帶住甩唔走嘅錯覺瞓覺,因為Barum同Hamburg距離只係好短,可以晏啲先出發,所以瞓醒之後,Christian車咗我出去Luneburg遊山玩水,佢順便拎之前配落嘅眼鏡。
上咗車之後,喺呢個兩條麻甩佬獨對嘅情況下,我先發現,原來Christian右耳戴住一個助聽器。我心一沉,因為我同時醒起,佢係一個鋼琴教師。
我唔知道Christian喺音樂上嘅造詣去到邊,但既然佢做得鋼琴教師,相信佢對音樂有返咁上下熱誠同成就,但諷刺嘅係,佢右耳聽力出現咗問題。我冇問佢,可能係近排嘅事,又可能係好耐以前已經係咁,但我唔敢問。
Luneburg唔算好大,比起我去過嘅Dresden同Berlin都要細,我諗就好似土耳其嘅Edirne,又或者之後我留喺英國去過嘅Cambridge咁上下大細,咁呢個咁細嘅小城會成為一個旅遊城市呢?除咗代表住佢歷史嘅老城區,主要係因為電影《Red Roses》帶咗幾倍嘅遊客嚟新城區,反而老城區冇乜人。
咁老實講,套戲我冇睇過,唔特登上網搵料敷衍你喇。
Town Hall
去到Luneburg,陪Christian去眼鏡舖拎眼鏡,初頭仲以為好似香港咁,眼鏡舖都係細細間,加上呢度小城嘛,冇諗住屌你老尾成間旗艦店嚟嘅?一間眼鏡舖開到成間Apple Shop咁大,兩層高,以為行高檔路線啦,吖啱啱相反,仆街行平民路線嘅!
原來當初眼鏡舖創辦人本住「人人有眼鏡戴,理撚得你使唔使戴」嘅精神搞呢間閪嘢,正正因為佢啲眼鏡又平又靚,所以越做越大。
好似賣咗廣告咁,係呀,你試吓飛去德國Luneburg搵呢間咁大嘅眼鏡舖囉,實搵到嘅。
Christian帶住我周圍行,向我解釋原來Luneburg曾經係一個盛產鹽嘅地方,後來過來採鹽,搞到土地下沈,政府立即禁止採鹽,但都已經救唔返,老城區一帶已經斜咗落去,有啲建築物直頭係瞓嚟咗頸。
貫穿Luneburg嘅河曾經係用嚟運鹽嘅運河,後來亦變得商業化,兩旁開滿酒吧。企喺河嘅其中一邊,Christian同我講,佢後生時一家大細搬嚟Barum時,未有足夠鋼琴學生維持生計,佢又要養Susanne同兩個仔,夜晚要嚟呢度嘅酒吧打工,聽佢講到苦笑搖頭,相信係一段非常難捱嘅日子。
1669,間屋起嘅年份
企咗陣,Christian笑笑口咁帶我越行越僻,原來佢想帶我去紅燈區望吓。只見呢度都係普通民居咁款,點知一扇窗即時打開,入面一個黑人妓女對住我同Christian放生電,吖個撚樣又笑淫淫打返個招呼,應該熟客嚟。
紅燈區,唔知條友點識窿路
兩條麻甩佬些牙條腸
酒吧釀啤酒之處,Christian都係喺度買酵母
屌你古明華嚟嘅!一路好走
玩到咁上下,Christian就車我返屋企,同Susanne食件cake,幫我打個電話畀Hamburg嘅host話佢聽我大約幾點到,我就告別呢兩個令我感受到家庭溫暖嘅德國人。
See you.