多得大家正評同推 Post,今日可以專心寫故
即刻加個靚更唔多講!
正皮再夠數亦會加更
————————————
無錯,我無地方可以去,亦無錢俾我去任性一下。
凱婷講完一堆注意事項俾我聽之後,「萬一遇到有咩情況搞唔掂,而又搵唔到我,你一係就扮失憶、扮暈、扮頭痛,是但一樣啦,CCTVB 啲膠劇都係咁做。」
雖然凱婷講嘢串串地又 Cool Cool 地,但無可否認,佢真係喺我呢個人生低潮兼個腦好混亂嘅關鍵時刻出現,就好似人生導師咁指我路,令我無咁怯⋯⋯無咁孤單。
我暗暗喺內心叫佢做凱婷 Miss,咁啱佢打扮斯斯文文成個老師咁。
當然我對佢毫無愛情上嘅興趣。
呢點都幾奇怪,我一直鍾情佢呢類瘦底而又聰明嘅女仔,同可兒拍拖之前,一直都想搵個女朋友係凱婷呢類型。
但識左凱婷後,又完全無感覺,可能因為我已經有可兒,又或者係凱婷性格。
「唉⋯⋯」一諗到可兒俾第二個男人攬住,甚至食埋,唉,我就大大聲嘆口氣。
「啪!」凱婷大大力拍我膊頭一下,「你起碼都知可兒喺邊,想見就偷偷跑去望佢。我連文軒依家喺邊都唔知呀。」
「你都講得啱⋯⋯咦,你安慰我呀?」
嗰晚凱婷留低食飯,佢提醒我喺人前要叫佢英文名,我先知佢個英文名係咩。
個名同佢真人完完全全 100% 極之唔 Match!
佢叫做 Rose。熱情、浪漫、奔放嘅 Rose。