彈珠臺市場部會議室
「籌備左個幾月，聖誕活動搞得相當成功，大家黎緊終於可以有個空檔抖抖啦。」龔燁笑著道。
「太好啦，我已經覺得自己呢個月黑眼圈深左好多啊，Mary 你睇下！」Mandy 緊皺眉頭指著自己的黑眼圈。
「係喎，真係敷幾多mask都補唔番。」
「大家好好休息啦，新一年再博殺過。係啦，每年除夕公司都會搞聯歡party，同大家玩遊戲、抽獎同倒數。我已經訂左一圍，打算請哂你地去，慰勞下你地！」
「正啊，多謝呀龔！」
12月31日 除夕夜聯歡派對
玩了一整晚遊戲後，終於來到最緊張的抽大獎環節。
「成晚都未抽到獎嘅同事唔駛灰心，跟住落黎，將會抽出三份終極大獎，就係周大叔珠寶送出嘅足金金猴，每隻價值超過一萬蚊架！」大會司儀上台宣佈。
「成晚都未開過齋，隻金猴仲唔係屬於我嘅！」若水兩眼發光。
「咪開心得咁早住喎媽呢空，起碼仲有成十幾位同事未抽到，仲有我啊！」龔燁道。
「咪潑我冷水啦！我有預感，隻金猴一定係我囊中之物！」
「跟住落黎有請我地德高望重嘅主席，朱生幫我地抽出三位幸運兒，有請！」
現場一片掌聲雷動，氣氛被推至全晚最高潮。
朱生轉一轉抽獎箱，全場屏息靜氣，目光灼灼地盯著他。
「第一位幸運兒係，陳小娟，恭喜哂！」
「嘩係鐵面陳啊！」
鐵面陳在一片如雷貫耳的掌聲下上台，但他仍然維持那一貫鐵面無私，嚴肅冷峻的面孔領獎。
「鐵面陳果然係鐵面陳，贏到金猴都唔識笑嘅，不如比我啦…」若水流露出艷羨的目光道。
「說時遲，那時快，朱生已經幫我地抽出第二位幸運兒，就係…Isabella 群姐！Yeah！」
「群姐恭喜哂啊！」大家紛紛向群姐道賀。
「你估我用全套歐陽波比親筆簽名壹號皇庭DVD有冇可能同佢交換呀嗱？」若水問問旁邊的龔燁。
「頭先你唔係好有信心會抽到架咩？」龔燁不禁竊笑。
「得番一隻咋，希望上天庇佑抽到我啦，熊若水，熊若水，熊若水…」若水不停碎碎念著自己的名字。
突然，朱生在司儀耳邊說了幾句悄悄話，司儀隨即宣佈：
「啱啱朱生有個提議，為左刺激啲，我地會將足金金猴擺到倒數後先抽，而家先改為抽出我地駐場魔術師扭嘅吹氣天使公仔一隻！」
「唔係呀嘛，吹氣公仔都攞出黎抽，求神拜佛唔好比我抽到啊…」若水緊閉眼晴，皺起眉頭，十指交纏在一起祈求道。
「呢位幸運兒就係…熊若水！恭喜哂！」
「唔係呀嘛？」若水倏地睜開眼，勉強擠出虛假的笑容，身旁的同事都在竊竊私語，想必都是在取笑她。
她毫不情願地上台領獎。此時，台下的龔燁已經笑到前仰後翻，五官都快扭作一團，將要窒息似的。
一直走下台的若水已瞥見龔燁在捧腹大笑，便衝向他怒目而視。
「死賤精！笑笑笑，笑夠未啊！」
「呢隻公仔幾似你啊，你咪好中意儲天使嘅，啱哂啦擺係枱頭，哈哈哈哈哈哈…」龔燁笑到眼水不住在流。
「我隻金猴啊！」
「好啦大家差唔多準備倒數啦。仲有十秒，十、九、八、七、六、五、四、三、二、一，Happy New Year！」
大家紛紛互相祝福，新一年萬事順景，心想事成。
「Happy New Year 啊媽呢空！祝你想個樣有個樣，下年唔好再抽到呢啲啦！哈哈哈哈哈哈…」龔燁仍然笑不可抑。
「你去死啦！」
「好啦倒數完畢，事不宜遲，馬上請朱生為我地抽出新一年得到金猴嘅幸運兒！」
「係…龔燁！」朱生緩緩地打開抽獎紙條。
恭賀的熱烈掌聲驟然響起。龔燁一聽見自己名字，簡直欣喜若狂，便舉起雙手，不停鞠躬，接受眾人的祝賀。
若水難以置信地看著他，心想：「死賤精搶左我隻足金金猴啊…」
他領過獎後下台，走到若水面前道：
「真係唔好意思啦，隻金猴睇黎都係想跟我番屋企多啲…」
「係我架，比番我啊！」若水尖銳地向龔燁咆哮，一直對他窮追猛打，他倆又跑出會場外了。
「Mandy 啊，覺唔覺 Mary 同呀龔愈黎愈似啲情侶係到打情罵俏咁啊？」全程目擊此情此景的 Jessica 不禁問道。
「直頭旁若無人添啦！我諗我地都係要對Mary 好啲啦！未來經理夫人啊！」
二人相視而笑。
未來經理夫人，連旁人都察覺到你倆曖昧的蛛絲馬跡，你又打算何時醒覺呢？
(待續)
P.S. 之前寫左好幾篇都好沉重，打呢篇真係輕鬆好多(呢單堅係真人真事發生係我朋友身上笑死用左黎寫故仔
)，希望大家睇得開心，咁岩今日又係年三十晚，係舊曆除夕，祝大家豬年好運
樓主係咪寫緊唱歌走音嗰個朱主席
當中有部分係事實，但係之後嘅推理純粹係樓主亂吹，唔好信啊
樓主有研究？
