隔離14日出嚟,我個淫底女友俾人食咗、我個身份仲要俾人取代咗《奪臉述異記》

1001 回覆
468 Like 41 Dislike
2020-08-19 20:54:31
「下!唔係呀嘛!」

「你地有無聽過松仔園,有無聽過猛鬼橋?」

「車,香港周圍都有猛鬼橋架啦,都唔知係咪真係有咁多鬼——哎呀!痛呀!」

司徒師傅唔知喺邊度變把摺扇出黎,大大力打落我隻手上,「衰仔!你要開始學下積德喇,口德算係其中一種,至少唔好造口孽先。」

「師父教誨有理,徒兒銘記於心。」

「閘住!我唔收徒弟架。」

我心諗:梗係啦,你連自己都搞唔掂。

當然我無講出口。

凱婷繼續帶動議題:「師傅,請講返松仔園、猛鬼橋。」

嘖嘖嘖,我望住刻板既凱婷,已經可以幻想到以前佢讀中學果陣一定做風紀隊長,完全唔會同同學傾閒計講笑果種悶騷學生。

真係唔明張文軒諗乜,一方面嫌屋企人嚴肅又悶,另一方面又好鍾意機械人凱婷,明明屬同一類型。

我搖搖頭,都係唔好問張文軒,費事佢又唸一大輪深奧詩文。

司徒師傅話:「猛鬼橋曾經發生過好多意外,最多人聽過既就係有班老師帶童子軍去果度露營,點知無啦啦落大雨導致山洪暴發。

結果死傷者近 100人,當中有差唔多 30人遇難。

呢件意外前前後後都有唔少車禍,歷年黎多宗死傷之外,亦有唔少行山友喺果度撞過鬼⋯⋯

總之,松仔園係一個陰氣怨氣極重既地方。」

「師傅⋯⋯」我聽到呆呆地,「你究竟有無上過《怪談》架?」

「多嘴!」司徒師傅又用摺扇打我,今次我避開左。

我講:「不過講開又講,我同可兒果次去睇螢火蟲真係好離奇,又係無啦啦落大雨架,而且當時領隊啲通訊儀器又無啦啦壞左,可兒形容得好好,真係好似拍鬼片既套路!」

凱婷平淡問:「你有無數過你今日提過幾多次『可兒』?」

我愕一愕,開玩笑講:「係咪吃醋先,人地果朵『獨一無二嘅玫瑰』。」

佢當然知道之前張文軒將佢比喻為「獨一無二嘅玫瑰」,冷冷答:「我既意思係,既然你知道自己咁愛佢,以後要好好珍惜佢。」

嗚!做乜揭我瘡疤!

司徒師傅回應返我既話:「果度咁多人枉死,有怨魂搵替身都唔奇,不過呢個係題外話。我想講返你地呢件事發生既時間點,從而解釋點解我要搵出施法地點。」
2020-08-19 21:17:35
樓主座山個伏線都伏咗好耐
2020-08-19 21:25:42
乖,遲小小俾你出場
2020-08-19 21:26:46
得實體書版咋,暫時唔會有電子版
2020-08-19 21:27:15
劇情大暴走
2020-08-19 21:28:30
好早發現果個人,係咪就係你?
2020-08-19 22:59:32
唔緊要





聽朝照鏡睇下塊面仲係咪一樣
2020-08-19 23:00:18
你個名咁正,周圍都搵緊你
2020-08-19 23:05:54
變咗喇沙仔個樣xd
2020-08-19 23:27:14
仲以為有幾特別......








又真係好特別又流暢
係得既
2020-08-19 23:36:36
日日都追live 牽涉到神鬼文化嘢越睇越正 g持樓豬 快啲加速
2020-08-19 23:54:02
開心有人搵到伏線
仲諗住鬼神野無乜人鍾意...btw鬼節到了。
2020-08-20 00:10:19
鬼節到了就傾下偈。

呢個故其實有幾段係我真人真事,個故既靈感亦來自自己。

其中一段真人真事,正正係夜晚去大埔睇螢火蟲。

當晚係join左on day tour上山,勁大大大雨。一團人應該三十幾人。

行左少少,成班人企喺公廁前避雨,領隊個Walkie壞左,當時仲有其他團黎左,但領隊因為Walkie壞左同佢地失聯。

成班團友開始縮沙唔行,大家傾緊繼續上山定落山果陣.....公廁外牆勁多甲由爬黎爬去。領隊唔知係咪問公司可唔可以cancel。

其實一落車無耐我已經好不安。

1. 經過間湖邊廢屋,有開燈,但果個位感覺無人住緊...

2. 蠍子牆:一邊類似山牆既野,由於路滑想扶下,但領隊話千萬唔好,上面爬滿蠍子。由於天黑睇唔到。

於是有半數人決定落山,我係其中一個。

返到旅遊車上等餘下果班人睇完螢火蟲落山。

講真,落晒狗屎我唔肯定會睇到,而且係大雨到連最開頭嘅泥石地路面都有個小型瀑布咁勁大雨。

等左好耐,佢地一個個上返車...

但無人出聲,個個面青口唇白咁坐喺自己位,郁都唔郁。

架車載返我地成車人去九龍塘落車後,我地就解散。

至於果班人究竟遇到咩事,我唔知。

應該話,我唔知嗰班人,究竟仲係活人,抑或已經........

同場加映:事後為左寫呢個故,我上網research一下。

我先知,當晚落車處正正係松仔園猛鬼橋.....

關於嗰單鬼故起因上面內文有提到....

諗返當晚同樣都係落大雨....我覺得成件事更加恐怖。

以上有5%係虛構
2020-08-20 00:23:15
嗰5%就係你冇返轉頭 上咗山
2020-08-20 01:20:58
華生
2020-08-20 03:00:26
我預測下結局:
般若,香港有三萬個
2020-08-20 03:52:54
於是有半數人決定落山,我係其中一個。

依個係假 其實你冇落山 而係上咗去
你已經唔係「你」了
2020-08-20 08:17:34
多謝你
2020-08-20 10:59:50
又或者係,果晚我無join過團,果三十幾人.....
2020-08-20 11:17:44
我琴日一日睇曬呢個故同莫斯科
而加開埋你其他故止痕先
2020-08-20 11:36:25
呢個故其實有幾段係我真人真事,個故既靈感亦來自自己。

你係可兒定係凱婷?
2020-08-20 14:08:01
爭幾個正評又可以一連出三更喇
準備俾我用文攻擊你地啦
2020-08-20 14:57:29
手動正評
2020-08-20 15:47:53
手動正評 combo x2
2020-08-20 16:16:57
留名一身蟻
由頭追緊 樓主加油
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞