第三十九章 <老細的指令>
一大清早,朱生把龔燁叫進辦公室。
朱生的主席辦公室寬敞明亮,簡約大氣,他悠閒地坐在寬大的辦公桌後,靠著旋轉大班椅,嘴正叼著細長的雪茄。
「朱生,咁早搵我有事?」
「坐啊。」
「艷麗熱巴個到,我同佢地公司傾過,佢地肯唔追究。不過始終都要查清楚係邊個嘅過失。」
「放心啦朱生,我已經聯絡左保安部嘅鐵面陳翻查閉路電視,希望可以盡快搵出真相。」
「你辦事,我放心。另外,洋酒批發單生意,我想呀龔你親自帶隊上上海傾。」朱生略略將身軀向前傾,吞雲吐霧地說著。
「朱生,單生意係Jason 跟開,應該由佢地team去?」龔燁有點詫異,明明早已將這單生意轉交Jason,為何兜兜轉轉又落到他手上?
「我知,不過我收到風,接龍都好有興趣,所以我親自打左個電話比佢地主席話想合作,點知佢話一早係大學時期已經識得你,同你傾會方便啲。」
「佢指明要搵我?」龔燁皺起眉頭。
「係呀。更何況你知大陸徵洋酒稅愈黎愈重,佢地一直想落黎拓展香港市場,呢個餅將會好大,比起Jason,我更加信得過你。」
「但係我手頭上都仲跟緊幾個客,未必行得開。」龔燁藉口推塘。
「嗰啲細客你咪彈比Jason囉,再唔係就叫啲細嘅去跟。呢個大客我唔想得失,一於由你去傾個獨家代理番黎啦,唔好再推啦。」朱生斬釘截鐵地道,龔燁亦難以再拒絕,得失了大老闆,後果更得不償失。
「咁幾時要出發?」
「最好下星期啦,我想係接龍班人同佢地傾之前截佢地糊,你親自帶隊上去會有誠意啲。」
「咁好啦。」龔燁嗓音低沉,語調也充斥著無奈。
「其實我都有啲想入股佢地上海個酒莊,過到去你順便幫我視察下個環境,有冇問題?」
「冇問題。」
彈珠臺市場部
「各位,我有個消息要宣佈。」龔燁拍拍手掌道。
若水,Mandy 等大伙同事紛紛放下手頭上的工作,目光一致地移向龔燁。
「下星期我將會帶隊去上海出trip, 傾洋酒批發個獨家代理番黎。我知事出突然,不過希望大家體諒,暫時將手頭上嘅嘢放埋一邊,我地夾手夾腳砌左個proposal 出黎先。」
「又會咁趕嘅?同埋個客唔係彈左比Jason咩?」
「朱生想我地係接龍同佢地傾之前,親自上上海捷足先登。同埋佢話呢個大客,都係想交番比我地team 跟,佢會放心啲。」
「雖然係好趕,但證明朱生好信得過呀龔你,係好事黎架!」
「都係嘅。麻煩Mandy 你盡快幫手book機票食宿,我地下星期五要出發啦。」
「冇問題!」
「咁呢個星期要辛苦大家開OT,捱埋佢我請大家食番餐好嘅。」
「好!」
大家緩緩散開返回座位工作,若水趨上前輕拍龔燁胳膊。
「咩事?」龔燁轉身問道。
「冇,我記得之前你明明話私人理由,唔接呢個客,點解而家…」
「乜你覺得我地做打工仔,老細叫到有得托手踭咩?」龔燁直勾勾的盯著她,眼神冷冰冰的,若水心裡也暗生怯意。
「都係嘅。」若水被他一句弄得啞口無言。
「好多嘢我地控制唔到,所以,做好自己本份啦。」龔燁強顏歡笑,轉身離去。
若水目送他漸漸走遠。今天的他,背影挺拔又帶點孤傲,渾身也充滿著壓抑的氣息,有種拒人千里的冷漠。
你到底背負著些甚麼?
能告訴我嗎?
(待續)
P.S. 大家一定好想睇嘅出trip劇情即將開始,請密切留意