司徒師傅搖頭,「比起張文軒,你更加埋怨自己人生,呢樣就係我頭先猛咁問你地一啲唔關事既原因。
我發覺好多時你明明遇到好事,但你個諗法往往負面。
例如可兒。你有個咁好既女朋友,但你往往著重於佢既缺點:
明明佢咁靚女,你又嫌棄佢皮膚有瑕疵;
佢身材有肉地屬於細細粒咁得意,你就嫌佢肥仲出聲叫佢減肥⋯⋯
所有事物都有正反兩面,而你傾向睇到負面,而遮蓋佢好既一面。
我諗生靈一向都覺得你不知足,既然係咁,不如由佢黎承接你唔想要既野,然後將你想要既野俾你。
張文軒既身份就岩晒你,而且凱婷亦係你本身鍾意果類型。」
⋯⋯我⋯⋯我頓時俾佢講到無地自容。
講真,自從失去可兒之後,我一直回憶我地種種過往。
我好似真係有意無意講啲傷害佢既說話⋯⋯
我照直講:「超,咁張文軒係人生勝利組,佢既怨恨梗係少過我啦!生活艱難呀!」
司徒師傅繼續平心靜氣分析:「你個問題就係打從一開始就將自己列為受害者,遇到咩事都怪個天唔公平、人地對你唔好。
就講今次俾人搶身份咁,你懷疑張文軒、怪阿圖,但從來都唔會諗自己既責任。
唔係樣樣野都同錢掛鉤。
正如你會羨慕凱婷睇得出張文軒既個人特色,同時怪可兒點解睇唔到你嘅。但你有無諗過,會唔會係你自己無展現出黎,責任唔在於人地度,而係你自己?」
嗚!
佢講中晒!
我即刻俾佢收左皮,縮埋一角反省。
「咁其實又無壞嘅。」張文軒打圓場話:「既然你講到張文軒人生咁好,依家有機會擁有,咁對你都係好事呀。」
佢講得啱。
張文軒有車有錢有樓有樣有女,榮華享之不盡。
但問題係,佢嘅世界無可兒。
如果擁有以上一切而單單無左可兒,咁得來都毫無意義!
先唔講凱婷會唔會同我一齊,就算佢肯,我覺得同機械人凱婷比唔上同可兒一齊咁開心⋯⋯
唔係,係喺呢個世界上,我搵唔到另一個人能夠取代可兒。
唯獨係佢,先明白我諗乜、聽得明我啲爛 Gag⋯⋯
就算就算我以張文軒既身份追到可兒,咁都唔係我想要既感情。
我要既,係光明正大以陳又廷既身份同可兒一齊!
再者,我對可兒有信心,佢唔會見張文軒條件好而飛左「陳又廷」。
而且,了解過後其實張文軒都有好多負擔、屋企人亦無乜溫暖,雖然勤快 Maria 真係好勤快,但我情願喺自己間屋度自己落手落切生果俾阿媽食。
「錯。」我正色講:「我之前一直都錯過晒。我最想要嘅,都係自己嘅人生,我要做陳又廷!」
比起我,張文軒立場搖擺不定。
聽到我嘅決定,佢問:「司徒師傅所言甚是。咁請問我地應該點樣化解今次既危機?」
「首先,你地改改自己既思維模式先。係呀,你都有份!」司徒師傅愈講愈起勁,指住張文軒。
佢話:「你地心中怨恨一直餵食生靈。
張文軒,只係你未去到陳又廷咁勁,但你嘅怨念會助養到陳又廷既生靈。
一日你地心中惡念強大,一日你地都唔可以拎返自己身份。」
「我都想俾人助養下⋯⋯」我講。
「你地再咁樣落去,生靈既力量會愈來愈強大,到時唔好話擊退佢,連你兩個既肉身都難保呀!」
「我唔制!」張文軒放低雪糕、飲啖可樂,「我想做阿圖做多排先呀!」
司徒師傅突然一手搶過佢罐可樂,啪一聲放喺枱面。
佢一臉凝重,問左個非常驚人既問題,驚人程度嚴重過我俾生靈搶走身份:
你地兩個就快死,
你地知唔知㗎?