屁屁蛋攻擊
2020-08-08 02:08:09
自從呢一日,我同阿怡嘅關係就緩和咗好多,
佢彷彿喚醒咗我個良心,我知道咗內疚嘅滋味。
以前同Maivs玩嘅時候,我從來都冇諗過阿怡嘅感受,
淨係想自己開心就得,但當真正經歷過爆煲嘅時候,
我先知我傷得自己女朋友幾深。
但到頭來,佢都冇去責怪我,反而為咗我去作出改變,
努力去討好我,去踏出自己嘅第一步,嘗試佢曾經厭惡嘅嘢。
一切一切都係為咗迎合我,希望滿足到我,
希望我唔好離開佢身邊。
我唔知應該話佢傻好定on9好,
但佢傻到咁,傻到信曬我講嘅所有嘢,
理應我係要覺得鬆一口氣,係要覺得開心,可以繼續為所欲為
但原來,欺騙一個完全信任你嘅人,都唔好受。
我唔知自己可唔可以做到,我唔知自己改唔改到,
但自同佢對視個刻起,我就同自己講,
我會嘗試,嘗試好似阿怡愛我咁,愛返佢。
-
或者內疚感真係維持感情嘅秘方啦,
我好想做多啲嘢去令阿怡開心,我想彌補佢,想睇到佢笑。
所以我諗住帶阿怡去南丫島,就算一直知道佢鍾意離島,
但我都冇帶過佢去,因為覺得係宿舍大家就開開心心,又有得扑嘢,
唔明點解要山長水遠去離島,又曬又熱,仲要俾幾舊水租間爛屋。
所以我地拍咗拖兩年幾,唔計去旅行,今次先係第一次同阿怡出去overnight。
「B豬~我地今個星期六日去南丫島過夜好冇?」
「真係㗎!真係㗎!咁突然既,我想去睇風車好耐啦~!」
佢聽到話我地要出去過夜之後,雙眼發光,一輪嘴咁回應我。
見到我點頭確認之後佢就一下攬實咗我,
佢笑得好甜,雙眼眯起曬,虎牙露咗出嚟,
兩塊蘋果肌都笑到谷起咗。
佢興奮到好似小朋友去學校旅行咁,
即刻拎咗部電腦出嚟上網睇行程,揀度假屋,仲要諗埋着咩情侶衫,
唔講以為我地準備搭飛機去日本玩。
見到佢咁活潑嘅樣,我先發現原來我一直給予佢嘅嘢係咁少,
少到原來話帶佢去離島玩都足以佢咁開心。
電腦前嘅佢喋喋不休係到同我講查到有咩好嘅行程,
仲一邊祈禱星期六、日唔好落雨,
我先醒起原來佢都有咁可愛咁少女嘅一面。
歲月磨平了我們,使我們互相貼合,
但原來也會磨滅記憶,令我忘了她曾經的樣子。
拍拖兩年幾,我地冇咩嘈交,磨合期一早就過咗,
日子耐咗,漸漸就忘記咗佢嘅好,係雞蛋中挑骨頭,
記掛住佢做得唔好嘅地方,卻忘記咗佢為我改變嘅地方。
其實阿怡,真係好好。
我從後環抱住佢,輕吻佢個頭一下,
陪佢一齊plan行程。