【大清亡國關慈禧蛋牛治】第一回

呢件事，同好多政治事件一樣，大家不斷拗嚟拗去，到最後始終冇一個定案，如果南方勢力拉倒北京中央政府嘅話，咁之後又點呢？又打仗？有冇咁多錢打仗呀？

況且我覺得最重要一點，係西方一眾列強，日、英、俄、法、意、比，特別係日本人，傾向支持黎元洪段祺瑞暫時執政，穩住局面。既然大佬都話ok，咁其餘做細嘅就唔敢出聲勒。

1916年6月29號，黎元洪以大總統名義，就約法同國會問題提出申令：「憲法未定以前，仍遵行中華民國元年3月11日公佈之臨時約法，之憲法成立為止。其二年10月5日宣佈之大總統選舉法，係憲法之一部，應仍有效……玆依臨時約法第五十三條，逐行召集國會，定於本年八月一起繼續開會。」

「新舊約法之爭」告一段落，黎段依「新約法」理據而承繼袁世凱政治權力，合法上臺執政主理北京中央政府，但佢哋承認「舊約法」法理基礎不變（放生孫文）。繼續模棱兩可，總之一切重新開始，中華民國嘅法統就態仲係處於討論階段，一切未達到有效共識，大家要繼續傾落去。但冇人諗過，1916之後10年，已經係中國人最接近法統嘅日子，係之後，所謂法統概念會離開中國人越嚟越遠，最後遠到我哋根本唔知法統係啲乜嘢？

不過我想講，「法統」啲嘢，始終係西餐，中國人要食中菜，食西餐永遠食唔慣。就算今日嘅香港，有英國人用咗百九幾年教你用刀叉，但係有人始終都係鍾意用筷子食中菜。西方事物，始終唔符合中國國情，中國人存在於地球村上，要有自己一套生存方法。呢個係審美嘅問題，正如紥腳三寸金蓮都有人覺得靚一樣，況且你成日話要擁抱普世價值，點解普世價值要由西方人去定義呢？唔通我哋中國人自己講嗰套就唔係普世價值咩？又況且，民主制就係要少數服從多數，即係話無論件事係啱定錯，只要有多數人支持，就係正確嘅。咁14億人夠唔夠多呢？

朋友啊，大家去思考一個問題。當有一日全世界大部分人都認為「自由」係唔應該存在嘅時候，咁「自由」係應該要消失嘅，因為大原則係少數要服從多數。今日嘅香港人，一定要好好諗吓呢個問題……至於問題嘅答案，其實你需要自己答自己。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常公子歷史頻道210回：大清亡國關 #袁世凱練兵 蛋牛治】

♉今日內容，主要係講袁世凱並唔係一個純粹擦鞋仔，佢係有非凡嘅才華，短短幾年間，替當時一無所有嘅清帝國訓練咗一支有質素嘅西洋裝備陸軍，亦都將整個清帝國軍事文化徹底改變，至少能夠融合全世界，喺袁世凱之前，所有人閉門造車，結果清國嘅軍事力量落後於歐洲日本超過半個世紀，甲午戰爭一敗塗地，其實係清帝國滅亡嘅主因，有時脫離歷史想像，如果冇甲午一敗，中國歷史將會係另一個圖像，所以仗真係唔可以亂打。

♉踏入2020年，戰爭亦無可避免，美軍利用無人機精準擊殺戰術，炸死伊朗第二號人物，一種全新戰爭模式出現，以最小代價（無論敵我雙方）獲取最大震懾效果。本來世人對核子戰爭嘅未來世界非常悲觀，但無人機加精確制導武器畀我哋睇到了不一樣嘅可能。世事日新月異，未來世界會點樣走？仗係會點打？真係難以想像。

♑香港亦都出現變局，政府「止亂制暴」基本方針不變，警察繼續放題大濫捕，最近幾次遊行活動，都以三位數字拘捕人數做起點，眨眼間，有接近成萬人可能面對白色恐怖嘅司法檢控，係一項非常龐大嘅法律程序，未來幾年，為整個社會所帶來嘅負面效果難以想像；中聯辦換人，以駱惠寧換上王志民，一個完全冇接觸過港澳事務嘅高官接手中聯辦？唔好太多揣測，其實邊個做都一樣。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/TOTRoT2q6zY

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百九十二回）
大軍閥平反系列

1916年年中開始，段祺瑞及黎元洪上臺當政，開展咗中華民國真正「立憲共和國」聯邦制時代，其實亦係中國一個最民主嘅時代，清水總理段祺瑞係好人一個，黎元洪用現今香港人嘅角度，係一隻完全嘅和理非非動物。兩個人基本上都依從「法統」做事，可惜得出嚟嘅效果，係爭拗不斷，社會停滯不前。

同香港過去嘅日子都係一樣，國內同胞好鍾意講香港長期陷於政治爭拗漩渦之中，結果內耗大量精力，經濟同科技冇辦法追上強國強勁發展大時代，呢類「高見」，其實普遍存在香港人心裡面，甚至有人會覺得，我哋應該同內地同胞想法一致，放低身段接受極權統治，然後全心全意發展經濟。亦有人認為，「中國式極權模式」可能係現今世界政治嘅一個最可行政經模式，西方人都應該效法中國，放棄民主自由，follow me please。

不過亦都冇辦法，有錢係大曬，有錢就會好惡，有錢就係一切都正確。你話支爆？幾十年未爆喎老友？你話我欺壓人民？打壓言論自由？但今日大部份中國人都支持共產黨執政喎？香港搞逆權運動，中國人又冇人支持喎？你又點解釋呢？今日中國嘅發展，連美國人都驚，咁仲唔係正確？大前題係，「自由民主」唔可以當飯食，菲律賓印尼都有自由民主，結果係點呢？啲女人咪要出國嚟香港做工人囉。

舉多個例子，第一次世界大戰之後，威廉二世倒臺，德國嘅「第二帝國」時代結束，取而代之嘅係一個自由民主嘅文人政權，叫「威瑪共和國」，結果響威瑪政體當道嘅十幾年間，民主德國嘅發展停滯不前，日日有人遊行示威，甚至出現馬克大崩盤，全國經濟大蕭條，人民生活非常悽慘，最後催生希特拉納粹黨上臺，用極權統治修補殘局，亦為全人類之後送上最大嘅一場人道災難：WW ll！講完！民主自由真係冇撚用啊！

1916年嘅中國，大家對中國憲法採取嘅形式莫衷一是，各有各嘅見解，結果爭拗聲不住，其實，當時中國四億人口中，只有一小部分知道或者關心憲政係乜嘢，大部分中國人依然對政治一無所知，喺佢哋心裡面，慈禧太后=孫中山=袁世凱=黎元洪≈蔣介石≈毛澤東，其實完全冇分別，政治只係社會最上層金字塔頂極少數人嘅利益遊戲。既然自由民主法統喂唔飽我，我點解要理佢呢？

大致上，段祺瑞同黎元洪執政嘅時代，只係喺一片爭爭吵吵、離離合合、衆人爭權奪利中渡過，中間發生乜嘢事，我哋慢慢開始講……

1916年9月21號，安徽省都督、手中擁有一支二萬人「辮子兵」嘅張勛、省長倪嗣沖等召開第二次徐州會議，拉攏唔同省份嘅滿清殘餘勢力、復辟派保皇黨，推舉張勖做「十三省聯合會盟主」，會議最主要鞏固北洋集團勢力，反對南方國民黨為宗旨。會議之後，成員聯名致電北京政府，反對唐紹儀等人參加內閣，而且大力指摘國民黨議員同閣員刻意製造政治混亂。第二次徐州會議仲有一個最主要目的，就係開始討論復辟清朝嘅可能性，而且仲確立咗復辟滿清帝國嘅戰略程序。

北京政府方面，為籌辦召開新一輪國會，商討憲法國體，忙到一頭煙，其間繼續同西方列強不斷借錢，維持政府開銷同發展經濟，9月25號，廣九鐵路通車，香港人可以直接搭火車返大陸玩。

時間去到10月，10月1日，當時著名學者、畢業於美國康乃爾大學胡適（1891-1962）發表《與陳獨秀書》，開始正式倡導中國文學及文字革命，之後胡適成為咗「五四運動」嘅中流砥柱代。之後一年1917，胡適再去美國哥倫比亞大學讀埋個PHD返嚟（佢呢個哲學博士真係讀哲學嘅），從此以後，胡Sir就係中國知識分子嘅代表人物。

10月10號，孫文、蔡鍔、唐繼堯、陸榮廷、梁啟超、岑春煊受勛。表揚佢哋響推翻袁世凱帝制中所付出嘅努力，袁世凱6月6號死，屍骨未寒，已經開始被人鞭屍，之後仲鞭足100年，去到今時今日21世紀，所有中國人都要話佢係仆街。

10月31日，之前真國父黃興從美國回歸，打算同孫文講和，重投革命事業，但唔知點解，無厘頭死於一場急性胃潰瘍，佢嘅死有冇內幕？我唔講喇，之前亦都講過。總之從此以後，革命KOL就淨返孫文一個，你要擁抱革命，就只可以擁抱我！

黃興死後一星期，被譽為「再造共和第一人」，發動護國戰爭反對袁世凱嘅軍神劉松仁蔡鍔，亦都響日本福岡病逝，死因係肺結核，事實上蔡鍔由1916年8月頭病發，已經去咗日本醫病，拖咗三個月，始終難敵死神呼喚，死嘅時候實齡有33歲，同黃興一樣，英年早逝……

黃興同蔡鍔嘅早死，有人話係中國人冇運行，因為佢兩位都係忠肝義膽嘅好人，當然佢哋嘅聲名極佳，亦係因為dying young，如果俾佢哋活落去，可能到頭來都只係兩個許冠文式大軍閥。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

♊美國向伊朗動武，可能亦都只不過係隔山打牛，最抄錄響香港01某篇文章所記嘅一首西方民謠：
「丟失一枚鐵釘，壞了一隻蹄鐵；
壞了一隻蹄鐵，折了一匹戰馬；
折了一匹戰馬，傷了一位騎士；
傷了一位騎士，輸了一場戰鬥；
輸了一場戰鬥，亡了一個帝國。」
牽一髮動全身，尋晚特朗普嘅講話仲有一句：「If you value you're own life, you will not threaten the lives of our people」，其實要世界和平，大家就要安分守己，唔好搞咁多小動作撩事鬥非。


♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/ZcTQFyD-Rt0

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百九十三回）
大軍閥平反系列

1911年辛亥革命推翻滿清，中華民國建立，但其實大家要知道，中華民國立國嘅《憲法》其實仍未制定清楚同落實，大家仲用緊一部叫《臨時約法》嘅物體做嘢同做法理基礎，仍係臨時性，叫用住先，只係condom，1916年8月1號北京黎段政權重新召開國會，就係要將制訂《中華民國憲法》嘅工作繼續。要寫民國歷史，真係好複雜同好亂，或者由1911年制定本《憲法》嘅發展過程，制訂憲法，係西方民主觀念「三權分立」（行政、立法、司法）中，立法機關嘅工作，而由1911年開始，國家級嘅立法組織其實出現過好多次嘅變化，現在為大家整理一下：

1.各省都督府代表聯合會（1911年11月30日-1912年1月28日），先喺武昌，後響南京召開，革命省份嘅都督，即軍事力量領袖為建立新共和國採取嘅第一個步驟。

2.臨時參議院（1912年1月28日-1913年4月8日），以南方革命黨人同國民黨員為核心，先響南京召開，然後遷移到北京，制定出一部《臨時約法》。

3.第一屆國會第一次會議（1913年4月8號-1913年11月13號）
，依一次係中國有歷史以來第一次召開嘅民主國會，可惜因為宋教仁之死為觸發點，引發南北之爭，連串爭執下，最後被袁世凱驅逐國民黨議員而解散。

4.政治會議（1913年12月15號至-1914年3月18號），一個係一個傀儡立法組織，係袁世凱為取代原有國會而召開。

5.約法會議（1914年3月18號-1914年6月5號），起草咗《新約法》，取代1913年頒布嘅《臨時約法》，純粹為袁世凱獨裁專政舖路。

6.參政院（1914年5月26號-1916年6月29號），由袁世凱控制下，依從《新約法》，暫時行使國家立法功能，即係袁世凱恢復洪憲帝制背後嘅最主要政治backup。

7.第一屆國會第二次會議（1916年8月1號-1917年6月12號），袁世凱死後舊國會恢復運作，重新承認1913年頒佈嘅《臨時約法》章程，由北京黎段政權掌控，目的係起草同制訂一部永久性嘅「中華民國正式憲法」，（劇透）可惜到最後都無成功。

由上面嘅描述可以睇到，中華民國立國短短五年間，其實係連一個正式公認嘅立法機構都冇辦法產生出嚟運作，而且1916年8月第一屆國會第二次會議後，仲有無數咁多次離離合合，仲有唔同嘅立法組織會出現同消失。參與其中嘅政客，因為大家有唔同意見，亦代表唔同嘅政治利益，因此完全無辦法達到共識同妥協，爭拗不斷發生，背叛亦都係常態，一部永久性中華民國嘅正式憲法，亦從來冇機會產生過。於是亂局持續落去，連一部正式憲法都冇嘅國家，其實唔可以稱呼為一個完全獨立嘅主權國家，憲法體制由於參予分子熱衷於派系鬥爭而耗盡咗自身嘅活力，呢個亦係當時中國大分裂時代嘅忠實寫照。

叉開一筆，政治如何可以達至共識？唔同的意見點樣先可以達成和解及統一呢？透過對話、協商同和談，就可以達到和諧？大家坐低傾，和理非非，就可以解決問題？化解爭執？

政治嘅吊詭就喺呢度，我哋明明大家都相信彼此間嘅談話協商，可以解決一切爭執。但係歷史話比我哋知，談判嘅作用非常有限，人類始終係弱肉強食茹毛飲血嘅哺乳類動物，一切政治紛爭，其實需要用暴力同軍事力量解決，邊個有錢邊個有兵邊個有暴力邊個惡，「槍桿子出政權」先係永恆真理，用暴力打贏咗你，用恐懼令你妥協令你不敢再反抗，然後先埋位傾，政治其實就是這麼一回事。

真正一部通行全國嘅共和國憲法，又能夠全面得到落實同推行，其實要去到1949年10月1號先至有……

20世紀初期嘅中華民國，其實充滿矛盾，整個國家喺矛盾同衝突中成長發展起嚟，有人問，點解西方世界嘅自由民主議會嗰套嘢，會冇辦法喺中國順利實行呢？呢個題目太大，好難回答。大概中國或中華民族本身就有一套自己嘅內在規律性存在，用現代人嘅講法，係DNA嘅問題，西方民主自由思想，某程度上真係如中國共產黨所講，並不符合中國國情。

毛澤東係1937年寫嘅《矛盾論》，最近大紅大紫，內裡有咁嘅描述：

「按照唯物辯證法的觀點，自然界的變化，主要地是由於自然界內部矛盾的發展；社會的變化，主要地是由於社會內部矛盾的發展，即生產力和生產關係的矛盾，階級之間的矛盾，新舊之間的矛盾，由於這些矛盾的發展，推動了社會的前進，推動了新舊社會的代謝。」

矛盾永遠唔會消失，社會上存在矛盾係常態，而且如果我哋相信毛主席，我哋更加要清楚「矛盾」並唔係壞東西，因為矛盾先至係推動社會前進同社會代謝嘅力量。信奉馬克思主義唯物辯証法嘅話，你就會明白，正常和平和諧穩定水靜河飛嘅社會先係最危險嘅社會，因為冇矛盾就會缺乏嚮前發展嘅動力，亦係違反唯物辯証法歷史法則，所以當冇矛盾嘅時候，就要想辦法製造矛盾，要想辦法製造鬥爭，睇過《22世紀殺人網絡》未，一個完美嘅系統，需要自我製造Bug同病毒，目的唔係破壞系統操作，而係要測試系統應對災難嘅能力，同埋加強系統自我完善發展嘅原動力。

冇錯，係深咗少少，不過一定係真相。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】（二百九十四回）
大軍閥平反系列

1916年6月底，黎段政權上臺取代袁世凱執政，造就了第一次「法統重光」，中華民國再一次以「法統」重新建立，可惜之後發生嘅事情，只係亂上加亂。

正如1913年袁世凱解散舊國會，驅逐國民黨議員，取消法統。後世人都話係一代奸雄袁世凱出於一己私利製造嘅大陰謀，老實講，責任並唔喺剩係響袁世凱一方，舊國會被解散並唔係袁世凱刻意設計嘅陰謀，用劉仲敬嘅講法，係「而是各方缺乏良好協調造成的交通事故」，係集體炒車，「良好協調是長期經驗累積的產物」，而當時即中華民國建國兩三年貨仔，中國人又咁撚小氣？邊有呢種民主自由議會運作嘅經驗呢？而且要從協調中找到共識、達成默契，需要有犧牲精神同埋海量心境，即係有人要為咗大局著想唔怕蝕底、肯犧牲自己或自己所代表集團嘅利益，可惜上述嘅因素正正係中國DNA中所缺乏，今時今日嘅香港政局，你會睇得一清二楚。

後來袁世凱行番帝制，都係心裡面有一個覺悟，就係「中國人係要管嘅」，唔去管，就會甩繩馬騮，狗咬狗骨，就會電腦大爆炸。呢種覺悟袁世凱有，成龍都有，香港今日有50%嘅人亦都相信有。

1916年7月，新舊約法問題暫且解決，7月14號，唐繼堯以全體軍閥名義通電全國，宣佈撤銷南方「軍務院」，雙重中央局面結束，北京政府黎元洪大總統宣佈依法8月1日重新召開國會，國務總理段祺瑞亦開始佢嘅組閣工作。

段祺瑞嘅第一張內閣名單，其實相當有共融性，佢並唔係單純委任自己友入閣，佢設法係閣員名單中羅致北洋軍閥集、國民黨、進步黨、舊派官僚、甚至前帝制支持者等各種勢力做代表，務求想「劣」得個個都開心，可惜內閣名單一出場，就惹來各方非議，保守勢力一方屌名單中國民黨員太多，相反國民黨一面，就屌你老X土冇進步，所以大家都唔開心，亦冇人滿意。

上述事件反映民主制度嘅弱點，要明白一個哲學問題——世界上係冇一件事可以令所有人都滿意，你就算香港政府今日每個市民派十萬蚊，亦都有人會講派錢唔會幫到香港人。你做壞事固然仆街，但做好事亦有人會話你好心做壞事，所以響政治世界，其實並冇好壞黑白是非之分，有嘅只係「共識」同「協調」，多數人認同嘅就係「好事」。正如二次世界大戰，德國納粹黨屠殺猶太人，其實係大部份德國市民嘅意願，不單止德國人，當時亦有好多歐洲人覺得係應該，所以整個歐洲大陸滅絕猶太人行動先會順利發生。

要達到共識，就需要用唔同嘅手段去完成目的，關雲長關公固然重要，但係世界上只有一個 California荷里活，唔係所有人都好似美國人咁識拍電影同包裝自己嘅意識形態，要製造共識，最簡單嘅手段就係玩獨裁統治，一言堂政治環境下，99.99%嘅人舉手贊成，咁仲唔係最完美嘅「共識」境界？

以上問題，係每一個涉足想政治嘅朋友，應該好好思考一下嘅哲學問題。

之後黎元洪同段祺瑞不斷設法尋找各方共識，到最後改變咗某啲內閣成員名單，至此，新內閣名單基本就緒，只要等待國會通過，就完成法定手續。

中華民國國會依照1912年頒布嘅《臨時約法》第53條規定喺北京復會，1916年8月1號當日上晝十點，喺北京眾議院舉行開會儀式，參、眾兩院議員一共457人出席會議，大總統黎元洪致開幕詞，並根據《大總統選舉法》第4條規定，補行咗佢做大總統嘅宣誓儀式。

之後嘅成個8月，國會進行咗對憲法、政體同新政府內閣組成嘅激烈辯論，我個人認為，依個8月亦係中國人有歷史以嚟最民主自由嘅一個月，不同嘅意見大膽發聲，大家大鳴大放，在爭拗中尋找共識、響辯論中達到協調。大家要記住，依種我哋後世人覺得咁正斗嘅民主議會局面，係由黎元洪段祺瑞一手促成，後世抹黑段祺瑞嘅人，其實全部冇智慧同徧頗。

9月1號同4號，國會進行選舉點票，響超過半數同意之下，段祺瑞內閣成功夠票過關。10月底，國會更加補選咗當時嘅江蘇督軍馮國璋為副總統，但馮國璋睬你都生臭狐，佢並無前往北京任職，只係響佢嘅地盤南京接受中華民國副總統嘅任命，打仗出身嘅人就係太聰明，調我入中央？明昇暗降？馮國璋唔受依套喎，段祺瑞你傻的嗎？

黎元洪同段祺瑞對法統嘅努力，令一直處於嚴重對立狀態下嘅南北關係漸趨緩和，亦一度出現咗袁世凱當政時期從未有過嘅融洽合作氣氛，當時有人認為段祺瑞係民國再造民主自由法統嘅「功臣」，其實並無錯。

但係中國人就係鍾意鬥，外部矛盾稍有平息跡象，風平浪靜就會屎忽痕，內部就發生新矛盾。總統府同國務院兩派勢力，隨即於權力分佈、同埋第一次世界大戰對德國外交問題上大動干戈，展開咗激烈嘅權力鬥爭。

段祺瑞主理嘅國務院，由佢第一號頭馬國務院秘書長徐樹錚（1880-1925）把持，由於段徐有北洋系軍事力量作為後盾，佢哋根本唔將黎元洪嘅總統府放入眼內，而黎元洪亦唔甘心做「橡皮圖章」，積極拉攏國會民主力量同美國勢力支持，對抗主要由日本人支持嘅國務院勢力！

院府之爭，一觸即爆！

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常公子歷史頻道212回：大清亡國關 #北洋軍閥 蛋牛治】

♉休息一集再上路，病情好轉，托賴。香港進入流感高峰期，大家要小心，身邊唔少朋友已經中招，其實世界上殺人最多嘅病，應該係感冒，不過大部份去世嘅人都係因為感冒而引發嘅併發症，冇入埋感冒條數，而且感冒菌不斷在變種，一直與人類作基因對奕周旋，歷史已經講咗畀我哋知，1918年就有一場西班牙流感奪去咗一億人嘅性命，以當時全球有統計數字國家計算，約20億人，即每20個死一個，呢個數字仲未計算冇人口統計同患病死亡數字嘅國家，例如當時嘅中國。

♉世局瞬息萬變，上星期仲擔心美伊爆發全面戰爭，但最後大家都息事寧人，退一步海闊天空。反而付出代價嘅係平民百姓，一架烏克蘭客機被伊朗導彈意外擊落，160人死，伊朗政府最後承認責任，都係一個有承擔嘅舉動，如果件事發生係「某個國家」，我敢寫包單一定唔會認！國家與國家之間嘅政治紛爭，最後以平民百姓傷亡埋單，歷史上屢見不鮮，要控制依種情況，人類社會一直未能夠做到。

♉最新嘅戰爭模式，無人機重點轟炸目標對象，可能係一個契機，打擊始作俑者，唔使咁多平民受牽連，應該係一件好事。至於無人機戰術未來會不會被濫用？我相信亦都一定會，正如紛爭會唔會停止？我亦都相信一定唔會。地球資源日益枯竭，地球總人口喺可見嘅將來亦都唔會大幅度減少，要維持資本主義繼續運作，銀紙亦都印得太多，未來一定會更加動盪，二次世界大戰大殺戮之後留低嘅和平年代，早已經響21世紀來臨前一去不返。

♊作為一個普通個體，如何面對大時代嘅風風浪浪？唯一嘅方法都係自求多福。人類總喜歡幻想未來，但其實未來完全不可控制，處理好眼前嘅事情，做一日和尚敲一日鐘，其實係普遍嘅做法，叫「活在當下」。世局動盪，香港人亦難以獨善其身，希望大家都會好好充實自己，變得聰明一點，睇清楚事情嘅真相，正如流感高峰期唔該帶返個口罩出街，有病就嗱嗱臨去睇醫生，留得青山在，總能夠睇見勝利降臨嘅一日，自求多福就係咁解。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/oLgu3FCKDqY

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百九十五回）
大軍閥平反系列

今集講黎元洪同段祺瑞之間嘅權力鬥爭，即係「院府之爭」。

其實近代中國史，都有另一場「院府之爭」，就係中共裡面嘅毛澤東同周恩來兩位偉大同志嘅鬥爭，毛澤東長期身兼國家主席軍委會主席，其實就係大總統；而長期擔當國務院總理周恩來，就控制國務院。兩人表面係親密戰友，但其實鬥到飛起。

毛澤東所代表嘅係真正共產主義烏托邦式左派幼稚病黨徒；而周恩來即係整個蘇聯訓練列寧式幹部實幹派官僚主腦。表面上毛澤東一人坐大，但其實佢處處受制於周恩來，1966年發動文化大革命，用十年浩劫時間，幾千萬人生命作為代價，毛派先向另一個列寧式官僚幹部劉少奇奪權，最後將矛頭直指周恩來，可惜特務出身智慧非凡嘅周恩來，就連齊天大聖都動唔到佢半條汗毛，1976、77年，兩個鬥足50年嘅偉人，雙雙前後腳去見馬克思。

邊個贏？當然係周恩來贏，跨代死鬥，要到第二代先分勝負，因為毛澤東後繼無人，佢嘅繼承人「你辦事、我放心」好人華國峰，忠誠滿分智慧零分，羔羊難敵狐狸，最後始終被另一個列寧式幹部官僚、政治強人鄧小平所取代，鄧小平奪權之後，更加粉碎毛澤東嘅所有夢想，實行開放改革，共產主義變資本主義。毛澤東在世嘅最後努力，亦衹能夠將佢嘅極左路線烏托邦式共產主義美夢，苟延殘存多17年。亦由鄧小平上臺開始，技術官僚當道，文革而生嘅歷史大補償由金字塔頂少數人所獨得，直至今時今日……

中共嘅故事以後大把機會講，返番去1916年11月先……

隨住黃興同蔡鍔去世，歷史進入新一章，中華民國國會8月1日復會，黎元洪宣誓做大總統，段祺瑞內閣名單通過，黎段政權擔正，袁世凱死後嘅權力真空得到修補。但係11月2號，就爆出眾議院提出彈劾國務院秘書長徐樹錚案。

先講講徐樹錚（1880-1925）呢個人，佢係江蘇人，任何人都有頭馬，佢就係段祺瑞隻頭馬。根正苗紅，日本陸軍士官學校畢業，由1901年開始成為段祺瑞嘅幕僚，係佢嘅私人秘書同文膽。佢唔係廢人，相反我個人感覺佢能力非常高，1912年徐樹錚為段祺瑞起草《北洋五十將乞共和電》，以武力威脅滿清王朝和平退位，係佢嘅一大功績。

1914年5月，徐樹錚被任命為陸軍部次長，成為中華民國陸軍第二把交椅，當時佢只係34歲。但袁世凱明顯唔like佢，1915年袁世凱稱帝，就係徐樹錚勸阻段祺瑞抵制帝制，於是袁世凱炒咗佢魷魚，袁世凱同段祺瑞關係惡化，就係因為一個徐樹錚。1916年6月，袁世凱死後，段祺瑞馬上拉返佢入政府，任命返佢做陸軍次長兼國務院秘書長，權傾朝野，絕對唔係講笑。

新格局下，黎元洪同段祺瑞權力鬥爭，院府之爭展開，其實理由又非常簡單，和你飛飛黎菩薩並唔係北洋系統嘅人，幾年之間由一個武昌小小兵頭，撈到大總統之位，其實某程度上係時來運到屎忽撞棍，所以有人話佢係民國歷史上最幸運嘅人，其實又無錯。反觀段祺瑞，無論資歷同實力都遠響黎元洪之上，點解要同你黎元洪平起平坐？你有乜撚嘢資格呀？

所以以段祺瑞為首嘅國務院北洋系人馬一樣睇唔起黎元洪，只係當佢係一個橡皮圖章，「簽名啦，大總統！」應該係一句經常出現嘅對白。其實由6月開始，已經爆出多次徐樹錚頂撞黎元洪，身為國家最高元首大總統黎元洪當然心有不甘，明白自己雖然勢孤力弱，但係手握當時最強大嘅武器，就係「法統」！而且段祺瑞響時人心目中，只係大奸大惡袁世凱嘅copycat，民意基礎輸蝕畀黎元洪。

1916年下半年，算係中國最自由民主嘅年代，大家依法做事，唔係有兵就惡曬。於是黎元洪借法統發爛，彈劾徐樹錚，彈劾案眾議院列出徐樹錚七大罪狀，包括藐視總統、強迫總統蓋印、秘密派員參加張勛嘅徐州會議、暗中操縱軍人干政……，條條大罪，法統面前，徐樹錚落馬，由黎元洪自己友張國淦（1876-1959）接任國務院秘書長。

徐樹錚下馬，院府衝突正式浮面。除咗徐樹錚，黎元洪亦開始安插大量自己人於新政府內，力圖抗衡段祺瑞北洋系統勢力擴張。

政治紛爭一直冇停過，但係一場中華民國意識形態大戰，就醞釀發生。辛亥革命之後，滿清王朝被推翻，其實亦都係儒家哲學嗰套君君臣臣、父父子子、要個社會井然有秩序嘅意識形態被大部份中國人所唾棄，唔信儒家哲學，咁信乜呢？

其後袁世凱想行洪憲帝制，目的都係想復興儒家哲學傳統文化，想個社會回復傳統秩序狀態，減少紛爭，再一次邁向大一統，袁世凱帝制嘅失敗，進一步證實，維持中國社會3000多年超穩定狀態嘅儒家哲學意識形態已經失去其生命力。

1916年11月12號，國會參眾兩院之中，就有超過100多名議員喺北京組成「國教維持會」，佢哋響國會提出，將「孔教」列為國教，要求寫入憲法，回復祭祀孔子之禮，國會憲法審議會開會審議憲法草案條文嘅時候，是否將孔教定為國教，成為議員之間激烈爭論嘅問題。而係當時社會上，一股徹底將舊文化儒家哲學摧毁嘅文化力量，亦都逐漸形成，舊嘅唔去新嘅唔嚟，係當時大部份人、或者講係年青人最時尚嘅想法。

當然，當年亦都冇人諗到，100年後，21世紀儒家哲學要喺個屎坑度錨返上嚟，重新擔當拯救中國人民道德滑坡嘅意識形態武器。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ


【常威近代史】第二部《中國一百年前的第一次改革開放》實體購買
https://www.382now.com/product?id=151

【常公子歷史頻道213回：大清亡國關 #彈劾 蛋牛治】

♉臺灣選舉塵埃落定，昨天晚上中美簽訂第一階段貿易協議，不想跪低也得跪低，有人形容今次貿易協議係喪權辱國嘅《馬關條約》，但係又可以咁睇，美國方面只係想回收佢哋過往向中國輸出嘅利益，以及壓抑中國國力繼續坐大挑戰其世界霸主地位，另一方面佢哋都想全面打開中國市場，尤其是喺金融服務業一環。不過中國心知肚明，如果放棄保護主義，全面開放所有金融關卡，真正行自由市場經濟模式，中國將要承受一個乜嘢嘅效果？到嗰陣時就真係馬關條約！

♑情況有如兩國現在嘅軍事距離，如果正面交鋒，係完全冇得打。所以堅持唔打，又要維持其氣勢以及呃傻仔同阿公阿婆，只有不斷嗌交玩口水戰玩語言偽術。中美貿易戰由第一日爆發開始，拖下拖下，一面嗌交一邊傾，咁就拖咗兩年，時間真係好快過，中国式「和稀泥」戰略真有其實效。

♋「和稀泥」係乜？根據網絡定義，「往泥土裡摻水，使變稀。比喻不講原則、不分是非地調和折中」，係中國人常用處理問題嘅解決方法，總之拖拖拉拉，不斷改變立場，忽左忽右，忽強忽硬，向硬問題摻水，令硬變軟，令膿化稀，一路拖落去，問題就會唔存在，自自然咁消失……好似好深奧，其實一啲都唔深奧。今日香港嘅「警暴」問題、「民主」問題，特區政府就係用和稀泥嘅手段處理緊，過多一年半載，或者三五七年，就好快有人唔記得，咁個問題就唔會存在，that's all and close the file。

♊香港嘅老人問題亦都係一樣，四任持首加特區政府一直唔肯正面面對，唔肯興建大量安老設施同調配資源，面對嚟緊嘅老人高峰潮，一直用小恩小惠加乾坤大挪移將問題拖住，其實就係和稀泥緊，向問題摻水，使其變軟化稀。有人提議過用幾百億全民退保，希望長遠解決未來嘅老人問題，但唔知點解特區政府嫌貴？但係用過千億起高鐵港珠澳發展西九就好爽手？或者最近批100億公帑比海洋公園亦都好爽手？點解呢？

♊相信理由亦只有一個，搞基建搞工程，古往今來係人都知道最容易上下其手，政府批100億出嚟任你攞，咁梗係齊齊分水先，整個利益共同體大家先分五六成（其實香港已經好廉潔，大陸係分八九成），齊齊發袋袋平安，剩低嘅錢先愛嚟真係搞，搞基建項目如是，搞地產如是，搞股票亦如是。有好多人唔明白點解香港咁多有錢佬，其實大家只不過唔知道佢哋用乜嘢方法賺錢？所謂財來自有方，而且這些機會不是你和我的。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/nzUgSIx4WvA

當時嘅中國社會的確非常撕裂。一方面有好多人（上岸廢老，大清遺民、既得利益階層，社會上重要持份者）希望復古，回復儒家哲學提倡嗰種井然有序嘅社會秩序狀態，因為喺嗰種狀態下，佢哋嘅財富同利益先可以得到長久保存；但同時，年輕一輩同知識份子，則想辦法喺舊世界中找尋新嘅意識形態出路，喺佢哋心目中，儒家哲學封建思想已經毒害咗中國幾千年，係時候要發動一次性文化大革命，推翻一切，起碼要推翻嗰批肚滿腸肥嘅既得利益者。

社會思潮起伏，意識形態醞釀重新洗牌，其時整個中華民國，亦到處發生武裝叛變同地區性軍事衝突，有時候喺兵打兵，有時候係兵打民，民打兵，總之永無寧日。加上日本不斷用唔同藉口干涉中國主權，情況日益嚴重，之前簽下喪權辱國嘅21條開始產生作用，而當時弱勢嘅中華民國北京政府，亦根本無力抗衡日本。

12月19號，大總統黎元洪頒佈，禁止軍人參加政黨，希望進一步削弱段祺瑞一方北洋集團軍人干政嘅勢力。

12月26日平安夜，中國著名學者蔡元培（1868-1940）被黎元洪任命為北京大學校長。蔡元培係浙江人，25歲進士及第，為翰林院庶吉士，曾經留學德國萊比錫大學，喺革命期間，佢係同盟會會員，係光復會會長，民國以後，佢擔任過第一任教育總長，負責處理新中國教育事務，佢嘅聲明極好，做人做事到達偉人級數，係佢一手將中國人教育「從封建專制時代擺渡到民主自由時代」。

接任北大校長後，佢將北大全面西化學術化，大刀闊斧進行大改革，包括改革學校領導體制同埋學科，銜接西方設置大學學制，創辦科研機構，提倡平民教育，佢更加係第一個主張男女同校。由於蔡元培採取包容唔同意見嘅方針，不拘小節，網羅唔同政見嘅知識份子加入北大，北大好快就開始咗學術研究同思想自由嘅優良風氣。亦由蔡元培時代開始，中國人先真正擺脱「讀書為官（之後貪汙致富）」嘅舊思想。

另外蔡元培亦都百分百支持新文化運動，提倡以白話文取代古文，反對封建復古主義，揚棄儒家哲學，倡導以「科學」 Science德先生同「民主」 Democracy賽先生為內容嘅新思潮，新意識形態。蔡元培嘅努力，終於令到北大成為五四時期新文化運動嘅重心，不單止是五四運動，之後嘅北京大學，亦都成為中國知識份子嘅心臟同良心，在此的確要多謝蔡元培先生嘅豐功偉績。

順帶一提，1937年年老嘅蔡元培嚟到香港終老，其後死於養和醫院，安葬於香港仔華人永遠墳場。



【常威近代史】系列

第三部《東方維多利亞女王之死》
https://play.google.com/store/books/details?id=GaGrDwAAQBAJ

第二部《中國一百年前第一次開放改革》
https://play.google.com/store/books/details?id=_6KMDwAAQBAJ

第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

第一部《大清亡國關慈禧蛋牛治》實體購買
https://www.382now.com/product?id=87

第二部《中國一百年前的第一次改革開放》實體購買
https://www.382now.com/product?id=151

第三部《東方維多利亞女王之死》實體購買
https://www.382now.com/product?id=165

【常公子歷史頻道214回：大清亡國關 #新軍出手鳥 蛋牛治】

♉Sorry，最近真係好忙，【中英聯合聲明】系列第二十二回，要再拖一個禮拜先出街，請大家見諒，人得我同阿潮兩個，手只有兩雙，盡做！

♑今集講袁世凱新軍出手了，當然唔係打外敵，係鎮壓自己人！袁世凱小站練兵編練嗰支中國最強武裝力量「新建陸軍」，奉命出發前往山東鎮壓義和團，神阻殺神，佛阻殺佛，最後保住個山東半島，取得大捷，之後袁世凱乘機喺山東壯大實力，抗日之餘，不忘坐大。

♐現代世界，一個政權最大嘅敵人並唔係外國勢力，侵略其他國家壯大自己，已經係上一個時代嘅玩法。今日畀個伊拉克你做第五十三個州，你都唔會要，水漲船高，管治需要成本，多隻香爐多隻鬼，侵略其他國家，已經冇人會做。因此政權嘅最大敵人唔喺外面，而喺裏面，國內嘅群眾就係政權最需要防範嘅「敵人」，維穩變得無比重要，經過過去半年香港發生嘅事情，相信大家已經一清二楚。2020年，中央政府對香港嘅維穩政策應該有一個翻天覆地嘅巨變，2019年嘅亂局佢哋唔想再發生多一次！

♈不過令人失望嘅係，狗始終改變不了吃屎，亂局平靜後，鷹派鄧炳強上馬，立刻濫捕濫告，大規模秋後算賬，成日講修補撕裂，但係實際行動卻將撕裂不斷擴大，無非擺出姿勢，以大石責死蟹，話畀你知，鐵腕統治強權當道白色恐怖就係香港人將要面對嘅未來。忍得到就留低，忍唔到唔該移民，你走幾多我補充幾多，其他嘢就冇乜，人真係大把。如果你感覺呢個唔係事實，對唔住，呢個正正係事實。

♍下集215回Youtube，會有全新做法，常公子真身粉墨登場講解近代史，拉近大家距離。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/P6SqjqAQUmY

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

❤請大家支持，我有份寫嘅新書【賭馬男人嫁得過】！農曆新年前，香港各大書局上架！

🙏賭馬男人嫁得過🙏
👍出版:財經移動 / 定價:$108
👍作者:賭SIR、常威、必勝客

❤【內容簡介】❤

《賭波男人嫁得過》作者賭Sir之後又一力作！！
今次與文史哲達人常威攜手合著「嫁得過」系列3《賭馬男人嫁得過》。

《#賭波男人嫁得過》於出版短短三個月內即已再版，不啻為出版奇蹟。

《#碌葛男人嫁得過》是香港人以香港話寫生活智慧哲學書。

《#賭馬男人嫁得過》由以下三部份組成：

第一部份，賭馬風險管理，由杜氏數學創辦人賭Sir主編。教你拆解馬會嘅綑縛式利誘投注策略，令你唔使賭貴馬、輸凸錢。 仲會解釋畀你知，賭馬方程式背後嘅原理，令你有能力區分賭馬集團嘅真與假。 除此之外，賭Sir仲會踢爆坊間嘅賽馬老千，及其牛鬼蛇神，助你認清真相，杜絕任何畀佢搵你笨嘅機會。做好風險管理，學識唔好蝕底。

第二部份，賭馬政治學，由近代史專家常威主編。由政治同歷史嘅角度，分析賽馬同資產階級嘅關係，教你跳出當局者迷嘅馬迷身份，借用權貴嘅眼睛，摸清賽馬遊戲嘅潛規則，令你有能力睇到一般馬迷睇唔到嘅蛛絲螞跡，降低搭沉船嘅機會。用統治階層嘅腦袋刨馬，學識綜觀大局。

第三部份，賭馬技術分析，由經典馬評家必勝客匿名主編。由宏觀返回微觀，落返去個體馬迷嘅視野，究竟有咩揀馬嘅技術先？？好高興邀請到隱世高手必勝客，揮筆傳授「揀馬的26道暗黑兵法」畀大家。講到底，都係要學識把握機會！！

#賭馬男人嫁得過
#賭SIR #常威 #必勝客
#投資哲學

【常威近代史】（二百九十七回）
大軍閥平反系列

時間去到1917年，依一年係人類歷史上意義重大嘅一年。因為1917年2月俄國發生革命，史稱「二月革命」，人民推翻羅曼諾夫沙皇300多年王權統治，尼古拉二世（Nicholas II，1868-1918）成為亡國之君，建立以亞歷山大克倫斯基（1881-1970）為首嘅臨時政府。克倫斯基奉行資本主義，而且堅持繼續參與第一次世界大戰，令到俄國國內瀕臨崩潰嘅經濟雪上加霜，貧窮引發國內起義民眾強烈不滿。

國會「杜馬」中信奉共產主義、以列寧及托洛斯基為首嘅多數派（即係歷史上所謂「布爾什維克」，是俄國社會民主工黨中的一個派系），於同年7月響聖彼德堡發動士兵同工人上街遊行示威，反對臨時政府施政，克倫斯基似乎完全冇得到尼古拉二世留下嘅教訓，來來去去都係一招，動用軍隊開槍鎮壓群眾，死傷400多人，俄國歷史上稱為「七月事件」，「七月事件」終於導致「十月革命」爆發，布爾什維克共產黨於1917年11月發動政變，成功奪權，建立世界上第一個共產主義國家。

列寧奪權建立蘇維埃（Soviet）共產主義政權，其實係20世紀重要事件，因為一直以嚟，由馬克思及其同路人所創立嘅共產主義思想（Communism），一直只係流於紙上談兵（真係講就天下無敵），如果唔將1871年3月18日到5月28日嘅「巴黎公社」依個短暫共產主義政權計算在內，人類要去到1917年，先至真真正正將共產主義變成實際政治操作，變成一個真真正正擁有實質權力嘅政權。

當時全世界嘅人，尤其是係知識份子及低下階層（或者馬克思主義所講嘅Proletariat，「無產階級」），佢哋都將列寧嘅新政權視作世界嘅新希望，因為資本主義而產生嘅帝國主義引發大規模世界大戰，生靈塗炭，整個世界低下階層活於水深火熱嘅地獄中，列寧嘅共產主義政權喺當時無疑係一個救世主，佢嘅出現，係拯救世界，係為世界帶來新秩序，一個全新嘅、人民均富、冇戰亂嘅烏托邦，並非為破壞世界而來！

今日世界，唔少人將共產主義視作洪水猛獸，但係20世紀初期，活於戰火同貧困之中嘅世界人民，共產主義係一個救命水泡。當時嘅中國亦唔例外，共產主義思潮開始蔓延，列寧於俄國奪權成功，無疑更加火上加油，進一步鼓舞全中國嘅知識份子推翻舊世界，建立新秩序！一場中國國內意識形態大轉移，亦開始醞釀發生。

清楚歷史嘅人都會相當明白，所謂「大部份人嘅共識」其實唔存在，社會上大部份人都係「冇意見」，呢個係常態，「共識」或者「主流民意」，其實只不過係社會上少數具有影響力嘅人，利用輿論同影響力所操控及引領。政治本身係一樣非常複雜同奸狡嘅操作技術，其實大部份普羅民眾都唔明白內裡嘅實際情況，總之人講乜就信乜，身邊大部份人覺得點就係點。

【常公子歷史頻道215回：大清亡國關 #盡鍚洋人 蛋牛治】

♉由今集開始，我嘅Youtube Channel常公子歷史頻道將會改變形式發放，由我粉墨登場主持，老鬼現身，同大家觀衆拉近距離。

♑本集錄製時間，遇上唔少技術性困難，例如收音回聲太大，我隻眼又唔知望咗去邊？大請大家忍受一下，技術在不斷改善中，過多一兩集效果就會好好多，畢竟手只有兩對，得我同阿潮兩個人包辦所有，陀地製作，係咁上下，請大家多多包涵。

♐今集opening有一段，我表白心跡，講出我製作一條近代史頻道嘅目的，無非都係想更多人認識近代歷史，回溯過去，才可活在當下，有助擁抱未知嘅未來，一片真心出發，對得住天地良心，希望大家可以介紹多啲親朋戚友睇我條頻道，幫補一下製作費！多謝大家！

♉最近有個新諗法，希望過年後搞個小班教學，教吓「馬克思主義」或「中共黨史」，地方場地已經有咗，響觀塘，收吓學費，幫補一下生計，希望大家會捧場，本人亦希望成事，畢竟社會上，除咗大學學府，民間應該冇乜人深入淺出教馬克思主義or共產主義，應該有DD綽頭，唯一擔心嘅，反而係「政治正確」問題，不過冇得諗太多，佛陀教我，精進勇猛，做人應該勇往直前，面對挑戰，一於做咗先算！

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/_GeXiVqKjQw

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百九十八回）
大軍閥平反系列

用少少篇幅，講一講1917年時候嘅少年毛澤東。

作為中國近代史上一個最重要嘅人物（沒有之一），或者作為世界歷史中一個傳奇人物，究竟佢嘅青年時代係點樣過嘅呢？今日講少少。

對毛澤東嘅評價一向非常兩極，有人話佢係古往今來一個最大嘅魔頭，亦有人非常推崇佢，到咗今日世界上仍有唔少「毛派」支持者，我常公子作為劉仲敬先生忠實書迷，我認同毛澤東係歷史上最偉大嘅馬基維利主義者，其實佢響唔同時代以唔同嘅身份同立場出現，能夠配合時勢為自己爭取最大嘅政治籌碼，玩手段玩意識形態，係玩到出神入化，最強項係燃化人民同政敵，燃到大家雞毛鴨血，燃到大家死無葬身之地，喺毛澤東之前，冇人可以做到，而我更相信毛澤東之後，亦都冇人可以copy佢，今日有人話想學佢，但係我想話畀嗰個人知，你十劃未有一撇。

我用編年史（Chronicle）文體寫民國史，時間線去到1917，當時毛澤東23歲，正身在湖南省立第一師範學校讀書，仍未畢業行乞出發去北京。

毛澤東1893年出生於湖南省長沙府湘潭縣韶山區，當時清末嘅湖南省，係中國一個思想最開放嘅省份，湖南省長沙市係王夫之（王船山）思想發源之地，亦係平定太平天國之亂大功臣曾國藩鄉下，南方士大夫團練武裝力量人員構成嘅主要提供地。

自19世紀60年代開始，湖南省軍事同革命人才輩出，簡直係星光熠熠耀保良，先有麥兜響噹噹戊戌六君子譚嗣同，自立軍唐才常，真國父黃興，當然最後有毛澤東同埋劉少奇，多到數都數唔曬。湖南人鄰近廣東思想開放，民風強悍，同樣受顛覆種基地香港氣氛薰陶，但廣東人鍾意走精面（eg.孫文），湖南人就有前冇後打死罷就。

毛澤東老豆叫毛貽昌，喺當地富農，曾經參加過湘軍，思想非常保，係中國傳統家長式人物，毛澤東母親叫文七妹，係一個普通農家婦女。年幼時代，毛澤東接受過幾年儒家私墊傳統教育，國學根基深厚，亦都奠定咗佢一生，始終無法擺脱中國文化嘅糾纏，佢喜愛詩詞歌賦，亦鍾意閱讀中國傳統文化歷史書籍同章回小說，佢自己就講過，一部「資治通鑒」、一本「三國演義」，貫通佢一生人所有政治鬥爭脈絡。嚴格嚟講，毛澤東係一個舊派傳統嘅中國知識份子。

1910年，辛亥革命爆發前夕，十六歲嘅毛澤東離開鄉間，進入湘鄉縣立東山小學堂讀書，接受新式教育，開始接觸新時代資訊。1911年辛亥革命爆發，毛澤東曾經參軍，成為湖南新軍一名士兵，之後退役，以全校第一名考入湖南全省公立高等中學，半年後退學。1913年前，毛澤東每日響湖南省長沙市湖南省立圖書館自修，每日不停睇書，中午食兩個米餅，晚上訓響社區中心收容所，閱讀各種西方政治同科學嘅經典著作（翻譯本），書中自有黃金屋，勤奮自學，境界不斷提昇。

閱讀，成為毛澤東一生人最大嘅嗜好之一，其實非常正面，試問一個革命青年，點可以唔讀書丫？唔讀書就冇理論根底，冇理論根底就好容易露底，一露底就冇人幫到你。打仗殺敵需要理據；理據來自理論；而理論則來自書本。依一點大家一定要清楚。

1913年春天，正當成個中華民國立立亂之際，毛澤東考入唔需要學費嘅湖南省南第四師範，1914年2月，第四師範併入湖南省立第一師範學校，毛澤東就喺第一師範學校，一讀就讀左四年，渡過咗佢19歲到23歲嘅青年黃金時代。

期間，毛澤東勤工儉學，用最低嘅生活成本，一邊讀書，一邊搞政治活動，呢幾年，佢響湖南第一師範認識咗好多人，呢啲人之後都成為中國革命嘅主要參與者，亦喺第一師範就讀期間，毛澤東開始接觸同埋閱讀馬克思主義著作，並開始成為馬列主義嘅信徒。

湖南讀書期間，毛澤東差唔多謝絕所有年青人享樂，甚至不談戀愛（可能根本冇錢，佢老豆唔科水），專心一致以知識裝備自己，一心一意希望拯救整個中華民族於水深火熱，佢嘅動機絕對高貴而純潔，同所有同時代嘅革命青年（或叫社會主義革命青年）一樣，為咗理想，為咗整個民族未來的福祉，佢哋可以唔食飯捱窮、可以拋頭顱灑熱血，從未驚過。

放響年青毛澤東眼前嘅連串中華民國政治紛爭，毛澤東認為解決之道就係當時火紅嘅「馬克思主義」。1918年6月，毛澤東響第一師範畢業，創辦《湘江評論》，開始響湖南傳播初級馬克思主義思想，同年佢更加同友人創建《新民學會》，搞社會主義讀書組。

年青人毛澤東似乎明白要再上一層樓，就要去當時中國最高嘅學府進修，於是1918年中，佢決定離開長沙，前往北京大學，睇下有乜嘢再發展，之後響北大圖書館認識中國馬克思主義元老級master李大釗，亦徹底改變毛澤東嘅一生……

毛澤東嘅青年時代就寫到呢度，將來要講毛澤東仲有無數事情要講，下集我哋會回歸段祺瑞黎元洪院府之爭，睇吓自由民主百花齊放，如何衍生更大的亂局……

自信人生兩百年，會當水擊三千里。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165