都係嗰句,路仍要走,終點係呢個世界最懶,佢永遠唔會郁,一定要等你過去搵佢。你唔行,你呢一世都唔會到終點。
無論同呢家人建立幾深厚嘅感情都好,我始終要逼自己出發。
Kobe喎
Buda果然係比較多山,一越過多瑙河,我就要喺Budapest翻山越嶺,仲未離開市區,已經蒙古皇帝打仔──大汗dup細汗,嬌喘連連。
今日嘅目的地Tata比較近,我仲喺家姐屋企食埋個lunch先出門口,只係五點,我就到咗距離Tata只有十公里嘅大城Tatabanya,稍事休息。呢個時候,我搵wifi聯絡喺Warmshowers嘅host Jozsef,原因係佢同我講,佢喺嗰度附近返工,如果時候夾,可以一齊踩單車返佢屋企。
歐洲路況真係好好
Tatabanya
點知Jozsef回覆我,佢兩點幾收工,已經等到我四點先走,依家早就返到屋企,搞到我都唔係咁好意思,嗱嗱聲起行趕去Tata,費事佢喺屋企等我太耐。
不過作為一個愛好單車嘅人,對單車旅行又有一定經驗,其實係會體諒嘅。
再踩一陣,個天慢慢暗嘅時候,我亦抵達Tata邊陲,安全着陸。
Tata係一個小鎮,市中心係一個湖,唔少人喺度散步同做運動,不難感受到呢度嘅輕鬆氣息。胡亂沿住個湖兜咗個圈,根據Jozsef畀嘅資料搵到佢住嘅嗰間小屋,敲咗陣門都冇人應,仲以為我搵錯地方。敲木魚咁敲多陣,Jozsef終於出嚟。
Jozsef同佢老婆兩個人住,原來佢老婆都鍾意踩單車,佢哋都試過兩公婆一齊去啲短線嘅單車旅行,不過其實睇落佢老婆都係陪佢居多。安頓好,沖個涼,Jozsef就喺焗爐度拎咗個粉出嚟畀我食。
巨魔夫婦
只見Jozsef坐喺隔離睇住我食,我就問佢:「做乜你哋唔食?」我暗暗覺得唔妥,仆街唔通份pasta落咗春藥,條友變態嘅?正當我一背都係冷汗,沉思如何脫身之際,Jozsef笑吟吟咁解釋,原來佢係一個麵包師父(唔怪得焗個pasta咁好食),老婆又係返好早,平時慣咗早食飯,早睡早起,只係咁啱佢聽日放假,我先唔使一早跟佢出門口。
傻啦,其實我從來冇擔心過,仲有啲失望添。
因為佢老婆第二日要返工,所以等我食完飯就瞓先,剩返我同Jozsef喺度傾偈。Jozsef兩公婆英文都唔算好,不過佢非常努力咁同我溝通,不停show佢屋企啲擺設,同埋佢兩公婆踩單車嘅相我睇,更加有趣嘅係,佢為咗令我更深入認識Tata呢個地方,特登用佢部smart tv開YouTube,播一段匈牙利旅遊局拍嘅片畀我睇,雖然攰到甩轆,但仍然感受到佢嗰份十足嘅誠意。
老老實實,我知道大部份香港人仲停留緊喺去旅行一定要住酒店、Hostel已經係極限嘅思維,對住當地人屋企十分抗拒,我並唔係鼓勵你哋,始終未必個個咁好彩遇到好人,出咗事我亦賠唔到個仔或者女畀你老豆老母,只係想講,有啲嘢,你唔係咁樣同當地人接觸係經歷唔到。
自己執生啦。
Jozsef見我釣晒魚咁,都好識做,返房瞓覺,留返個廳畀我休息。