地球重來都唔會因為冇咗邊個而停止轉動,
我都繼續開始我嘅生活,
Year 4嘅我為FYP而打拼,再加上intern,同追靚個CV,
我嘅生活已經被填滿,
時間過得好快,每一日都過得好忙碌,
原來就快畢業嘅感覺會係咁,
每一日都活得似行屍走肉,每一日就似活得無盡頭。
我盼望住快啲捱完呢段日子畢業,
卻又知道捱完呢段日子,就只會係跌落更無盡頭同無意義嘅深淵。
而係繁忙嘅日子中,我最愛嘅就係夜晚,
好似漆黑嘅夜晚,先係屬於我自己嘅少少時間。
往年嘅我,一定會選擇去common,或者去其他人嘅房,打牌飲酒玩通宵。
可能真係老咗,我唔再沉迷於呢種social,
反而想留啲時間俾自己,獨處下,休息下。
係疲憊嘅深夜,我偶爾都會㩒入佢個IG,睇下佢嘅近況,
但就只限如此。
可能每個男人心目中都會有咁樣一個得唔到嘅女仔,
佢未必係你追咗最耐,未必係最靚,未必係最適合你,
但卻係最念念不忘嘅一個人。
呢個女仔就似埋係死土下嘅一粒種子,
你明知佢唔會發芽,
但係偶然有啲場景或者物件令你諗起佢時,
你又會幻想下呢粒種子如果可以開花結果,會結出點樣嘅果實呢。
你唔會成日記起佢,
因為佢只係一粒埋藏於土下,我地唔會見到嘅種子。
我知道我無辦法令佢發芽成長,
但我相信有人可以,
玫瑰花嘅種子會搵到專屬嘅小王子,
小王子會用玻璃花罩保護住佢、會幫佢除掉身邊嘅毛毛蟲、再用愛灌溉。
花園裏有5000朵玫瑰花,但總有人會覺得你係特別既。
Hey Venus,你並唔差,只係你嘅小王子未搵到你。
(記於2019年11月6日,見到Venus分手post嘅Ringo。)
-
後記:
呢個係一個男性朋友嘅故事,
後尾嘅佢有機會同Venus一齊,
只係佢冇再行前個一步。
有人會話佢傻,鍾意嘅女仔臨門一腳又退縮。
但其實我明白佢。
因為佢知道Venus並唔係真係鍾意佢,只係缺愛,
想搵一個愛自己嘅人,
可能Venus仲細,仲未識諗,但Ringo同佢唔同。
佢知道其實自己並唔係真係好鍾意Venus,
只係有種得唔到嘅執念,所以佢寧願將呢種感覺變為永遠,
封藏係回憶入面,偶爾拎出嚟幻想下,維持佢嘅美好。
都唔想得到後好快就破滅。
的確啊,如果明知道唔會擁有一個好結局,又何必硬要開始呢。
「我寧願佢重來冇盛開過,即使只係一朵花蕾,我都可以靜靜陪係佢身邊,照顧住佢。」