[長氣多圖][無限期] 香港staycation之旅(2)

暫時食過最高質既brunch

道歉啟示
用八婆黎稱呼係我唔岩
我唔會再咁寫架啦

笑左
終於追番哂d post

原來要搵一間又好食服務又好嘅酒店係咁難

最頂級果堆六星酒店都做到既

壽司飯＜有落醋
白飯就無落醋

惨～被發現，跪玻璃啦

我諗應該係咁
但我當刻諗左白飯係咪即係話唔係日本米

有得跪都好

再帶佢食好西

佢鍾意食劣西

有冇精選酒店推介

lm

點為上精選酒店
即係精品?
我無咩點住過
諗住如果有機會試下石板街酒店

西式一定係involtini
黃店黎講佢都係算一算二
日式果頭淨係食過玄鮨
不過淨係食過lunch set
夜晚唔知會唔會過你budget

DAY55.2 吃什麼 段純貞 九分飽 阿木台灣麵 程班長台灣美食

行過去就係大館
下面雲咸街有間台式黃店
叫做吃什麼
就星期日休息既
之前staycation check out完想過都食唔到
所以就特登揀左個星期六過黎左呢頭

吃什甚前身叫做請坐
本身已經必比登推介餐廳
後來好似因為股東意見不合執左
其中兩位台灣媽媽就係中環重新開過
就變成左呢間吃什麼
重開之後亦都一直都米芝蓮名單入面
而全香港既米芝蓮台灣菜
就只係得吃什麼同阿元來了
仲要兩間都黃

餐廳門口比較鬼化
只有what to eat三個英文字

可能因為係下午四點
所以餐廳無乜人
而且好似慶祝緊員工生日咁

餐廳入面有d特色既牆畫


始終係中環都要有番d裝修
同埋見到兩位台灣老闆都係度

而且餐廳入面好似都唔少台灣小二
好多時都要用國語溝通

餐牌有兩頁
一頁食物

一頁飲品

如果有叫食物既飲品會有優惠價
仲有另外一張獨立既小菜

咁其實食完鰻魚飯都唔算太肚餓
最主要都係天氣太熱
叫左兩杯野飲
荔枝烏龍加珍珠

同埋泡沫紅茶加芋圓

都算係大杯既

呢度環境都算OK
地方同檯唔算細
但唔知係咪台灣特色黎
佢地既餐具係咁樣包住

就真係好奇怪

芝士強餅

都拉到絲


小火雞肉飯

呢個就真係麻麻地
都幾乾下

滷肉乾麵

同雞肉飯相比就完全係兩個世界
滷肉好食
麵條仲好彈牙

坐到五點都係無乜人
唔知係時間問題定點啦
埋單果時老闆娘走左出黎收錢

唔洗加一
點左三樣野同兩杯野飲
176蚊
價位一般
不過以中環黎講應該算係比較平價既餐廳
服務都OK
係有時要用國語黎溝通比較麻煩
下次應該試下其他小食或者牛肉麵


未完

咁除左呢間叫什麼
其實呢排都食左唔少台灣野可以講下
之前見L佛有介紹過間過江龍牛肉麵
見肉dee都有講
牛肉其實係用美國牛
咁見佢地講到唔錯咁就去試下

段純貞係台灣好似幾出名
係幾個城市都有分店
但好似就只有新竹係直營
其實地區就由六角代理
我就一次都未食過

而家由峰景餐廳集團同六角合作
係香港開左三間
我今次去既係荃灣店

餐廳開係如心廣場一期
個位有少少入
五月去果時開業其實只有半年左右

門口裝修係唔錯

平日夜晚七點左右黎到都幾多人排隊

佢話只得45分鐘用膳時間

大約等左三個字左右入得

座位都叫做闊落

有二人檯同四人檯

距離都算開

話like左可以有小食送

但完全唔吸引所以慳番個like

餐牌大部份係牛肉麵


可以揀細麵或者手工麵
小食同一款台式餐廳有少少唔同

飲品亦都無因為有跟餐而有平

香芋珍珠奶茶

芋味都夠
不過杯就比較細
三十蚊就真係唔抵飲

紅燒腱心半筋半肉紅肉麵

有選擇困難
見呢個好似最大路又乜都有咁
麵條揀左手工麵

麵條係寬麵
口感就一般
亦都無話特別吸汁
始終都唔係好似沾麵果種杰身湯底
牛肉份量算多
湯底話係以牛大骨慢火熬幾個鐘再靜置一晚煮成
甜甜地算係比較有特色

可能門口都多人排隊
食完無耐就比佢收左碗
唔夠半個鐘就出番黎

台式餐廳同拉麵店一樣就無咩要加一既
呢間段純貞要自己出門口比錢
但竟然係要加一
圍番個麵都差唔多一舊水
連埋正價野飲就要百三蚊
已經講緊係無叫小食既情況之下
價錢黎講都算貴
上網睇見佢官網寫呢個麵賣台幣220
圍番六十蚊左右
香港價大約係台灣1.5倍
味道亦都唔太特出
性價比唔高
仲要集團式經營
立場無保證
口痕想食下可以
要排隊就不了

之前都有聽過下阿元來了同九分飽既恩怨
就話係阿元來了既支那夥計偷左秘方出黎開舖
九分飽唔只係北角有舖
仲係九龍東開埋分店
而家見到屯門準備開第三間
淘大黎講就無乜邊間好食
我覺得呢間九分飽算係比較高質
不過堂食都係第一次

有一晚八點幾去到
門口仲有人等位
不過都係等左陣就入得


阿元來了我就無去過
不過睇相既話呢間九分飽真係幾似阿元來了裝修


餐牌就得一頁

九分飽就有接受過訪問
話阿元來了都無牛肉麵
咁樣點會係抄呢
仲記得飲食男女有個叫做食店恩仇錄既系列
唔知而家米紙會唔會去拍呢

揀左A既主食
可以以優惠價十蚊叫B1既野飲

百里香紅茶
size一般
味道正常

B2飲品就無得平

黑糖珍珠牛奶
一樣都係正正常常

雞扒滷肉飯

諗住叫多d小食淨係叫左一個飯
份量都夠share兩個人食
仲有樣半隻滷強
而呢個飯只係45蚊
對比起好多台式餐廳都算係好抵食
所以我就成日係度買外賣
減埋openrice果d廿蚊優惠平均都係四十蚊左右有主食有野飲

on99咁揀多左份鹽酥雞

同個飯一撚樣
呢度都炸得幾脆既
係炸衣有少少厚

酥炸魷魚

全部都炸野
係香口既

強餅

呢份我麻麻
應該係唔太鍾意肉鬆果種感覺
叫番芝士應該會正常番

夜晚先有既蚵仔煎

之前試過叫外賣拎番屋企好大份
堂食反而無呢種視覺效果
而蚵仔份量都多

四人檯隔開
而家基本間間餐廳都係咁做
其實即係要同格離位搭檯

但張檯都唔細
黎齊晒所以野食都仲算鬆動

埋單唔洗加一
246蚊

因為都叫左成四樣小食
仲有杯正價野飲
所以都唔算係貴既
野食起碼都叫做有質素
係淘大黎講算係少有
所以次次經過都排晒長龍
唯獨係次次拎外賣門口小二都係西口西面
而小二都係阿姐多
態度就一般啦
食得多九分飽反而真係想食下正版既阿元來了
但佢地觀塘星期日唔開
堅尼地城又太遠就仲未試到

咁正宗台式餐廳真係大部份都係黃店
可能同個國家都有關係掛
起碼米芝蓮果兩間都係黃
而旺角亦都有間都好黃既台式餐廳
叫做阿木台灣麵
老闆娘都係台灣人
之前仲拒絕左CCTVB做訪問
但係連登評價都算幾差
我就唔知點解

咁果日坐巴士去旺角
上網睇見到話日日都好多人排隊
可以用apps拎定飛先
咁去到就岩岩好過左兩三個number
可以補番排最頭位
慳番好多時間

我今次去左廣華街果間
另外仲有一間係豉油街
阿木門口就貼左好多野

睇到頭都暈

過左陣就入得
舖頭都算細間
坐到勁迫

單點餐牌

另外有個個午市餐牌

價錢就平少少
同埋可以跟餐飲品可以少d銀兩

唔知點解餐具都係咁樣包住


我就叫左三樣野
先黎既係珍珠奶茶

呢杯要加十蚊
又係幾細杯

再上既係鹽酥雞

呢個勁細份
得果四舊

叫得做阿木牛肉麵
就點左碗最正路既紅燒牛肉麵

麵條好似都係手工麵
唔錯幾有咬口
不過睇漏左佢可以加三蚊轉關廟麵
唔知分別大唔大
不過佢最大驚喜係d牛

同極細份既小食係完全唔同
佢d牛係勁厚勁大件
仲有成四大舊
而呢碗野六十蚊唔洗
抵食過好多台式餐廳
個湯都仲幾甜幾好飲下

唔洗加一
埋單90蚊

價位一般
其實黎到淨係食牛肉麵就OK
午餐小食可以完全唔洗點
無試到蛋餅就唔知味道如何
呢度環境都係麻麻
位同位好窄
而最差既地方就真係太多人排隊
我果位係半張四人檯
咁格離果兩位走左之後餐廳竟然放左一家四口入黎
就企係我格離
擺明就係想迫我走
而我就仲係度飲緊野
呢一點就好撚唔鍾意
幾黃都係咁話

最後試埋連登仔最推既程班長
講到全香港都係垃圾
唯獨得程班長可以一戰咁
呢間程班長一樣都係黃店
一樣都係由台灣人打理
直頭似小二全部都係台灣人
係入面食野基本都要用國語黎溝通

餐廳係荔枝角億利工業中心1樓

門口貼左好多獎

入面就唔只溝通似台灣
連環境都好似台灣咁一樣咁差

自修室咁樣既設計
我完全睇唔透未有武肺既時間佢地d檯係點樣運作

餐牌大同小異都係一張咁樣既紙


同其他餐廳唔同既係
填好之後係要走出黎比錢既

然之後得到個牌仔

要再掛上去塊板上黎就會有人送過黎
未黎過就一定唔知要點樣做
見到好多人都on99生勾勾好似自己咁
就唔知咁樣運作係好定壞

餐具要自助

好似唔係幾乾淨

跟餐要加十二蚊既四季春

入面除左茶葉之外就乜都無


程班長有得揀湯麵同乾麵
咁我就緊係要左乾既牛肉麵

牛肉係碎既
有全隻滷蛋
粗麵條幾好
仲有少少辣油
但係份量唔多
食完就唔太飽
不過呢度一個麵唔洗五十
都算係咁

食完麵先上既柯仔煎

即整熱辣辣
份量都夠
食埋呢份就夠晒飽肚

其實程班長都OK既
但我最唔鍾意就係呢度環境
咁樣三面圍板食飯真係好唔舒服


呢餐食左96蚊
有埋個柯仔煎都抵食

但係呢個環境就好難令人回頭
味道亦都唔係特別吸引
我而家明白連登仔會吹奏既餐廳就只係因為抵食


之後其實都有食過阿元來了新開既菜市場同埋那個既排骨飯
不過應該算係第二日既遊記黎
仲有間老厝邊有食過
不過因為做打手就唔係度寫lu
果間份量就幾多都抵食不過鹹酥雞就淋既
其實台式野並無講到咁差
可能真係食慣平價就唔習慣香港呢個價位
但而家無辦法離開就真係無計
好似座銀咁足足係日本個價兩倍半都不斷有班人吹奏
咁台灣野其實都唔會特別垃圾
係比較大路野間間都有d似姐

DAY55 完

留名

而家真係好多餐廳都會迫你走咁
想做多幾轉生意
有時想坐耐小小都勁大壓力