屁屁蛋攻擊
2020-04-14 01:00:56
返到宿舍我即刻去沖咗個熱水涼,
等自己可以暖返個身。
我一邊用毛巾擦頭髮一邊玩手機。
「叮-」係Jessica個衰婆wts我,
「你件外套搵返啦,頭先有條仔見你漏低幫你拎走咗,叫Leo呢。你自己搵佢拎返啦。」佢就咁彈咗個電話號碼俾我。
我放大條仔個人icon,得個背脊,睇唔到樣,
就咁望個身形就唔係大隻仔,偏瘦,
望住張相,我依然記唔起頭先同我地一齊飲酒有條仔叫Leo。
不過為咗我件唔平嘅羊毛大褸,我都係決定wts佢。
「HI, I am Bo😊」
「👋🏼 我係Leo,你件外套係到啊!」
「haha thanks! 🤣請問你幾時得閑?我想嚟拎返件外套🥺🥺」
「依家?」
依家?我望一望鐘,朝早七點。
咁chur既條仔…
「如果你係hall嘅話,因為我都係住hall.」佢補返一句。
估唔到條仔竟然係同校同Hall!不過佢又知既…
「你又知我住hall既?😯」
「你上莊個陣出名啊嘛」
傾到呢個位我已經唔太想覆,
草草換咗件衫之後就去咗佢房搵佢拎返件大褸。
-
見到佢嘅第一眼,我就感歎世界上原來真係有咁普通嘅人。
佢係個種你望到佢就會覺得佢好熟口面,
因為全世界路人都係同佢一樣樣個種。
唔係話差,只係真係好平庸,好平凡嘅一個男仔。
「真係唔該哂你啊!我地下次再一齊飲酒啊。」我露出腰果笑,之後揮揮手,打算轉身走人。
「係呢,你食唔食早餐?我有啲餓。」佢好隨口咁問句。
我窒咗窒,不過又真係有啲餓,同佢食又冇所謂既。
「err可以啊,但學校canteen未開喎。」
「你食點心㗎可?」
我點點頭,覺得呢個人,品味怪怪地。
邊有兩個後生仔去飲早茶㗎。
-
我都唔知原來學校唔係好遠嘅地方就有間舊式茶樓,
係啲姐姐推住車仔叫賣個種,好有風味。
我第一次嚟呢啲地方,而四周都真係得我地係年青人,
Leo好順手咁幫我洗咗杯碗,再放係我面前。
動作好自然,唔會覺得佢係獻殷勤,
反而似係佢天生真係咁紳士。
佢問咗我嘅飲食喜好,方便等等拎嘢食,
我唔知呢個男仔係細心定係識玩,
呢種識照顧女仔嘅感覺好易令人淪陷,
所以身經百戰嘅我並冇中招。
我以為自己避得好好,
只係對呢個男仔抱有好奇,
但估唔到佢一句說話,就攻陷咗我。
係行返宿舍嘅路上,我地並肩而行,寂寂無語。
其實呢種感覺幾舒服,好自在,
兩個人靜落嚟都唔覺得尷尬,唔需要特別搵話題。
但我始終都按耐唔住,開咗口問佢,
「啊係喎,你次次飲完酒都帶女仔飲茶㗎?」
「唔係。」佢好簡單咁答咗我,
風係我地之間穿過,
一句說話隨風飄來,
「因為係酒吧嘅你,似乎好寂寞。」
我愕然地望向佢,佢似係隨口一句,
甚至講完都冇望向我,直直咁望住前方,似係漫不經心所言。
但呢句卻重重打係我心頭,
冇錯,其實我好寂寞,好想有人愛。
但我冇覆佢,扮作咩都冇聽到,兩個人繼續並肩而行。
只有風知道,岩岩句說話,係我心掀起咗大浪。
-
我同佢各自各返咗房,咩都冇做,
個句說話依然係我腦海中盤旋,
今日由重遇Tim開始,好似就迫緊我諗一個問題,
我仲想唔想要依家呢種生活?
-