屁屁蛋攻擊
2020-08-10 00:03:31
香港真係一個地少人多嘅地方,
連南丫島呢啲偏僻離島都咁撚多人。
估唔撚到入到嚟食飯都仲要排隊,
我地企係門口,手拎風扇仔,目光呆滯地等待,
準確啲嚟講,得我係呆個個,阿怡不知幾興奮。
佢不斷同我講話呢間café viu tv前排嚟拍過咩《調教你男友》喎,
本身聽到個名以為玩咩SM咩調教,但阿怡講個節目係咩男女朋友分開七日冇得聯絡,之後班男仔會成長好多,
我真係得啖笑。
屌,七日咋嘛,改到一個人幾多啊。
不過見佢咁鍾意,咪唯有陪佢排下囉,
雖然我呢啲肥仔真係好驚熱。
老實講,南丫島其實都冇咩嘢玩,
食下豆腐花、行下沙灘、影下港女相,
咁就一日。
「叮-」我望一望手機,
竟然係Mavis覆咗我個ig story。
「wa!!!ho leng!where?😍😍」
睇佢個勢,係想撩我傾偈。
自從個日走咗之後,我都真係block咗wts,冇再搵過佢。
而佢都冇搵我,畢竟大家都好清楚,我地只係大家sip時間嘅工具,
互相利用,互相戲弄,並無真正嘅名份同責任,
而呢種關係是但一方都可以單方面終結。
我望向遠處嘅阿怡,拎住枝船槳,係陸地扮撐船,佢一臉認真咁揮動船漿,
感覺到我望向佢,佢就回頭問我:
「我扮得似唔似啊?」
見到阿怡戴住漁夫帽,低低能能個傻婆樣,我失笑起來。
點解一個出咗社會做嘢嘅女仔仲可以咁幼稚咁有童心。
我放低手機,選擇唔覆Mavis,我諗呢個已經係最好嘅答覆。
「有咩咁好笑?你都嚟扮下啦!」阿怡見我笑佢,一臉不忿。
說罷,仲遞支船漿俾我,順勢仲拎埋手機,幫我影相。
「嘩!影得我咁矮㗎,你男朋友明明咁高大威武。」
佢被我逗笑,伸手去抆我個肚腩,我捉住佢對手。
夕陽西下,光線照落魚排,我望住笑得明媚嘅佢,
打打鬧鬧,原來都好幸福。
-
其實今次南丫島之旅嘅重頭戲係夜晚,
但並唔係因為扑嘢咁膚淺同必須嘅嘢,
而係今晚我會第一次帶阿怡初嘗smoke嘅日子。
阿怡呢種乖乖女,連水煙都未試過,
今次一定會好緊張,所以我特登問咗阿葉拎咗款脂溶性嘅草,
呢款係已經經過烘焗,只要加入熱牛奶到就可以。
無需要好似平時整cake咁咁多步驟,
因為加熱咗牛奶,就可以令入面嘅脂肪就已經可以幫助啲THC釋放出嚟。
我諗飲牛奶對於阿怡嚟講會比直接吸更加輕鬆同易接受。
我一邊叮囑佢,飲咗之後唔洗緊張,唔想講嘢可以唔出聲唔緊要,
只要享受同放鬆就得,因為呢個先係smoke嘅本意。
阿怡乖巧咁點頭,我拖實佢隻手,俾支持同鼓勵佢。
我知道,佢已經為咗我向前行咗一大步,佢好努力咁想貼近我嘅生活,
想融入我嘅世界,佢害怕我嘅離開,佢害怕我同佢生活係唔同嘅緯度。
所以佢唔介意做多啲,迎合我多啲。
見到如此盡力嘅佢,我又點忍心推開呢。
我伸出手,環抱住佢,
呢一刻,我就係佢嘅全世界