【大清亡國關慈禧蛋牛治】第一回

1001 回覆
108 Like 23 Dislike
2019-04-02 10:49:52
【111回:大清亡國關 #雨天 蛋牛治】

😚整場戊戌政變,慈禧太后完全係被動者。一切都係光緒帝燈蛾撲火,自取滅亡,與人無尤。由一開始北京大裁員禮部人事大地震,即「六堂官事件」;再不斷加新人入自已陣型,然後前後兩次向豆斗提出召開「懋勤殿」,另立中央建議;喺慈禧太后心目中,係前後兩次對佢赤裸裸嘅奪權。第一次推咗你已經唔同你計,你仲要嚟第二次,咁就真係冇辦法。

😃好多人認為百日維新係中國現代化改革嘅重要里程碑,但係我話畀大家知其實百日維新祇不過係一場宮廷政變;同60年代中國發生嘅文化大革命一樣,只係一場宮廷政變權力鬥爭。想奪權嘅人係光緒皇帝,搞事嘅人亦係佢,出賣國家嘅人亦係佢。到咗最後黑臉白臉調轉咗,捍衛大清帝國利益嘅慈禧太后變咗大奸角,反而一心要賣大清嘅光緒帝就流芳百世,真係打波先嚟落雨,冇計。

😄近一兩年好少聽人講政治,社會風氣又變咗。林鄭月娥上臺之後真係有辦法,技術官僚就有技術官員嘅好處。如無意外,下一任嘅特首張建宗(我估)都會沿用同一條管理路線,大家講少句,凡事和稀泥,引頸待斃,大限將臨,有本事就走,冇本事就留低,就係咁簡單。不過又可以走得去邊?世界好大,但其實又好細。早十幾年前有人同我講,移民英國好正;十年前又有人同我講,攞綠卡做美國人冇得頂;幾年前有人同我講,移民臺灣都係一個唔錯嘅選擇;我仲記得有人同我講過,與世無爭嘅人間樂土係新西蘭……

😄打埋開口牌,各位上我條youtube channel睇片,唔該同我睇吓啲廣告,或者click入去兜個圈,畀我賺多少少廣告費,畀啲甜頭我同阿潮繼續經營一條全球廣東話近代史粵語頻道!多謝大家!

♎【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!好快!好快!衝上2000訂戶!

🍳http://yt1.piee.pw/FR52J

🍳https://youtu.be/OEhUcqhyW8w

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-03 11:23:39



【常威中史】慈禧平反系列(一百四十三回)

俄國佬天下無敵嗰支 #波羅的海艦 隊原本嘅終點係 #旅順港,支援遼東半島上嘅俄軍作戰,但係當1905年5月佢哋進入遠東嘅時候,旅順已經落入日本人手上,於是艦隊改變航程,希望到達俄國海崴威軍港停駐,成個行程18000海浬足足兜咗地球半個圈,呢單嘢真係好搞笑。

波羅的海艦隊擁有戰列艦8艘,裝甲炮艦3艘,裝甲巡洋艦3艘,巡洋艦6艘以及其他艦隻一共38艘。其實基本上呢一隊艦隊唔係想打硬仗,而且一隊 #GoGoVan,希望運送大量物資同埋軍事裝備去旅順港支援守軍,俄國嘅參謀部對整個戰事形勢係嚴重錯判,亦都錯誤掌握時間,或者佢哋從來冇諗過日本人真係可以短時間內成功佔領旅順。

當時迎戰波羅的海艦隊嘅 #日本聯合艦隊,海軍大將係大名鼎鼎嘅日本辛康納利 #東鄉平八郎(1848-1934),出戰嘅艦隻有戰列艦4艘,裝甲巡洋艦8艘,巡洋艦15首,以及其他船隻一共108艘。單從艦隻嘅數字比較,係108對38,而且對手仲要行咗18000海浬,日本聯合艦隊則以逸待勞,真真正正係守株待兔,就等你隻白痴兔仔衝埋嚟用個頭撞樹死!

翻查史料,仲有一點要補充,原來當時俄國嘅波羅的海艦隊,大部分嘅船員都係拉雜成軍,好多人係航海學院嘅應屆畢業生或新招募上船,之前甚至冇出海作戰經驗,一路行嚟已經發生唔少笑話,其中包括誤傷英國漁船、胡亂炮擊自己友同軍紀散渙等等,咁甩皮甩骨,打條毛嚕。由事實反映出,其實俄國人一直冇將日本人放喺眼裡面,覺得自己眼深鼻高、身高六呎就食滑你日本仔。

1905年5月27號正午,日本同俄國嘅海關終於響 #對馬海峽 上遭遇,著名嘅「#對馬海戰」發生!俄國總指揮 #羅傑斯特文斯基 中將(1948-1909)坐鎮總旗艦「蘇沃洛夫公爵號」(Knyaz Suvorov)上;東鄉平八郎則坐鎮日本聯合艦隊主力艦「#三笠」號上指揮一切。同 #甲午戰爭 嘅清國 #徐步蟾 命運一樣,後世人都將今次對馬海峽嘅大戰敗歸咎於美國隊長羅傑斯,話佢係一件大廢物。

但平心而論,羅傑斯先生響整個航程同戰役中嘅表現係稱職嘅,只不過客觀條件太差,戰敗基本上係必然。對馬海戰發生之前,如果你話波羅的海艦隊最正確嘅選項,實際上係應該say goodbye掉頭返歸,不過如果咁樣做就等於宣佈帝俄投降,等於將遼東半島主導權奉獻畀日本,打仗嘅嘢,有時唔可以咁樣計,就算明知要死,都要衝個頭埋去死。

對馬海戰係東御平八郎嘅show time,史書上邊講,佢採用有違常規嘅T字型戰術,以及秘密研製嘅「#下瀨火藥炮彈」,給予俄國艦隊毀滅性打擊,呢場驚世大海戰,日本聯合艦隊完完全全以100分滿分擊敗俄國波羅的海艦隊!

睇數字啦,最後日本聯合艦隊主戰艦冇一艘沉沒,只損失三艘魚雷艇,戰死人數117人。俄國方面一共被擊沉21艘艦隻,被俘虜6艘,戰死4830人,負傷6106人。我好相信呢個戰果,亦都係人類整個海軍軍事歷史上,一個勝負分野最大嘅輝煌戰果。

我哋下次繼續。……

#常威 #大清亡國關慈禧蛋牛治 #慈禧太后 #晚清歷史 #日俄戰爭

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-03 11:45:27
2019-04-04 11:18:03
【112回:大清亡國關 #六君子之死 蛋牛治】

😚今回説到戊戌政變塵埃落定,六君子人頭落地,有人要為政變付出代價;但可悲嘅係,成個事件中,真正要負上政治責任、勾結外國勢力嘅人唔使死,佢哋就係光緒帝、康有為、張蔭垣等人。要死嘅,反而係一班替死鬼,一班一心為中國廣大同胞圖謀幸福生活嘅知識份子;慈禧太后斬殺六君子,係殺雞儆猴,要話俾所有有異心嘅人知,作反嘅下場係乜嘢。響政治層面方面,佢可以講無錯;但係道德層面方面,佢就大錯特錯。遺臭萬年,都係應該。

😃我哋呢代人,叫「六四」一代,我哋成長嘅過程中,親眼睇到1989年六四事件嘅發生。我哋見到天安門廣場殺人事件,好多人為咗中國嘅民主自由獻出生命,佢哋嘅出發點冇錯,道德層面亦都相當崇高。佢哋嘅死,深深烙印咗喺我哋呢代人心裡面,就算過咗30年,都冇辦法忘記。過去30年,中國嘅經濟急速起飛,成就有目共睹,但係中共放響我哋呢代人心裡面嗰條刺,永遠無辦法拔得走。

😄我唔係細路仔,我非常明白過去30年中國嘅巨大發展,係來自極權統治下產生嘅秩序;即係話,如果冇咗中共嘅極權式統治,呢30年嘅經濟奇跡冇可能被創造出嚟。我哋目前見到嘅盛世,無論係泡沫又好,或者係假像又好,中國的而且確比30年前文明先進咗好多好多倍;你話人心空虛、道德滑坡;出自唯利是圖香港人把口,五十步笑百步啫。政治畢竟唔係談戀愛,實際結果先係最重要。所以我哋呢代人係矛盾嘅,係歷史狹縫中嘅怪物,成日想左右逢源,既想有道德有光環、又想物質豐盛賺大錢。一邊想支爆,一邊又想北上找尋商機?咁仲唔係矛盾?咁仲唔係怪物?

😌伊索寓言有個故事,地上嘅禽獸,覺得蝙蝠會飛,因此唔將蝙蝠當成同類;天上嘅雀仔,又覺得蝙蝠冇羽毛,所以唔覺得蝙蝠係自己人;於是乎,蝙蝠兩面不是人。其實,蝙蝠係哺乳類,係禽獸嘅一種,佢唔同一般嘅禽獸,只不過英國人一百年前送咗一對翅膀畀佢,令佢可以喺天空上面自由飛翔,令佢可以有另一個更廣闊嘅視野去觀察陸地上嘅禽獸或商機。又如果,你問一隻蝙蝠,你係禽獸定係雀仔?我諗蝙蝠會咁答你:「如果地面上有嘢食或有商機,我希望我係一隻禽獸;但係如果我想自由飛翔,我又想自己係一隻雀仔。」

♎【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!好快!好快!衝上2000訂戶!打埋開口牌,各位上我條youtube channel睇片,唔該同我睇吓啲廣告,或者click入去兜個圈,畀我賺多少少廣告費,畀啲甜頭我同阿潮繼續經營一條全球廣東話近代史粵語頻道!多謝大家!

🍳https://user35103.pics.ee/FCLX6

🍳https://youtu.be/2LWE0a8GvzU

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-04 23:50:30



【常威中史】慈禧平反系列(一百四十四回)

對馬海海戰嘅慘敗對俄國係致命嘅,其實早響之前,俄國國內嘅厭戰情緒已經不斷高漲,民眾對亡國之君尼古拉二世嘅忠誠度亦都出現動搖,1905年1月9號就發生咗「流血星期日」事件。

流血星期日亦稱為「一月大屠殺」,聖彼得堡內,軍警開槍鎮壓前赴冬宮示威嘅工人階級隊伍,死者官方公佈係96人,但民間相信超過4000人。官方數字同真實情況有距離亦唔係今日發生嘅事,血腥星期日完全打破咗一般民眾對尼古拉二世嘅友好仁慈形象,而且過依場屠殺,俄國國內嘅馬克思主義迅速蔓延,無產階級同工人階級已經對專制羅曼諾夫皇朝失去信任同耐性。同年之後發生嘅一連串暴力事件,事實上已經為羅曼諾夫王朝敲響哀鐘。

1905年嘅革命,並非由列寧同佢嘅布爾什維克所領導,純粹係俄國人民內部反抗情緒爆煲,呢個時候列寧同埋托洛斯基都流放於海外,佢哋利用佢哋支筆不斷籲俄國民衆加入馬克思主義者行列,1905年之後,列寧、托洛斯基同佢哋嘅布爾什維克不斷擴大,後終於響1917年十月革命成功奪權,建立世界上面第一個無產主義國家!

一連串連鎖反應其實都係來自一場日俄戰爭,有陣時輸唔起就唔好賭喇,你睇吓尼古拉二世幾X慘……仗真係唔好亂打,無論真實戰爭抑或貿易戰爭……

對馬海戰之後,日本完全控制遠東海權,但係經過一年多嘅慘酷大戰,其實日本同俄國雙方都筋疲力盡,錢亦都洗曬,兩個國家都冇能力再打落去,大家開始尋找下臺階。1905年8月10號響美國總統老羅斯福(Theodore Roosevelt Jr.1858-1919)斡旋底下,兩個國家開始坐低響英國談判,呢個就係「撲次茅夫」和談(Treaty of Portsmout),談判期間雙方拉鋸不下,一個月內進行咗17次正式談判,隔日就嗌交,但終於響9月5號簽定停戰協議,日俄戰爭到此完全終結。

《樸茨茅夫條約》內容之後講,先用人命嚟總結一下日俄戰爭,整場戰爭中,雙方都付出巨大代價,日軍戰死同響戰爭期間病死嘅人數有84000人,俄軍有50000人,日軍嘅死亡人數遠超於俄軍,單從數字就可以睇到,日本人贏呢場仗係用民衆嘅鮮血贏返嚟。除咗死亡人數外,日軍仲有143000人負傷,而俄軍則有220000人負傷。呢一班負傷者如何回歸社會?都成為咗戰後兩個國家一個重要難題。可以講俾大家知,響戰爭中受傷嘅士兵,佢哋回國後,國家畀佢哋嘅支援、醫療同供養都係堅唔夠,真正得到國家補貼嘅人只有極少數,好多人就係咁樣終身殘廢淪為社會渣宰,真真正正用完就算。

1905年發生嘅日俄戰爭亦都將現代戰爭嘅慘酷同埋悲痛表露無遺,帝國霸權為咗擴張實力,不惜用人民嘅鮮血作為籌碼,但係當時嘅人似乎睇唔通呢一點,佢哋以為為國家奉上生命係理所當然,所以日俄戰爭只係初版,之後仲有更慘烈嘅第一次世界大戰同第二次世界大戰,繼續喺20世紀上半季繼續爆發。

我常公子係五毛,當大家今日係咁小共產黨如何不知所謂嘅時候,唔該大家睇睇歷史,睇吓共產主義點解會出現?睇吓當時嘅世界點樣壓逼貧苦大眾?我可以同你寫包單,如果我常公子活響20世紀初期,我一定係列寧嘅布爾什維克絕對支持者,甚至係佢嘅先鋒隊,一邊唱住「國際歌」一邊衝!

「起來!不願做奴隸的人們!」並非一個口號,而係真真正正展現咗當時世界低下階層民眾對自身存在嘅一種熱切期望!

我係五毛!

#常威 #大清亡國關慈禧蛋牛治 #慈禧太后 #晚清歷史 #日俄戰爭

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-06 10:37:50
【113回:大清亡國關 #楊深秀 蛋牛治】

😚政治站錯隊,情況可以好嚴重,六君子之中嘅楊深秀就係好例子。本來兩榜正途出身,年輕有為,思想開明,前途一片光明。如果佢唔係跟隨光緒皇帝作反搏呢鋪,或者佢喺晚清歷史甚至民國時代都會有一番作為,不過好可惜,到頭來佢只係可以成為光緒皇帝奪權大計失敗嘅替死鬼,以忠義之名,流芳百世。

😏最近香港炒作嘅政治話題係引渡條例,有人想2047之前再開一道大門,最後連政治犯經濟犯都可以中港兩邊走,距離2047,仲有30年貨仔,有啲嘢,大家真係要好好珍惜。當然有冇引渡條例其實都冇關係,阿爺做事,有強力部門,要喺香港帶你走,easy喇。揸住外國護照嘅中國人都可以照被扣留照被認罪,更何況係揸住特區護照嘅香港人?

🙄名正言順拉你上去接受中國法律制裁、抑或利用秘密警察(強力部門)暗中帶你走迫你認罪,兩者本質上其實都係一樣。前者其實好似有法理依據,但中國人做事你應該是明白的。所謂法理,其實衹是輔助政權統治的一個工具,黨政合一,「黨」排響「政」前面,政權是大曬的;上述嘅統治概念係中國人利用100年時間建立出來,要佢消失,我諗要用多100年時間。

😏未來日子,相信自由嘅尺度喺香港會日漸收窄。同檯食飯,好難再各自修行,河水不犯井水嘅時代已經過去,因為大家都要飲東江水,冇水飲始終都會渴死。生產關係決定人嘅命運,地理距離亦係相當重要。至上世紀80年代開始,無數香港人因為內地嘅開放改革而致富發達,世界上冇免費嘅午餐,借咗嘅嘢亦都一定要償還。

♎【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!好快!好快!衝上2000訂戶!打埋開口牌,各位上我條youtube channel睇片,唔該同我睇吓啲廣告,或者click入去兜個圈,畀我賺多少少廣告費,畀啲甜頭我同阿潮繼續經營一條全球廣東話近代史粵語頻道!多謝大家!

🍳http://yt1.piee.pw/FTPDY

🍳https://youtu.be/Jxakqf9A-jw

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-06 22:44:59


【常威西史】慈禧平反系列(一百四十七回)

1906年 #諾貝爾和平獎 係頒俾美國老羅斯福總統,為咗表揚佢調停日俄戰爭。

日俄戰爭,日本人贏得相當慘,戰場上打得好慘,處理事後就更慘。連 #伊藤博文 都唔贊成打依場代理人戰爭,打完邊個最著數先?大家不如計吓數。

同1894年 #甲午戰爭 比較,日本死傷38萬人,係甲午戰爭嘅20倍,軍費開支係甲午戰爭嘅10倍。但打贏甲午戰爭,#馬關條約 令日本得到天文數字戰爭賠款,仲有朝鮮嘅控制權,得到臺灣澎湖列島。今次呢?哈哈,得啖笑就有。由於沙俄並唔係完全戰敗而投降,大家叫坐埋「媾和」,想停戰啫。樸茨茅夫 談判期間,俄國人都睇通日本仔壠嘢,所以死人都唔賠錢。幾經討論,山縣有朋、大山嚴、桂太郎、兒玉源太郎、山本權兵衛,寺內正毅一班日本領導內閣元老重臣,最後決定放棄戰爭賠款,都要結束戰爭。

結果《#樸茨茅夫條約》係:日本以人道立場同和平理由放棄戰爭賠款,沙俄承認朝鮮係日本勢力範圍,將南滿鐵路同旅順嘅租借權轉讓比日本,並且割讓庫頁島南部……中國東北主權仍然屬於 #清帝國。

老實講,日本同俄國做咗大老襯,俄國因為戰敗,令到 #馬克思主義 係國內急速升溫,加埋日本間諜喺俄國國內活動,直接導致咗沙俄帝國嘅衰落,終於喺第一次世界大戰之後,徹底玩完,#羅曼諾夫王朝 一舖清袋。

日本方面,《樸茨茅夫條約》公佈後,日本國民發咗癲,1905年9月5號到7號。就發生咗「#東京騷亂」,即係「#日比谷燒打事件」,東京民眾一邊唱住「#君之代」,一面掟石放火,日本政府最後要頒法戒嚴令,出動軍隊鎮壓,死咗17個人(官方數字),傷者無數。東京騷亂,亦係日本現代化以嚟,民衆對自身處境嘅一次反抗同咆吼,後果逼得桂太郎內閣集體辭職,同時亦都仲下咗幾年後「#大正政變」嘅種子。

之前已經SAY過,打日俄戰爭,英國人喺售賣軍備,同戰爭債券收益賺到盆滿缽滿,美國人(即係 #猶太人),上一節亦都曾經講過,又係無寶不落,事後收錢收到手軟。日本死成84000人,仲要冇錢返?英國美國一條人命都唔使付出就賺到笑,佢哋先係大贏家。邊個係天才?邊個係白痴?大家應該心裡有數。

況且仲有一條死數大家未計,日本同俄國打仗,兩個軍事力量強大嘅帝國國力相對被大大削弱。此消彼長,英美就繼續做國際大佬,唔驚你爬我頭,仲贏埋諾貝爾和平獎,財色兼收,真係邊個吹得佢脹麽?

成日響側邊食花生,仲要撈到最大筆嘅油水。次次咁做,都幾乞卵人憎。所以智慧絕對唔響功利主義者英國人同埋美國人之下嘅大德意志 #日耳曼民族 就睇唔過眼。#第一次世界大戰 先將大英帝國拉落水。#第二次世界大戰 美國佬又想食花生?軸心國盟友日本就嗱嗱臨 #偷襲珍珠港 喇,旁邊鶴哈哈哈,你就X想……呢個純粹係我常公子個人嘅見解,大家不喜勿插。

第二次世界大戰德國人同日本人(對唔住,#軸心國 真係唔好關 #意大利 事)最後估唔到嘅係,#奧本海默(Julius Robert Oppenheimer,1904-1967)同 #愛因斯坦 快過佢哋製造到 #原子彈 出嚟。大家仲要記得一樣嘢,奧本海默同愛因斯坦都係猶太人,係呀!又係猶太人呀!

#常威 #大清亡國關慈禧蛋牛治 #慈禧太后 #晚清歷史 #日俄戰爭

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-08 18:39:26
已正皮,gchi
2019-04-08 22:00:40
2019-04-09 10:24:53
【114回:大清亡國關 #MacDonald 蛋牛治】

😚今時今日,香港政治又好中國政治又好,最驚就係跟車太貼,萬一站錯隊,就真係萬劫不復。政治嘅力量無比強大,你睇吓有幾百億幾千億身家都要走佬,都要照樣入冊你就知幾勁。

😏權力嘅誘惑就喺呢度,點解要有權力呀?錢唔夠power咩?冇錯,就係唔夠!就算你幾有錢,去到權力面前,一樣要低頭。我嘅良師益友周顯教我,你搵一個億或十個億,你真係可以唔理政治,柄埋一邊收租個安樂生活;但如果你想成為百億富豪,你就冇可能逃避政治,就算你唔想理,政治都會殺埋身。所謂政治經濟學,就係咁解,「經濟」同「政治」永遠冇辦法分得開。

😏1899年嘅戊戌政變係政治事件,凡係政治事件都有替死鬼,名垂千古嘅六君子就係戊戌政變嘅替死鬼,佢哋當中,大部分人都係冤枉嘅,反而真正嘅幕後黑手,事後都逃過被斬首嘅命運。中國人有句說話講得好好,黑狗偷食,白狗當災。凡事如果只係睇表面個浸,永遠無辦法認清真相。

😜現今世界,資訊無比發達,I-phone在手,天下我有。有好多人以為有Google大神幫手,自己乜都知,其實好多嘢大家仲未知。流通得嘅資訊,其實好多都經過統治階層過濾同裁剪,而且亦因為資訊太氾濫、太密集、令普羅民眾注意力無法集中,一件事情未去理解清楚,第二第三第四第五件事情又排山倒海而來,結果整個世界變成過眼雲煙,尋日嘅事已經成為過去,今日嘅事又接踵而來,頭腦應接不暇,亦冇足夠嘅時間去思考同消化,大概我上述所講嘅,就係今日嘅現象世界。

♎【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!好快!好快!衝上2000訂戶!打埋開口牌,各位上我條youtube channel睇片,唔該同我睇吓啲廣告,或者click入去兜個圈,畀我賺多少少廣告費,畀啲甜頭我同阿潮繼續經營一條全球廣東話近代史粵語頻道!多謝大家!

🍳https://user35103.pics.ee/DUJUZ

🍳https://youtu.be/5OACNKsSQOM

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-09 22:18:49


【常威中史】慈禧平反系列(一百四十九回)

中國近代史除咗最鍾意抹黑人之外,亦都最鍾意抹走人。國民黨同共產黨寫近代史,完全係為咗配合佢哋政權而寫,對真實發生嘅事情,佢哋完全冇興趣。

1942年毛澤東喺《延安文藝座談會》上嘅講話,佢講到明所有文學創作、戲劇(佢冇講新聞,其實包含在內)都要配合共產黨,為共產黨服務,有人就話,係毛澤東將中國嘅言論自由徹底消滅,但我同你講,佢唔係第一個咁樣做嘅中國人,因為之前嘅中國近代史,或者中國文人已經有一個傳統,就係好輕視歷史同真相。黄興(1874-1916),作為辛亥革命最重要嘅一個人物,喺我常公子心入面,佢先係真正嘅國父,但係佢嘅重要性係完全俾人忽略,佢成個人甚至比人抹走。直至90年代,台灣解除軍統狀態,黄興由西方人重新發掘史料,先將佢嘅重要性提返出嚟。

1905年,當日俄戰爭打完之際,孫文同黃興喺日本第一次見面,成立「同盟會」,自此之後,呢個真真正正革命組織嘅大部份軍事顛覆活動,都係由黄興,一個具有大無畏精神同個人勇氣嘅中國知識份子,所親自指揮策劃同發動。

孫文嘅角色,係作為革命運動嘅理論宣傳家同埋革命經費嘅募集者,而黄興則係革命嘅軍事領袖。其實兩者比較冇話邊個叻啲,一樣係咁重要。冇錢冇可能革命,但係冇人拎支槍唔X怕死上前線衝,革命亦冇可能會成功。所以辛亥革命前後,「孫黄」係一體,正如之後嘅無產階級革命,「朱毛」(朱德同毛澤東)一樣。不約而同,朱德同黄興兩個真正軍事領袖,之後同樣被政權矮化。

黄興响歷史上嘅消失,唔關孫文事,係陳其美(1878-1916)一手造成,但其實又唔關陳其美事,只不過係陳其美將一個人介紹咗俾孫文識,依個人叫蔣介石。依啲嘢,之後有機會講。

細講黄興嘅起伏,其實即係細講辛亥革命。黄興出生於1874年10月25號,黄興唔係真名,佢叫黄軫。佢出生於湖南長沙市,冇錯!佢係湖南人,中國近代史上面有兩個非常啲重要人物都係湖南人,第一個係毛澤東(1893-1976),第二個係我常公子成日掛響口邊,我日後所寫嘅中國近代史終點,劉少奇(1898-1969)。湖南同湖北係清朝係作為一個行政單位,由湖廣總督統治管理。湖南係軍事大省,源於另兩個湖南人曾國藩同左宗棠,撲滅太平天國革命運動,搶救滿清王朝嘅湘軍,就係主要由湖南人組成。

湖南同廣東相鄰,由大英帝國殖民地香港作為革命顛覆總基地(呢個概念,到今日仍然值根喺中國領導人心裡面)嘅西方民主自由思想,一早已經由廣東輸入湖南。但廣東人比較古惑走精面,湖南人民風傾向倔强,打仗唔怕X死。所以革命思潮喺湖南迅速成長亦都係理所當然。

仲有一點,湖南人仲有一個王夫之(即王船山,1619-1692),之前已經提過,王夫之係滿清入關之後,一個堅守儒家哲學嘅民族主義思想家哲學家,曾國藩同佢兄弟曾國荃,其後重新出版王夫之嘅所有著作流通全清國,重提反清復明、大漢族本位主義,某程度上亦係為推翻滿清外族統治播下嘅第一粒革命種子。(我亦都講過,呢個可能係曾國藩落馬嘅真正原因)

下次carry on…….


#常威 #大清亡國關慈禧蛋牛治 #慈禧太后 #晚清歷史 #辛亥革命



【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-11 11:51:25
【115回:大清亡國關 #霍布斯邦 蛋牛治】

😚我最喜愛嘅歷史學家有三位,排第一嘅係楊繼繩,佢係中國人,係共產黨員,我最近都係睇緊佢本書《天地翻覆》,講文化大革命,非常精采。佢之前寫過另一本好書《墓碑》,唔使我多講,大家都知道呢本書,楊繼繩係為響中國五六十年代交界發生嗰場史上最大嘅饑荒所餓死嘅幾千萬人立碑。當年我睇完呢本書,抑鬱咗成個星期。

😄第二個我最喜愛嘅歷史學家,係霍布斯邦(Eric Hobsbawm),佢係英國劍橋大學史學教授,又係猶太人,喺英國第一號咗左派史學家,平生著作甚豐,由十幾年前第一次讀佢嘅書,到今日將佢嘅書差不多全部睇曬,中間嘅過程,改變咗我自己嘅所有史觀,只可以講一句,我係獲益良多。對歷史有興趣嘅朋友,一定要睇睇佢嘅書,如果你又有睇其他歷史書,咁同霍布斯邦比較一吓,你就會知道霍布斯邦有幾高,冇錯,係幾十層樓咁高。

😄第三個係劉仲敬,亦係中國人,佢亦都好犀利,佢嘅史觀同埋寫作手法異於常人,我常公子其實係向佢學習緊,當然我連尾燈都睇唔到,劉仲敬嘅書喺香港到處有得賣,買返本睇睇,包你大開眼界。

😃上述三位,堅定咗我對歷史寫作嘅意志,我冇得同佢哋比較,因為佢哋嘅水平實在太高,高我太多太多,我衷心向佢哋三位學習,盡我一點綿力,大家響歷史研究上出一份力,為人類嘅足跡留下一點印記。

♎【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上2000訂戶!打埋開口牌,各位上我條youtube channel睇片,唔該同我睇吓啲廣告,或者click入去兜個圈,畀我賺多少少廣告費,畀啲甜頭我同阿潮繼續經營一條全球廣東話近代史粵語頻道!多謝大家!

🍳https://user35103.pics.ee/FTLVS

🍳https://youtu.be/baJ5Eijz8TI

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-12 22:54:24


【常威中史】慈禧平反系列(一百五十一回)

1903年,30歲嘅黃興返番清國,開始咗佢接下嚟一生嘅偉大武裝革命事業,呢個時候,我哋嘅奪命書生孫文,經過1900年嘅武裝起義(惠州)失敗之後,佢一直留流亡國外。響世界各地遊歷演說,宣傳中國革命思想,而「中華民族」依個沿用到today嘅概念,亦響佢努力宣傳下正正式式同「清帝國」劃清界綫,革命理念開始清晰,康有為嗰套保皇黨概念(撐劉精唔撐豆斗,希望清帝國會實行政治改革君主立憲嗰套)開始退場,新一代嘅革命觀念係武力推翻滿清政府,建立民主共和政體,即中華民國(未係中華人民共和國)。

事實上,理念本身亦係幕後金主嘅意志展現,康有為好食好住收嘅錢,可能嚟自清帝國內嘅保皇黨勢力;相反,孫中山所籌嘅錢,係嚟自外國自由民主世界嘅華僑,佢哋兩個represent不同嘅團體。好似今日嘅香港,你收得黎智英捐款自然要企喺美國嗰邊,你受得中共嘅惠澤,就要義無反顧做個保皇黨,社會上人人有立場,人人有錢收,冇錢收嗰批,就等坐監啦。

舉多個例子,民國時期一直大力宣傳蘇聯馬克思主義嘅偉大左派文人魯迅先生,原來佢係租住咗上海一間最貴嘅公寓,有工人用生活奢華,過嘅係上海租界最好嘅資產階級生活,但錢從何來?當然係嚟自蘇共嘅第二國際,有啲嘢希望大家明白,凡事唔好睇得咁死,我搞呢個page出嚟講歷史,都係為咗呢個目的。

講返黃興,1903年中佢返清國,響長沙明德學堂教書,但之後連老師都唔X撈,全程投入革命事業,11月成立「華興會」革命組織。華興會講到明要武力推翻北京政權,吓吓要放炸彈做刺客,其中所有三十幾個成員差唔多都係留學日本嘅留學生,你淨係睇依點,就知道日本同中國革命嘅關係幾咁密切啦?

同年黃興亦都同湖南哥老會嘅頭目串連,黑社會組織同社團,一直喺中國革命事業中發揮無可替代嘅力量,呢個係不容否定嘅事實,黑社會都有愛國嘅,並唔係1989年開始。因為當時嘅黑社會,大多數都係反清復明留落嚟嘅地下組織,推翻外族統治,基本上係黑社會本源文化,佢哋同革命份子一拍即合,亦都理所當然。

仲有一點要提提大家,當一個極權帝國走向沒落嘅時候,貪污舞弊情況進入失控的時候,其實地下經濟往往係會超越表面嘅地表經濟,上世紀90年代嘅蘇聯同今日嘅北韓就係好例子,地下經濟即係不合法黑市交易買賣活動,理所當然係由黑社會所控制嚕,20世紀初,清帝面臨崩潰狀態,地下經濟發展蓬勃相信亦都係必然,即係講乜呢?即係話你知,當時黑社會係有人又有錢!

1904年頭,日俄戰爭爆發在即,民族情緒高漲。黃興打算響長沙策劃一次武裝革命,計劃喺1904年11月16號,即係農曆十月初十,慈禧70大壽嗰日起事。佢哋打算放置炸彈行刺長沙重要大清官員,然後起兵佔領省會長沙做第一個革命根據地。黃興依照日本軍制編組革命軍,自己係主帥,劉揆一同哥老會頭目馬福益係副帥,湖南省內佈置就緒後,佢另外派遣其他人同其他秘密會黨聯繫,陳天華到江西游説防營統領加入革命,章士釗楊守仁駐上海聯絡,胡瑛同宋教仁喺武昌建立華興會支部。

相信當中好多名字大家都聽過,佢哋之後會成為辛亥革命同埋中華民國初期嘅領導人物,其實佢哋好多都係跟黃興起朵。王興依一次策劃嘅長沙革命,其實規模可能比唐常才1900年嗰次更大。

結果係點?下次繼續……


#常威 #大清亡國關慈禧蛋牛治 #慈禧太后 #晚清歷史 #辛亥革命


【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-13 11:45:54
【116回:大清亡國關 #柒點 蛋牛治】

😚近日熱辣嘅新聞係引渡條例,一國兩制下,到目前為止,內地並冇法律權力將香港人引渡返內地受審。所以如果要「的」你返大陸,就要由「強力部門」幫手,或者你「自願」返上去受靶。九七回歸咗20年,無端端點解會搞壇咁嘅嘢?個人感覺,無非都係要將香港白色恐怖層次提昇,進一步收窄香港人嘅自由,口講一套,內裏做一套,中國人最叻。

😜23條,一直係上頭耿耿於懷嘅事情;其實等多30年,2047,一切都會煙消雲散,真係唔使咁急。鄧小平講過50年不變,其實真正嘅目的就係想97年前出生嗰一代人保持原有嘅生活方式,直至佢死嗰日,都可以做隻英國鬼。畀香港人多50年時間自由,換取香港主權,其實係非常合理嘅交換條件,所以當時大家都會覺得冇問題。可惜鄧小平嘅智慧就係太高,接手佢工作嘅人冇佢咁高,甚至低,於是乎就搞鑊泡出來……

😄做人要講信用,冇信用嘅人唔會得人尊重。所以佢唯一想你尊重佢嘅方法,就用支槍指住你講:「唔該尊重我。」

♎【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上2000訂戶!打埋開口牌,各位上我條youtube channel睇片,唔該同我睇吓啲廣告,或者click入去兜個圈,畀我賺多少少廣告費,畀啲甜頭我同阿潮繼續經營一條全球廣東話近代史粵語頻道!多謝大家!

🍳http://yt1.piee.pw/GFD6F

🍳https://youtu.be/MsPgyOvidOA

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-13 21:10:28


【常威中史】慈禧平反系列(一百五十二回)

執筆嘅時候 #李卓人 敗選,#馮檢基 先生剔票成功,當然,就算李卓人當選都改變唔到啲乜嘢。當日 #希特拉 上臺嘅時候,係用選票來上臺嘅,係德國人民支持佢成為德國嘅領袖,當然亦係德國人民利用選票,用民主嘅形式選出一個帶佢哋入無間地獄嘅領航員。有句說話講得好啱:

「條路自己揀,仆街唔好喊」

未講1904年 #黄興 #長沙起義 結果之前,先講講 #奪命書生。其實響孫文響大朵之前,参予過百日維新嘅 #康有為 同 #梁啟超 先係中國革命嘅代表人物,但佢兩位始終同 #劉晶 光緒冇辦法割斷,保皇概念根深蒂固,康有為更加以大清遺民自居,梁啟超嘅學養同埋見識都係康有為之上,後來佢哋師徒決裂,梁啟超曾經獨當一面,成為代表中國新時代嘅革命領袖(起碼喺國際傳媒同輿論層次上),不過佢始終係真讀書人唔夠激進,1903年調頭轉向,捨棄暴力革命的主張,支持君主立憲,佢嘅行為令到孫文獨攬革命熱潮嘅領導權。

奪命書生籌款的確有一手,1903年頭佢就喺檀香山發行過「#愛國債券」,每股10美元,革命事業成功之後,可以以每股100美元贖回,之後有冇兌現冇人知道。但絕對可以相信,如果孫文身處現代香港,佢一定係一個玩財技好叻嘅 #殼王。

黃興打算喺1904年11月16號響湖南長沙起義,革命用嘅軍火已經喺上海買到(又係0005上海),佢哋話參與起義嘅人有成10萬。但係呢次起義未發生之前,已經俾二五仔篤爆咗!10月24號,湖南當局下令逮捕黃興,黃興收到風先閃咗,而其他人好似 #宋教仁 咁,當局亦都搵唔到具體證據拉人封艇,結果參與革命嘅學生領袖好多只係被開除學籍就咁算數,由此可見,當時由 #張之洞 揸旗嘅湖南地方政府當局嘅處事手法都好現代化同唔殘忍,換咗後來嘅 #國民黨 同 #共產黨,使唔使同你講咁多道理呀?即刻拉你入後巷打靶啦!

後來黃興都曾經落網,不過佢死口唔認冇供出自己個名,當局就放咗佢(真係慈禧=兒戲),之後黃興經由上海法租界,逃亡到日本,但響日本,黃興又知道湖南 #哥老會 #馬福益 正籌備新一輪起義,於是佢又潛逃返中國,攞起支槍想去前線衝,佢亦曾經響途中,同大清士兵駁過火,但係未到位,馬福益已經被當局拉咗,義始終冇起過,於是黃興又著草返去日本,繼續逃亡。

你睇吓黃興,就真係勇武喇!吓吓要上前線,吓吓要真刀真槍搏命,堅到爆。1905年王興流亡日本,成為咗東京中國革命學生嘅著名領袖。講番從1900年惠州起義失敗後,到1903年,孫文都係住喺橫濱,1903年至1905年7月佢環遊世界,到處籌款同宣傳革命理念(上文已經提及),1905年7月佢返到祖家日本,造就咗佢同黃興嘅世紀性碰面。

你可以咁樣去理解,當時孫中山係代表國際華僑金主嘅勢力,而黃興則係土炮陀地,坐擁兩湖革命組織力量。佢哋響1905年7月28日《#二十世紀之支那》雜誌編輯部進行第一次會議。會議嘅內容係黃興希望將當時大清國內同日本嘅各個革命團體合而為一,組成一個更強大、組織性、紀律性更強嘅革命組織,大家各有各搞,真係好難成事。於是乎,兩個人響7月30號東京赤阪區內田良平屋企,宣佈成立一個新革命組織,叫中國同盟會,簡稱「#同盟會」。

同盟會有一個誓詞,原文係:

「當天發誓,同心協力,驅除韃虜,恢復中華,創立民國,平均地權,矢信矢忠,有始有卒,如或渝此,任眾處罰。」

同盟會嘅成立,對中國嘅整個革命事業嚟講,產生咗決定性嘅影響。從此以後,每個游離嘅革命團體,開始俾一個組織、畀一種理念收編歸納起嚟,成為一股更強大的革命武裝力量。推翻滿清,建立 #中華民國 開始擺上歷史嘅 Agenda。之後,孫中山更加要強化中華民國嘅建國理念,佢開始構思一套新嘅意識形態,加強革命宣傳,呢個意識形態,呢個主義,就叫做「#三民主義」!

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-13 21:16:18


渠頭者聯盟三部曲,各大書局有售,請大家捧場!
2019-04-16 11:05:20
【117回:大清亡國關 #天草四郎 蛋牛治】

😚今集內容有提過天草四郎,天草四郎係日本版嘅洪秀全,曾經搦住天主教旗號,同日本幕府進行戰爭,最後慘敗收場,成為一代傳說。天草四郎嘅故事非常壯烈,為日本人津津樂道,近代,有山田風太郎所寫嘅《魔界轉生》,就係以天草四郎為背景嘅魔幻故事,係一本暢銷小說。天草四郎嘅故事亦都曾經被拍攝為電影,澤田研二同窪塚洋介都飾演過佢,另外,天草四郎更加係唔少日本動漫嘅主角。有陣時,真係好欣賞日本人能夠將一切嘢變成大眾娛樂文化,起碼響中國兩岸三地,仲未有洪秀全嘅漫畫或者洪秀全嘅動漫人物出現過。

😜講開太平天國,其實我從來未細心讀過寫過。現代人對於依場可能係世界歷史上最大型、死二千五百萬人嘅內戰認識並唔係好深,但其實當中有好多可歌可泣嘅故事,後世人刻意對太平天國淡化同無視,其實非常之錯誤。最重要嘅係,太平天國內部其實有好多外國人參予;更加離奇嘅係,最後平定太平天國嘅主力亦都係外國人,即英法聯軍部隊。中國共產黨歌頌太平天國喺中國歷史一場偉大嘅農民革命,其實佢哋將外國人嘅因素撇除咗。亦因為英國人法國人有份平定太平天國,所以某程度上,外國嘅歷史亦都將太平天國加入大量黑材料,以維持自己嘅政治正確。

😄希望有朝一日,本公子能夠有時間可以研究一下太平天國,為大家奉上一個為太平天國平反系列……但係都不知道是何年何日了……

♎【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上2000訂戶!打埋開口牌,各位上我條youtube channel睇片,唔該同我睇吓啲廣告,或者click入去兜個圈,畀我賺多少少廣告費,畀啲甜頭我同阿潮繼續經營一條全球廣東話近代史粵語頻道!多謝大家!

🍳https://user35103.pics.ee/DZB4G

🍳https://youtu.be/H4l2QHXWyXc

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87
2019-04-16 17:25:40


🔥【常威近代史】第二部《中國一百年前的第一次改革開放》實體書正式上架!

🔥請大家支持我常公子的近代史寫作計畫,Facebook專頁、Youtube、電子書、實體書,我希望用唔同嘅新媒體,令香港人或用粵語為母語嘅朋友認識或加深對近代史嘅認識,過程會好艱辛,但係我唔撚怕,我會努力落去,直至寫到王光美接劉少奇骨灰為止,我會用我嘅母語廣東話,寫下香港人眼中嘅近代史,為香港人響歷史上留下一個小小腳印。

🔥請大家支持我,到書局買本實體書!download咗電子書嘅朋友,亦請多買幾本實體書,送禮自奉,大家一齊推廣香港人保存粵語文化運動!有你有我!高山流水,沒齒難忘!
2019-04-16 19:24:28
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞