春泥
2020-01-13 00:40:19
踏入九月,暑假結束,學生又再次回到學校。
今天,我們在自強會新的總部聚會,上個月會考放榜,自強會的會員成績參差,只有曾倩儀、朱思遠能夠原校升讀;關國安只有八分,他決定重讀一年;尚興國只有三分,他對唸書沒有興趣,決定協助父親管理拳館。
陳依官對我說重讀一年的陸永祥與成敏研,會考成績只有三分,決定不再作第二次重讀,報讀毅進,為投考警察鋪路。
只有六分的游大輝得知這個消息,心情瞬間好了不少,雖然他未能升讀中六,但比曾經的情敵多了一倍分數,讓他很得意,道:「都唔知啲人係咪讀屎片?repeat一年只係得三分,好心搵磚豆腐撞死咗佢算數吧啦!」
游大輝續道:「我都要報毅進,陸永祥都讀得,我智商高佢成倍,無理由佢讀到,我讀唔到啩!」
我心想游大輝報讀毅進,並非全是因為陸永祥的關係,其實他不想出來工作,所以修報毅進好讓他向家人交代。
陳依官問道:「游大輝,你都諗住考警察咩?」
游大輝搖頭,道:「緊係唔會啦!我老豆話好仔唔當差,之前元朗單野,見到啲差佬咁衰,要當差嘅話,我寧願揸拖頭。」
陳依官悄悄問道:「成皇志,之前我有睇你個節目,你話九月十一日,有兩架飛機撞向紐約嘅雙子塔,依件事係真嘅?」
我輕聲反問:「依件事自強會多唔多人提起啊?」
「依件事喺自強會廣傳,好多人都議論紛紛,有人信、有人唔信,好似飯桶武、矮仔文依啲你嘅死忠,信到十足;但唔信嘅都佔唔少,信你嘅會員企圖說服唔信你嘅會員,但係佢地都攞唔出證據去說服對方,有啲人仲因為咁而鬧交,我驚依件事會令會員出現分歧,影響自強會嘅內部團結。」
陳依官說出此言,我才察覺到問題的嚴重性,如果九月十一日真的什麼也沒有發生,那些會員會怎樣看我?到時我不但沒法在娛樂圈立足,而且很有可能會失去自強會會員的信任,原來我下的賭注比我所想像的還要大。
我問道:「咁你對依件事點睇啊?」
陳依官道:「我嘅睇法我諗係佔最大多數,就係雖然你嘅說話好荒謬,但係根據之前係你身上發生嘅事,我地都覺得唔係完全無可能。成皇志,究竟你喺節目到講嘅說話係咪真架?嗰個睡仙陳搏真係報夢畀你?」
「嗯,仲有唔夠兩個禮拜就可以證明得到。」
陳依官的說話反映了大部分自強會會員的態度,如果說出這樣荒謬的話並不是我,他們只會一笑置之,將心比己,如果有我沒有這樣的經歷,有人向我作出這樣的預言,我只會當那人精神有問題。
陳依官道:「成皇志,照你咁講,嗰日應該會死好多人,你覺得應唔應該同
相關嘅人去講?」
我苦笑道:「連自強會都有人唔信,咁你覺得出面啲人會唔會相信?」
陳依官亦搖頭苦笑,道:「成皇志,我真心希望你嘅說話係錯,嗰日唔會發生依啲事。」
我道:「嗯,我同你都無能力去做啲咩,只有等嗰日係咪真係會發生嗰種事。」
這種人禍誰人亦不想發生,我的心情亦很矛盾,我以自己的資產、名聲、前程去下注,如果我勝出的話,世界的彼端會有一班人成為枯骨,當初我沒有多作考慮便作出這樣的預言,現在我開始懊悔。