【常威近代史】（三百零四回）
大軍閥平反系列
由 #布爾什維克（即俄國共產黨）所領導發生響1917年11月7號嘅「#十月革命」，其實只不過係一場小規模嘅政變，推翻響聖彼德堡嘅「#俄國臨時政府」，革命嘅過程並非一如之後蘇聯官方文獻所講「偉大的十月社會主義革命」。主要策劃者 #托洛斯基 之後亦都講過，其實當日參與十月革命嘅群眾，大約只有25000人，最多30000人，當中最重要嘅主力可能係一班海軍嘅水手，大部份聖彼得堡嘅群衆，其實響側邊食花生。
十月革命嘅例子講比我哋知，其實革命可以由極少數人進行，只要佢哋唔怕死就可以，當然大前提係革命想推翻嘅對象，支持者一定要比革命嗰邊少先得，十月革命係好例子，當時 #克倫斯基 臨時政府已經完全失去民望，國家其實進入半癱瘓無政府狀態，邊個夠膽出嚟插旗仔，就係贏家！
當然十月革命布爾什維克只係能夠趕走中央，有限度控制 #聖彼德堡 政局，距離統一全國仲有好漫長路途，俄羅斯領土巨大，人口衆多，布爾什維克共產黨要有效控制全國，其實仲要打一場漫長嘅血腥內戰，老實講11月7號嘅「十月革命」，其實只係革命嘅起步點。
起義嘅同時，布爾什維克單方面召開「第二次全俄蘇维埃大會」，喺會上通過咗 #列寧 起草嘅《土地法令》，即係廢除土地私有制，實行土地國有化，無償沒收所有地主、皇室、教會嘅土地，而一切生產工具一律交畀農民代表嘅 #蘇维埃 自行分配。除咗收回土地，仲要收回所有工業同金融業國有化，長遠徹底廢除私有財產制度，簡單啲講，就係打倒 #資本主義，推行 #共產主義。不過列寧提出噉嘅方案，資產階級地主同貴族階層又點會放過佢？內戰無可避免一定要發生嚕。
當時嘅布爾什維克共產黨，其實勢孤力弱，十月革命之後重新舉行嘅杜馬選舉，佢哋嘅得票率亦都只不過係20幾個%，但係之後點解會得到全面政治勝利？其實個理由好簡單，就係因為夠硬淨，共產黨嘅信徒堅定不移，反而佢哋嘅政治對手往往「概念混亂，變化不定，忽左忽右，自相矛盾」，依個世界贏嘅人，往往唔係因為有「神級」嘅力量，而係因為面對「豬級」嘅對手！
布爾什維克十月革命之後，其實並冇企圖玩一黨專政，只不過為咗生存，逼不得已夾硬嚟，既然政治鬥爭不斷，不如就玩槍桿子出政權，一切以武力解決，邊個夠惡邊個話事，暴力解散國會，由托洛斯基組織「#紅軍」對付「#白軍」，勇往直前，一口氣打下俄羅斯江山，死幾百萬人，換來世界上第一個共產主義政權正式確立。
其實要講布爾什維克共產黨嘅奪權故事，真係要另外開一個系列先得（希望遲啲真係有機會去搞），十月革命之後發生咗無數錯綜複雜嘅事情，紅白兩軍嘅大型內戰，亦唔係幾句說話可以講完，關於俄國嘅故事，喺呢度真係要煞停，否則冇機會返去中華民國。
