第五十三章 <一百分女友>
彈珠臺市場部,臨近下班時間
市場部的同事許多都下班了,零零星星只剩數人。趁人少,龔燁從房間步出,輕叩若水的桌面問:
「喂,就收工啦,陣間去食飯?」
若水收拾著細軟道:「我今晚唔得啊,約左人。」
「約左邊個啊?緊要得過你男朋友?」
若水抬頭一暼,「約左呀爸撐枱腳啊,係咪唔得啊?」
「Tree Gun嘅話⋯咁我就放你走啦。」
「你叫我呀爸做咩話?」若水一臉訝異地問。
「Tree Gun 囉!熊樹根呀嘛,咪即係Tree Gun!」
「點解你連我呀爸全名你都知架?」
「上次上你屋企食飯,Tree Gun 同我講佢miss左個旅行社大抽獎嘅deadline,咁啱我有朋友係嗰到做,我咪叫佢比啲個人資料我,我叫我朋友破例幫佢參加囉!」
「你地幾時變到咁熟架?」若水張口結舌地問。
「係架,佢有時仲會打比我,問下我黎緊百貨公司有咩優惠添。」
若水無語︰「唔係呀嘛,佢個女我都係到做架喎,問你都唔問我?」
「咁就好心你檢討下啦,肯定係因為你太惡死,成日叫人食蕉連皮。學下我咁,人見人愛,咩長輩都冧得掂!」
若水斜他一眼,「又懶醒。」
「咁聽日星期六,我全日留左比你架啦,你想做咩?」
「第一次正式出街,呢啲唔係應該係男仔諗架咩?」若水蹙眉問道。
「我呢啲叫尊重女朋友。」
「好囉…」
若水思量了一會,有了決定:「我想番大學。」
龔燁挑眉,嘴角微微上揚問:「番大學?做咩啊,你想同我懷愐下學生時代啊?」
「總之我就係想番去啦。嗱下晝節目我諗左架啦,夜晚你諗掂佢啦。」
「包係我身上,保證唔會令你失望。著靚啲啦。」
若水其實並沒有約樹根。她推卻龔燁,為的是參加砌模型班。
班上不乏女性學員,相信大家都是為了討男友歡心而來的。學員們全神貫注地砌模型,若水暗暗在旁觀察打量。有些女生已手勢純熟,手握模型專用剪鉗,由裁剪、接合零件,到噴上顏色等步驟都一絲不苟,該是日子有功,技巧已爐火純青。
「熊小姐,你今日第一堂喎?」老闆朝她走過來,坐在她旁問。
「係啊老闆。」
「以前從來未砌過模型?」
若水一臉迷惘,「未啊,完全係一竅不通。」
「咁你又知唔知龔生最中意係咩模型啊?」
「上次好似聽佢講過下啦,不過我都唔記得哂。」
「如果想氹佢開心呢,最好就係砌呢款比佢啦。」老闆從身後拿出一盒絕版聖鬥士星矢模型。
「佢好中意架?」
「係啊。佢周圍撲左好耐架啦,其實我上個星期係日本搵到,我知你會黎上堂,突登唔通知佢住,留番比你親手學砌黎送比佢。」
「好啊,咁我地開始啦。」
若水一直照著老闆的吩咐去做,用鐵鉗小心翼翼的裁剪零件,之後手也緊張得微微顫抖,撿起零件,戰戰兢兢的黏在他指定的位置上。在老闆的指導下,砌了數個小時,她聚精會神得眼珠都快要向內偏斜,終於完成任務。
「熊小姐,你都幾有天份喎,砌得有板有眼。」
「係咩,多謝。」聽到老闆的稱讚,若水心裡也暗爽。
「黎緊我地仲會開啲情侶模型班架,你可以同埋龔生一齊黎上堂,增進感情喎。」
「有機會,我拉埋佢黎啊。」若水禮貌地笑笑。
看著自己一手一腳砌起的星矢模型,若水也一臉滿足,展顏笑了。
不知道龔經理收到雙下巴天使親手砌的禮物,又會有何反應呢?
P.S. 其實樓主對模型一竅不通,都唔肯定我講嘅模型係咪真係要自己砌
不過劇情需要雙下巴天使安慰呀龔,唯有咁寫啦
(待續)