我先打開 Macbook。Whatsapp 同 Line 嗰啲話 Password 錯咗 Login 唔到,但 Facebook 同 Email 維持 Login 狀態,睇返帳戶依然係陳又廷嘅嘢,令我安心唔少。
咁起碼除咗貓仔,又多一樣證據去證明我無痴線、並唔係我自己癲咗搞亂身份,而係我塊面甚至成副身體真係俾人換咗、陳又廷呢個身份俾人偷咗。
然後我再開電話,都仲係無訊號。我打開相簿睇,入面所有嘢都仲係我所熟悉嘅。
有呢半年嚟喺台灣影嘅相、十四日隔離嗰陣嘅些少相(本嚟影低想第日畀可兒睇返)、喺半年前即離港前嘅所有相。
手指愈往上面錄,愈多可兒以前逼我影嘅二人自拍相。我知道自己依家個苦澀樣其實係帶笑。
相簿入面幾乎可以話有晒我呢幾年嘅經歷,雖然唔係下下有影相以致回憶會中斷,但都可以拼拼埋埋記返起呢幾年嘅生活。
睇住香港變得愈嚟愈醜陋,睇住喺社運期間去過嘅地方……
當中,亦夾雜住可兒食梳乎理 Pancake 嗰陣嘅幸福樣、因為我無著佢親手織嘅冷衫而嬲到西晒面、仲有佢喺海邊叫我幫佢拍片然後無啦啦對住個海大嗌⋯⋯
呢啲一切一切我都記得好清楚。
我好記得當時我係有少少厭惡,覺得佢好蠢、好港女同好麻煩,但依家再回憶多次,其實如果當時唔係有佢喺身邊,我一定更加厭世同唔開心。
只可惜,我依家先察覺。
只可惜,佢依家已經喺另一個男人嘅懷抱入面。
⋯⋯唔係,嚴格嚟講,可兒係俾180cm男,即係張文軒呃咗!
因為張文軒個樣變成陳又廷咁樣,所以可兒先會唔察覺,以為佢先係陳又廷!
嚴格嚟講,可兒無俾綠帽我戴!
諗到呢度,我已經執好晒隨身物品,出發去可兒屋企樓下等佢。
我要 Show 俾佢知我唔係癲佬,我真係有晒同佢一齊過嘅證據!
如若全世界一天一點變壞
猶幸還有你一貫爛漫姿態
而你赤裸裸脫俗如像小孩
想笑就笑要嗌就嗌