司徒師傅亦係爽快人,二話不說舉起手掌,豎起五隻手指。
「五、又收五千蚊?!」我驚愕問。
佢故作神祕搖搖頭。
「唔係五萬蚊呀嘛!張文軒我地走!」
「錯!」司徒師傅笑笑口,「係『不成功、不收費』。依家唔會收你地任何錢。」
呃⋯⋯我發覺佢唔止個五官似佛陀,連個收費都好似佛陀咁慈祥。
有別於羅蘭師傅,司徒師傅個「神壇」設喺自己屋企,佢叫我地落車就係要帶我地上樓。
即係話,頭先揸車佢聽到張文軒話要搵自己,又聽到目的地係坑口,其實已經估到張文軒係想去佢屋企,所以佢無問張文軒詳情地址,自自然泊架車喺屋企樓下。
我細細聲問張文軒:「一開始你話去坑口,果陣你已經知司徒師傅住喺度?」
我地喺某座公屋走廊上,司徒師傅帶頭行去緊佢屋企。
「無錯,我上網搵到佢有揸八折的士,而且風評唔錯,好易就搵到佢電話號碼。諗住 Call 車扮偶遇,如果貿貿然衝去叫佢接 Case,佢一定唔肯。」
司徒師傅似乎幾有工作運,做風水師傅果陣又有聲譽,轉做的士司機又係。
「睇黎你呢個『扮有緣人』計劃幾 Work。」
入到司徒師傅屋企,意外地好一般百姓,唔似羅蘭師傅咁又黑又掛滿佛牌乜乜乜,佢屋企同普通屋邨單位無異。
司徒師傅要我地詳細再講多次事件經過,唔同於喺的士嘅描述,佢要我地要講埋諗法同感想,所以我連當時啲回憶片段都有話俾佢聽。
奇怪既係,過程中佢著眼於唔相關既事上,而且好多都係早於我出發去台灣之前既事,對於張文軒都係咁,簡直係問晒我地兩個既人生歷程咁。
提到最初我之所以肯定自己無痴線、無靈魂出竅,我指出:「因為我隻貓仲認得我,所以我肯定副身體都係同一副,只係唔同左樣。」
「貓仔⋯⋯」司徒師傅若有所思,「叫咩名?」
唔好話我知貓仔先係關鍵貓物呀,「橘子。」
「開啲相嚟睇睇。」
我隻貓係橘色貓,圓到成個波咁都幾得意,我影左好多相。
張文軒問:「師傅,隻貓係咪有靈力?請指點迷津。」
口講到好誠懇,但佢食緊人地包薯片,邊食邊問。
「非也非也。」司徒師傅放大個貓頭睇,「只係覺得佢肥嘟嘟好趣緻。」
我究竟喺度做乜?!
一個掛住食,一個愛貓萌大叔⋯⋯
之後我地差唔多講左兩個鐘頭,到左五點先講完。
「我諗我大概明白係咩事喇。」司徒師傅長嘆一聲。
「咪就係阿圖個仆街化為厲鬼,搞到我地兩個乜都無晒囉!」我嬲嬲地,「司徒師傅你拿拿臨幫我收左佢!」
我想補一句「唔使問米請阿圖前世上黎喇,事件起因我已經清楚晒」,不過好似有啲唔尊重就無講到。
「唔⋯⋯」司徒師傅來回踱步,「唔係唔係,我諗你地怪錯人,阿圖應該唔係罪魁禍首。成件事起因⋯⋯」
「係你,你先係罪魁禍首!」司徒師傅企定喺度,食指指住既人⋯⋯
係我!