(龔水) ＜若躲不過燁緣＞

唔會啦，果時阿水都係剛剛大學畢業，咁年輕，Tree Gun 應該未擔心阿水嫁唔出

影畢業相嗰日tree gun先笑得好開心
況且個女咁惡死 難得有個荀盤肯要梗係

第六十二章 <同居預演>

兩人互相依偎，靜靜沉醉於專屬他倆的甜蜜時光。時間一分一秒過去，龔燁肚子無法自制的發出聲響。

若水笑問：「你係咪肚餓啦？頭先嘔左咁多。」

「係啊。」

「一係我煮啲嘢你食啦。」

他倆離開浴室，一直走到廚房。若水一打開雪櫃，大吃一驚。

「嘩，乜你個雪櫃咁空嘅？」

「咁我收工咁夜，成日都係出面食完先番黎，咪唔駛買咁多嘢囉。」

「好心你咪食咁多街嘢啦，冇益架。」媽呢空的隱藏身份不經意又躥出來了。

「咁我以前冇人煮比我食呀嘛，以後幫我塞滿雪櫃嘅重任就交比你啦。」他牽起她雙手，眉梢眼角都是笑意。

「你當我係工人啊？」若水睨著他問。

「當你係…呀媽啊！」

「死賤精！媽你個頭啊！仲講！」她毫不留力的捏他手臂一下。

「唔講囉！不過睇你gel哂甲咁，唔似入開廚房喎，你識唔識架？」若水愛美如命，一副十指不沾陽春水的模樣。對她的廚藝，龔燁存有很大質疑。

「Are you talking? 邊個話gel甲就唔識入廚架，我最拿手係整鹽焗雞啊！」

「咁堅？咁你幾時整比我食啊？」

「有機會先囉。」其實自從跟魚蛋基分手後，她也甚少入廚，幾乎忘掉了鹽焗雞的做法。剛才她只是自我吹噓而已，便藉口推搪。

「你請我上你屋企食飯，我咪可以試你手勢囉！」

「你唔驚又比我呀爸捉住你問長問短咩？會煩死你架喎！」

「唔驚！我最中意同Tree Gun 傾計架啦！」

「行外父政策啊？」若水輕挑眉問。

「我呢挺質素駛唔駛啊。喂咪掛住問啦，你係咪煮嘢比我食架。」

「你出去坐陣先啦，我淥個麵你食啦。」

「淥麵記住加多啲芫茜，我最中意食！」

若水斜他一眼，「咁多要求架！好煩啊你！」

不消一會，若水捧著熱騰騰的餐蛋麵出來，端在餐桌上。整碗麵都被滿滿的芫茜覆蓋。

「食得啦。」

「嘩，你駛唔駛落咁重手啊？」龔燁看到麵上一片舖天蓋地的草青綠色，心下一沉。

「真係神又係你鬼又係你喎，又係你話要嘅！」

「好囉。」

龔燁拿起筷子，嘗了幾口，「咦，都似模似樣嘅。」

「駛乜講。」

「話時話，頭先你點送我番黎？」

「咪截的士抬你番黎囉！頭先辛苦死我啦，隻手仲痛緊啊。」若水捶著自己酸軟的手臂，撇嘴抱怨道。

「你一個女人抬我番黎？」

「Ivan 都有份嘅，不過個死仔撻左你落梳化，拍下籮柚就走左啦！」

「可能佢唔想阻住我地呢。」龔燁嘴角微微上揚，小聲嘀咕著。

「你講咩話？」

「冇啊。」

他一邊吃，若水便環顧著他家每一角落。龔燁的家不算太大，全屋以米黃色為主調，令家居看上來更寬敞明亮，配搭典雅的儲物櫃及燈飾，一派維多利亞式風情。

他是個動漫迷，家中擁有數百個模型，統統放在大門旁的金漆雕花儲物櫃中。

「嘩，咁多模型，你課左幾多金？」

「啲模型我由細儲到大架啦，次次一出糧就忍唔住買。」

「嘩你咁樣，一定儲唔到錢啦！以後唔好再買咁多啦，你間屋都冇位擺啦！」她又在念叨。

他低笑一聲，「嘩，啱啱一齊姐，你就管家婆上身啊？」

「我係咁架啦，你而家係咪後悔啊？」

「點敢啊，Mary姐。」

饑腸轆轆的龔燁三兩下就將整碗麵扒清光。他打了個嗝，一臉滿足。之前對媽呢空的廚藝不抱任何期望，沒想到竟出乎意料的好吃。

「食完！帶你去參觀下我間房啊。」

他牽著她手腕，徐徐步入房間。

「咦，嗰隻咩黎架？」一踏進房間，若水離遠瞥見他桌面上擺放了一個似曾相識的擺設，便走過去想一探究竟。

「咩啊，咪亂搞我枱面啲嘢啦。」龔燁連忙用身軀遮擋著，不讓她接近書桌。

「哦，呢隻咪我隻緣份天使。」可惜若水眼明手快，一手便從縫隙中將擺設搶過來。

龔燁暗暗咂舌，被她當場發現，面子也蕩然無存。

「原來你一早買左隻比自己嘅，個陣又笑我信埋哂呢啲低B嘢？」

「咩姐，咁我見幾靚，順便買多隻比自己咋嘛。」他繼續砌詞掩飾。

「等你仲笑我為左想同你一齊去買富貴竹，你自己咪又係咁！」

龔燁微笑不語。

若水再掃視他的房間，最注目的還是那鑲在牆上的偌大衣櫃。

「嘩，你男人老狗要咁大個衣櫃做咩啊？」若水打開衣櫃，裡面放滿了不同色系的西裝，排列整齊有序。

「咁我咁多套西裝，要整大啲先夠位擺架嘛。」

「我個衣櫃都係同心如share咋，我擺衫嘅位都冇你呢到一半啊。」她艷羨的神色完全袒露於臉上。

「羨慕我啊？」龔燁挑眉問。

「緊係啦，咁大個衣櫃根本係女人嘅天堂。」

「咁我贈你三個字。」

「又點啊。」

「但我驚你唔敢聽喎。」

「你敢講，我敢聽囉。」

龔燁頓了一會，湊近她道：「搬入黎。」

她目光一怔，臉又開始發燙。

「死賤精，想嗆你個心啊！」她提起雙手，又想揍他，手卻被他猛力一扣，然後他一個旋身將她壓在衣櫃上，俯身看着她，目光摻點玩味，薄唇輕啟問：

「不如，今晚你唔好走？」

二人的臉只有一寸之遙，他溫熱的鼻息撲面而來，她聽到自己驟然慌亂的心跳，嚇得一句話都說不出來。

見她神色慌張，他憋不住笑道︰「睇下你個樣嚇到，我講笑咋。你肯我都唔敢啦，唔驚Tree Gun殺左我咩。」

她鬆一口氣，向他吼著，「死賤精，又玩我！」

他笑得閉不上嘴，一手將她擁入懷中，「唔駛心急喎，你遲早都會搬入黎。」

媽呢空，不用著急。

終有一天，你會成為這裡的女主人。

（待續）

P.S. 特別係到鳴謝 我有咁講過咩 巴打較早前提供過三個字「搬入黎」呢條橋我借黎寫左落去

Stanley最愛嘅莞茜
仲以為會過夜添

日常輕輕一推

見到Stanley嗰幾個Figure櫃都好想問佢課咗幾多金

個陣都係得廿幾歲 過夜好似過份左啦

睇到TreeGun 式笑容

阿水咁後生就拿手整雞整過一次之後就停唔到㗎啦水水
期待劇中上到阿龔間劏房會見到隻天使

呢集好sweet阿
希望水水可以快啲做女主人
btw其實一直都好好奇劇中堂堂亞太區市場部總監點解會住劏房

Stanley間屋
尋晚一口氣追返1x章爽到爆，甜死人啦

+1

樓上
講故台唔好引原文啊

我覺得佢唔係真係住劏房囉可能上次只係出錢出力租住先黎幫女神

啊龔霸氣櫃咚
純情龔係唔存在喺呢度麼
次次都係啊龔flirt 阿水
一齊之後情節硬係覺得會開車

呢個故唔會見到開車架
純情龔都有出過幾次 你要細心啲睇番
咁不如又投下票
黎緊想見多啲純情龔定霸氣龔
純情龔
霸氣龔

想兩個之間自由切換就俾
利申我想

想睇埋篇文先訓教

第六十三章 <Tree Gun的笑容>

差不多凌晨一時許，若水終於返家，體力透支的她一下便攤倒在沙發上。

「咁夜先番嘅，去左邊啊？」在旁的尚善，又想旁敲側擊套口風。

若水坐正身子，敷衍兩句說：「有個同事飲醉酒，我幫手送佢番去咋嘛。」

「男定女啊？嗰個龔燁啊？」精明的尚善浮起一個曖昧的笑容問道，果然沒有甚麼能逃得過她的法眼。

「關你咩事姐。」

尚善輕挑眉頭，嘴角上翹，「老實答我，你地係咪一齊左？」

若水低著頭，感到尚善兩道灼灼的目光落在自己身上，那種壓場的脅迫感迫使她稍微點了一下頭。

「真架？幾時一齊架？」她立即緊張地再追問，聲音倏的變得響亮。

「殊，你咪咁大聲啦！會嘈醒佢地架！」若水神色慌張地道。

「咁你答我啦。」

「都係最近嘅事囉。」

尚善靈機一動，「哦，就係你地去上海個陣？」

若水點點頭，沒吭聲。

「咁你有冇蝕底比人啊？」尚善神情蠱惑地問。

若水焦急地澄清，「你講左去邊啊，我地清清白白架。」

「你啊，小心啲保護自己啊。」

「得啦。」

「咁佢點同你表白架？」

「大家姐，你又想攞黎寫故仔啊？唔好啦。」

「嗱你份人唔得大方，唔肯開心share。我份人就好大方嘅，細妹拍拖呢啲天大嘅好消息呢，我就最中意同人分享架啦，你駛唔駛我而家就叫醒大家？」

「喂啊，你咁即係威脅我姐？」

「唔好講到咁難聽，你咪當同家姐談下心囉。」尚善挪一挪身子坐近她，搭著她的肩膀笑笑道。

若水頓了一會，道：「我問佢當我係咩，佢就話三個字：女朋友。之後就一齊左囉。」

「呢招我小說用過啦喎。咦，呢個龔燁識貨喎，肯定係有睇過我啲書。」

「係咩？你邊本有用過？」

「搞錯啊，身為我細妹你都可以唔知？」

「咁你知我不嬲都冇乜書緣架啦。」若水自嘲地說。

「既然佢有睇我啲書，好啦，我正式宣佈佢pass到成為熊家女婿嘅第一個門檻！」

若水翻了個白眼，完全不想搭理她。

樹根聽見深夜客廳還傳來人聲，不禁從房中步出瞧瞧。

「大妹，二妹，咁夜仲唔訓，傾緊啲咩啊？」

「冇，呀水有個好消息想同你講咋嘛！」尚善趁機捉弄若水一番。

「係啊，有咩好消息啊？」

若水斜眼一瞪她，便別過頭，笑著與樹根道：

「好消息就係⋯我決定要渣番鑊鏟啦！」

「下，二妹，你不嬲都唔中意入廚房架喎。」樹根一臉疑惑。

「咁無聊想整下嘢食呀嘛。係呢呀爸，呀媽留低個本食譜，仲係唔係到啊？」

「係，收埋左我係房櫃桶底啊。」

「咁岩啦，我想整番鹽焗雞。」

「鹽焗雞你幾年前都整過比魚蛋基食啦，你唔係識煮嘅咩？」尚善好奇問。

「咁幾年冇整過啊，啲步驟都唔記得哂啦，我想學番啊。」

「無啦啦想整，哦，唔通二妹你有男朋友？」樹根喜上眉梢，展現出招牌Tree Gun式笑容問道。

「咩啊呀爸，我無聊想整番咋嘛。」若水眼神閃縮，不敢正面回答。

「哦，係咪想整比嗰個呀龔食啊？」

「呀爸啊，我醒起聽朝仲要番工啊，我都係番房訓先啦。」若水一個轉身閃入走廊。

「二妹啊，答埋我先啦，幾時叫佢上黎食餐飯啊？我整啲拿手小菜佢食啊⋯」樹根緊緊跟在她身後，又開始念叨個不停。

若水一邊掩著耳朵，樹根就一直追著她進房，在旁的尚善完全一副「食住花生睇好戲」的模樣。

她嘴角泛起一個幸災樂禍的笑容，「我以前經歷過嘅嘢，而家有排你受啊。」

（待續）