第七十二章 <妒忌惹的禍>
經過若水的悉心照料,還有那情意綿長的吻作為療藥,龔燁很快便回復龍精虎猛,隔天便如常回公司繼續博殺。
一早回到辦公室,龔燁發現鐵面陳正在他房外來回踱步,臉色沉肅,心事重重似的。他便走過去問:
「咦,鐵面陳?搵我?」
「係啊龔生,你琴日冇番工?」
「係啊,請左病假。有急事搵我?」
他舉目四顧,放輕聲線道︰「呢到人雜,我地入房先傾。」
龔燁怔了怔說:「好。」
一進龔燁房間,鐵面陳便將房門上鎖,並拉下百葉簾,小心翼翼的檢查,確保沒有一條縫隙能讓人從房外窺探到房內情況。
龔燁見他舉動有異,便問:「咁緊張咁嘅,究竟咩事?」
鐵面陳徐徐坐下,聲線沉穩的向他彙報:「之前你叫我查艷麗熱巴嘅事,有左結果。」
龔燁一聽,心也提了起來,「查到係邊個換走啲乾花?」
「我地翻查過商場閉路電視,係事發之前,有一個形跡可疑嘅清潔女工,推住架車入過去化妝間。不過,由於化妝間入面嘅閉路電視影唔哂全景,咁啱擺花個位係死角位,所以影唔到實質證據指證係佢做。」
他不禁疑惑,「咁點解你地咁肯定係佢做?」
「因為呢個清潔女工係合約形式請番黎。事發冇幾耐,佢張合約就啱啱到期,離左職。憑我曾經任職飛虎隊,經驗話比我聽,呢件事唔會係咁巧合。所以,我暗地裡派左保安部嘅同事連日監視,終於比我查到啲野。」
他更加焦急地追問:「咁到底查到啲咩?」
鐵面陳臉色一黯,有口難言似的,思量一會才接話︰「我希望你有心理準備,呢件事係牽涉到公司女高層。」
他從制服外套的內袋中掏出一個公文袋,遞給龔燁。
龔燁接過,打開,取出一疊相片。一直翻著,映入眼裡的都是那熟悉的臉孔,令他呆在當場。
鐵面陳續解釋︰「呢個清潔女工去搵左Macy幾次,啲相影到佢地拉拉扯扯,我地懷疑佢係想問Macy攞多啲掩口費。呢件事事關重大,我唔敢輕舉妄動,所以都係交番比你處理。」
他連忙將相片收起,將公文袋的細繩繞上,臉色微僵道︰「好,我明白。」
鐵面陳再叮囑︰「咁希望龔生你會公正嚴明咁處理,比個交代朱生。」
「一定。」
「咁我出番去先。如果有咩想我再深入咁查,隨時搵我。」
「好。」
鐵面陳離開後,龔燁思前想後,突感到一股寒意,一寸一寸的,從後背爬了上來。他認識了超過十載的Macy, 那個有著玲瓏外表,待人溫婉體貼,面面俱圓的女人,竟然藏著一顆蛇蠍的心,在背後暗放毒箭,想加害於若水。而且這絕不是一般惡作劇,而是一個足以讓她丟掉工作,讓公司面臨被追溯賠償的陰險計謀。
難道這一切真是嫉妒惹的禍?Macy 勢要將與他有可能發展的女人都斬草除根?女人心真是深似汪洋大海,內裡蘊藏的心機,他完全無法揣摩。
他陷入沉思,在想下一步應當如何是好。念在昔日情份,他狠不下心腸親自向朱生揭發事件始作俑者就是Macy。但倘若他選擇包庇她,一向大公無私的鐵面陳絕不會就此罷休,屆時,事情只會更一發不可收拾。
冷靜了一會,理清好思緒,他在想,若水始終是這宗事件的受害者,也許應該先讓她得知事情真相,再作打算。
午膳時間,龔燁邀約了若水到一間位於公司附近窄巷,環境靜謐,人跡罕至的咖啡廳。他找了個偏僻的角落位置坐下。
慢慢划動著杯中的咖啡,若水笑問︰「而家我地都揚左啦,點解仲要搵間咁僻嘅cafe食飯?」
龔燁吸了一口氣,神色凝重的看著她,「今日我要同你講啲嘢,不過你要應承我,呢到大庭廣眾,無論你幾嬲都好,都唔好太激動,好無?」
若水感莫名其妙,「咩事啊?你個樣咁嘅?」
他怔了數秒,徐徐道:「之前艷麗熱巴嘅事,鐵面陳查到啲眉目。」
若水睜大眼,不由俯身向前,「真係?到底係邊個做架?」
「你睇下呢疊相,就會知。」
龔燁將公文袋遞給若水。若水取出照片,逐張逐張翻閱,那反應與龔燁初看時同出一轍。
「係Macy 做嘅?」她倏地睜大滾圓的雙眼,神情驚詫。
「其實CCTV影唔到實質證據。不過鐵面陳查到,相入面嗰個清潔工人曾經偷偷地入過化妝間,而且佢張合約之後就咁啱完左。鐵面陳覺得有可疑,一直查落去,就影到佢地曾經私底下見面幾次。」
聽完他的描述,若水嘗試拼湊出事實,「即係話,成件事係Macy 指使個清潔工人做嘅?」
他躊躇片刻,答︰「好大機會係。」
「佢咩事啊?咁大整蠱?我得罪佢啲咩啊?佢要咁黎玩我?我差啲連份工都冇埋啊!」若水瞬間火冒三丈,聲線驟然變得如洪鐘般響亮。
「殊,都話叫你唔好咁激動咯,呢件事得我、你同埋鐵面陳知架咋。」
若水仍然壓不住怒火,「咁佢真係好大整蠱呀嘛,點解要咁黎冼我?」
龔燁推敲道:「我諗佢sense到我中意嘅係你,所以想趕你走。」
「唔係呀嘛,咁都唔駛玩到咁大架。咁你打算點?」
他托著腮,展出一臉為難的愁容,「我都唔知,鐵面陳想我渣正黎做,同朱生交代清楚。」
若水一聽到事情可能要鬧到朱生那頭,又不由得心軟,「不過咁大件事,如果你直接向朱生告狀,佢以後係PR界真係唔駛立足架啦。」
「係啊。所以我諗,係咪唔應該去得太盡。」
「不過諗深一層,如果當初唔係佢去上海求Vincent嘅話,單生意都未必掹得番。佢都叫做幫左你,如果你趕盡殺絕,會唔會迫到佢發癲架?」若水在想,假如一個女人願意為了她心愛的男人不顧一切,奮不顧身,最後換來的卻是男人在背後捅上一刀以作回報,那種痛,應該是撕心裂肺的痛,痛得足以將她迫瘋。
「我都唔知。我而家先發覺,原來我識左佢咁多年,都係唔知佢個心係到諗緊咩。」
若水舒了口氣,道:「我諗我明佢點解要咁做。」
「你明?」
「我中學個陣,曾經都好中意一個男仔叫洗碗強。我個陣都試過出啲陰招,阻止其他女仔送情信比佢。」
龔燁抬了抬眉,不解地看她,「乜你地啲女人個個都咁陰濕嘅?」
「喂情敵喎,緊係想盡辦法鏟走架啦。」她說得理所當然。
「咁兩單野點同啊,你個啲就話小學雞整估下,佢個啲真係會搞到你連份工都冇埋架。」
「有咩唔同,都係因為兩個字,妒忌姐。」
龔燁見她說得如此雲淡風輕,也覺意外,「佢咁害你法,你唔嬲佢咩?」
「嬲啊,好嬲添。但係而家我又無穿無爛,而且都得到左佢最想得到嘅嘢啦,我先係大贏家,唔係咩?」
見到她如此落落大方,他眼睛驟亮看著她笑道:「乜熊若水原來係咁大方架,以前真係唔覺喎。」
「唔係大唔大方嘅問題…我只係覺得,如果由你黎揭發佢,佢一定會傷上加傷,癲起上黎,真係唔知會做啲咩。」
「但係我始終都要比個交代鐵面陳。」
「我都知你難做…」
「其實單嘢你先係受害者,不如交比你黎決定應該點做?」
她思索片刻,道︰「咁就要諗下有冇一個兩全其美嘅方法。」
(待續)
P.S. 回歸後第一篇好長,大家enjoy
樓主抖左一星期,叉好電,學Stanley 話齋,更精彩嘅故事而家先開始