第五十八章 <峰迴路轉>
下午,會議室裡已坐滿彈珠臺的各部門高層。趁主席之位仍空著,大家都交頭接耳,低聲討論龔燁失了上海酒莊這筆大生意到底會落得如斯下場。
Jason 坐在龔燁對面,見他臉色沉肅,低頭垂下視線刷著手機,彷彿要將一切聲音隔絕於耳,忍不住在心頭暗笑。龔燁失勢的一天,他終究等到了。
突然一聲輕響,大門被推開。在那一剎,全場都屏息靜氣,時間也彷彿停滯。
朱生神色平靜自若,動作不急不緩,在空著的主席位置坐下,手往扶手隨意一搭,完全與大家腦海中想像的情境不符。
他微微將身軀傾前,十指擱在桌上,竟慢慢笑了。
「今日叫齊大家黎,係有個好消息想同大家宣佈。」
好消息?今天召開這個會議,不是為了公審龔燁嗎?所有人,包括Jason在內,無一不愕然,聽得一頭霧水。
「上海酒莊主席Vincent 改變主意,決定將單生意交番比我地彈珠臺。」
龔燁一聽,嚇得目瞪口呆,自己明明狠狠揍了他一頓,Vincent沒向他追究責任而是不幸中之萬幸,更遑論簽成生意。事情發展竟然如此峰迴路轉?
「朱生…點解佢會改變主意?」龔燁蹙起眉頭,一臉惶惑地問。
「我冇去深究啦。總之佢今朝就打左個長途電話過黎,話思前想後,都係覺得我地提出嘅條件比接龍好。遲啲,佢會派下屬落黎香港,正式同我地簽約。」
眼睜睜的看著鬥垮龔燁的大好機會就此溜走,Jason 在一邊聽得咬牙切齒。為何上天老是在危急關頭眷顧他?
「所以呀龔你地team人有幾辛苦,大家係有目共睹嘅。辛苦哂大家。」大老闆果然是大老闆,見風使舵的速度之快簡直是無人能及。
「過獎啦朱生,係我份內事黎。」聽著朱生的誇獎,龔燁根本沒有一絲喜色。正所謂伴君如伴虎,今天他把你捧上天,明天也可以狠狠的把你摔下去。
「今次呢單生意,係我地公司全年生意額最大嘅一單。所以為左慶祝,我決定星期日係名人飯堂設宴,同公司上下歡聚一晚。」
「多謝朱生。」
「咁呀龔你個team 繼續跟埋啲手尾,始終一日未簽約,一日都可以有變數,要跟緊啲。」
「一定一定。」
「咁可以散會。」
星期日 名人飯堂
朱生包下了名人飯堂宴會廳,宴請彈珠臺上下所有同事。
「今日請大家食飯,係想慶祝彈珠臺已經同上海酒莊傾成合作,黎緊佢地所有出口到香港嘅洋酒,都會由我地公司獨家代理。」
全場響起一片如雷貫耳的掌聲,氣氛也瞬間變得熾熱起來。
掌聲褪去後,朱生目光停到龔燁那一桌,再道:
「今次呢餐飯特別要表揚下龔燁呢team, 所以你地每人都會有一封大利是!」
「多謝朱生!」
晚宴正式開始。龔燁坐在若水身旁,時不時幫她斟茶、夾菜,照顧周到入微,四周的空氣也彷彿都曖昧了幾分。兩人自以為隱藏得好,但只要細心觀察他們對望時所漫溢的寵溺與甜蜜,那分明就是情人專屬擁有的眼神啊。
「呀龔呀,你唔好淨係掛住夾餸比Mary先得架,我都係你下屬黎架。」坐在龔燁另一邊的Mandy 語帶調侃地說。
「緊係唔會漏左你啦Mandy,食舊雞啦。」龔燁笑意盈盈的安撫著她。
「Mandy啊,我地又點同Mary 比啊?我地就係普通同事,Mary就⋯」
「都係普通同事。」若水立馬打斷,阻止Ivan再胡說下去。
在旁的龔燁,嘴角又止不住勾起來。
心思縝密的Macy 坐在別桌,眸光時不時不經意的瞟向他倆,自然能看出一點端倪。
「話時話啊呀龔,Vincent 點解會無啦啦肯比番單生意我地嘅?」Ivan 感到莫名其妙。
「咪就係囉,你仲要走去打⋯」心直口快的若水差點漏了口風。
龔燁立馬接住她的話,「打⋯左好多次電話比佢傾呀嘛,所以佢感受到我嘅誠意,又覺得我地開嘅offer 都係好過接龍,最後咪肯比番單生意我地囉。」
「哦,原來係咁,咁好彩呀龔你咁鍥而不捨咋,唔係我地條team 真係隨時比Jason食埋啊。」
「係囉。你有冇見Jason 今日全程頭耷耷咁啊,平時佢咁鬼串呢,今日見到佢咁嘅樣真係零舍心涼!」Mandy 說得眉飛色舞。
「係啊係啊!」若水也興奮附和。龔燁立即斜她一眼,剛才差點將他揍了Vincent一頓的秘密泄漏,現在還好意思搭腔。
「我去個廁所先。」龔燁交代一聲便離席。
他從洗手間出來後,見到Macy 正倚在走廊牆壁,望天打卦,像是在等人。
Macy 別過頭來,與龔燁的目光一對,便揚聲:
「呀龔。」
「Macy, 搵我?」龔燁慢慢步近她。
「係啊,有啲嘢想問你,方唔方便傾兩句?」Macy 的目光定定的凝聚在他臉上。
龔燁心下一愣,回答:「哦,好。」
(待續)
P.S. 使開左Macy 成廿章,終於出場
想知佢會問咩,記住聽晚入黎睇