故事劇情進入大直路既同時,我住果幢大廈亦中咗招⋯⋯
今次真係到我要隔離十四日了⋯⋯
點都好,嚟緊可以出好多文,大家準備好未?
——————————
對於阿圖入院既原因,過來人既我唔使諗好耐都知,絕對唔係因為工作關係,而係佢吃不消。
雖然用緊我副身體,但對一個本身多年無女朋友既阿圖黎講,個天忽然送個淫底女朋友可兒俾佢,而可兒又半年無掂過我,實會日 Chur 夜 Chur⋯⋯
「呀!」諗到呢度我又嬲到怒叫。
「專心啲。」凱婷講。
今晚凱婷又再上黎食飯,飯後喺我間房匯報進度果陣,佢有個提議。
佢話:「呢位師傅已經金盆洗手左幾年,所以唔係個個 Case 都肯接,真係要有緣人佢先肯幫。」
咩金盆洗手,咩有緣人,呢個人相當有嫌疑。
聽落去好似啲性交轉運騙案既開始。
前幾日經歷左羅蘭師傅既問米事件之後,我有同凱婷提過。
講真,我完全係當成笑話咁講,不過佢就好認真咁聽晒,唔知係因為我一開始有講「香港仲有法科師傅肯接我地 Case」,定係「羅蘭師傅係張文軒搵返黎」。
我諗左陣,每次只要一提到「張文軒話」,凱婷都會無條件相信。
我再想起可兒,又諗返張文軒講過既野。
其實可兒本身未必係咁,只係因為對住我先會咁單純、無晒戒心⋯⋯
佢⋯⋯其實佢都係無條件咁相信我⋯⋯
「喂,有無聽我講野?」凱婷問。
係喇,總之凱婷聽完羅蘭師傅事件後,佢好似斷定左事因就係怨魂作祟咁,呢幾日係咁搵唔同既師傅。
直到今晚,佢真係搵到呢個咩「金盆洗手師傅」。
喺迷信方面,佢同張文軒又真係好夾。
唔係,應該話:喺任何方面,佢同張文軒真係好夾。
我攤喺床度,開手機 Game 打,一邊問凱婷:「你喺邊度搵到呢個師傅㗎?唔好話我知又係剪報呀。」
「咩呀,梗係唔係啦。」佢坐喺電腦枱前面,開咗條片出嚟,「我聽網台講鬼故提起佢㗎,就係呢條。」
節目主持人係位光頭黑實男人,皺晒眉聽緊聽眾 Phone In 講鬼故。
故事主人翁 A 小姐有日喺街見到同自己一模一樣嘅人,自始身體愈來愈多毛病。
條片係幾年前拍嘅,當時金盆洗手師傅未金盆洗手。
佢告誡 A 小姐有厲鬼纏身,如果唔超渡隻鬼,A 小姐嘅陽壽會俾隻鬼吸晒。
講到呢度,凱婷停咗條片。
「最後點呢?」我收起電話,凝視凱婷。
A 小姐講嗰位「同自己一模一樣嘅人」,應該就係厲鬼。
同我個情況唔同,不過有參考價值。
「然後就沒然後。」佢極不負責任咁冷冷答。
「喂,係咪玩嘢呀?」
「『下,無㗎拿?睇完㗎拿?』——A 小姐講到最緊張嗰陣,主持人講咗呢句就 Cut 咗喇。我無俾錢Join 會費計劃,無得聽落去。」