「我嘗試用科學角度去分析件事。先黎個大膽既假設,繼而用實證去支持呢個立論。」
「如果太陽風勁到可以改變人體,咁唔會成個地球入面淨係改左我地幾個囉。」佢雙眼充滿藐視,「就算係太陽風再強,都只係造成北極光、南極光之類,同人體結構改變係無任何關係。」
頂,我只係隨口講兩句,竟然俾佢一輪嘴否定。
睇佢都係扮識野架啦,我串佢:「唔好亂咁講喎,我 Google 下先。」
「唔使喇,我大學讀物理學系架。」
「咩話?你唔係喺中學教文學、中文果啲咩?」
佢不解問:「邊個同你講我文科出身架?我教理科架。」
「頂!咁你滿口詩文、書櫃擺滿詩句書同小說係咩玩法呀?」
佢尷尬搔搔頭,「由細到大,我夢想都係想做一個暢銷小說作家。只係為左滿足屋企人既期望,我先讀理科啫。」
我依家先真正體會到凱婷所講,話張文軒好有個人特色呢一點。
佢呢個人真係充滿矛盾,表面係理科老師,但又成個詩人咁;讀書同做野都同理科相關,偏偏又好迷信;變成肥仔一臉認真唸詩,但表現出黎唔係文青而係搞笑。
佢再講:「我連個英文名 William 都係跟我偶像改架。」
「而我不知道陳偉霆是誰?」我問。我記得的士陳英文名好似係 William。
「唔係呀,」佢雙眼充滿憧憬,「係 William Shakespeare。話說佢寫既《第十二夜》同我地有種類似既感覺。故事係講——」
「得!講返正題先。」我舉起手掌,打斷佢話:「咁阿理科老師,請問世界上有無一套技術,或者一種藥,可以慢慢改變人類面部輪廓同身體外觀呢?」
「好可惜係無嘅,就算做手術都好難做到咁似。」佢怔一怔,「你係咪睇得戲多,理性少少 OK?」
喂,啱啱邊個話自己搵法師喺月圓之夜作法呀!理性少少 OK?
我嘆口氣,講:「我地一傾就傾左咁耐,今晚凱婷上黎食飯,我差唔多要返去喇。」
時間都六、七點喇。
一聽到凱婷,張文軒個表情話俾我知佢覺得不是味兒。
於是我提議:「不如你同凱婷見一見啦,我覺得佢唔係淨係睇樣既人,而且佢比你想像中更加鍾意你。」
醒起佢唸果句詩,我笑笑口話:「而且你啲『香味』依然如舊呀。」
————————————————
大家點睇
想唔想睇肥仔張文軒去搵凱婷?