橘子綠茶
2020-08-21 19:38:48
雖然目前未會相認,張文軒暫時扮演阿努,而凱婷亦要扮唔認得佢,不過睇佢兩個尷尷尬尬咁一定好過癮!
門一打開,肥仔張文軒出現!
我即刻望去凱婷,佢似乎無好意外張文軒走晒樣,可能因為我事前形容得太貼切。
張文軒粗魯地大步大步踏入屋,大聲喝罵:「屌!又廷你呢度好撚難搵囉!又唔落黎接我!」
呃係,「阿努」並未上過師傅屋企,今次係第一次上黎。
不過⋯⋯點解佢好似怪怪地咁⋯⋯
「呃⋯⋯Sor 囉。」我比比手,「介紹返,呢位係我好朋友,阿努;呢位係司徒師傅;呢位係我之前同你提過果位張文軒既女朋友,佢叫凱婷。」
「凱婷⋯⋯」張文軒打量凱婷喃喃講。
而我最期待既係,佢會問凱婷壞唔壞。
「兩位好。」不過張文軒只係愕一愕,「唔好意思呀遲左上黎。頭先好撚塞車,我等左好撚耐先上撚到黎,Sor 呀下!」
唔⋯⋯張文軒你⋯⋯係咪因為唔想俾凱婷認出,所以特登扮晒粗魯又爆晒粗咁嘛⋯⋯?
比起我,凱婷似乎無乜反應,冷冷行返去飯枱,「唔緊要,師傅我地繼續。」
司徒師傅同我一樣知道晒成件事,佢都唔多講啲乜,淨係簡單將啱啱講過既野講多次俾張文軒聽。
我好奇問:「如果有生命危險,點解師傅你肯幫我地?仲要瞞住司徒嫂。」
佢唏噓答:「揸的士根本就唔係我既天職,我都忍左好幾年,始終救人先係我既使命。」
「唔好話因為呢排揸的士無生意,先要轉行⋯⋯」我細細聲講。
凱婷無視我既話,總結:「即係話,我地依家已經準備好晒陣法、法器、參與者同埋施法地點。咁可以隨時作法?」
我補一句:「唔會要等到月圓之夜呀嘛?」
「啪!」
「仆街!」張文軒無啦啦大力打我大腿,「尊重啲呀你!」
嗚!一個文青溫順肥仔無啦啦變左 MK爛口肥仔,我好唔慣。
司徒師傅笑笑口,「當然可以。不過呢個法陣仲需要生靈同可兒在場,問題就係點樣搵埋佢地一齊上山。」
凱婷摸摸下巴,「用棍打暈佢兩個,直接綁上山應該 OK。」
「哇唔得!」我即刻反對,「乜你一個女仔人家咁暴力架!打傷我既可兒咁點算呀!」
「屌!迷撚暈佢地兩個咪得囉!咁撚簡單!」
唔⋯⋯張文軒我都係叫你搭一兩句粗口啫,你使唔使句句都咁突兀呀?
我係咪應該提提佢唔好咁造作呢⋯⋯
橘子綠茶
2020-08-21 19:39:26
「呀!」我突然醒起,「我知道喇!」
「講你就講啦仆街!扭扭拎拎!」
張文軒你啲粗口聽到我有尷尬癌呀!
我忍住唔鬧佢,講出我既計劃:「是咁的,可兒之前有叫過我幫佢搵名醫黎醫下假陳又廷既⋯⋯」
但最近陳又廷拒絕唔見醫生,採取放棄態度。
同時,陳又廷無論有幾攰都好,佢都會叫可兒陪佢去大埔行下山。
唔使講,果度正正就係大埔滘自然教育徑啦!
咁只要我同可兒講我搵到名醫介紹佢地識,然後可兒就呃假陳又廷陪佢行山,實質係帶佢見名醫。
我不得不佩服自己既聰明才智,「即係話,呢個係計中計中計!其實背後係我地呃可兒去呃陳又廷上山!」
司徒師傅同張文軒靜晒,似乎仲消化緊我講乜。
「行得通。」凱婷係最快聽得明我呢個計劃既人,佢問:「不過你點肯定可兒口中既『大埔行山』就係大埔滘自然教育徑?」
「呢點我肯定。」司徒師傅幫我搶答,「果間廢屋係生靈出體既地方,我認為係某種力量引導佢過去,又或者佢定期要上去吸收怨氣、滋養自己。」
我發覺師傅無錯係好擅長於大膽假設、細心推理,但一提到法力同捉妖,我總係覺得佢好唔靠得住咁。
靜左陣張文軒好似搞得明我既計劃,佢問:「咁即係你去同可兒講,你個仆街已經搵撚到名醫,約佢某日上山。而我地就喺山上等佢地黎到,就即刻施法?」
「係係。」我答,「師傅擺陣應該可以用法陣鎖住生靈唔俾佢郁啦?同時我地綁實可兒,所有人喺法陣之內,師傅再施法打開鎮魂鐘?」
然後我湊近張文軒,細細聲提佢:「你唔使勉強自己句句都講粗口架。」
一諗起在場全部人都知佢就係張文軒,而佢仲搏晒命爆粗扮第二個,其實佢都幾可悲。
張文軒著眼點唔在於個計劃行唔行得通,佢問:「但咁樣可兒會覺得你呃佢上山,變相令佢出賣『陳又廷』。我覺得佢會好撚憎你。」
「I don’t care。」我聳聳肩,「將生靈放返我身體入面之後真相大白,佢一定會原諒我啦。」
然後,張文軒講左一句話,令我當場靜左唔識應。
佢話:「你有無擔心過,依家生靈對佢咁好,佢就算知道晒呢一切,佢情願揀生靈而唔想要你?」