(龔水) ＜若躲不過燁緣＞

會！準備出

第廿二章 <魚蛋，燒賣，芝心丸>

若水茫然看出車窗外。

往事一幕一幕地閃現在眼前，車外的風景一掠即過，頃刻間也變模糊了。

她跟自己說，這次是最後一次為他掉下眼淚。

絕不容許下一次了，再有下次，就是她自作孽，不值可憐。

「到啦媽呢空。」龔燁把車駛到若水樓下。

「唔該哂你送我番黎。係呢，今晚嘅事…」

「唔好話比人聽呀嘛，得啦。」龔燁一眼已能看穿她心中所思。

若水下了車，但仍是步履蹣跚，渾渾噩噩似的。

「唉你睇你行到，我為人為到底，送埋你上去啦。」

龔燁輕扶著若水上樓。

「叮噹。」打開門的是樹根。

「咦二妹，番黎啦，仲有呀龔。」

「係啊世伯，頭先我地去完頒獎禮，Mary 佢又飲左啲酒，所以我送佢番黎。」

「係喎二妹你一身酒氣，做咩飲咁多啊。」樹根湊近若水聞了聞。

「頭先我要介紹啲新人比其他人識，所以Mary 要應酬佢地，就飲多左兩杯。」 龔燁連忙替若水解圍。

「真係麻煩哂你啦呀龔，不如入黎坐低飲杯熱茶？」

「唔駛客氣啦世伯，我都差唔多要走。如果屋企有解酒茶，你沖啲比佢飲啦，唔係聽朝起身會好頭痛架。」 龔燁細心地叮囑。

「好啊，遲啲得閒隨時上黎食餐便飯，當係多謝你咁照顧二妹。」

「一定一定，走先啦世伯。」龔燁轉身離去。

「咁呀爸，我去沖個涼先啦。」若水腳步浮浮地進房去了。

大家姐尚善在客廳目睹整個過程，若有所思。

「唉呀，屋企冇哂解酒茶啦。」樹根翻了翻廚櫃，繼而嚷著。

「呀爸，等我去買啦。博士，陪我落去。」尚善輕撞博士的手肘。

「我？」

「係啊，食飽飯落去行下啦。」

樓下便利店

尚善與博士掃視著店內層架，尋覓解酒茶的蹤影。

尚善忽然開口道: 「你打算點啊？」

「咩打算點？」

「對呀水啊，你有冇諗過下一步要做啲咩？」

「咩啊大家姐，都唔知你講咩。」博士聲音低沉，低頭撇開尚善的眼神。

「係我面前唔駛做戲啦。我叫你落黎就係想點醒你。人地已經開始出招啦，又黎畢業禮，又送嘢比呀水，而家仲專登車佢番屋企，仲細心到叫呀爸沖解酒茶啊。」

「咁佢係呀水師兄，又係上司，咁做都好應該嘅。」博士嘗試找藉口逃避。

「點解你地啲男人咁中意自己呃自己架姐？咩年代呀而家，覺得暗戀呀，默默守護個女仔好偉大啊？一句到尾，你中唔中意呀水，答我。」

「唔係唔中意⋯只不過⋯」

「中意就得啦，咁就去追啦，你唔好當正自己係我小說個啲第二男主角先得架，個個都冇好下場架。」

「但係我地已經係十幾年朋友⋯我唔想⋯」

「唉咪咁婆媽，我講個故仔你聽啦。呀水由細到大，落親黎7仔，都一定係簡食燒賣。直到佢識左魚蛋基，做埋佢女朋友，拍拖就離唔開陪佢去佢舖頭到食魚蛋，慢慢佢都中意左食魚蛋多過燒賣，可能係因為中意身邊陪佢食嗰個人啦。不過佢地分手之後，呀水都唔敢再食魚蛋，怕會諗番起啲食魚蛋嘅回憶。於是佢又轉番口味，變番食燒賣，如是者，食左好幾年，又習慣哂。你話如果有一日，7仔出左隻黑松露芝心丸，賣行哂廣告，外表好矜貴咁啦，啱哂呀水呢啲外貌協會，仲要咬落去原來都唔差架喎，啲芝士爆哂出黎，好有新鮮感，簡直係有外表又有內涵。所以佢從此就轉食芝心丸，唔再食燒賣，你問心，你想唔想咁？」

博士聽完尚善一席話，如當頭棒喝，思索良久，道:

「咁點先可以令佢食番燒賣？」

「咁我覺得，燒賣都有佢嘅優勢嘅，始終食左咁多年，有感情架嘛。關鍵在於燒賣識唔識得宣傳下自己，比呀水記得番佢有幾好囉。」

「點宣傳呢？」

「咁都要問啊？一係你搵我出番本小說，書名就叫 <燒賣與芝心丸的抉擇>， 我係本書到幫你寫到燒賣有咁好得咁好，再比呀水睇囉。不過搵我宣傳，我收好貴架。」

「大家姐你咪講笑啦。」 博士嘴角泛起一絲苦笑。

「總之你好自為之啦。盒解酒茶你比錢，當係今日嘅學費啦下。」尚善拍拍博士的肩膀，轉身離去。

博士目光移向旁邊的小食檔。

「希望有一日，你會重新愛上食燒賣。」

（待續）

日常push
黑松露芝心丸一定好好食

我都好想食

雖然你係講若水同龔燁
但我內心一直都係支持博士
就算佢同左max一齊 我都好想佢地最後有好結果
直到佢同左mandy
我先覺得原來真係無左

內外兼備

假如冇龔燁出現 我都好撐博水
青梅竹馬係另一種溫馨
不過過左去都冇辦法
日後都會夾雜寫啲博水 希望你中意睇

鐘意啊 若水值得有愛佢對佢好既人

Pish

快D更文啦！

專心睇埋今集出

第廿三章 <融入家中>

星期一早上，彈珠臺市場部，接近午膳時間。

若水敲敲龔燁房門。

「龔燁，聖誕活動份proposal寫好啦，你過下目。」

「好。點呀你，心情好啲未？」

「訓左一教，咩都唔記得哂lu。」若水展顏一笑。

「咁犀利，個晚你唔係咁架喎。」

「咁太陽升起之後，又係新嘅一日啦。其實我都唔係好明我個晚點解會咁，可能因為飲左酒掛。」

「你以後真係唔好再飲酒啦，你發酒癲個樣呢，真係好得人驚。」龔燁蹙起眉頭，那晚若水的德性簡直是不堪入目。

「個晚我飲醉酒，冇亂講嘢啊可？」

「你驚你會亂講咩啊，話你仲中意魚蛋基啊？」言畢，龔燁被痰噎到，一直咳嗽。

「嗱抵死，個天叫你唔好亂講嘢啊。」若水笑不可抑。

「關咩事，我病緊啊。」

「病仲食m記薯條當lunch？前世未咳過啊？」

「啲薯條攤到凍哂啦，變哂薯仔，冇野嘅。」龔燁吐吐舌頭道，這完全是一個大細路被母親當場截獲吃違禁品的畫面。

「我請你食晏啦，當係多謝你個晚借個膊頭比我。」

「你舖話法啊，我點止借膊頭比你，成個心口都比你啲眼淚鼻涕搞到濕哂啊，我件恤衫貴野黎架。」

「咁你想點啊？」

「一餐lunch點夠賠，起碼都正正式式食餐晚飯啦。」

「咁你想食咩啊？」

龔燁思索一會，突然冒起一個想法。

「請我上你屋企食啊。上次你呀爸話多謝我送你番去，要請我上去食餐便飯。」

「你有咁好死，咁幫我慳荷包？仲以為你會屈我請你去長島酒店添。」

「我都想架，不過應承左老人家嘅嘢，一定要做嘅，我份人好有口齒嘅。」說罷，龔燁又開始咳嗽。

「唉你真係唔好再食薯條啦，黎緊聖誕大project 黎架，你唔可以冧架！沒收！淨係食個包好啦！」若水一手搶過桌上那包薯條。

「你話點咪點囉，管家婆！」

某天晚上，熊家

下班後，若水帶龔燁到訪熊家。

一見龔燁，樹根便喜孜孜地說：「呀龔你買左咁多生果黎，仲帶埋紅酒上黎，我地真係有口福啦。」

「世伯你都煮左咁多好餸，我有口福就真。」

「嘩呀爸，好耐冇見你煮咁多餸啦喎！」若水大吃一驚，上次出現這菜式陣容已是心如拿到傑出學生那時候。

「咁我地屋企好耐冇客人上黎食飯啦嘛。」

明明大家只是上司下屬的關係，若水真不知那來的勇氣會邀請他來，又不知他那來的勇氣會赴約，不過她心裡卻暗自滿足。

一見龔燁，心如馬上騰出若水旁邊的位置讓座。

「呀龔，食隻飽魚啊，仲有呢隻右脾，好滑架！」樹根不住把餸菜夾到龔燁的碗中。

「多謝世伯，唔駛咁客氣啦。」

「係呢，聽二妹講，你用左幾年時間就升做經理，真係厲害！」

「你過獎啦世伯，我諗Mary 過幾年都應該可以嘅。」

「係呢，咁你做嘢咁忙，咪冇時間拍拖囉？」樹根焦急地為若水打聽龔燁的感情狀況。

「呀爸啊，你做咩問人呢啲嘢架？」若水頓感尷尬。

「唔緊要。係啊而家冇拍拖，專注工作先。」

若水聽見龔燁的話，心中暗鬆口氣，即是他與那位Macy 已經分開了吧？

龔燁很有交際手腕，與席上各人通通聊得來，即使樹根像查家宅般問東問西，他都一一耐心應答。他既為心如大學選科提供意見，又跟樹仁交流攝影心得。總之天南地北，無一不曉。雖然龔燁私下經常調侃若水，但畢竟是個事業有成的大好青年，交際時落落大方，談吐態度令人舒服熨帖，大家心裡都對他讚不絕口。

吃過飯後，他們移師到客廳繼續聊天。

「係呀，琴晚我收工之後去廠到拎左啲聖誕禮品 sample, 你入黎睇睇啊。」

「好啊。」終於有機會一覽媽呢空的房間。

若水的房間裝修簡約，天花垂一盞枝形吊燈，淡黃燈光令人陪感溫暖。牆上掛了一塊松木框軟木板，上面釘滿了一張張的照片。一瞥，龔燁看到自己。

「咦，咪我同你影嗰張畢業相。曬埋出黎貼，咁想見到我咩？」龔燁將頭湊近若水，忍不住嗤一聲笑出來。

「咩啊，個個都有份架！嗱，你睇，博士，心如佢地都有單獨合照架。」若水連忙談及他人以掩飾尷尬。

「以為你咁掛住我添。」

龔燁再掃視牆上的照片，發現若水的童年照，旁邊站著博士，二人樣子都非常青澀。

「呢個咪係你同博士？佢都冇乜點變喎，隻眼都係咁細。」

「係啊，呢張應該係我地細個，去附近社區中心聖誕party 個陣影嘅。」

「你地真係青梅竹馬喎，有冇一齊過？」龔燁語氣帶點酸溜溜。

「冇啊，好朋友咋。」

「識左咁多年，一啲感覺都冇咩？」龔燁嘗試試探。

「冇啦，我諗佢都當左我係佢啲兄弟。」

「實會係咁啦。」但憑當日畢業禮上二人眼裡迸發的火花及那種無形的敵意，龔燁相信，博士一定對她有意，這是男人的直覺。

「你真係好八啊，啲sample 睇完啦嘛，好走啦。」若水推著龔燁出房外。

「咁快趕我走，你咁對世伯啲貴賓？」

「貴你個頭。聽日唔駛番工啊？走啦。」

這一頓飯，相比起長島酒店的鮑參翅肚，也許是相形失色。但龔燁依然樂得開懷，因為他吃的不只是食物本身，只是那久違的家庭溫暖。曾經他以為這種幸福是遙不可及，現在，上天讓他在若水身上找到了。

(待續)

糖尿啦

凍咗嘅薯條個part有聲嘅 好正

寫番Stanley本人

頂好正啊 堅有聲

今日又有龔水線睇又有你篇文睇 真係糖尿啦

好正呀
完全可以滿足到我FF心態

凍左薯條會變薯仔好正
根本個個就係Stanley

第廿四章 <尚善的一席話>

「送完呀龔走啦？」尚善問道。

「係啊。」

「食飽飯冇嘢做，不如上天台傾吓計？我哋兩姊妹好耐冇試過飲住啤酒傾計談心啦。」

「好啊。」

尚善與若水從冰箱中取出兩罐冰凍啤酒，便上了天台。

「你同嗰個呀龔發展成點啊？」甫坐下來的若善便問道。

「咩發展啊？」若水在裝傻。

「係我面前唔使扮野啦。你唔係唔知你家姐我係作家黎，最識得睇人眉頭眼額。嗰個呀龔唔係對你有意思嘅話，點會又去畢業禮，又送禮物比你，又送你返屋企，而家仲上埋黎食飯添啊。」尚善對龔燁近日的舉動作出精闢分析。

「家姐，你都覺得佢對我有啲嘢？」若水追問。

「有嘢就梗㗎啦，不過我始終唔了解佢係一個咩人。有時一個男人對一個女人有興趣，又未必真係會追架喎，佢哋只係享受嗰種似有還無嘅曖昧姐。」對男性心態瞭如指掌的尚善道。

「唉，啲男人就係咁仆街。」

「咁你呢，問心你對佢有冇野？」

「好似幾啱feel嘅。不過講真，我都未係好了解佢。」若水嘴角泛起一絲苦笑。

「咁你就輸蝕啦。你睇佢而家識晒你屋企人，你之前話過佢係你師兄，仲識魚蛋基㗎嘛，即係佢對你嘅過去都一清二楚啦。咁你呢，你又知唔知佢屋企有咩人，佢以前拍過幾多次拖之類啊？」

「我淨係知佢有個阿爸係老人院，阿媽就離家出走咗。同埋佢中四有個初戀女朋友咋。」提起他的初戀，若水也感到不是味兒。

尚善抿了幾口酒後說:「初戀真係男人嘅弱點黎。就算以後再識多幾多個女人，初戀永遠都係唯一，嗰種感覺真係呢世都無辦法重新搵到。」

「不過佢頭先話而家冇拍拖，即係分左啦掛？」

「冇拍拖唔代表冇前度係身邊趑趄噉轉架喎。咪話家姐唔教精你，你真係要摸清楚佢個底你先好諗同唔同佢一齊。你知你當年啦，就係因為根本唔清楚魚蛋基嘅為人，人哋氹你兩句就沉晒船，搞到自己最後咁傷。你記住呀，第時無論同邊個拍拖，最緊要唔好將嗰個人擺做你世界嘅重心。你大把選擇，唔好淨係集中喺眼前同你曖昧緊嘅人，有時有啲人近在咫尺，只係你留意唔到啫。」尚善果然是愛情專家，聽她一席話勝拍十次拖。

「大家姐你講啲嘢咁深奧嘅？咩近在咫尺啊？」

「我簡單啲講啦。即係你好鍾意食魚蛋嗰陣，就以為呢個世界得魚蛋最好食，但到冇得食魚蛋嘅時候，轉返食燒賣其實咪一樣得。總之呢，我就唔希望再見到嗰陣啱啱分手嘅熊若水再出現係我面前啦。」尚善果真很愛用魚蛋燒賣的比喻。

「放心啦家姐，我會保護自己㗎啦。係啦，做乜突然咁關心我啲感情問題呢？」

「梗係關心啦，隨時可以做我下一本新書嘅題材喎。你記住有咩進展都要同我講啊，知唔知呀！」尚善眼內盡是期待。

「又黎？當年你改編我同魚蛋基嘅故事出書，跟住大賣我都未同你計啊！幾時比返啲稿費我啊！」若水不屑地搖著尚善的手臂。

「一世人兩姊妹，唔好咁計較啦！請你飲啤酒！」

(待續)

後話：樓主其實好中意睇姊妹談心嘅場面，大家姐雖然平時好毒舌，但係其實都好錫呀水，我成日想睇佢做一盞指路明燈，幫呀水係感情上引路。可惜劇中冇乜點刻畫，唯有自己寫滿足下自己啦

Pish

大力推一推

趑趄噉轉

我睇咗2秒先明咩意思
又學到生字了

第廿五章 <博士醒覺了>

星期六早上，博士一早到茶樓取位，與若水一家飲茶。

「係啦呀水，就嚟年尾，記唔記得有咩要做啊？」博士為若水斟茶，漫不經意地問道。

「年尾？有咩要做啊？」若水一臉茫然。

「你真係唔記得啦？今年2013年啊，記唔記得我哋嘅10年之約啊？」

「係喎！10年前我哋應承咗話今年平安夜要返去社區中心同佢地敍舊㗎。」若水如夢初醒似的。

「記得就好啦。係啦，當年我哋咪一齊DIY整公仔，我咪送左我整個隻比你嘅？你仲有冇keep住呀？」博士眼神閃過一絲期盼。

「哦應該有，不過好似收埋咗喺櫃桶底，我要返去巢下先。」

「你搵到嘅話，平安夜嗰日帶埋去啊。」

「點解啊？」

「咁隻公仔咁有紀念價值，keep左10年喎，梗係要帶返去一齊影相啦。」

「你又啱！唔知其他人會唔會番去呢？」

「二家姐博士，你地講緊咩啊？咩10年之約？」心如一臉疑惑。

「哦冇，10年前我同博士去咗列堤頓道社區中心嘅聖誕party，個晚玩得好開心，我哋嗰陣話過10年後要返去再見咋嘛。」

「10年前啊，嗰陣我都係得幾歲咋。」

「係囉，估唔到你眨下眼，就要準備入大學，我都已經出緊黎做嘢。」若水不禁慨嘆歲月催人。

「係啊二姨，過多十年你三張幾添啦！」安仔嗤一聲笑出來。

「作死你啊？中學咁教你架？」若水厲眼睨著他。

飲過茶後，尚善藉口說遺漏了東西在速熊，要博士為她開門。

「博士，終於醒覺啦？」尚善揚起眉頭問道。

「吓？」

「你諗住平安夜同呀水表白？」

「大家姐，點解你會估到嘅？」博士嚇了一驚，尚善竟有看透人心的超能力。

「我係作家嚟㗎嘛，呢啲咁嘅約女仔招數，我係故仔度都唔知用過幾多次啦。」

「其實我都好淆，唔知點講好。」博士搔搔頭，顯得惆悵又懊惱。

「冇辦法㗎啦，你同阿水一定要靠你做啲野先有機會突破到朋友關係，你都唔想眼白白睇住佢比人搶走，咩都做唔到㗎。」

「我都知，不過我驚講咗出嚟之後會嚇死佢，佢會疏遠我。」

「我都好明白你呢啲少男心情嘅。最多到時無論你係得定唔得，我都幫你係呀水面前講幾句啦，包保你哋唔會尷尬。」尚善拍拍博士肩膀。

「希望啦。講真啊，唔係大家姐你點醒我，我諗我呢世都唔會有勇氣同呀水講。」

「梗係啦，講咗嘅話又唔會少忽肉嘅，最緊要係有個答案，自己老黎先唔會後悔㗎嘛。即使佢呢刻冇應承你，你起碼都要比佢知啦，等佢有得簡，我覺得你都唔係無機㗎。」尚善一席話簡直為博士打下一枝強心針。

「我明㗎啦。」

「點啊，使唔使我醒幾句表白必勝金句俾你傍下身啊？」

「唔使啦，我有初步嘅構思㗎啦。」

「之前成舊飯咁，唔推你都唔識郁，突然又會咁醒目嘅。咁我祝你得米啦，之後記得講番啲細節比我聽，比我用黎來做題材啊。」尚善又故態復萌。

「大家姐你又想擺我上枱啊？」

「唔好講到咁難聽，我隨時幫你搵個老婆番黎喎，小小甜頭都要比番我啦！」

博士無語。不過倘若有機會，他也想一嘗成為尚善筆下男一的滋味。那個總落得炮灰下場的男二身份，他是時候撇下了。

(待續)

又睇完喇