我一直冇提過呢位新認識嘅朋友嘅性別,大家覺唔覺得有啲嘢?
冇錯喇,佢係……一個男人嚟,仲要係鬍鬚佬。
咪癲啦,係女嘅我仲唔威威食雞晨早打出嚟等你班撚屌除定褲咩?
鬍鬚佬叫Wence,係地道捷克人,會合佢之後,我哋兩條麻甩佬就去咗酒吧食飯吹水。
Wence大約三十上下,同我一樣,佢係……或者話曾經係一個旅行者,佢喺外面五年,多數留喺東南亞,試過長駐印尼,所以大家都有唔少共同話題。
佢曾經迷失過,唔知道自己條路點行,所以選擇咗出去找尋自己。而喺出面咁耐,其實非常鍾意印尼,有機會佢係想喺嗰度定居,但佢發覺,咁樣嘅人生並唔完整,佢唔想就咁就一世,於是佢返嚟捷克。
冇錯,呢樣嘢套用返喺香港人身上都一樣,日博夜博,只得工作,然後好多人唔想咁就一世,係咪好似?其實,冇乜人可以真心樂意自己一世人只係做一樣嘢,行一條路,分別只係佢哋忍唔忍受到,敢唔敢行出第一步去另一個終點,無論佢本身係營營役役,定係遊子在外。
Wence
而我呢?老實講,我投身職場唔耐,而且畢業後我早就決定要走,打嘅都係風流工,冇話咩工作壓力,講唔上為咗呢樣嘢而出走,只係想喺短短嘅人生入面做返件畀人叫「痴線佬」嘅事。我知道,我終有一日會跌返落地。
而喺打呢段文字嘅時候,我就喺地上,亦已經面對緊唔同嘅壓力,不過呢啲同我嘅旅程無關,就唔多廢話喇。
Wence依家讀返書,讀一啲關於舞台嘅嘢,我諗呢個就係佢出走五年嘅答案。最估唔到嘅係,佢最鍾意嘅係王家衛!知道我喺香港嚟,佢好似執到寶咁,不斷同我傾王家衛,但嗰時我並冇睇好多王家衛嘅戲,而且更加唔知道啲戲名嘅英文,相信佢都唔係太盡興。
離開舊城區
不過能夠喺異地認識到一個鍾意自己屋企嘅嘢嘅外國人,其實係幾驕傲,亦令我更加想認識自己地方多一啲,可以代表香港介紹畀呢個世界知。
Prague都有佢現代化嘅一面
唔緊要吖,我相信每一個遇到我嘅人已經認為香港個個人都係痴撚線。