-
一落的士,我已經見到阿怡係公司門口等緊我,
我箭步衝埋去,一下就攬實咗佢。
身體接觸向來勝於言語,
就正如安慰男人嘅時候扑嘢係勝於你講嘅千言萬語。
阿怡有少少掙扎,佢作勢想推開我。
我就更大力地攬住佢,將佢禁錮於我懷中,
「怡,對唔住我錯啦。我愛你,你慢慢聽我解釋,好冇?我唔想失去你。」
我將頭埋係佢頸窩,係佢耳邊細語,語氣軟弱,
我冇用愛稱叫佢,反而叫佢個名,想佢感受到我認真嘅態度。
果然,阿怡雙手垂下,任我抱實佢。
見佢冇咗掙扎嘅意思,我就開始我嘅solo,
我首先不斷向佢道歉,並同佢講個個只係女同事,分咗手所以搵我陪,
然後將件事嘅責任推哂係Mavis身上先,不斷強調「係佢攬落嚟,我都唔知點解佢會咁,我對佢冇意思㗎!」
咁樣一嚟,將自己嘅身份處於被害者嘅位置,表示自己三不知,
唔知情、唔知點解、唔知點做。
但重點嚟啦,推完之後要拉,
何為「拉」,就即係將錯拉返係自己身上,因為你冇可能講到成件事自己一啲責任都冇,咁樣會令對方覺得你毫無歉意,所以呢個時候就要將一啲小事嘅錯拉返係自己身上,再不斷道歉,顯示自己有反省。
但唔好忘記,鑄成大錯嘅唔係你,係人地。
「不過我都知道自己有錯㗎,佢攬埋嚟個下我應該要即刻推開佢㗎,都係我衰,我個人呆哂,唔知應該俾咩反應,係我唔岩啊,對唔住啊B豬。」
係呢個時候,阿怡嘅內心係更討厭同責怪Mavis,
所以就應該配合佢,
「我同事都唔知發咩癲,分手就搵我嚟搞,癡線㗎佢。我冇推開佢係我唔岩,但我絕對冇再做咩對唔住你嘅事㗎啦。」
「我block咗佢啦,唔會再同佢有交雜㗎啦!」
說罷,我就拎出手機,係阿怡面前block咗Mavis,
做完以上嘅嘢,阿怡大部分嘅憤怒都被我轉移到Mavis身上,
但唔代表佢對我完全冇事唔嬲我,所以依家就要將佢嘅目光轉移到第二件事身上,
而呢一件事又正正可以解釋點解我個下冇推開Mavis。
「其實呢,我之所以會呆咗冇推開佢係因為我岩岩隊完草,反應好慢…」
「隊草!!!」
阿怡原本垂下嘅眼簾,瞬間瞪大,
佢住過宿舍,對隊草呢樣嘢並唔陌生,但作為乖乖女嘅佢只係聽過冇試過,
所以佢驚訝於我點解會冇啦啦去嘗試呢樣嘢。
「其實從你出咗社會做嘢之後,我就好大壓力。我覺得我地嘅節奏步伐唔同,我覺得自己比唔上你,我好自卑…」
我低下咗頭,亦都鬆開咗原本捉住阿怡嘅手,
我心中默數「1…2…3」
果然阿怡即刻捉返住我隻手,安慰返我轉頭。
今次嘅危機解除咗,
但我心情卻依然好差,
因為我仲未知係邊條仆街爆我煲,搞到我要搞咁大壇嘢,原本我仲開開心心食緊飯㗎嘛。
屌,真係唔應該去啲多人嘅餐廳,下次真係要小心啲。
-