【常威中史】慈禧平反系列（一百五十五回）
咁X辛苦讀書為左啲乜先？
搵份好工？改變自己嘅命運？改變自己嘅階級？上述嘅嘢都冇錯，今時今日亦都冇改變過。當然做唔做到又係另一回事，今日世界，老竇身家一定比一個PHD更值錢。我好朋友周顯講過，有錢人嘅地位嚟到現在，係到達史無前例嘅高峰，資本掌控一切，財閥亦都超越咗國家地域同政治嘅限制，你睇李嘉誠就知。
但係響古代，讀書係一般寒民（窮L）嘅唯一出路，考科舉中狀元做官改變命運，係唯一嘅玩法。所以百日維新，劉晶毫無準備下廢除科舉，造成社會上嘅巨大動盪係理所當然。到咗1905年，經過八國聯軍入京，大清被逼全面開放貿易，同整個世界資本主義市場接軌，某程度上亦都確立咗廢除科舉嘅合理條件。於是1905年，科舉呢個阻礙清國現代化同埋矇蔽知識份子雙眼幾千年嘅仆街制度，終於要徹底粉碎。
豆斗係聰明人，做事合理。仲未廢科舉之前，佢就逐步建立起另一套教育系統，令到廣大讀書人唔需要經過科舉都可以有前途（或者睇到有前途就夠），呢個時候，大清國內已經建立大量新式學校，新嘅教育制度係同外國勢力入侵、同庚子賠款有關，好似北京嘅清華大學，上海復旦大學交通大學，就係由庚子賠款同外國人所創立。響新式學校裡面，除咗傳統嘅儒家經典，仲有大量西方科目教授，好似英文，科學，地理，數學等等，學生要穿上校服、守校規、學校有圖書館有醫療室有體育室，舊有事物一夜之間消失無影。1905年廢除科舉嘅時候，全國嘅新式學校已經接近五位數字。
除咗帝國國內進行大刀闊斧教育改革，帝國亦都鼓勵學生出國留學，之前已經講過，美國同日本就係當中最大嘅推動者。（問心嗰句，真正嘅帝國主義侵略者，我常公子個人認為係紳士大英帝國同埋民主自由平等嘅法國，美國同日本某程度上真心為清國好），窮學生，出國政府仲有獎學金援助，1902年之後，大量學生出國留學，單單去日本讀書（受軍訓），人數就接近一萬人。
當然你去到日本成為咗革命份子，又係另一回事。呢個世界針冇兩頭利，你要個國家現代化，就要承受政權動搖嘅風險。20世紀初期嘅大清帝國正處於呢種兩難局面，一路行嘅愚民政策再唔再work，大清其實係唔見棺材唔流眼淚，如果響康雍乾盛世三代，就有以上嘅覺悟，大清帝國可能已經成為咗亞洲第一強權。又當然，如果一早接受西方文化，大清可能又已經亡咗國好耐，又或者好似印度咁成為大英帝國嘅殖民地幫手種鴉片。
真心。
講管治手腕，現今中國共產黨真係一流，每年大量留學生出國，接受西方文化自由民主平等理念嘅洗禮，但係佢哋回國之後，不但冇動搖過中共嘅極權統治，反而成為咗中共極權統治嘅最大助力。難怪特朗普講，每一個中國留學生都係間諜，某程度上佢又講得冇錯嘅。中共做得咁好全部係意識形態工作，你唔理意識形態係乜，Sorry，我冇辦法幫你理解歷史。
講返轉頭，大清亡國係唔係因為國內文化水平上昇而直接引發？事實上又未必。歷史一直在更新資訊，近年嘅高階歷史研究，紛紛指出真正將大清國運送入絕路嘅人其實係曾國藩，因為係佢首先創立地方民兵制度打太平天國，創立基本上有外國資金支援、完全不受中央政府管轄嘅地方軍紳民兵制度，呢種模式無疑係為大清掘墳。
1901年嘅東南互保機制，更加將整個大清國一分為二，南方地區只係名義上同大清政權掛鉤，其實內政已經同大清北京中央政府割斷，其時清國真正嘅財金中心仍然係大上海。再之後一大串日子，大家著眼點並唔係北京，而係如何爭奪上海。例如1927年蔣介石北伐終站就係上海，理由係乜？因為只要攞到呢個大錢罌嘅控制權，一切就可以水到渠成。
馬克斯講得冇錯，資本的確係掌控一切。如果你讀歷史唔講錢，我相信你一定會大錯特錯。
#常威 #大清亡國關慈禧蛋牛治 #慈禧太后 #晚清歷史 #辛亥革命
【常威近代史】第二部《中國一百年前的第一次改革開放》電子書https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》電子書https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買https://www.382now.com/product?id=87
【常威近代史】第二部《中國一百年前的第一次改革開放》電子書
lm
