離開Dresden
嚟到西歐，開始要行郊野公園
德國人畀我嘅第一印象同上網睇嘅一樣，死氣沉沉，冇乜感情咁，咩都跟規矩行，好聽啲就係遵守規則，難聽啲就係死板。但其實，正正係呢種民族意識，令到佢哋成為世界強國，而且，德國人並唔係咁簡單。
挑戰權威性人格
喺我就快到Berlin嗰陣，又係唔知做乜鳩，條路駁咗上highway，當時我自己都未意識到，只係轉咗入個入口幾步，後面一架私家車緊隨而至，佢一野cut埋嚟剎停，阻住我繼續行，司機仲即時落車，用幾激動嘅語氣同我講我唔行得呢條路。
我耍個冧，馬上轉頭搵路走，搵返啱路之後，我不禁諗，其他國家嘅人應該冇德國人咁誇張，第一時間會阻止我犯規，換轉係其他國家嘅人，都係呠吓我，等到唔知第幾架車，或者要有差人先會真係stop我。
Berlin嘅Warmshowers host Moritz係一個獨立音樂人，係，即係唔紅，但佢一直好努力咁做自己嘅音樂，喺網上面發佈。咁佢靠咩維生呢？就係酒吧賣唱。抵達Berlin當日，我比起預期遲，而Moritz等唔切，已經出咗門口去酒吧開工，我唯有踩去佢預先留地址畀我嗰間酒吧去搵佢。
去到之後，見Moritz已經開始咗唱歌，冇理由貿貿然衝入去問佢拎鎖匙㗎嘛？於是，我企咗喺門口差唔多個半鐘，等Moritz表演完先入去搵佢……
第一次見Moritz，佢攬咗我一攬，仲想叫個靚靚Bartender開支啤酒我飲，死德國佬……不過我踩咗成日真係好攰，又喺門口吹住風等佢等咗咁耐，都係婉拒咗，始終依家身處德國，又會喺Berlin留幾日，你慌冇機會飲咩？Moritz都好識做，畀咗條鎖匙我，叫我返去休息先，仲叫我唔使等佢門，佢有多抽鎖匙。
吖，呢個真係Warmshowers嘅優勝之處，唔踩單車嘅真係未必會體會到有幾想攤落床㗎！
家姐畀嘅鵝肝罐頭（仆街剪指甲啦！）
Moritz同佢一個女性朋友合租咗一間屋，呢幾日佢位flatmate唔喺度，所以我可以瞓住佢張床先。正，瞓德國妹張床。
瞓醒之後，hea咗陣，諗住等Moritz起身睇吓有咩搞，點知佢一出房門，咦喂？仆街！你後面有條女嘅？
Moritz，原來仲有人用緊拉線電話
原來係靚靚bartender！
有料有料，犀利犀利！
