不斷係度吹水就感覺唔係幾專業咁

坐左大約十分鐘左右上麵
上菜個畫面就好靚既
拉麵底放左乾冰會一直噴煙

跟餐仲有塊圍裙
濕手巾
同配菜
麵條同一般唔同
白雪雪闊身波浪型既
有D似刀削麵
掛湯能力幾好
食完係唔洗加湯水都可以清晒

另外份糖芯強係好靚仔

個湯都幾濃
但就唔知係低溫麵定餐廳比較涼爽啦
食到一半左右就已經開始涼
去到後期個湯已經係凍既
睇過好多人都有呢個問題
就應該唔關我食麵速度事

食個大約半個鐘左右就離開
係日本食拉麵算得上係一種平價食物
我就無乜食過超過一千yen既
但黎到香港咁樣食豌麵要百六蚊既話我就覺得真係太貴唔抵食
而且位置都唔算話好方便
由叮叮站行一段路仲要再斜路上
亦都未好食到要番轉頭
呢個價位真係試一次就夠
下次如果再黎試周月好過
之前麵屋一燈開係LCX都好似大概係呢個價位
我連食都未食過就已經執左
見都無乜人排
唔知呢間又可以做幾耐呢

咁有一日放左半日假搞屋企野過左北角
呢一區如果唔過去太古或者銅鑼灣
附加就應該係只有一間新光戲院

好似係因為無咩人睇大戲
本身就已經執左
近年由風水佬改建成為左戲院
今次都係第一次黎

呢度係少有同一個場次有兩種價錢既戲院
之前係外國就有見識過
前後排會有唔同價位
新光呢度最後一行係普通戲院凳會平十蚊

咁我地就揀左尾二行既梳化凳
狂舞派3
60蚊

個戲院都幾懷舊feel



戲院位就咁既

紅色凳同普通戲院差唔多
其他梳化位就幾舒服
而且好大張
大約係正常凳既1.5倍size左右

另外應該本身係預左有謝票活動之類所以銀幕前面有個台
好似星影匯咁

最特別好似係佢有三面銀幕
播正常戲果時就只會用一個
不過呢個戲院都真係有唔少問題既
第一係隔音好差
第二係個銀幕有一撻污糟野無人理
所以難怪係得個位人數入場既
而套狂舞派都算係比想像中好既
唔知點解會咁多負評呢

又再講番前一日其實去左大坑食飯
食之前去左一轉鰂魚涌
其實一直都好想去影變型金剛果座海山樓

外面其實同普通屋宇無異


原來入面貼晒d禁止拍攝既警告係度

淆淆地就快快手影幾張算數

樓下兩邊係商舖黎

過左日落黎到就天黑黑

影出黎都係一般般

附近有個街市都有差唔多效果

發覺呢度並唔稱得上係一個景點
就想行過去海邊

有個糖廠街市集


但夜晚已經收晒檔

唔知點解有種新加坡既感覺


最後黎到鰂魚涌公園

發覺比條東區走廊阻住根本去唔到海邊

係度行行下就番太古城坐黨鐵去天后食飯

大坑都真係好多食肆
仲好多黃店

仲有呢度橫街小巷又好似英國咁


呢度有間一星米芝蓮既鑄鐵板燒

個老闆都黃黃地
一直都好想試不過未有時間

另外都唔少壽司店

仲未食得起夜晚既omakase

亦都有間叫做little tai hang既精品酒店


樓下轉角位呢間Second Draft kiki & may都有介紹過

另一間維景酒店好似做左國安公署
現場見到大量狗隻

而我今日想試既就係呢一間dough kitchen

係路邊可以裝到入面廚房

自從食完involtini之後
對homemade意粉有左好濃烈既興趣
之後又去過tosca食過另一款紅蝦意粉
令我開始想試下唔同餐廳既紅蝦意粉
加上見到佢地個招牌海膽意粉都幾吸引
所以早幾日就係佢地網頁book左星期日夜晚
不過只有八點三之後時段
如果想book六點既可能要大約一星期前左右

小店地方
大約都係廿零個位
位同位既距離好窄

前面就係係街都望得到既開放式廚房

餐檯亦都擺唔到幾多野


餐廳主打手工意粉同pizza

有一頁係chef special

仲有頁係前菜

我就當然係揀紅蝦意粉
佢地話同海膽意粉隻意粉係唔同係扁麵黎
不過小二亦都指住牆身話紅蝦黎貨價貴左所以加左30蚊

都叫做平過involtini既

落單無幾耐就先上左個湯

湯左兩款
我揀左平十蚊既時令餐湯
今日係磨菇湯
都多料
夠分到兩碗

首先上既係signature海膽意粉

意粉係粗型
似上海麵咁
不過就煙韌好多

差唔多時間上埋既紅蝦意粉

隻紅蝦比之前食過既大隻好多
意粉雖然係扁麵
但個質感其實同海膽意粉隻麵係一樣既
所以兩款感覺都係差唔多
而個人就唔太鍾意要手動拆款
之前食過果兩間都已經拆晒所以感覺好好多

雖然係原隻上
但應該都已經清理好晒
個蝦頭就已經無汁可以必到出黎
應該都已經落晒係意粉到

意粉份量我覺得都算多
因為比較粗身亦都食得比較飽
原本一開始有諗過再叫個pizza
最後都食唔落無叫到

咁應該係之前食過果兩間太高質
呢間就被比下去
意粉黎講我都覺得唔錯既
係海膽同紅蝦發揮都唔算好特別
唔太驚靘
而且雖然呢間餐廳都係黃店
但我就覺得係比較市儈
因為佢係連普通水都唔提供
所有飲品都要收費
亦都無餐前麵包
唔知係咪比漏左

呢度有限時個半鐘
不過八點先入座就無呢個限制
但都只係食左一個鐘左右
埋單664

同樣都係一個湯兩個意粉
但比起involtini仲要貴
我就覺得環境服務各方面都係involtini優勝
呢度座位窄
服務亦都一般
無水無麵包提供
如果仲有下一次
就應該會試下佢地既pizza

未完

諗番起半年前有餐飯一直都未寫
就係位於浸大由小小虫開既bistro bon
唔洗學生都可以黎到既
之前見過佢告急
加上自己有野想慶祝
所以特登幫襯下
由九龍塘黨鐵站行過去都比較遠
都要行成三四個字



早幾日book左1930呢個時段

星期五夜晚未坐得滿
地方算大
都幾多檯
有個開放式廚房

不過地下就痴lumlum
好似好耐都無抹過咁

餐牌都多野揀


主菜可以再加68蚊配前菜,湯同野飲

環境一般
不過我地兩個人坐四人檯就坐得好舒服

送左兩件好普通既麵包

是日餐湯

OK既但有少少苦

另一個前菜係溫泉強炒菌

呢份幾特別

我地主菜就訂左兩個隱藏menu
威靈頓牛同西班牙海觧飯
其實由確認訂位到入門口
佢地都有勸喻過我地份量太多會食唔晒
不過呢一日有紀念價值
女朋友又一意孤行就交由佢發辦

首先上既係威靈頓牛

加埋一都成七舊水
賣相唔錯
不過都係有甩皮甩骨既情況出現
其實之前都只係曾經係gordon ramsay海港城間餐廳食過一次
呢個味道都可以
但因為只有兩個人食
每人三件
真係食到第二件都開始濟

另一個係西班牙海鮮飯

menu係無既
直到兩份都上晒檯我終於明白到點解佢地係咁不斷咁勸喻我地
因為份海鮮飯真係好大份
其實本身食威靈頓牛已經濟濟地
不過既然一場黎到
都叫左
當然都係會清晒佢啦
呢個海鮮飯都好足料
係比起牛係好食既
但都真係二揀一就夠
兩個都真係四人以上既份量黎

開心嘛
所以仲可以食埋甜品

甜品有四款
全部都唔貴
我地一人叫左一款

伯爵茶奶凍

可以做到動L效果
都唔錯

另一個係tiramisu

呢個樣好靚
手指餅用黎點咖啡又得
點蛋糕亦得

其實後尾餐廳都爆爆地
份量太多都食左成兩個半鐘
呢度算係學生飯堂
並唔係高級餐廳
無時間限制
亦都可以高談闊論
女朋友就鍾意呢種地方多過米芝蓮餐廳
唔洗避忌
不過呢餐價錢當然係貴到hihi

兩個四人份量既主菜
跟一個set
再加兩份甜品
埋單差唔多千四蚊
仲貴過去食米芝蓮
味道方面唔算特別好食
環境亦都有待改善
當係支持下黃店
聽講小小虫會開分店
如果就腳d可以試下

DAY40 完


岩岩去完九龍香格里拉
中菜同日本菜都OK既
唯獨係意大利菜真係好一般
難怪4道菜set lunch都只係388
另外房就真係好舊式
感覺就只係兩間客房打通
乜設計都無
廁所洗手盆得一個
企缸只得一個固定花灑
浴缸亦無電視
最顛係一開始住間低層房對正出面天橋
海房套房都咁樣又真係難玩左d
要到夜晚先轉到間高層房
成個感覺唔同晒
不過零房價就真係好抵玩
兩日食足六餐
仲要金環會儲左成千蚊
下次去金鐘可以當八舊水用
好似咁
咁樣諗深一刻又真係好抵玩既

樣樣都好正

Lm

邊間

浸大間西餐但我鐘意食拉麵多啲

而家少食左拉麵
反而成日搵意粉

我都食左香宮了

食完香宮覺得無乜驚喜
唔見左個welcome tea
同埋後悔無叫到個手工豆腐

另外間angelini都覺得好一般
隻意粉差過出面homemade果d