【大清亡國關慈禧蛋牛治】第一回

【常威中史】為慈禧平反系列（五十二）

「所有戰爭都會打兩次，第一次是在戰場上，第二次是在記憶裡。」─阮越清《不朽：越南和戰爭的記憶》

還原歷史真相？孤魂野鬼常威冇咁嘅能力！

發生響百幾年前，一個冇聲冇片時代嘅事，其實冇人會知真相係乜，就算身處21世紀資訊無比發達嘅今日，我哋都好多嘢唔X知，金正恩有幾多核武響手？佢係咪想南北韓統一？習近平點諗？唔通你又知咩？對於歷史，我哋唯一可以做嘅，就係以我哋本身嘅視角去重新理解一啲發生咗嘅事情多一次，希望從中得到一啲教訓同做人處世嘅心得（例如唔好咁易信人，世上冇免費午餐，共產黨可以辣到你唔信等等……），唔好再犯相同嘅錯誤，又或者一切都冇意義，只係鳩講多一次。講下笑，唔講邊有得笑喎！

百幾年嚟，好多人講黃海海戰，北洋艦隊以橫陣（鱗次橫陣）迎戰日本聯合艦隊嘅縱陣（單縱陣）係犯咗戰術上嘅重大錯誤。其實只係鳩講，首先兩隊艦隊事前都冇乜實戰經驗，對手諗乜又唔知，臨場排陣純屬偶然，事後當然一目了然，但事前係完全冇得估嘅。

其次，北洋艦隊以鎮遠及定遠兩艘旗艦為攻擊主力，其餘艦隻響兩側掩護都係正常，W話咁做係劉步蟾丁汝昌貪生怕死嘅舉動，毫無根據。貪生怕死就好似葉問咁，未打就扯白旗自己走先返屋企啦。仲有，橫陣既然係琅威理離職前留低嘅錦囊，有理由相信北洋艦隊一直操練得最熟嘅陣法就係依個，生死決鬥用自己最純熟嘅招式對付敵人，100%正常過正常。而且丁汝昌同劉步蟾心知肚明北洋艦隊嘅航速同機動性都唔夠日本人嚟，亦冇可能排出個以機動性為主嘅縱陣迎敵，排個橫陣，一字排開，希望以最大火力第一時間速戰速決，打開缺口，減低日艦機動性，再兩翼包抄敵人，圍住嚟砌，亦係唯一可以戰勝嘅方法！相信佢哋事前嘅美好景愿就係依個……

仲有仲有，就算調轉嚟，大清排個縱陣，日本排個橫陣，我好相信最後嘅戰果都會係一樣，因為日本聯合艦隊無論響各方面都秤先北洋艦隊幾皮（前文已經講過），北洋可以打贏黃海戰役，唯一只能靠運氣，但當年大清國勢頽咗五十幾年，邊有運行吖？國家冇運行，人亦冇運行，要贏？1840鴉片戰爭、1860大戰英法聯軍、1880中法戰爭早就贏咗喇。而且打仗嘅嘢，邊有運氣存在？生死相摶，實牙實齒，我有原子彈響手，你強運到期期中六合彩都冇用！

如果有運，定遠嘅第一炮就命中吉野號喇！打得中，成件事就唔同睇法。可惜距離命中目標相差咗幾百米！一字排開嘅北洋艦隊隨後相繼向5公里外嘅敵艦全力開火，日本艦隊裝備嘅速射炮要到3公里距離先可以發揮最佳效果，於是日本艦隊排成直線縱陣，減低命中炮火機率，一邊忍住清艦嘅炮火攻勢，一邊開足馬力前進靠近對手，發揮聯合艦隊機動性嘅強絕優勢。

當兩艦隊間距離縮小到3000米左右時，日艦全軍向北洋艦隊發起猛烈炮擊，集中火力攻擊北洋旗艦定遠號！

用左半日由頭追到LIVE...

LM

【常威中史】為慈禧平反系列（五十四）

自從常威開咗依個專頁講吓晚清歷史，就有人話我係黃屍，奇又奇在又有人話我係五毛？有人話我對清代專制政權塗脂抹粉，又有人屌我唱衰中國。其實講吓歷史狗噏啫，我冇諗咁多嘢，而且有政治立場又點jet？人係政治嘅動物嚟架，冇人可以離開政治存在，好多港豬唔講政治唔理政治以為就可以獨善其身？

我想講，碎肉機一經開動，最後人人有份，永不落空。

甲午黃海海戰，由中午12:50分開打，打咗20分鐘，到咗13:10分，其實高下已分，北洋艦隊嘅火力優勢一閃即逝，超勇艦、揚威艦分別中彈起火，船員冇法控制火勢，先後沉沒，超勇揚威艦沉時，全軍棄船，超勇管帶黃建勳，揚威管帶林履中跳海自盡，與船同亡，其餘船員一部份被魚雷艇救起，離開血腥戰場。

日本艦隊重整隊型，集中火力圍剿大清鎮遠、定遠兩艘鐵甲怪物，北洋水師全軍博命還擊！當中致遠艦管帶番禺人鄧世昌（1849-1994）真係英雄！15時10分，日艦扶桑號一枚炮彈擊中旗艦定遠艦首爆炸，船艙入水，幸得鄧世昌致遠艦趕到救援，以炮擊逼開敵艦，為定遠旗艦爭取時間排水，定遠失至可以頂到落去。但致遠艦救得人時，自己亦身受重傷，艦體傾斜，生死關頭，廣東人鄧世昌睇到敵人旗艦吉野號響自己面前，如果撞沉佢，大局或者仲有機會扭轉，於是較準角度，全速向吉野撞埋去，同佢一齊杏加橙同歸於盡，但大清實在冇運行，致遠艦中途俾水雷擊中，鍋爐爆裂，壯舉成空！依枝水雷原本係射向重傷嘅定遠旗艦，只不過中途誤中致遠！慘到想死！日本人真係有運行！

致遠沉沒時，鄧世昌同全艦250名船員一齊跌落海，悲壯到最後只有7人生還！當時鄧世昌生活相當西化（其實大部份北洋海軍高級軍官都係半個西人），佢養咗兩隻狗（至經係咩狗我唔知），兩隻義犬同鄧生一齊沉入大海殉國……亦有野史話鄧世昌係廣東佬，唔鍾意比福建佬救，結果冇上到福建人嘅救生艇咁講，大家有性趣可以自己揾吓資料昅昅。

致遠沉嗰陣，已經係下晝15:30之後，黃海海戰大局已定，濟遠艦管帶方伯謙（1853-1894）（佢係同徐步蟾一齊留學英國嘅同學）掛出重傷信號旗離開戰場，廣甲號見佢走，自己又走。濟遠走嗰陣，仲撞到重傷嘅揚威號，結果揚威艦擱淺。

廣甲號逃走中途迷路，最後觸礁擱淺大連灣，幾日冇人救援，最終被日本艦發現，被迫自爆沉沒。濟遠平安回航，但管帶方伯謙其後被光緒下聖旨話佢臨陣退縮，聖筆一勾，軍前正法斬頭。喂，有冇九兩菜先？方伯謙先生嘅濟遠號已經由1點打到3點先走，彈盡重傷，點算臨陣退縮呢？同埋帶番隻艦完完整整返屋企，保留實力下次再鍊過，錯乜卵嘢先？方伯謙實在死得好冤枉！

大清衰啲乜？咪所以啲嘢囉……

下回再talk……

【常威中史】為慈禧平反系列（五十五）

黃海大戰打到16點左右，已經係一個圍攻嘅局面，北洋艦隊一隻隻被擊沉，或被撤退離開戰場，只剩低鎮遠同定遠兩艘皇牌主力孤兒仔繼續同對手周旋火拚，日本聯合艦隊亦傷痕纍纍，司令伊東祐亨身處嘅松島旗艦唔卵沉根本又係天照大神保佑下嘅大奇蹟，日本海軍大臣樺山資紀（後來成為臺灣最高行政長官）坐嘅西京丸號更加神奇地避過幾次魚雷攻擊，仲有比穿甲彈貫穿船艙直出直入都冇事，連佢自己都話Lucky！打仗同踼波一樣，點都要有小小運氣，大清冇運行日本有，吹咩？

16點30分，大清北洋艦隊原本參戰嘅10艘戰艦只剩低4艘響戰場，定遠同鎮遠旗艦、來遠、靖遠兩艘輔艦起晒火，兩艘重甲旗艦遍體鱗傷，日軍事後統計，定遠艘被擊中2000發大小炮彈仍然頂X得住，你都咪話唔X勁囉！如果兩艘旗艦打X埋柴，亦唔會有之後嘅劉公島大戰。

黃海之上，定遠鎮遠係都唔沉，死頂住日本松島、千代田、嚴島、橋立、扶桑五艦圍剿，日軍都冇曬計，日落時份，劉步蟾指揮兩艘旗艦將日軍引離大東海溝，等另一邊大清陸軍可以完成鳩登行動。一場驚天大海戰一直打咗4個半鐘，到黃昏17時45分，伊東祐亨驚入黑會被大清魚雷艇偷襲，於是發出停戰旗號，雙方艦隻退出戰場，黃海海戰結束。

夜幕低垂，北洋艦隊折返大東海溝，確保陸軍完成鳩登行動，先駛返旅順港海軍基地。

黃海一役以日本聯合艦隊完勝作結。日本一隻艦都冇沉，北洋水師損失5艘戰艦，大清死傷837人，日本死傷298人，日艦發炮命中率為15%，大清10%，瓣瓣都係日本人秤先……

輸還輸，但北洋海軍冇衰俾人睇，冇臨陣退縮，一於同日本人鍊過，唔夠一件事抽唔贏打冇辦法，我唔要條命，你想贏我都要有冇命嘅準備！勇武就係咁解！百幾年過去，公道啲，唔可以睇低抹黑依班盡忠死戰嘅海軍英魂，William Ferdinard Tyler條撚様1929年出本書鳩噏抹黑北洋艦隊，正仆街。呃稿費有啲良心好啲。（常威遲啲都出書呃錢，其實又係仆街一條……）



【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【常威中史】為慈禧平反系列（五十六）

1894年9月17號，平壤淪淊、黃海海戰災難性慘敗嘅消息傳返去清廷，成班皇族成員先大吃一驚（吓？會輸嘅咩？），光緒嚇到瀨屎（唔漏精），拿拿臨要求李鴻章善後，同時退咗休嘅豆斗立刻擺駕離開頤和園，返去紫禁城旁邊嘅西宛接見軍機大臣翁同龢同李鴻藻聽匯報，唔聽由自可，一聽就知大撚鑊。

原來光緒條仆街仔同佢身邊嘅擦鞋仔一直將軍情瞞住豆斗，甲午戰爭發生以來，關於戰爭嘅報告都係「封奏」，即係直達皇上，旁人冇得過問，豆斗作為一個退休嘅前領導人，根本唔知道成件事嘅發展。當佢知道平壤失守、黃海戰敗，即刻批出300萬兩白銀（折算9億港幣）交畀李鴻章應急（唔知道李生中間又cap咗幾多呢？），同事決定長時間留響西苑處理國事，亦即刻下令停辦佢嘅六大壽慶典，後世人成日話慈禧要攪六十大壽駛錢，攪到北洋海軍冇錢買炮彈打輸比日本人，其實係100%誤會咗豆斗，如果成件事由豆斗揸莊，一定唔會輸得咁難睇，我常公子可以肯定。

其實豆斗六十大壽已經籌備咗三年，籌備嘅人又係嗰條死契弟翁同龢，黃海海戰慘敗後，慈禧下令將一切停止，停止撥款，將原本預備好嘅所有慶典材料都封存庫房，咁大家認為慈禧有乜嘢錯先？之前佢唔知道咁大件事，知道咗之後即刻刹停，其實相當負責任。

要屌，點解淨係屌豆斗同李鴻章？唔屌大清亂柒咁嚟嘅最高領導人劉晶？唔屌成日攪鳩北洋海軍銀頭嘅頭號軍機大臣契弟翁？唔屌吓嗰啲喺黃海海戰中宣佈中立嘅清流名士張之洞同劉坤一？佢哋手上面嘅福建水師同廣東水師，點解唔喺呢個時候出動？牽制日本聯合艦隊？等日本人唔好貿貿然就直指大清心臟？家陣你張之洞同劉坤一係咪搞獨立呀仆街？

黃海海戰勝利之後，日本人已經全面奪取咗黃海制海權，真正可以為所欲為。其實事前日本人並冇100%信心打贏大清，我講過佢哋都係將國運豪賭一鋪，海軍大臣樺山資紀曾經制定咗上中下三策應對時局發展：

上策：打贏海戰，海陸兩軍全面進攻中國，奪取遼東半島，然後直取天津、北京，打巢大清。

中策：如果海戰未能分出勝負，日軍就只佔領朝鮮，以保住朝鮮半島嘅勝局。

下策：如果日本聯合艦隊打輸，日本就會全面退守返去本土，守住個大門口，等待時機再鍊過。

事情發展到呢度，明顯係最理想嘅故事情節，日本人已經勝券在握，全面進攻大清，中日歷史上第一次侵華戰爭，正式開始。

【常威中史】為慈禧平反系列（五十七）

有樣嘢都幾搞笑，1894年9月17號北洋艦隊黃海大敗，但係李鴻章最初收到嘅風係北洋水師重創日本聯合艦隊（唔通又有人虛報軍情？），直到23號佢先知日本一隻艦都冇沉，而北洋則損失咗五艘主力戰艦！中國人有陣時真係幾童子軍跳彈床。

9月24號，李鴻章發電報畀響旅順港（外號遠東第一要塞，投資折合港幣過千億）嘅丁汝昌，催佢儘快恢復北洋艦隊嘅作戰同巡航能力。因為日本仔嗰邊，黃海海戰後嘅五六日內已經將所有受損嘅軍艦全部修復完成，重新出海巡航。

丁汝昌answer做唔到，亦反映咗大清同日本之間嘅後勤技術分野，佢老母係天同地。北洋水師主力定遠鎮遠兩艘海上巨獸損壞嚴重，零件不足，修船工作效率極低，甚至有師父見到兵情危急走埋佬。卒之拖吓拖吓，拖到10月18號，北洋水師先可以離開旅順港，重新巡航於旅順同威海衛之間，守住渤海，守住可以直插中出大清嘅大沽口門戶。

但係呢一個月之內，日本陸軍已經完全將清軍殘餘部隊掃蕩出朝鮮半島之外。取得完全制海權嘅日本更加將30000士兵從日本本土送到朝鮮登陸，預備發動全面侵華戰爭。

自從經歷咗葉問平壤一戰，日本人已經摸透咗大清陸軍嘅底牌，日本人知道大清陸軍應該係----低能嘅！所以軍隊信心大增，驚都未驚過，經過9月中到10月中無數大小戰役，清軍節節敗退，未X贏過一場，全軍退守鴨綠江返回中國。

1894年10月29號，日本陸軍正式橫渡冰冷嘅鴨綠江，踏入大清國土殺佢老母。明治維新日本陸軍之父山縣有朋（1838-1922）同日被伊藤博文解除司令官職務，改由野津中將揸旗侵華，臨別之前，山縣有朋留下一首七絕畀野津同桂太郎（1848-1913，日本政壇猛人，之後三度成為日本首相），詩曰：

「馬革裹屍元所期，出師未半豈容歸？天子急召還故里，臨別陣頭淚滿衣。」

喂！究竟佢係日本人定中國人？從依首詩大家亦可以睇到，當時嘅中國人同日本人，其實文化差異並唔係咁大。

日本人正式侵略大清，紫禁城裏面，豆斗已經搬番西宛，復出揸番大清枝旗，劉晶立刻收皮。豆斗睇返曬啲文件同埋瞭解番整件事情嘅來龍去脈後，得出一個結論就係「李鴻章誤國」，將甲午戰爭隻鑊推曬畀李鴻章孭，但係佢又冇懲罰李鴻章喎，只係降咗佢職同收番佢件「黃馬褂」，佢兩個明顯喺度扯緊貓尾。

打到嚟喇！點算啫？

#常威 #慈禧太后 #晚清歷史 #甲午戰爭 #李鴻章 #山縣有朋

【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ

特別推介【碌葛男人嫁得過】線上購閱
https://play.google.com/store/books/details?id=e1N7DwAAQBAJ

【大清亡國關 #擦鞋文化 蛋牛治】

中國人嘅社會裡面有兩樣嘢好失敗，第一樣係貪污文化，人人都貪，只要有機會就上下其手，左偷偷又偷偷，好鍾意攞一啲唔屬於自己嘅嘢，大概用另一個term講，呢啲叫共產主義，你嘅即係我嘅，我嘅當然係我自己嘅啦。除咗貪污，仲有一樣野叫擦鞋文化，中國人係擦鞋文化嘅鼻祖，有一個故事我想同大家分享：

好多年前，我有個朋友做警察。佢話我知，有一日佢哋差館收到風，當時嘅警務處長會去附近行山，因為警務署長係一個行山愛好者，當成間差館知道警務處長行蹤嘅時候，嗰日早上，成個山頭差唔多都係差館嘅高層警務人員（注意係高層，散仔冇份啊），個個扮曬行山愛好者，目的就要同警務處長一齊行一段。結果嗰朝警務處長喺山上「撞到」幾十個人，一行人就浩浩蕩蕩行完個山。呢個行山嘅故事，表達咗一樣嘢，就係好多人熱愛大自然，除非唔係。

中國人嘅擦鞋文化仲有一樣嘢經典，擦老細鞋，無非都係想得到利益或好處，但中國人就唔係，有時候只係為咗擦鞋而擦鞋，老細上司對你衰到仆街你都繼續擦，擦鞋嘅境界已經超出左擦鞋本身，進入咗奴性嘅層次，當然身為奴隸有幾咁正斗同心安，就係我哋中國人自己先清楚明白……

【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！

https://youtu.be/LbXRnsjvGbo

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

其實鎮遠定遠號真係幾把炮, 只可惜訓練不足(根本無心訓練,無經費) D司令官又廢(靠關係上位), 係有一個鬼佬就副司令GE(不過無實權)
加上炮彈火藥不足(一半係沙), 第一炮就擊中日本旗艦, 不過冇爆
我地個司令就比人第一炮打9死左, 所以係軟件跟唔上硬件

係北洋艦隊果D鬼佬
係咪都戰死哂?

啲鬼佬上錯船

【常威中史】為慈禧平反系列（五十八）

豆斗西面，將李鴻章降級作為懲罰，但係冇影響到李鴻章嘅實際權力，一句「北洋無人可易」，冇咗件黃馬褂嘅李鴻章仍然係大清皇室唯一一條救命草，係呢個時候，豆斗仲請返恭親王奕訢（1833-1898）復出領班軍機大臣。喂，大佬，李鴻章71歲，恭親王61歲，豆斗60歲，加埋成200歲，大清真係無人可用？來來去去得嗰幾両友走嚟走去。（註：豆斗返西宛，劉晶已經宣佈全面收皮）

豆斗知道大局已定，打就一定唔夠日本仔打，於是開始採取和談策略，由大英帝國出面調停向日本明治政府議和，唔使講大清當然要賠錢喇，但係條件開出，日本完全冇反應，繼續調動軍隊攻打大清本土。等待日本答覆嘅時候，國難當前，李鴻章不忘向豆斗祝壽，佢專登預備咗九件名貴禮品送畀豆斗，寓意長長久久，禮品名單如下：

「鑲玉如意九柄，赤金壽佛九尊，寶鑽金錶九件，福壽金杯九副，鋼鑽帽花九朵，純緯黃緞九端，七寶金爐九座，七寶金瓶九個。」

大清官場文化大家可以體驗一番。仗可以打輸，嘢可以做錯，但係鞋一定要擦啱！李鴻章及時擦鞋補鑊。講真，都唔係大清喇，今時今日嘅香港咪一撚樣，做官最緊要係乜呀？擦鞋呀！識做人！做世界仔呀！最緊要上面話ok！自己冇立場架！中華民族唔拋棄依啲擦鞋文化陋習，想登上世界第一，獨領風騷，仲有一百年呀傻逼。

1894年11月頭，由野津統率嘅日本陸軍一步步深入中國領土，矛頭直指外號遠東第一要塞，投資折合港幣過千億嘅旅順軍港，清軍兵敗如山倒，完全擋唔住日本陸軍嘅推進。

11月7號，日軍逼近旅順，仲響未有一個人傷亡情況下，就佔領咗清軍喺大連灣嘅所有炮臺陣地，情況係，清軍一見日本人嚟，就雞飛狗走，日本人仲喺陣地內搵到清軍響大連灣內嘅水雷配置圖，於是依住張圖將大連灣內嘅所有水雷清除。冇曬水雷，日本聯合艦隊集結，響遼東半島花園口登陸，向中國不停加兵。

唔知大家記唔記得，丁汝昌先生嘅北洋艦隊已經響10月中出返海巡航，但係佢完全冇阻止到日本聯合艦隊向中國運兵，有傳說話丁汝昌係專登係海上避開日本艦隊，因為一碰頭，就肯定全軍覆沒，由於丁汝昌採取「你睇我唔到、你硬係睇我唔到」嘅偉大戰略，渤海嘅海防已經全面崩潰，日本人予取予攜。李鴻章見到旅順危在旦夕，即刻下令所有海軍陸軍要守住旅順，但係丁汝昌只係返過旅順一晚吹吓水，即刻急急腳返番威海衛「保留實力」。

嚟到依度，大家（大中華膠）係咪好心痛呢？我就係喇！咁號稱十九世紀遠東第一要塞嘅旅順軍港究竟可唔可以當住日軍嘅魔爪呢？

其實我賣關子都係……多舊魚。

下次繼續窮途如末路，兵敗如山倒……



【大清亡國關慈禧蛋牛治】實體購買
https://www.382now.com/product?id=87 

 【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

你吹水啦，我追左3日

【大清亡國關 #港珠澳大橋 蛋牛治】

😝港珠澳大橋最近通車，香港同澳門珠海連成一線，但係實際嘅經濟效益我哋未睇到，反而副作用提早出現。大型基建，往往係一個社會經濟起動嘅火車頭，美國特朗普政府嚟緊就會大力推銷佢嘅16000億美元重型基建大計，去boost起返經濟。時局低迷，已成定局，香港股市連跌十個月，亦已經破咗之前嘅所有數據（之前最長嘅跌市係八個月），可以預期，一場史上最大嘅熊市即將出現。

😘推根究底，亦因為美國之前印銀紙印得太多，當然中國亦印唔少，貨幣唔係印出嚟嘅，如果印銀紙可以解決問題，世界上基本上沒有問題。歷史行到而家二十一世紀二十年代，其實問題有好多，而且好多都好似冇辦法解決咁，相同嘅情況喺20世紀初期都出現過，國家與國家之間嘅問題冇辦法透過談判、磋商、諒解去解決，最後只有訴諸戰爭。

🤔當然冇人想戰爭發生，因為核武存在，現代世界發生大型戰爭嘅機率亦都細好多。而且人類經過100年進化，基本上智慧有咗增長，我哋應該能夠發現除卻戰爭之外，更多解決問題嘅方案同辦法。而且教訓已經放喺前邊，大家應該一清二楚。我對未來，某程度上充滿信心。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🔦http://yt1.piee.pw/DDV9T

😜https://youtu.be/cejv4Ma_JHA

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】為慈禧平反系列（六十）

喃嘸阿彌陀佛。

1894年11月21日，日軍攻佔旅順後，對市內各處流散嘅清兵進行咗四天三夜嘅血腥大清洗，史稱旅順大屠殺。

旅順大屠殺嘅死亡人數非常參差，由幾千人到二三萬人不等，但無論如何，日本陸軍的確做出咗人類歷史上可圈可點嘅禽獸行為，當時響旅順嘅美國同英國記者記述咗呢件慘無人道嘅大屠殺，日本鬼子兵以狩捕清兵為藉口，（順便）血腥殘殺平民百姓、殘殺婦女兒童，有相有真相，日本人冇得抵賴。會殺平民女人同細路仔嘅軍隊，無論外表幾文明都好，其實都只不過係一群禽獸……

發起大屠殺嘅理由，不外乎係日本陸軍話清兵之前曾經虐殺佢哋嘅同胞（斬首分屍），因此以眼還眼，要進行血腥報復。呢個理由唔成立囉，打仗嘅嘢，一係我殺你一係你殺我，邊有話啱定錯？個情況好似1860年英法聯軍火燒圓明園，洋人都係要為咗報復清軍之前嘅殘酷行為，你信唔信先？（燒還燒但偷嘢喎）

毛澤東講過「世界上冇無緣無故嘅愛，亦冇無緣無故嘅恨」。

睇嚟甲午戰爭之前日本人己經對清國人恨之入骨，中日嘅仇怨始於明朝，由豐臣秀吉征韓開始到倭寇，日本人一直視明、清兩國為最大敵人，而且喺日本人心目中，日本係長期俾明清兩國壓住。正所謂受咗你咁耐氣，一鋪還返畀你。但係睇返轉頭，明清兩代真係冇做過乜嘢對日本人唔住（如果大家發現有，唔該話畀我知），日本人旅順玩大屠殺，我常公子衹能夠回應一句：

「日本禽獸！我X你老母！」

古往今來，戰爭基本上係一個高尚行為，戰士保家衛國，為自己嘅理念信仰而戰鬥（唔理你信嘅係真定係假），拋頭顱灑熱血，死而後已，無論贏輸都應該值得尊重。但踏入19世紀下半葉，戰爭變成咗帝國同帝國之間嘅權力競爭遊戲，戰爭嘅崇高性開始逐漸消失，剩低嘅只淨返血腥同埋掠奪，人類隱藏喺潛意識裏面獸性開始被喚發出嚟，結果喺第一次世界大戰同埋第二次世界大戰大放異采，全人類自食其果。再講一次，碎肉機開始轉動，任何人都難以獨善其身！

20世紀中期後，人類邁向真正嘅文明進步嘅黃金時代（Golden Era），其實真係要多謝原子彈嘅發明者奧本海默同愛因斯坦，佢哋兩位之後表示好後悔好內疚發明原子彈，但係我想同佢哋講，其實佢哋拯救咗無數生命。呢個世界永遠無辦法用道理同仁義道德講得服一隻「禽獸」，想佢聽話扮番個文明人，唔該用支槍指X住佢個頭。

旅順失守，日軍深入遼東半島，下一個目標，係大清最後一道（豆腐）防線：威海衛軍港！

甲午戰爭嘅一連串慘敗，令所有清國人知道自己嘅國家真係無能兼On9，完全唔夠日本人打，一部分人開始醒覺過嚟，好似奪命書生孫中山就響1894年10月投稿上海《萬國公報》，一篇《上李鴻章書》要求大清痛定思痛，作深刻同全面嘅政治體制改革，否則國破家亡指日可待。

革命之火開始燃燒鳥！

張獻忠屠四川屠左幾百萬人
清狗入關都屠左幾座城
提都唔提

八國聯軍同旅順屠殺加埋都唔個有冇三萬人就屌到仆街

【常威中史】為慈禧平反系列（六十一）

一啖砂糖一淡屎，上回屌完日本人凶殘，今日要讚佢哋專業。其實甲午戰爭史料大部分都係由日本人留低，後世人能夠對甲午戰爭有深刻理解，都係多得佢哋同外國記者嘅真實記錄。而大清呢？完全係冇囉，佢哋連一個正式嘅詳盡官方戰爭記錄都冇，民間相關嘅記述亦少之又少，好似場仗輸咗、人死咗、錢賠咗就冇咗件事咁，根本一啲都唔尊重戰場上為國捐軀嘅戰士！死嘅人好多時候連名都冇（亦冇狗牌），更加唔會學人哋咁將英靈供奉係靖國神社至今。

連一個戰事完整紀錄都欠奉，更莫論話媒體監察，當時開始踏入20世紀嘅大清國同大清國民，其實徹底同大時代文明脫節，再唔變，亡國都係應份。

大力叉開一筆，因為人民公社大躍進運動而發生喺1959-1962年之間嘅三年大饑荒，到咗今日，中共官方仍然冇一個具體嘅說法，究竟死咗幾多人冇人知？點樣死？喺邊度死？點解會死？亦冇人講冇人承認。3500萬？2500萬？抑或1500萬，亦都冇具體數字留低。世界上最悲哀嘅事，莫過於此。

中共老黨員、資深新聞工作者楊繼繩先生就寫過一本叫【墓碑】嘅書，詳述咗依一場可能係人類歷史上最大嘅饑荒。佢話寫本書嘅理由係為咗死嘅幾千萬人立一個墓碑。因為佢哋連墓碑都冇，佢哋生命就白白流逝響歷史之中，冇人再記起，亦都冇人再提起，就好似從來未發生過一樣。【墓碑】就係用文字為佢哋立碑。楊繼繩講，你唔敢面對歷史，你就永遠唔能夠抬起頭來。你唔夠膽面對錯誤，你就永遠唔可以理直氣壯咁去做人。你係邊位？大家心知肚明。

係咪做中國人就要咁命賤先？由乾隆爺死咗開始，就賤到今時今日，我哋究竟做錯啲乜？今日係香港講句說話都會犯法，歷史唔係開倒車，揾鬼信。

講返甲午戰爭，日軍佔領旅順大連大屠殺後，原本軍事部署係直取直隸，用1860年英法聯軍嘅行軍路線進攻天津同北京。但當時係12月，冰冷天氣同埋結冰嘅渤海灣不適宜登陸作戰，於是日軍改變戰略，先集中火力進軍威海衛，徹底粉碎北洋水師剩低嘅殘餘戰鬥力。

補充返小小資料，豆斗六十歲生日係農曆十月初十，即係新曆11月7日星期三，當時日軍已經登陸遼東半島向旅順步步進逼，金州失陷。豆斗嘅大壽慶典如期舉行，不過係低調行事，比起原本嘅安排相差十萬八千里，名副其實喪事當喜事辦。

去返12月頭，大清一心要保護山東半島上最後一座軍事要塞威海衛，中央加派軍隊進入山東半島防禦日軍，大力撥款招募新兵，最高總指揮亦由李鴻章改咗劉坤一。可惜大勢已去，根本冇人願意參軍去送死，原本嘅軍隊亦有大量逃兵，甚至有嘩變發生。12月26日日軍順利掃盪清軍沿岸防務，完成大規模登陸，將遼東半島嘅軍隊橫越黃海輸送到山東半島，同旅順戰爭一樣，聯合艦隊海路進逼，配合陸軍，直取北洋水師嘅最後據點、丁汝昌同劉步蟬身處嘅威海衛軍港。

預備好生鴉片未？



【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【大清亡國關 #候賽因 蛋牛治】

😝侯賽因的確係一個獨裁者，佢在位嘅時候，被美國同埋西方媒體形容為一個殘暴不仁嘅專政領袖，美國推翻侯賽因，藉口係伊拉克國內擁有巨大殺傷力武器，而且打算向美國或其中東盟友作出攻擊。但係事後證明，呢件事並冇具體證據支持，總之推翻咗就推翻咗，侯賽因亦死咗，件事一了百了，其實好精彩。

😘伊拉克自從候賽因政權倒臺之後，亂局一直維持到今日，整個國家仍未有另一股勢力，可以打敗其他勢力取得統治伊拉克嘅合法權力，咁樣一亂就亂咗十幾年……侯賽因倒臺之後，伊拉克嘅石油利益當然由美國企業獨佔，咁究竟美國推翻侯賽因政權係唔係為咗石油？我諗答案已經相當肯定。

🤔侯賽因政權嘅崛起，係兩伊戰爭。兩伊戰爭中美國嘅立場係幫伊拉克打伊朗。中東亂局，始於70年代初期，當時嘅美國啱啱由尼克遜放棄金本位，係世界經濟火車頭，連蘇聯都唔夠膽正面挑戰佢，但係中東嘅幾個產油國，佢哋嘅國家力量只係屬於第三世界水平，竟然係嗰個時候連成一線，利用石油供應向美國政府施壓，導致所謂世界石油危機，美國對呢件事其實懷恨在心，之後嘅日子裡面，美國人明白中東諸國再唔可以再團結起嚟，最好就七國咁亂，之後美國人做嘅嘢，都係朝住呢個大方向進發，直至今日。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🔦http://yt1.piee.pw/D9R4W

🚀https://youtu.be/0oTgvAP_BGY

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】為慈禧平反系列（六十二）

相信金正恩呢條肥仔上臺時，冇乜人睇好佢，但係佢竟然成就咗偉大功業，隻手結束咗維持咗70年嘅朝鮮戰爭，實現朝鮮半島無核化，開放改革，真係唔好睇小肥仔（目測230磅）。事後睇返轉頭，有理由相信佢之前剷除張成澤、崔龍海等舊臣，並非鳩做，極有可能係剷除阻擋南北韓和平嘅舊派絆腳石，政治嘅嘢，真係冇咁容易俾你睇透。

1895年1月，日軍響山東半島捷捷勝利，1月26日全面進攻威海衛軍港，比起佔領旅順軍港，日軍遭受嘅抵抗比較強烈。但係清兵仍然冇辦法阻擋日本人攻勢，以定遠鎮遠兩艘旗艦為首嘅殘餘北洋艦隊，試圖喺海岸線上用炮火支援陸軍，保衛威海衛，可惜效果欠奉。1月30號，威海衛南岸陣地完全失守，北洋艦隊完全暴露係已經被日軍佔領嘅炮台射程之內，用大清嘅炮射番大清嘅戰艦，陰公豬。

2月3日，威海衛東岸陣地相繼失守，整個威海衛軍港同所有炮台差不多比日本人完全佔領，陸軍雞飛狗走，北洋艦隊孤零零漂浮喺威海衛同劉公島之間嘅水域等死，2月5日深夜時份，日本利用魚雷艇發動夜襲，定遠中魚雷響淺灘擱淺，船身入水傾斜，丁汝昌下令炸沉定遠。

回天乏力，丁汝昌同劉步蟾率領鎮遠艦同魚雷艇退返劉公島作垂死掙扎，2月7號，聯合艦隊23艘軍艦全力進攻劉公島，大清最後九艘魚雷艇全被殲滅。2月8日，日軍佔領劉公島。北洋水師冇路可走，被迫喺海面四處躲避，完全捱打。2月12號，北洋水師派遣代表程璧光前往日艦商量投降事宜，向日軍投降後，當夜丁汝昌、徐步蟾吞生鴉片自殺，丁汝昌享年59歲，劉步蟾享年42歲。

除咗佢兩個，仲有劉公島陸軍指揮官張文宣同時自殺。北洋水師到此全軍覆沒。17號，日清雙方正式簽字落印，即日履行交收航艦同港口事宜，日軍釋放戰俘4000餘人，當中包括不少高級將領同外國僱傭兵。

德國嘅手工藝極品鎮遠旗艦都最後都冇沉到，投降後被編入日本聯合艦隊，沿用返鎮遠個名，服役到1912年於橫濱解體。

丁汝昌自盡，寧死不降，贏得日本軍人敬重，伊東佑亨用商船將遺體送返中國、同立碑以表敬意（日本人真係一個好分裂嘅民族，一邊咁靚仔一邊玩大屠殺……）。關於丁汝昌同劉步蟾生吞鴉片自殺嘅事，有人話佢哋隨身帶住鴉片，明顯煙癮好大。佢哋兩個有煙癮應該一定。當時大清北洋海軍屬於高級官員，有舖煙癮係當時生活潮流，一啲都唔需要覺得奇怪。反而係佢哋典解要採取呢種自殺手法？手槍佢哋一定有，一粒子彈射入個口一了百了，又何需用咁痛苦嘅方法去死呢？睇嚟佢哋只係想增加自己嘅死前受苦時間，以表達自己嘅愛國心同悔咎心，唔識屌就唔好亂屌唔該。

想提提一個人叫蔡延干，佢係北洋水師魚雷艇艇長，佢被俘虜後作咗首詩，詩曰：

「渤海清兵勢力微，日東軍士向前馳，此敗沙場君莫笑，他年再戰決雄雌。」

甲午戰爭後佢返番清國，歷任大清海軍部軍制司司長，中華民國海軍中將，民國總統府副大禮官，中國紅十字會副會長等職務，晚年歸隱，用心翻譯，喺清華大學同燕京大學教授中國文學。

邊個話大清冇人？祇不過係唔識用人，用廢官用狗官用貪官用擦鞋仔，唔死都幾難啦屌？

#常威 #慈禧太后 #晚清歷史 #甲午戰爭 #丁汝昌 #劉步蟾 #鎮遠 #威海衛

相信金正恩呢條肥仔上臺時，冇乜人睇好佢，但係佢竟然成就咗偉大功業，隻手結束咗維持咗70年嘅朝鮮戰爭，實現朝鮮半島無核化，開放改革，真係唔好睇小肥仔（目測230磅）。事後睇返轉頭，有理由相信佢之前剷除張成澤、崔龍海等舊臣，並非鳩做，極有可能係剷除阻擋南北韓和平嘅舊派絆腳石，政治嘅嘢，真係冇咁容易俾你睇透。

可唔可詳細啲講下

【大清亡國關 #大屠殺 蛋牛治】

😝2018年係Donald Trump年，上半年不停係特朗普同金正恩，下半年不停係特朗普同習近平，對手調咗，但係始終都係特朗普，美國總統先係世界舞臺嘅主角，到咗今日都係，所以我哋只可以相信美元為最值得信賴嘅交易貨幣，相信美債先係最後嘅金融基石。美國嘅霸主地位喺短時間內應該難以動搖，中國要追趕佢，除非軟實力加強，除非即刻出現大規模政治改革，否則係50年之後嘅事。

😘日本人係一個好奇怪嘅民族，一方面謙謙有禮，另一方面殘酷不仁。某程度上同德國人非常相似，一面聽住舒伯特音樂一面將猶太人送入毒氣室處決……係德國人日本人先做得到。旅順大屠殺係中國人同日本人仇恨嘅開端，呢份仇恨到咗今日仍未正式消解。

🇯🇵日本今日面對嘅問題，係人口老化，再過十年，日本一半以上嘅人口係60歲以上嘅銀髮族，過去十年，日本用喺社會福利開支已經上漲咗一倍。但係日本為咗維持佢哋大和民族血統純正，一直冇大規模放寬移民政策，大量接受外國移民。當然佢哋都心知肚明，一旦放寬移民政策，投入嘅新移民多數係韓裔、中國人或有中國血統嘅人。但係嚟緊嘅世代，日本一定要咁樣做，否則個國家一直老化落去，只會比大時代越拋越遠……

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🔦https://user35103.pics.ee/DK6LC

🇯🇵https://youtu.be/cnbsPUREOk0

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/