第二日朝早十一點我準時落去 Check out,身上已經淨得幾百蚊,就揹住我成副身家即係個大背囊去搭巴士。
喺去元朗嘅車程入面,我最驚嘅反而唔係佢哋揭穿我「冒認」張文軒,最怕嘅係,連扮成張文軒嘅機會都無。
怕嘅,就係佢間屋企,已經有個正牌張文軒喺度,而我反而係多出嚟嘅一個,既唔係陳又廷、又做唔成張文軒。
經過呢兩日,我覺得乜都有可能:呢個世界上,有一個陳又廷、一個張文軒,同埋我呢個陳又廷加張文軒共同體。
不過當嚟到元朗世宙某單位門前,我嘗試說服自己:入去啦,最壞情況都係俾人趕返出嚟,但乜都唔試就更加難搵出真相!
揸住條陌生嘅門匙,我第一個諗法係,乜呢啲有錢人樓唔係用電子鎖嘅咩,點鮮換左要插門匙?我拍埋隻耳去聽,聽唔到入面有人聲。
我深呼吸一口氣,插門匙入鎖、一扭⋯⋯
開到!