【大清亡國關慈禧蛋牛治】第一回

【常公子歷史頻道284回：斷送共和關 神授天意 蛋牛治】

♉關於袁世凱要行洪憲帝制做皇帝之事，本公子一直感覺非常疑惑，你用狼子野心去解釋袁世凱，未免太膚淺同太看輕呢個歷史大人物，袁世凱嘅智慧高出同時代嘅人好多，尤其是係國際視野，喺佢身處嘅時代，當時國際社會大部分國家仍然存在君主制度，同中華民國最息息相關嘅大英帝國同日本帝國，同樣行緊君主制，袁世凱想效法上述兩個國家響一片混亂南北分裂嘅政治亂局中重建君主制度，將自己變成虛君，然後立憲，重新再上路，可能經過一番深思熟慮都未定。

♐事實上，當時啱啱建立共和政體嘅中華民國，百廢待興，經濟實力薄弱，欠債纍纍，除咗版圖同埋人口位列世界前列，真正國力，就連當時歐陸一個中等國家如西班牙、葡萄牙都未必及得上。尤其是鄰居日本帝國帶嚟嘅震撼，1916年，中國人口大概有4-5億，而當時日本人口普查，官方數字大概係400萬，中國人口係日本嘅100倍，但係日本嘅國力，已經遠喺中國之上，問題在哪裏呢？你話中國守舊落後冇歐化，但其實自1860年開始，慈禧太后已經不斷嘗試將中國歐洲化，但係點解日本做得到？國力飛騰而上，而中國國力偏偏每況愈下呢？

♋中國發展不及日本，決定性嘅因素可能有好多，我個人認為人口太多先係最大嘅包袱，但對於人口問題，當時嘅世界並未有深入研究，社會學先至啱啱開始響歐洲啟動。響當時中國社會，反而覺得「人多好做事」，況且人命根本唔值錢，冇人會去諗，冇人明白，人口太多版圖太大反而先係最大嘅負累。袁世凱退而求其次，思考日本嘅政治體制會唔會係決定兩國國力分野嘅最大原因？尤其是係日本人（表面上）上下團結一心，全維繫於「萬年一系」嘅天皇君主制度。

♏袁世凱嘅想法大致上冇錯，錯就錯在虛君皇帝呢個角色並唔可以係佢做，當時共和體制的確唔適合中國人社會，對唔住唔啱聽都要講一次，要行民主自由共和議會制度，人民必須有一定嘅公民意識同智慧先得，如果冇，民智又未開，咁行君主制應該比較適合。如果用上述嘅思維，滿清帝國唔應該被推翻，使用沿用嘅君主制度一步一步、循序漸進行立憲改革，可能係全中華民族最理想最有利嘅選擇，但在歷史嘅分叉路上，人民選擇一躅即蹴，結果同安定和平愈走愈遠，不過條路自己揀，仆街冇得喊。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/xB5r_eWMBnE

【常威近代史】（三百六十九回）
大軍閥平反系列

1921年5月，仲記唔記得，1920年嘅5月，中國人第一次大鑼大鼓慶祝勞動節，過咗一年，社會主義（或共產主義、馬克思主義）同工人運動繼續升溫，用左派嘅語言，係有更多工人同無產階級覺醒，開始明白佢哋嘅處境，以及長期以來遭受資本家嘅剝削同埋奴役，群眾嘅反對聲音同力量開始喺社會上凝聚起嚟，好快會形成一股改朝換代嘅新勢力。

叉開一筆，講吓好多人對歷史嘅誤解，好多人以為改變係一朝一夕嘅事，今日話革命，聽日就可以推翻政府建立一個美好嘅新世界。事實上歷史事件係一個漫長嘅醞釀過程，改變從來唔會係一夜之間發生。以中共做例子，由1916-1917年，共產主義思潮剛剛喺中國開始傳播，足足要經過幾年時間，去到1921年中國共產黨先嚮「第三國際」指導同支援下正式成立並運作，中間經歷無數波折，有起有落，甚至差啲斷氣，到最後能夠統一中國，建立中華人民共和國，建立新世界，係1949年嘅事，由蘊釀期到開花結果，中間足足隔咗30年時間，30年係一代人嘅時間。

另一個例子，喺臺灣本土化運動，如果要為臺灣本土化運動（或直接了當叫臺獨）設立一個起點，應該係1962年，由臺獨之父——曾經協助過中共嘅馬克思主義者——史明（1910-2019）撰寫嘅台灣通史著作《台灣人四百年史》出版，依本書係臺獨里程碑同聖經，正式將「臺灣人」從「中國人」set中切割開嚟，流亡日本嘅史明響1967年創辦「獨立台灣會」，亦係最早響在臺灣內部串聯臺灣獨立運動嘅非法團體之一。就此展開，中間經過無數波折同人命嘅損失，直至去到2000年陳水扁當選臺灣第一個非國民黨背景總統為止，中間又係30幾年時間，又係一代人嘅時間。

歷史唔可以心急，欲速則不達，需要長時間醞釀同滲透，或者有其他突發嘅外在條件幫助，先會變成歷史事實。有陣時，改變係要等成代人一齊死曬先可能發生。但係種子必需播下，將來才能夠開花結果。做左某啲嘢而冇效果，唔需要灰心，亦係常態，亦算係一種播種嘅工作，連種秄都唔播下，攤喺度乜鳩都唔做，做任何事情都唔會發生。做小小都係做，人人喺自己嘅範疇內做少少，就能夠集腋成裘，變成一個巨大嘅改變力量。小學生常識，其實唔需要講咁多。

真正需要嘅係堅毅，同埋堅定不移嘅意志力，凡事總係由心出發。一鬥長命、二鬥堅持、三門運氣。

1921年，北京中央政府仍然陷於嚴重財赤狀態，舉個例子，5月16號，北京八間大專院校校長集體辭職，原因係政府開出空頭支，教職員冇糧出。5月19號，北京附近五個縣爆發旱災，有過萬個細路仔餓死，而且出現人口販賣情況，用一蚊，就可以買到一個細路仔。呢啲到底係乜嘢情況？其實係無政府狀態，一個冇錢嘅政府，其實係乜嘢都做唔X到，亦都冇辦法實行有效管治。政治同經濟從來無辦法分得開，要成功要搵金主，否則只係空口講白話。

5月頭，美國實用主義大師杜威再次來華，今次佢係應廣東教育會會長汪精衛邀請，嚟到廣東觀光同發表演說，今次杜威嘅演講題目係《西洋人對於東洋人貢獻》，佢嘅演講大受歡迎，次次有過千人聽，亦擴大左「實用主義」喺南方嘅影響力。杜威係美國自由資本主義代表人物，而當時廣州政府逐漸左傾，係想行共產主義，不過以前啲人唔係咁清楚左右之分，所以可以撈埋一齊講，總之凡事要以「實用」為原則，少講虛事。乜嘢係虛？中國傳統文化儒家哲學嘅道德同三綱五常就係虛，所有舊嘅事物都係虛，所有有「中國」標籤嘅東西都係垃圾，外來事物就係好，新思想先至夠前衛，舊嘅唔去，新嘅唔嚟，情況就係咁簡單。

5月30號，第五屆遠東運動會喺上海舉行，雖然唔少地方鬧飢荒，上海呢個自由城邦仍然繼續欣欣向榮，參加今次遠東運動會有142名菲律賓選手、96名日本選手、110名中國選手，中國仲首次派出女運動員參加比賽，比賽設田徑、游泳、球類等八個項目。6月4號賽事結束，6月5號舉行頒獎典禮，菲律賓獲團體第一，中國第二，日本第三，中國選手獲得足球、籃球、排球、跳高等六項冠軍。比賽期間，有大量上海市民入場觀看比賽，顯示中國人對體育運動已經開始日漸關心。

遠東運動會舉行期間仲有個小插曲，話說最後一日比賽，一群無政府主義者大鬧比賽場地，在賽場內開槍派傳單引起混亂，佢哋立刻俾警察拘捕，喺佢哋身上搜出中、英、日三種文字嘅傳單，傳單內容係「一拳打碎資本制度，一腳踢翻政府機關」。

又有花邊，上集講過有德國女郎向吳佩孚示愛不果。今集講吓民國第一美男子汪精衛，汪精衛同南洋富商之女陳璧君嘅盪氣迴腸愛情故事大家都知道，但其實汪精衛仲有一個紅顏知己叫方君瑛，汪精衛同陳璧君結婚後，方君瑛仍然對汪一往情深，二人經常來往，於是引起陳璧君不滿，方君瑛為表清白，竟然吊頸自殺，並且留下遺書俾汪太聲明：佢同汪精衛之間嘅愛，「僅屬精神，並未及於亂，至今猶為女兒之身」。

評語：談情說愛姐，其實駛乜死？亦由此可以反映出，當時嘅世界，人人都話拋棄「三綱五常」，其實每個人都被「三綱五常」繼續束縛住，要徹底割斷中國傳統文化，其實去到今日亦都冇可能。

汪精衛係大漢奸？歷史對佢評價非常唔公平，其實真相並非如此，我真係好想，如果我有時間閱讀更多，我一定會推出為汪精衛平反系列……

#常威 #大軍閥平反系列  #大軍閥 #民國歷史


【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常公子歷史頻道285回：斷送共和關 阿寶 蛋牛治】

♉因為人類不斷重複錯誤，所以今集阿寶會出場，阿寶是新類型人，是戰鬥武器機械人高達的駕駛員，1979年第一季「機動戰士」中，阿寶本來係外太空殖民地一個平凡少年，因為機緣巧合，同另外一班年青人踏上戰爭之路。所謂戰爭，係「地球聯邦軍」同「自護國」之間嘅爭鬥，自護國本來係地球外太空殖民地之一，後來宣佈獨立，於是同地球聯邦軍展開一場長達數十年嘅太空戰爭。

♑細個睇高達，正義當然永遠喺地球聯邦軍一面，但同其他同類型科幻動畫比較，「機動戰士」世界觀嘅正邪劃分，已經冇咁清楚，世界並非非黑即白，非正即邪，地球聯邦軍中亦有官僚主義同黑暗面，大奸大惡嘅自護國裡，亦都有大量有情有義嘅人物，愛上高達，亦因為呢個理由。之後嘅幾季機動戰士動畫，亦都將之發揚光大，終於打造一代傳奇，歷久不衰。

♉其實世界上冇絕對嘅壞人，亦都冇百分百嘅好人。無權無勢者，當然亦冇黑白之分。有權有勢嘅人，難免要選擇政治立場，政治光譜上，左右兩個極端只係屬於少數人，大部分人徘徊喺中間狀態。今時今日嘅世界，亦唔係「資本主義」同「共產主義」兩個簡單意識形態嘅鬥爭，而係屬於一場「管理技巧」嘅決對，如何管治一個大國，既能自保，又能夠攻擊敵人；既要發展經濟，又不能夠導致分裂，其實所有都係管理學問題，而並非意識形態問題。

♑意識形態好多時候成為處理經濟問題嘅包裝或偽裝，以為係意識形態問題？其實係經濟問題。和平盛世已經過去，由資本主義自由主義一手打造嘅黃金時代，亦會一去不返。中國同美國，代表著世界兩大陣營嘅「新冷戰時代」已經降臨，並且開始啟動具體鬥爭。有人問點解唔可以和平相處？總係要發生爭執？但係真相係，所謂和平其實只係單邊獨大，或者有足夠威嚇性而達成嘅暫時平衡，從來都冇可能長久。係一個巨大嘅聯邦裡面，亦冇可能達到真正公平嘅利益分配，但天秤出現傾斜，利益唔夠分配嘅時候，自護國就會出現為自己爭取合理利益，其實係歷史常態。

♐阿寶話人類會不斷重複錯誤，而且不懂得響錯誤裏學習，其實係錯！人類並非想不斷重複錯誤，而係「不斷重複錯誤」本身，係人類嘅本性同歷史嘅必然。如果現在整個地球上只有一千萬人口，咁樣全地球所產生嘅物質條件就一定能夠滿足一千萬人口嘅全部物質需要，咁就唔會有任何鬥爭出現，全地球一體化嘅「地球聯邦」政治體系亦會如愿成立……

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/CEIVYHJtw_k

?

【常威近代史】（三百七十回）
大軍閥平反系列

1921年6月，係「聯省自治」運動嘅高峰期，政治現實係，好多省份同地區早已經係各有各做，掛住「中華民國」牌頭，一方面係畀面你北京中央政府，另一方面係中國人心裡面「大一統」觀念作祟，一個「中國」原則根深蒂固，佢哋冇辦法接受一個中國分裂成多個或十多個細小國家。

其實最簡單嘅解決方法就係「聯省自治」，行美國嘅聯邦制，而當時嘅中華民國，亦都係最有條件組成一個類似美國嘅聯邦制主權國家，如果真係成事，「這個世界已經是中國人的了也不定」，當時點解做唔到？除咗北京政府冇去推廣或者認同「聯省自治」之外，最重要嘅係各省嘅軍閥唔肯放棄佢哋嘅基本武力，佢哋口講嘅「聯省自治」，其實即係大分裂。再深入去講，就係大家唔信任對方，如果我首先交出武力，冇左自衛權，就會被其他軍閥所吞併。

老實講，係私心作祟，彼此間缺乏互信。再深入去講，就係大家並冇相信同一套意識形態，或者冇一套共同嘅宗教信仰或哲學信仰連繫彼此。之前大一統嘅中國，中間係有儒家哲學「三綱五常」作為紐帶或黏合制，你要摒棄儒家哲學，打倒孔家店，同上一代傳統文化完全切割，得！但係用乜嘢代替儒家哲學呢？

講到「打孔店」，其實係中國第一號大學者胡適先生響1921年6月，響《吳虞文錄》序言中提出，純粹係無心插柳，但係呢個口號之後喺新文化運動中廣泛流傳，胡適提出要打倒孔子、打到儒學、打倒後儒同埋打倒吃人的禮教。該口號對當時提議尊孔讀經嘅舊勢力給予致命打擊，成為新文化運動嘅鮮明綱領。

冇人敢講我講，唔使再背「四書五經」，唔駛再讀孔孟朱熹，唔駛再寫文言文，我手寫我口用白話文，作詩唔駛用平仄，咁讀書就輕鬆easy好多，寫文章或讀書亦都唔係某個士大夫階層嘅專利，人人都可以寫都可以讀，學術上今古分野道高牆冧咗，全部人平等咗，事情變得easy咗，邊個唔鍾意先？

打到舊有事物，同上一代完全切割，其實係一件好happy嘅事情。一句outdate，將過去嘅事物完全放低，新一代出世前地球冇人架，所有事都要重新開始。依種心態，由五四運動開始深入民心，經過半世紀醞釀，終於到1966年文化大革命全盤開花結果，一個舊世界徹底被摧毁，所有傳統道德律及價值觀完全被廢除，加埋80年代鄧小平改革開放，話畀你知馬克思主義都係廢嘅，連建立烏托邦共產世界都outdate，大家要嚮錢看，亦唔好相信西方世界資本主義市場定律，因為大家信奉嘅係有中國特色嘅社會主義，我哋自己中國人有自己一套共同信仰。

結果係點？相信大家一清二楚，人在做，天在看。我經常講一句，人並唔可以缺乏信仰，「無神論」或「共產主義」都係一種信仰，如果你乜都唔信，見黃扮藍，見藍扮黃，或者以為自己係「庖丁解牛」，到處「留有餘刃」，或者想做一個成功嘅世界仔，中環股票年輕才俊，左右手得四隻手指，冇中指，咁個結果駐定係悲劇性嘅。

今時今日嘅中國，終於發現問題所在，道德大滑坡如何解救？唯有搬返出儒家哲學個貞節牌坊，全世界開辦間諜機構「孔子學院」，話畀全世界人知，中國人都係信奉緊儒家哲學。但問題係，我哋自己都唔相信儒家哲學，咁點可以叫其他人相信我哋相信呢？

呢方面嘅問題，遲啲再有機會講，就此停住，否則歷史文章會變成哲學文章。

1921年6月4號，浙江督軍盧永祥通電北京政府及各省區，主張各省自定省憲法，搞「聯省自治」，目的係想抵制直系軍閥曹錕同埋吳佩孚嘅軍事壓力。西南各省紛紛響應，6月20號，西南各省派出代表喺杭州磋商聯省自治問題，各省決定召集省自治會議，組織委員會起草省憲法，籌務聯防，編制聯防軍，抵抗直系。

萬變不離其宗，最後又係南北問題，依一點大家要清楚。

6月，工人運動再度升溫，全中國到處都有工人罷工事件發生，6月14號廣州超過一萬名機器工人舉行大罷工，要求削減工時增加薪水，粵漢、廣九、廣三鐵路工人聲援支持；6月13號，京綏鐵路工人罷工，全線停駛，交通斷絕。

各地工人嘅罷工事件，有理由相信係左派勢力喺背後所支持，當然爭取勞工權益，係天經地義，資本家做得好，減少剝削，工人就唔會咁容易相信馬克思主義嗰套，但上述情況，永遠冇可能發生，因為資本主義生產方式本身就係一套以「剝削」為中心嘅制度。

踏入20世紀20年代，成個中華民國嘅基本格局係互信不足，不同政治勢力之間固然缺乏互信，人民亦唔信任政府的權威，工人階級開始唔相信資本主義生產制度，新世代知識份子唔相信傳統文化，一切固有秩序，應該被推倒，但新嘅秩序，新嘅意識形態到底係乜呢？孫文宣傳嘅「三民主義」係其中一樣；中共（或第三國際駐華勢力）宣傳嘅「共產主義」或「馬克思主義」係另一個選項。兩者具體內容其實並不重要，最重要嘅係，拋棄所有傳統文化嘅民眾需要有一個全新嘅意識形態代替品。

拆大臺之後，要搵另一個大臺頂上，世事如此這般就是。

#常威 #大軍閥平反系列  #大軍閥 #民國歷史

【常威近代史】系列，網上書展，半價大平賣

請立刻登入

https://www.382now.com/product?id=245

【常公子歷史頻道286回：斷送共和關 民意 蛋牛治】

♉大家冇諗過所謂「民意」到底係啲乜嘢？一個社會上，大部份普羅民眾嘅意愿？抑或係根據某啲民意調查，而得出嚟嘅統計數據呢？兩者到底有冇直接關係？

♐不過好多時候，我哋所做嘅政治選擇或者投票意愿，都會follow民意嘅數據，所謂「民意」某程度上，亦都控制咗我哋嘅個人意願。但我哋所聽所聞嘅所謂民意或民意調查數據？究竟有幾大真確性呢？或者又有幾多水份呢？舉一個好簡單嘅例子，上屆美國總統選舉，一般民意調查及傳媒均認為希拉里大幅拋離特朗普，但係最後嘅選舉結果大家都知道。到咗現在，民主黨總統參選人拜登又再拋離特朗普11個百分點，至於結果，11月美國總統大選就一清二楚。

♈用美國做例子，其實美國大部份傳媒同新聞媒體都係民主黨陣營或支持民主黨，結果每每我哋發現，傳媒所發表嘅民意調查，都會傾向有利於民主黨，但往往事實完全相反。通常民意調查唔會做假（亦無需要造假），問題發生喺sampling度，採集樣本問題，你搵乜嘅人做調查，就會得到乜嘢嘅結果，大家應該明白。如果你要做一個「是否應該向有錢人大幅加稅」嘅民調，我相信你訪問1000個有錢人資本家或訪問1000個窮人無產階級，會得到截然不同嘅兩個唔同結果。

♉好多時候民意調查都會補充一句，我哋係隨機抽樣，以增加民調公信力——but人講你就信，千祈唔好。香港近幾年仲有發表所謂電視收視調查報告，傳統大臺收視仍然相當高企，有成20-30點，成日話晚上仲有百幾萬人乖乖地坐響屋企睇大臺，大家應該心知肚明真相係乜？所謂收視報告係用電話隨機抽樣調查咁話，l am so sorry，本公子響香港活咗40幾年，就從來未收到一個電話訪問我睇邊個電視臺？反而銀行叫我借錢嘅電話就每日收到兩個或以上。大臺收視高企，因爲要同廣告客戶交待，否則冇人睇，邊個仲會洗錢落廣告？情況不單止發生喺大臺身上，所有傳統媒體包括電臺報紙雜誌一樣用類似方法……

♏我已經不下一次講下面嘅說話：世界只不過係人想像出嚟嘅產物，你的想像如何，你的世界便如何。但世界不能憑空想像出來，需要接收外界資訊經過大腦思考過濾，從而描繪出對現實世界的圖像，所以你能夠接觸到嘅資訊或「民意」，亦決定咗你所見到嘅世界係點樣？

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/amP_o7x5boo

【常威近代史】（三百七十一回）
大軍閥平反系列

1921年7月，上海英美煙草廠工人罷工，為反抗洋人監工剋扣工資並且毆打工人，罷工開始後，上海共產主義小組立刻派出李啟漢（1898-1927）前往參與領導工人工作，李啟漢亦都係之後省港大罷工嘅領導人之一，後來佢死於蔣介石清黨活動。李啟漢組織英美煙草公司工人同資方談判，當時並無任何法例保障工人權益，罷工期間，警察拘捕工人尋釁滋事，但工人並無退縮，經過20幾日嘅工潮，資方最後屈服，答應工人復工條件，依一次罷工，亦都係中共所領導下嘅第一次工運勝利，所以要寫低。

同月，文人郭沫若（1892-1978）、郁達夫（1896-1945）、成仿吾（1897-1984）及張資平（1893-1959）等人響東京發起成立「創造社」，上述四位都係當時留學日本嘅高級知識份子，除咗郁達夫早死，其餘三位最後都加入中共服務，當中郭沫若更成為中共建國之後，文藝界嘅代表人物。

「創造社」表面上又係一個文學團體，宗旨係「打破社會因襲，主張藝術獨立」「打造中國未來之國文學」，主張文學要把握時代，要對社會不公作出公正批判，同時強調文學要表現文人內心嘅要求，將內心嘅要求作為一切文學創作嘅原動力，提倡靈感與天才，主張除去一切功利嘅打算，專注追求真善美，創作基本傾向，是具有反叛精神嘅浪漫主義同埋唯美主義。作品不論詩歌、散文、小說、戲劇均較少客觀描述，而且帶有濃烈嘅主觀抒情色彩，要將文人對社會現實嘅不滿，直接表現為大膽嘅詛咒同埋強烈嘅抗議，大力展開文學革命運動。「創造社」後來響中華民國曾經出版唔少刊物同書藉，響20年代中期紅極一時，當中有郭沫若名作《女神》及郁達夫嘅《沉淪》，相信大家都聽過，「創造社」於1929年被蔣介石國民政府查封消失。

其實類似嘅文學團體，喺五四運動發生之後如雨後春筍，郭沫若郁達夫嘅「創造社」係其中一個典型，佢哋大部分左傾，相信共產主義同馬克思主義，情況可以反映出當時知識份子大部分係左膠。文人傾左，其實無可厚非，亦係一般常態，村上春樹講雞蛋高牆之間嘅選擇，稍為讀過書、稍為有理想嘅年青人都會選擇成為雞蛋。

尋晚睇《紙房子》reason 2，La Casa De Papel，有一段對話令我印象好深刻，主角教授問其他人「如果世界盃足球賽，巴西對喀麥隆，大部份人係想巴西贏？抑或喀麥隆贏呢？」答案好簡單，撇除巴西人，其實大部分人心裡面都會同喀麥隆打氣，希望奇跡發生。人類嘅心理，總係喜歡同弱者站於同一陣線，無論足球比賽，或群眾運動，情況都係一樣。選擇與弱者同行，為貧苦大眾發聲，挑戰社會不公，做雞蛋去撼高牆，其實係人之常情，唔需要覺得奇怪。況且巴西球星如雲，多你一個唔多，少你一個唔少，你想去成為巴西隊（高牆）嘅一分子？排隊攞籌都冇機會。

今時今日嘅香港亦都係一樣，選擇做雞蛋去撼高牆，完全冇錯！人類喺40歲前大部分係浪漫主義生物，要到40歲後先會變成實用主義者，而實用主義者嘅終極進化版，就係我成日講嘅馬基維利主義者。

40歲前，腦筋比較清晰，當然能夠睇到世上存在著真理；40歲後，你會發現真理唔可以當飯食，人係需要食飽先可以有氣力尋求真理；最後你又會發覺原來真理並唔存在，所有真理其實可以掌握喺自己手裏面，被自己創造出來，況且時日無多，嗰頭近，有需要為自己同自己嘅後人打算。生命三部曲，發生係所有人身上，亦發生喺所有政權身上。

1921年7月1日，中國第一部故事長片《閻瑞生》響上海公映，中國第一部電影《定軍山》拍攝於1905年北京，由著名京劇老生譚鑫培在鏡頭前表演京戲，但並無故事性，隨後出現嘅都係短片。到1921年，《閻瑞生》先係第一部有劇情嘅長篇電影，上映時候萬人空巷，故事改編自真人真事一宗兇殺案，由楊小仲編劇、任彭年導演。自《閻瑞生》上映之後，上海電影工業開始蓬勃發展起嚟，而電影亦都開始正式成為普羅大眾嘅日常娛樂同重要嘅意識形態宣傳渠道。

7月12號，喺俄共布爾什維克扶植下，蒙古人民革命政府宣告成立。其實由1911年辛亥革命開始，中華民國北京政權已經失去對外蒙古嘅實質管轄權，不過拖拖拉拉咗成十年，始終需要有一個結局。

本月2號，前沙俄白軍進襲外蒙古，攻陷首都庫倫，同時宣佈獨立。而同一時間蒙古人民革命黨，亦響恰克圖成立革命政府，6號，蒙古人民革命黨要求俄共紅軍出兵援助，攻入庫倫，打走白軍勢力並取而代之。蒙古人民革命政府逐成為唯一正式政府，「大蒙古國」成立，仍奉活佛為元首，即君主，行君主立憲，正式脫離中華民國統治。

1924年5月，俄共承認蒙古為中國一部份。同年7月，大蒙古國改國號為「蒙古人民共和國」。1928年蔣介石國民黨時代，國民政府將外蒙古稱為「蒙古地方」，曖昧否認其獨立地位。去到1946年，中華民國政府先承認外蒙古為獨立嘅「蒙古人民共和國」。1949年，中華人民共和國建立，同蒙古國建交。蒙古人民共和國，到今日仍然係一個獨立國家，首都為烏蘭巴托。

#常威 #大軍閥平反系列  #大軍閥 #民國歷史

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】系列，網上書展，半價大平賣

請立刻登入

https://www.382now.com/product?id=245

【常公子歷史頻道287回：斷送共和關 虎禪師楊度（上） 蛋牛治】

♉一連兩集我會講一個民國奇人，叫楊度，外號「虎禪師」，佢一個知識份子，或者講係當時一個公共知識份子，響滿清王朝最後迴光返照嘅十年，楊度嘅言論，影響時人甚深，佢雖然冇正式嘅學歷backup，但佢成為晚清君主立憲嘅主要推手，由一個平凡讀書人、知識分子，鯉躍龍門，升價十倍，成為炙手可熱嘅大人物，當時嘅佢仲未夠30歲。

♈楊度嘅經歷，的確令人羡慕，全因為民智初開，行得夠前嘅人，當然佔有優勢。正如當日80年代初內地開放改革，第一批上去設廠生產嘅香港商人，食盡當地中港兩地經濟差別而產生嘅「剩餘價值」，有本回港炒樓炒股，就成為咗最成功嘅一群，佢哋贏乜？贏在四個字：「捷足先登」。

♉如果你到21世紀先返大陸開廠發展，我諗你冇機會發達，到咗今時今日，更加冇所謂「香港人返大陸開廠發達」嘅故事可以發生。世界不停在變化，時機一閃即逝。個人能力同學養，大概同發達關係不大，最重要係可以捉緊時機，或者講，喺最適合嘅時間做最適合嘅事情，發達要啱timing。

♊因此喺香港，好多人唔相信自己嘅「能力」，而相信「運氣」，其實完全冇錯，真相的確係咁。楊度作為一個公共知識份子，亦都懂得呢個道理，西瓜靠大邊，最後佢成為袁世凱稱帝嘅文宣推手，負責響文藝界同民間宣傳袁世凱稱帝計畫，洪憲帝制失敗之後，楊度成為過街老鼠，於是佢又入去深山看破紅塵，研究佛學，又拚出另一番聲名來。講真，其實楊度好叻，懂得變通，適應時勢。曾幾何時，令香港人最自豪嘅，就係依種「中環金融才俊式靈活變通」性格，所謂去到邊都可以生存，去到邊都可以賺錢。

♑但似乎，香港人呢種古惑仔「靈活變通」性格，所帶嚟嘅經濟優勢已經完全消失。香港人冇錯，只不過世界不斷在變化，不斷在改變其遊戲模式。互聯網時代，十年、二十年就一個世代交替，實在快得令人無所適從。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/DKLBPmWTD5I

【常威近代史】（三百七十二回）
大軍閥平反系列

1921年7月23號，中國共產黨正式宣佈成立，並且召開第一次全國代表大會，即所謂「一大」，到今日係「十八大」，中共第一次全國代表大會喺自由城邦上海舉行，當中最重要議程——係宣佈中國共產黨正式成立。無可否認，依一個係非常重要嘅日子，因為28年之後，1949年中共呢個政黨將會統一全中國，成立中華人民共和國，展開歷史性的新一頁。

由1920年8月開始，得到「第三國際」嘅支援同指導，陳獨秀、李漢俊、俞秀松、施存統、陳公培響上海成立咗中國首國共產主義組織，制定咗《中國共產黨宣言》，並出版《共產黨》月刊機關刊物，並開始喺全中國宣傳共產主義馬克思主義以及推動工人運動。喺上海小組嘅積極策動同聯絡下，北京、武漢、長沙、濟南、廣州及日本東京、法國巴黎嘅共產主義小組相繼成立，互相串聯並且交換情報，中共嘅實際政治工作其實已經正式展開。

當時嘅中華民國，或者我哋叫北京中央政權，仍然係一個自由民主法統嘅共和體制，人民有參與政治及建立政黨嘅權力，除咗中共外，其實當時民間有數之不盡嘅政治團體，有大有細，甚至有人稱帝，建立自己嘅王朝，其實去到20世紀80年代，改革開放之後，周顯講我知，都有幾單農村朋友稱帝事件，其實好搞笑，佢哋嘅收場亦未必係俾國家控以反革命叛國罪名，可能被當作嚴重精神病患者處理。

1920年3月，第三國際駐中國代表荷蘭共產主義者馬林（Hendricus Josephus Franciscus Marie Sneevliet；1883－1942，化名Maring）同赤色職工國際代表、布爾什維克成員尼柯爾斯基（1889-1938）抵達上海，佢哋不約而同認為建黨嘅條件已經相當成熟，係時候召開第一屆全國代表大會，加強共產主義政黨組織性，於是上海小組代理書記李達發信比各地共產主義小組，要求每個小組派出兩名代表到上海集中開「一大」。

7月23號，「一大」響上海法租界貝勒路樹德里3號李漢俊家中秘密召開，到場開會嘅代表包括由上海小組嘅李達（1890-1966）、李漢俊（1890-1927）；武漢代表董必武（1886-1975）、陳潭秋（1896-1943）；長沙代表毛澤東（1893-1976）、何叔衡（1876-1935）；濟南代表王盡美（1898-？）、鄧恩銘（1901-1931）；北京代表張國燾（1897-1979）、劉仁靜（1902-1987）；廣州代表陳公博（1892-1946），東京代表周佛海（1897-1948），另外出席一大會議嘅人仲有陳獨秀（1879-1942）、馬林同尼柯爾斯基、包惠僧（1894-1979）等，大會由來自北京嘅張國燾——呢一位後來最有資格同毛澤東掌控中共嘅人物——主持。

上述中人代表住當時全中國50幾個共產黨員，你冇聽錯，1921年全中國只有50幾個共產黨員，當時共產主義馬克思主義嘅支持者可能已經有幾十萬，但真正接受「第三國際」收編及直接指揮的共產黨員，仍然係少數中嘅少數。我個人相信，當時想加入共產黨嘅人絕對有好多，不過唔係你想入就可以入，必須經過嚴格審查程序，確保你身家清白先可以加入，因為呢一群中共嘅拓荒者，就係列寧口中嘅「無產階級先鋒隊」，一定要忠誠勇毅，不能有異心，要願意為共產主義目標而奮鬥同犧牲。

當然上述的大名中，之後亦有好多人背棄咗共產黨，借出屋企開會嘅李漢俊就響第二年1922年離開中共。出席第一屆全國代表大會，清一色係知識份子，全部飽讀詩書，學貫中西，如果論學歷，毛澤東可能係最低嘅一個，因為佢未有學位同埋出外浸過鹹水，如果用階級立場分析，中共嘅一大，大部份人都係資產階級或小資產階級。不過如果你唔識字，又點會識讀馬克思呢？就算你識字，亦都好少人能夠睇得明馬克思。

7月30號，李漢俊屋企受到法租界巡捕房注意，7月31號，大會轉而到浙江嘉興南湖一艘遊船上繼續舉行，並在遊船上舉行閉幕儀式，詳情可以參考中國電影《建黨大業》，片中隻船都整得好似。

中共一大確立中國共產黨奮鬥目標為：以無產階級革命軍隊推翻資產階級，建立無產階級專政政府，即係贊成以暴力手段發動政變，廢除私有制及資產階級，直至消滅所有階級差別。當前嘅中心任務係組織中人階級、建立工會、開辦工人學校、提高工人覺悟性、展開工人運動，大會確定咗民主集中制嘅組織原則同埋黨紀律初步約章。

一大選出陳獨秀、李達、張國燾組成中央領導機關：「中央局」。陳獨秀擔任中央局書記，是為中國共產黨最高領導人，李達為宣傳主任，張國燾為組織主任。

中共鶵型正式確立，中國共產主義之父李大釗並冇出席一大，好有可能係響北京受到嚴密監察。一大議程亦都相當符合傳統馬克思主義者傳統，著眼點係資本主義工業社會中嘅工人階級，對於全中國95%以上嘅農民及其階級處境，一大並無談及。

中國共產黨於1921年正式踏上時代舞臺，並且展開其開天闢地嘅共產主義偉大事業，直到今時今日，出年2021年就係中共建黨100週年紀念！

#常威 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道288回：斷送共和關 虎禪師楊度（下） 蛋牛治】

♉今集繼續講民國奇人楊度嘅故事。香港嘅疫情反復，再一次進入半封城狀態，六點過後，因為禁食令，市面一片蕭條，有個朋友揸的士，就會一清二楚。過去一年時間，香港嘅經濟的確受到嚴重嘅衝擊，當然太平盛世嘅時候，社會上仍然充滿怨氣，否則亦唔會有2019年中嘅亂事發生。

♐亂世局面已經形成，不單止香港，整個世界都被新型冠狀病毒殺個措手不及，香港已經係一個富裕嘅地方，仲可以幾百億幾百億掟出嚟救市，其他貧窮國家，好多已經係年年赤字，國庫空虛，我真係冇辦法想像佢哋嘅局面為何？經濟不景氣，就會引發政治動盪，政治不穩定，就會發生戰爭，呢個係千古不移嘅定律，蔓延全球嘅第二次世界大戰，就係因為一場美國三十年代經濟大蕭條所引發。

♑最近閱讀一本書，係魏斐德（Frederic Wakeman. Jr）所寫嘅《洪業》（The Great Enterprise），講嘅係17世紀清朝開國史。內裏描述，明朝覆亡，其實係同17世紀初期一場發生喺歐陸西班牙嘅金融災難有關，1620年到1660年間西班牙塞維利亞Sevilla（即係今日西甲嘅西維爾）係歐洲嘅金融中心，因為歐洲市場爆發貿易危機，以塞維利亞為中心嘅世界貿易體系遭到沉重打擊，結果導致中歐貿易中斷，引發流入中國嘅白銀數量大減，當其時明朝普遍採用白銀作交易貨幣，白銀進口減少，引發明朝末年嚴重嘅通貨膨脹，通貨膨脹令米價暴漲，為城鎮居民帶嚟前所未有嘅巨大災難，終於引發民變，張獻忠李自成就係咁樣出現……

♐政治問題永遠同經濟掛鉤，我又再重申一句，大把錢駛，就冇人有怨氣冇人想作反，目前大家面對嘅世界局面，係資本主義自由主義黃金時代留低落嚟嘅資產泡沫臨近爆破邊緣（或者響2008年已經爆咗），利用印銀紙填補黑洞，同樣只會引發惡性通貨膨脹，物價攀升，人民生活質素物質條件相對下降，生活唔好就會累積怨氣，矛頭直指向政治制度，條方程式就係咁簡單，加多隻Covid-19做催化劑，亦加速咗爆炸時間。

♉我所見嘅就係咁，希望我睇錯😔😔😔😔😔

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/ExeNboMng18

【常威近代史】（三百七十三回）
大軍閥平反系列

我最近發現一個規律，只要我一寫共產黨，FB收視就會下滑，證明香港人真係好憎共產黨，憎到一個點，係見到佢就會走，完全唔想去知道任何關於佢嘅事，不過我想提一提大家，統戰嘅最高境界，就係你最好睇我唔到！睇我唔到！睇我唔到！

不過作為一個寫近代史嘅人，我冇辦法逃避中共響中國近代史嘅影響力，因為佢哋係最後勝利者。每一次改朝換代，都會經過一段大分裂時代，由隋朝過渡到唐朝、就有半個世紀嘅大混戰；同樣朱溫篡唐後，亦有半個世紀五代十國大混戰時代；元朝過渡明朝亦如是；明朝過渡清朝，過程比較順利，但係亦有李自成同張建宗出現。1911年清朝結束，至1949年中共統一江山，中間要經過40年大混亂，呢個似乎係歷史常態，分久必合，合久必分，其實係生物學現象，係科學常識。

人類嘅苦難從來唔會停止，就算喺最繁榮安定嘅時代，一樣會有受苦受難嘅一群。用最切身嘅例子，香港由70年代到今日，半個世紀繁榮安定，難道個個都係得益者？受苦嘅人，一定對現實產生強烈不滿，因此希望全盤推翻面前嘅世界，但係當革命真係發生，苦難反而以幾何級數上昇，不過當然有其好處，就係可以將其他人拉埋落水，一齊受苦受難，心理上得到補償，亦係一件唔錯嘅事。公平世界好少可以由「均富」展現，「均貧」時代下，實現公平嘅可能性會高好多。

上集講到1921年7月，中國共產黨正式成立，第一次代表大會順利舉行。初期嘅中共，維持馬克思主義基本傳統，即由資本主義工業社會工人運動開始政治工作。所謂政治工作，實際行動就係搞工會，團結工人力量，增加工人階級覺悟性，要佢哋明白，產業工人係被剝削嘅一群，資本家利用剝削工人勞動力產生「剩餘價值」，食到肚滿腸肥，又唔X使做。

而產業工人手中最厲害嘅武器就係罷工，所以由1920年開始，罷工浪潮蔓延整個中華民國。作為一種民衆對政府嘅抗爭方式，罷工其實相當有效，而且流血嘅機會係最低，當然好多當權者往往亦都使用暴力手法鎮壓工人，呢啲事情，每日都發生。當年嘅中華民國，當然亦唔會有所謂「僱傭關係」、「集體談判權」等勞資概念，邊個夠大邊個惡，邊個夠膽開槍邊個夠膽動武，通常就會贏，大致規律到今時今日都冇變過，如果你覺得經過咗100年，去到21世紀，人類係進化咗同文明咗嘅話，大概係你一廂情願嘅錯誤想法。

1921年8月，中共喺上海成立領導工人運動嘅總機關：中國勞動組合書記部。我哋首先睇睇呢個書記部成立時候嘅宣言第一段：

「資本主義在中國各大商埠發展的狀態，和在世界上任何地方發展的狀態是沒有分別的。新式的生產制度，一天一天的把所有舊的生產方法毀滅，一天一天的把勞動者集中到工廠裏去，命令他們做機器的附屬品。一班男女勞工在這種新式的生產制度下，工作情況簡直是牛馬一樣……他們從極年幼的時候，就變成了本國中外國資本家富源的開發者，並變成了資本家的新式奴隸。這種痛苦的工作狀況，加諸這班男女工人和童工的身上，一定會迫著他們自己團結起來，向著他們的東家——剝削者——為有力的奮鬥，是我們敢斷言的。」

好奇怪嘅中文？係呀！當時興！開宗明旨，針對嘅係當時產業工人嘅慘況，當時嘅工人有幾慘？單單「童工制度」就係你今日冇辦法接受，七、八歲人仔日日返十幾個鐘工廠？冇機會接受教育之餘，如果不幸被機器夾到斷手斷腳，亦都冇工傷賠償，工廠一旦解雇你，亦冇遣散費，當然社會亦無任何退休保險制度提供，工人要以佢哋嘅勞動力換取生存所需嘅米飯，當唔能夠販賣勞動力時，就等同餓死。事實上呢個亦都係對當時資本主義嘅正確理解。

100年前嘅資本主義同今日嘅資本主義係完全兩個唔同嘅概念，千萬唔可以混為一談。所有今日大家所理解資本主義制度下勞工階級權益，其實全部都係布爾什維克建立政權後——資本主義制度，因為共產主義成為現實後——對自身作出嘅修補同改良版本。佢肯作出改良，並唔係因為體諒工人階級嘅慘況，而係唔想工人階級站到敵人一方，壯大反對嘅實力。

大愛左膠是如何練成的？大愛左膠就是這樣煉成的。

中共旗下組織「中國勞動組合書記部」總部設於上海，張國燾為總部主任，李啟漢、包惠僧、李震瀛（1900-1938）為幹事，於全國各地設立分部，毛澤東好朋友羅章龍（1896-1995）為北方分部主任、毛澤東為湖南分部主任、包惠僧兼任武漢分部主任、譚平山（1886-1956）為廣東分部主任、王盡美為山東分部主任。張國燾發表成立宣言，指出「中國勞動組合書記部」係一個聯合各個勞工組織嘅總機關，創辦機關刊物《勞動週刊》，積極對工人進行宣傳教育，力圖提高其階級覺悟性，並進一步帶領工人組織工會，開始罷工抗爭工作。

其實個情況，就即係香港嘅「工聯會」，創立理念同運作方式都好相似，不過工聯會梗係有錢過佢哋好多。「中國勞動組合書記部」成立未夠一年，1922年就比上海租界當局查封，總部之後遷往北京，上海為分部。不過無論統治階層及資產階級如何打壓，中國工人運動已經一發不可收拾，加上去到1920年代，俄國布爾雜什克已經企穩陣腳，發展欣欣向榮，同時義無反顧，要將共產主義革命向全世界輸出。

#常威 #大軍閥平反系列  #大軍閥 #民國歷史

【常威近代史】系列，網上書展，半價大平賣

請立刻登入

https://www.382now.com/product?id=245

【常公子歷史頻道289回：斷送共和關 陳獨秀 蛋牛治】

♉中美關係進一步惡化，昨日美國關閉中國駐候斯頓領事館，事情再升溫，消息一出恒生指數插500點，立竿見影。之前我都相信中美之間嘅政治摩擦，會延綿一段好長嘅時間，處於『鬥而不破』狀態，但一場新型冠狀病毒，將事情加速催化，未來會係點？相信除咗少數玄學家之外，冇人可以預測得到結果。

♐可以相信，打仗嘅機會率好低，中國固然唔想打，美國人如果冇忘記越南戰爭同伊拉克戰爭嘅教訓，應該亦會選擇輕易動武，就算小規模軍事衝突都唔會掛，但你一拳我一腳，大家為啖氣，互相反制報復、反制報復，最怕一方玩大咗，擦槍走火，冇人想打，但意外嘅嘢真係好難講，你睇吓一隻死亡率祇有5%嘅冠狀病毒，就足以令到世界大亂，你就明白，條數其實好難計，甚至冇得計。

♊大家亦千祈唔好以為個世界局勢好穩定，的而且確至二次世界大戰之後，整個世界進入咗高速發展嘅黃金時代，中間固然有好多波折重重，但亦無礙人類整體嚮前發展嘅步伐，但自從1991年蘇聯解體後，原來嘅平衡開始消失，美國一國獨大，及至21世紀中國崛起，終於衍出今時今日嘅新冷戰時代局面，一切事件固然是偶然，亦係歷史上的必然。

♑因為合久必分，久分必合，本來就係大道理，辯證法中嘅「正、反、合」三段論永遠正確，只係睇吓用乜嘢形式去發生同演釋。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/Ij1pBQx3Jh4

【常威近代史】（三百七十四回）
大軍閥平反系列

原來啱啱先發現，自己寫緊一個世紀前嘅歷史，現在是2020年，我嘅近代史進程去到1921年，剛剛好100年一個世紀。

100年前，中共剛剛成立，當時嘅中華民國，依然係一個初生行共和憲制嘅民主自由國家，雖然唔可以同當時嘅英美日本比較，但係仍然係一個自由嘅國度，民眾享有言論自由、新聞自由、宗教自由、出版及結社自由、可以組織政黨或政治團體。後世人將呢段時間形容做「軍閥時代」，描繪成中國近代史上一段最黑暗嘅時間，其實完全錯曬，錯到離曬大譜。如果你身處1921年，你以為自己好苦好冇自由嘅話，咁只因為你未睇見地獄之門打開啫。

1921年，俄國革命大局已定，經過差唔多三年嘅殘酷內戰，由托洛斯基領導嘅紅軍擊敗保皇勢力白軍，取得全面勝利，俄共布爾什維克共產政權進入強勢執政階段，世界上第一個共產主義國家終於成功建立起嚟並且生存到落去。

用托洛斯基嘅講法，共產主義到底係乜嘢呢？就係「正直而開明的少數人有理由以自己『取代』未成熟的人民，並把理性和幸福帶給人民」，嗰一批「正直而開明的少數人」，就係擁有高度階級覺悟性嘅共產主義者，因此有共產主義者組成嘅政權，有資格代表全民執行最有利大衆嘅施政同管理，即係一個人民交托予「黨」全盤領導嘅「托管制度」。「托管」一詞用得非常精妙，細路仔入託兒所接受托管，就要聽老師話，因為細路仔唔識自己思想同作出最有利自身利益嘅判斷，老師唔管住，就會周圍走仆崩個頭。

不過點解成日話托洛斯基係先知？就係佢響1921年講上面呢啲嘢嘅時候，同時用其令人震驚嘅銳利目光預言咗黨嘅命運：「首先是黨組織以自己取代全黨；之後是中央委員會以自己取代黨組織；最後是一個獨裁者以自己取代中央委員會。」列寜要布爾什維克行「民主集中制」，一層推一層，始終會將權力推到金字塔嘅頂端，一人手上，托洛斯基明白到極權始終會再出現，呢個係人性同埋「民主集中制」無法可以逆轉嘅困局，因此佢認為革命要每隔一段時間後再發生，推倒本來由上一次革命所創造出嚟嘅「極權」統治，呢個就係托洛斯基「不斷革命論」最簡易嘅解釋。

列寧本人未曾有幸活到成為獨裁者，有上述覺悟嘅先知托洛斯基，亦因為出身係猶太人及本身性格而做唔到呢個位，否則俄國內戰結束之後，佢只要唔交出紅軍兵權畀中央軍委會就可以。同埋托派「不斷革命論」思想實在太前衛，列寧自己都接受唔到，革命啱啱先至響巨大無比嘅殘酷鬥爭中獲得勝利，你就同我講總有一日要自己拆返自己一手建立嘅大台？實在係行得太前，結果列寧死後，有人冷手執個熱煎堆，終於一如托洛斯基所預言，一個歷史上最恐怖嘅獨裁者終於誕生。

佢叫史太林（1878-1953）。

當然我唔排除，如果接替列寧嘅人係托洛斯基嘅話，所帶嚟嘅血腥同震撼會比史太林更大更重？

整個歐陸，尤其係英國法國同德國，都因爲第一次世界大戰元氣大傷，三個國家國內年壯男丁因為WWI同一場世紀瘟疫「西班牙流感」死去一半以上，你話大唔大鑊？德國無厘頭戰敗，被迫簽下梵爾賽條約，割地賠款之餘，霍亨索倫王朝崩潰，國家走上真正民主自由共和憲政之路，建立「德意志國」（Deutsches Reich），即後世所稱呼嘅「威瑪共和國」，自由民主之花，建設在頽垣敗瓦之上，早就註定營養不良，遲早要枯萎。

英國國力大衰退，日不落帝國始終要日落，你只要睇吓當時英帝國響中華民國嘅影響力同發言權急劇減退，你就會一清二楚。20世紀之前喺英國人玩哂，當然帝國疆域過分膨脹，亦係導致佢之後頽敗嘅原因之一，歷史上波斯帝國、羅馬帝國同蒙古帝國都講咗畀我哋知，權力泡沫等同資產泡沫，個波吹得太大，一定會爆。

取代英法地位嘅，係一直置身於一戰之外嘅美國，左右相隔一個大平洋一個大西洋，地緣政治保持咗美國嘅優越地位，你用力打仗，我就全力發展工業發展經濟，輸出軍用品武器同物資俾你打仗，此消彼長，遊戲規則其實相當簡單。

開心嘅美國大賺外匯，經濟欣欣向榮，去到20世紀20年代，美國已經差唔多取代大英帝國，成為地球上最大嘅經濟體系，不過資產泡沫不斷膨脹，終於引發十年後一場金融風暴，「大蕭條」震撼美國之餘，同樣將歐陸呢個火藥庫重新點著藥引，爆多一次！

另一個同美國相同境況嘅係日本帝國，雖然大正年代政治爭拗不斷，但係無礙日本嘅經濟高速成長，亞洲大佬已經係必然，「大東亞共榮圈」概念早響辛亥革命時代已經有人提出，東風壓西風，打倒二百多年來，紅鬚綠眼嘅西方列強對東方世界嘅剝削同壓迫，要改變全盤遊戲規則，東方世界嘅人唔可以只做廉價工廠勞工，供應消費品予西方列強資本家所需，比佢哋班吸血鬼進行炒賣金融活動然後取暴利。

要達到上述目的，東方世界就必須團結一致，大家要聚埋一齊，當然係最有power嗰個國家話事，呢個國家就係日本！唔通係你四分五裂嘅中華民國咩？

今集縱覧全局，上咗一堂20世紀初世史，goodbye！

#常威 #大軍閥平反系列  #大軍閥 #民國歷史

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】系列，網上書展，半價大平賣

請立刻登入

https://www.382now.com/product?id=245

【常公子歷史頻道290回：斷送共和關 中華帝國 蛋牛治】

♉美國國務卿蓬佩奧發表對中共的強硬演講，將中國嘅經濟崛起，演繹成對西方自由資本主義世界嘅最大威脅，呼籲其他盟國組成聯合戰線，全力抵制中共，並且形容此爲共同的「時代任務」，the mission of our time，如果不改變中共，誘導中共改變，中共則將會改變世界。網上把蓬佩奧發演講稱之為「討共繳文」，無疑再一次為中美的爭霸局面，再下一劑重藥，令其冇辦法返轉頭。

♐蓬佩奧強調，將「中國人」同「中共」Communist China分開處理，要對付嘅中共，並非中國人；對於蓬佩奧嘅講法，我冇任何補充，反正響自由世界每個人都有發表自己意見嘅權利，把口生響你度，就講乜都得。11月在美國總統大選，目前尋求連任嘅共和黨特朗普，因為處理新型冠狀病毒手法不善，落後於對手民主黨拜登平均六、七個百份點，如果再無動作嘅話，疫情繼續嚴峻，本來萬無一失嘅連任機會一定會斷送，拜登陣型亦好聰明，以不變應萬變，反正講多錯多，總統選舉之爭，大概己經純屬天意，要睇到11月疫情數字同社會風向。

♑特朗普一向唔將病毒放響眼內，認為Covid-19係弱流感，全世界放大咗件事，任由其發酵令全球經濟停擺，特朗普無錯，錯就錯在佢太坦白太自負，不過作為地球第一強權嘅最高領導人，自負有型係好應該。我始終認為，所有發生嘅事情同講話，都係同11月總統選舉有關，要過咗11月塵埃落定，看看勝負，先可以睇得出美國對中國嘅真正態度，當然就算民主黨拜登當選，亦唔會一下子扭轉美國人「反中」或「反共」意識，本質上不變，只係程度上嘅問題。

♈目前，新冷戰形勢上係美國主攻，中國主守，到今日為止，兩者無論經濟或軍備上，實力仍有相當大距離，況且用全球化嘅角度去睇，美國必不能不復甦、不能不步入正軌，否則全球經濟一齊攬炒，任何國家難以獨善其身，真正一鑊熟！已經有人講過，美國嘅消費者係全球經濟嘅最後一根救命稻草，而響全球化分工大市場內，中國同美國亦冇辦法徹底切斷關係，否則亦會一齊攬炒一鑊熟！更加唔好講雙方會打仗，打仗就係終極攬炒真正一鑊熟咯。

🙏唔知點解，我突然有去佛堂唸經嘅衝動，希望多唸幾遍佛經，平和人間戾氣，化解爭執，希望世界和平，人人安居樂業。真心。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/3FLwzGp2nsA