【大清亡國關慈禧蛋牛治】第一回

【常威中史】為慈禧平反系列（一百零六回）

兵荒馬亂最啱作反，太平盛世你要革命都冇得你革，柄埋一邊打飛之就有你份。1896年後長駐日本嘅奪命書生孫文一直從事反清活動，佢做嘅嘢，用今日嘅角度嚟睇完全係賣國同埋反革命顛覆活動，但係孫文始終係國父，奪命書生始終會用書生奪命劍，無論點樣都係崇高而神聖不可侵犯，高到十幾層樓咁高，你係摸佢唔到。

戊戌政變後，列強協助康有為梁啟成功著草，有為同孫文一樣去咗日本，繼續攞住「維新派」支旗仔做嘢。響日本政界背後泵水支持，響宮崎滔天、犬養毅為首，加埋一大班熱心「支那問題」嘅日本浪人同黑社會，孫文嘅「興中會」同康有為終於走埋一齊，聯手策劃推翻豆斗政權嘅大計。

我再say多次，當時1900年，其實「中華民族」依個概念先啱啱誕生，要多謝同樣身在日本嘅章太炎（1869-1936）同梁啟超發明「中華民族」依個偉大概念（思想武器），一切反清力量終於揾到意識形態鬥爭嘅制高點，從而產生向心力結團結埋一齊，革命到最後先可能響1911年成為現實。凡事凡物都要講口實，好似「一國兩制港人治港」，有個口實有個口號你ok我ok就成功回歸咗先算，由於過咗海就係神仙，之發生嘅事大家再冇責任，到咗今日治港嘅「港人」內容係乜？心態係乜？效忠對象係乜？大概已經無關痛癢，反正係你痛又唔係我痛，失戀嗰個係你又唔係我。

1900年中，中華民族呢個概念仲未谷得起，宣傳費未夠。所以一切反清力量仍然以擁護劉晶、推翻豆斗為大前題口實，依個亦係有為「保皇黨」嘅作反概念。其時冇人要推翻大清，只不過係要擁立翻維新龍頭大佬劉晶話番事，殺豆斗，殲滅保守派，簡單啲講係「滿人做皇帝，南方漢人話事，行君主立憲，搞國會選舉」。唔係「革命行動」，而係「政變行動」。定義上，革命係指一個階級推翻另一個階級，而政變只係統治階級內裡嘅技術性輪換，相同嘅係兩者必須流血。

八國聯軍進軍北京期間，華北直隸地區大亂，南方出現咗一場自立軍起義運動，起義阿頭係唐才常（1867-1900），目標就係推翻豆斗策動政變，擁戴劉晶行君主立憲，唐才常係譚嗣同生前好朋友，亦係湖廣總督張之洞（1837-1909）門生，唐才常彈起又同日本有千絲萬縷關係，總之1900年3月，佢睇到義和團情勢發展失控，於是成立「自立會」，同步吹雞各個反豆斗單位，包括孫文興中會、有為維新派、興漢會、南方仕紳官兵、甚至立場激進嘅革命黨人，一齊起事推翻大清嘅豆斗政權。資金方面嚟自向外國華橋嘅捐贈為主（之後瀨嘢亦係同錢有關），但我常公子始終認為，日本先係背後嘅大金主，你信又好，唔信又好，我就是相信村上春樹。

我想公子講過，洋人最緊要有生意做最緊要係貿易，其實邊個政權話事，佢哋冇乜感覺，反而日本人同清國人同源，起碼當時大家仲共用緊相同文字（漢字），日本人真係對中國（支那）有濃厚感情，依點不容否認，一直直接或間接資助中國人搞革命，可能真係真心為咗中國好，但係世事就係咁奇怪，愛你越深傷得你越甘，到咗最後，日本反而成為中國最大嘅敵人，中國人最大嘅災難竟然係嚟自日本，可能正正應驗咗一句說話：

「好心會做壞事」

自立軍嘅事遲啲繼續講，去返北方大清首都北京，一如豆斗所料，派去阻止八國聯軍進軍嘅義和團民兵，死傷慘重，佢哋唯一嘅貢獻係拆咗條京津鐵路，令到八國聯軍冇辦法用火車推進，被逼行路嚟北京，邊行邊打，足足用咗個幾月時間先打到去心臟。北京城內義和團繼續狙殺洋人二毛子，圍攻使館區同教堂，呢個時候大清政府仲落咗一道驚天動地嘅命令，就係要求各省官員盡殺羊人，係啊，殺曬啲洋鬼子呀！

咁正嘅？好嘞！啱曬！畀個藉口我同你玩東南互保！

#常威 #大清亡國關慈禧蛋牛治 #慈禧太后 #晚清歷史 #義和團

【大清亡國關慈禧蛋牛治】實體購買
https://www.382now.com/product?id=87


【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【常威中史】為慈禧平反系列（一百零七回）

有一個講法認為義和團大暴動，係一場以「端郡王」載漪為首，保守派仇夷派直接挑戰豆斗無尚權威嘅奪權政變！（註：載漪係「瑞王」定「端王」，各有所載，中國歷史就係謬誤多多），當時「載」字輩四個堂兄弟，載濂、載漪、載瀾、載勳，加埋崇綺、剛毅班守舊派官員，睇到恭親王奕訢瓜柴，李鴻章翁同龢等重臣離開權力核心，加上豆斗已經六張幾。佢哋以為有機可乘，重奪天下，借住義和團暴動上位，可惜依班貴族大食懶，就係有一個弱點，就係「低能」，佢哋嘅強項只係「收租」同食大煙玩女人，至於政治並唔係佢哋可以處理到嘅事物，結果最後引火自焚，全部仆街。

60幾年後，情況再重演一次，四人幫江青（1914-1991），張春橋（1917-2005），姚文元（1931-2005），王洪文（1935-1992）伴響偉大領袖身邊，諗住等偉大領袖瓜老襯就奪權，可惜又係衰能力嚴重不足（常公子認為四人中張春橋例外），佢哋嘅智商同老狐狸周恩來鄧小平比邊有得比？最後燈蛾撲火，永遠被釘在恥辱柱上，反而偉大領袖就成為咗銀紙上嘅頭像，太陽紅紅，繼續照耀中國人。1901年後，滿清班低智奪權派死嘅死，去西伯利亞嘅去西伯利亞，豆斗繼續擁有最高權力玩多幾年。凡事最好睇結果，過程其實唔重要，個結果出嚟，你咪知道邊個係天才？邊個先係白痴？

6月25號宣詔殺曬全國洋人呢單嘢，一定係班白痴諗出嚟，但豆斗當時已經俾佢哋夾咗上車，自身難保冇辦法唔跟。但係命令一出，震驚全國，人神共憤，各省各地官員均唔X執行，正所謂你有你死我有我返屋企，南方猛人兩廣總督李鴻章（其時已經復職，死極都死唔去嘅老屎忽）、兩江總督劉坤一、湖廣總督張之洞同山東巡撫袁世凱等人，共同帶頭抗命唔執行殺洋人聖旨。

英國政府考慮到自由城邦自治上海同長江流域係佢勢力範圍，恐怕形勢氾濫落去會損害其商業利益，洋人最緊要有生意做，打打殺殺實在冇性趣，於是第二日6月26號上海英國總領事華倫先生就聯絡劉坤一同張之洞（李鴻章係大英帝國自己友，應該唔駛傾），取得共識，共同推持長江一帶秩序，並於同日響上海簽訂「東南互保章程九款」，即歷史上出名嘅東南互保，短時間內擴展至浙江、福建、四川各地，長江以南嘅南方，得以一直保持和平狀態，冇死個一個洋人，老實講係不幸中之大幸。

我之前已經講過，自從陳寅恪口中所講嘅大賣國賊曾國藩建立嘅民兵制度冒起之後，中央政府對南方各省嘅控制能力絕對唔強（根本亦冇），河水不犯井水，大家各有各做好耐，東南互保已經唔係第一次，1895年甲午戰爭，南方嘅水師唔參戰宣佈中立齋食花生已經係最好例子。如果話分裂，中國其實已經分裂咗好耐，真正嘅大統一，要去到1949年。

豆斗亦唔係冇做嘢嘅，殺洋人聖旨一下，佢亦順帶提及「各就本省情形，通盤籌畫」，要求排外殺洋人要「事事均求實際」，其實一早比咗位大家攝，我斗膽講一句，東南互保極有可能係豆斗一早已經預見到嘅情況，佢就係高。

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

#常威 #大清亡國關慈禧蛋牛治 #慈禧太后 #晚清歷史 #義和團

【大清亡國關 #Marketing 蛋牛治】

🙃Marketing好重要，比一切嘢都要重要。骯髒嘅政治需要包裝，包裝得靚就係天下無敵，全世界最識得包裝政治嘅係美國人，20世紀之前係大英帝國，你可以問吓你自己，你回頭想一想，美國人響歷史上所做嘅每一件事、發動嘅每一場戰爭，你都會覺得係有正義成份在內。當然我唔排除美國本身係一個正義嘅國家，但係佢嘅Marketing真係做得好好，中國同佢爭得最遠嘅就係呢樣嘢，最少有50年距離，軍備上邊祇有30年距離，今日如果計埋互聯網5G科技，或者更小。

🙃為美國政治包裝嘅仲有荷里活，荷里活過去100年，不斷通過電影向全世界輸出美國人嘅意識形態，Marketing角度嚟講，係史上最成功嘅一個案例，由戰爭片，到復仇者聯盟，美國人話俾大家知，世界上總有一個邪惡嘅大佬，正義就係打大佬，打低咗大佬世界就會和平。

🙃結果全世界每一個人心裡面都有一個邪惡大佬存在，個大佬曾經係蘇聯，今日個大佬係邪惡中國。呢種簡單嘅二分法，好處就係好容易令人接受，人類基本上係懶惰嘅動物，亦好喜歡接受一啲容易接受嘅嘢，諗得太多有陣時好辛苦，亦都會好亂，簡簡單單，要套餐，就會心安理得，個世界就係咁，唔到你唔信。

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/FTRU7

🍳https://youtu.be/PQSvd6nglDw

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買

https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】為慈禧平反系列（一百零八回）

借用網友Tim Choy嘅說話：豆斗向來崇洋媚外，冇咩理由打柒洋人。義和團撳極都撳唔住，焗畀佢騎劫，再嚟過「借刀殺人」都唔出奇。畢竟「寧得罪君子，莫得罪小人」。雖然無從判斷豆斗點諗，但事後證明豆斗的確落啱注。

冇錯！豆斗最愛洋腸，四十年來如珠如寶，實在冇奶油反轉豬肚，1900年7月開始，東南互保搞掂，戰場只侷恨於北京同天津一帶。京津鐵路被破壞，八國聯軍被逼徒步推進，沿途勢如破竹，無人可擋，直取天津。

北京之內，清兵同義和團合流，一齊進攻東交民巷使館區，國仇家恨，扶清滅洋！誓要殺盡大毛子二毛子，當時東交民巷約有三千多人被圍攻，當中包括使館職員及家眷、戶部稅務司員工（唔知當時中國海關總稅務司赫德先生喺邊？真係要check吓）、洋教教士同教民二千幾人，當中有戰鬥力嘅洋兵只有400幾人，武器同埋糧食都嚴重不足，但唔知點解，依一場東交民巷保衛戰竟然打咗八個星期，擁有正規裝備嘅大清陸軍同幾萬義和團暴民竟然冇辦法攻得入去？你話洋人係咪強呢？所以睇返轉頭根本係戲一場，傳聞統率清軍嘅榮祿先生雖然向使館區不斷發炮，但係國度就完全唔啱，炮彈全部喺使館頭頂飛過，完全唔係堅打，不但係咁，而且清軍仲秘密派人送飯送水送軍火入去接濟洋人，一邊打、一邊救、完全唔知係乜X嘢玩法？

同時，西什庫教堂亦被圍攻，仲離奇，守軍只有法國士兵30人，意大利兵10人，守護教堂內避難嘅大毛子二毛子3000幾人，但係又畀佢哋守到八個星期，直至8月14號八國聯軍入城解救，你都咪話唔係世界軍事史上第一奇蹟？就咁睇，你仲以為嗰40個士兵係「復仇者聯盟」成員添。

冇人係傻瓜，就咁睇上述嘅事件，綜合一切線索，大家都會明白豆斗點諗，所有嘅事根本係佢安排做場戲出嚟，同騎劫佢夾佢上車嘅保守派滅夷派partners交待，豆斗根本冇諗過殺曬班洋人，只不過之前玩大咗收唔到科，佢亦好清楚再殺洋人，大清就真係會即刻亡黨亡國！

話分兩頭說，東交民巷同埋西什庫教堂戰事，其實義和團嗰班被收編嘅暴民都好有問題，真係要打，幾萬人湧過去，蟻多都嬲死象，邊可能攻唔入去？所以我之前講嘅嘢應該冇錯，暴民入京城只係揸住扶清滅洋為口號，合法打劫，佢哋嘅真正目標係京城內嘅有錢人同滿蒙貴族屋企。同之後紅衛兵運動一樣，所有嘅暴亂都係為咗合法抄家打劫。我講過中國人乜嘢最叻？就係講一套做一套！因此幾年前香港嘅佔中佔旺事件，就真係和平理性到極點，起碼冇人乘亂打劫，諗真，香港人嘅質素就係高到無倫，高到上扯旗山天比高豪宅一帶，係摸都摸唔到。

今時今日，有好多人千方百計想撳低香港人嘅質素，其實居心叵測……

最可憐嘅反而係嗰啲比政治擺上枱嘅忠心軍人，6月9號，八國聯軍攻至八里臺，秦煌叔聶士成（1836-1900）殉國，10號聯軍逼近天津，義和團民兵鳥獸散拜拜走人，14號天津淪陷。呢個時候聯軍開始響天津集結，以德國人為聯軍統帥（大件事了！），佢哋留返20000人守住天津同大沽口一帶，40000人向北京進發拯救同胞！當時大清各省勤王兵亦到，達到40000人，加上董福祥（1839-1908）、宋慶（1820-1902）、馬玉崑（？-1908）正規部隊，同埋義和團班牛鬼蛇神，一共十幾萬人守住北京城外，預備同前來嘅八國40000聯軍決一死戰！

下次講鬥而不破！八奇權謀最高境界！

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【七不思議系列一：孽咒】
https://play.google.com/store/books/details?id=gSZnDwAAQBAJ

#常威 #大清亡國關慈禧蛋牛治 #慈禧太后 #晚清歷史 #義和團

【星期日特別放送】社會秩序基本上靠社會碌葛支撐

由於社會要有「秩序」先可以運行正常，所以就要推到去管治問題，如何管治一個社會係一門大學問。本書《碌葛男人嫁得過》非常平庸化，絕對不離地，拋一堆哲學term同政治經濟term出嚟，對大家都冇益處(況且只有中三程度嘅筆者亦堅係唔X識)，所以，不如舉大家最貼身嘅例子說明一切。

如果大家已經做咗人父母，咁你想啲仔女聽話定唔聽話先？相信100個父母有103個都係想啲仔女聽教聽話(至少唔佔中)，最好你叫佢努力讀書佢就努力讀書，你叫佢做醫生律師佢就做大醫生大律師！咁就Perfect池！係冇？相信大家都冇異議？Right？父母希望仔女「聽話」，天經地義，仔女聽教聽話，父母就開心，一家人就會和諧(河蟹)；同樣，作為社會嘅領導階層(統治者)，都希望市民(被統治者) 聽教聽話，咁領導階層就開心，整個社會就會和諧(河蟹)！係冇？相信大家都冇異議？

你未生仔？唔UN？冇問題，再舉例呃稿費。

養過狗未？作為一個主人，一定係想養一隻聽話嘅狗，拖佢行東就行東，去西就狗向西奔走，一餐好一餐唔好，從來冇投訴，就算比舊屎佢食，佢都擺尾多謝你話好食，咁就係一條好狗！相信大家都冇異議？Right？相信一個平凡人一定唔會養一隻痴線嘅狗，唔通你真係想隻狗成X日吠你？或者無端端噬你一嘢，搞到你要去養和醫院響肚臍側邊打瘋狗針咩？養狗人一定想養隻好狗，唔想養隻顛狗，所以一條蠢狗，亦會係唔錯嘅選擇。同樣道理，一個社會既領導階層，都會希望被管治嘅市民聽聽話話，Understand？大致上嘅概念就係咁。

放番入社會模型裡頭，領導階層同市民，一定要建立一個主僕制度，有效嘅社會秩序先可以發生運行。既然一方係主、另一方係僕，就有從屬關係，亦有上下之分，從而亦出現階級（class）之分。市民要聽聽話話，仔女要聽教聽話，隻狗要絕對服從主人指揮，依個情況要成為現實，被統治嘅一群，一定唔可以有獨立思考嘅能力，就算有，亦唔可以太多！或者最好情況係----市民普羅大眾以為自己有獨立思考能力，其實係冇就最好！咩叫「有其實係冇」？玄咗少少，舉個貼地例子幫大家說明：

話說有一日你收到一個長輩whatsapp，話飲檸檬水可以治療脫髮，自以為有獨立思考能力嘅社會碌葛就會諗：「我點會信呢啲嘢？飲檸檬水治療脫髮根本係冇科學根據嘅。」，但係真正有獨立思考能力嘅社會精英，就應該連睇都唔會睇，因為whatsapp上依亭嘅長輩帖，根本冇一個會係真。呢個就係兩者嘅分別，好mean？我都覺得係。

因此，貢獻社會穩定力量必需要靠一班人，依班人要有以下特徵：

1.一定要蠢，要人講乜佢就信乜。

2.要入世，唔可以離群，要對整體社會經濟有貢獻，甚至要覺得自己為社會同全人類作出貢獻！

3.要欠缺獨立思考能力，否則佢唔會人講乜佢就信乜，社會大趨勢叫佢做乜佢就做乜。

4.依群人唔可以發達，因為發咗達就會晉身領導階層，成為剝削者，成為社會精英。

5.對一切發生響自己身上嘅剝削、欺騙同仰壓視而不見，或逆來順受，抗逆能力極高，心理素質極好。

有齊上述特徵嘅人，就係本書既主角：社會碌葛！所以，千萬唔好睇小社會碌葛，係有佢哋，個社會先可以運作正常！

之不過，我強調過，137億年嘅演化之路，到咗今日，人之所以可以被定義為人，必先有獨立思考能力，能夠有自由意志作出選擇。但係社會碌葛要冇獨立思考能力就最好，如果咁講，社會碌葛咪唔係人？說話又唔好講得咁死！講吓笑啫，唔講邊有得笑先？

況且，世界上有謀殺同誤殺，後者刑期輕得多，因為係冇心之失，可以被原諒。同樣道理，社會碌葛之所以成為社會碌葛，有時候並非自愿，反而係一個被精心塑造嘅過程。有陣時，好好哋一個有獨立思考能力嘅人，會被某種精心計算嘅安排而被培訓成一碌「社會葛」，服務統治階層，鞏固同延續佢哋嘅權力，最後係一個戰略問題，係一個統戰問題，甚至歸結係一個政治問題。

😎【碌葛男人嫁得過】

https://play.google.com/store/books/details?id=e1N7DwAAQBAJ

正解

好好睇 定期入黎追追

【常威中史】為慈禧平反系列（一百零九回）

我常公子最喜愛嘅歷史學家劉仲敬先生提出一個理論叫「鬥而不破」，中國人最鍾意鬥，天下皆知，無情白事都會鬥餐死，我哋最叻就係喺冇矛盾嘅地方製造矛盾，風平浪靜搞到波濤洶湧。但係涉及鬥爭，就係生死相搏？Sorry！錯咗！劉仲敬話中國鍾意鬥，但就更鍾意鬥而不破。

佢舉咗最經典嘅例子，就係毛澤東同周恩來，兩個人明爭暗鬥40年，互相糾纏不休，你鞭我一下，我滴你臘，你餵我一啖砂糖，我餵你一啖屎，你就快斷氣我幫你做人工呼吸，來來回回，永劫回歸好有SM味道，主人同奴隸角色不斷交錯，但到最後大家鬥而不破，彼此享受過程，不在乎結果，其實係個淒美嘅愛情故事。

1900年嘅豆斗都用咗「鬥而不破」理論，一邊打洋人一邊幫洋人解圍，一邊企喺保守滅夷派嗰邊，一邊又喺背後捅佢哋一刀，陰陽兩面，交錯循環，食神話齋「你硬係估我唔到」，將整個大清帝國當成籌碼，玩弄權術到達淋漓盡致嘅境界。為保住自己嘅最高領導權力，不擇手段，借刀殺人，甚至出賣一直支持佢嘅滿蒙貴族同胞，到最後又冇人睇到破綻，真真正正實踐到馬基維利主義者嘅終極手段。

一邊鬥而不破，一邊講一套做一套。我都講過義和團班暴民都係一樣，扶清為名，打劫為實。民間智慧其實比嗰班滿蒙貴族更高，最可憐嘅反而係佢哋，以為保家衛國，決戰洋人，最後死無葬身之地。佢哋咁蠢，全因為出身太好，家底太厚，享福太耐，全部係井底之蛙，不知天高地厚，仆街亦係正常。

凡事只看結果，過程並唔重要。到咗最後，豆斗嘅政敵死曬，帝國仍然牢牢操控喺佢手上面，佢仍然係大清帝國最高領導人，甚至外國勢力最後都幫佢一齊响廢墟中重建大清。1902年後，大清帝國先至有一段回光返照期，庚子事變（BoxerRebellion）之後，其實大清國欣欣向榮，國庫充盈，好有機會走上君主立憲道路，蜕變成為現代國家。如果豆斗唔係1908死X咗，辛亥革命亦唔會發生，天下亦唔會之後大亂40年，直至有另一個比豆斗更偉大嘅馬基維利主義者出現，天下先至回歸統一，佢係邊個？佢叫毛澤東！

可能你會覺得我太抬舉豆斗，但事實放響眼前，不容否認。有豆斗有大清，冇豆斗就大清亡國！後世人抹黑佢嘅能力，純粹出於妒忌之心，一個儒家哲學三綱五常主宰嘅父權主義世界，又點可以容納一個咁出色嘅女人呢？武則天同豆斗命運都非常相似，明明雄才大略，但係就比歷史文人儒家知識分子長期抹黑，理由祇有一個：天生女兒身！

相信豆斗好清楚咩叫鬥而不破，天下可以大亂，但係自己嘅步伐唔可以亂，旁人可破，但係自己不破……明我講乜？恭喜你鳥！你終於進入咗八奇嘅思考領域。如果唔明？冇所謂！得啖笑啫！

今集完全發噏風，下次回歸史實再講！

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87


#常威 #大清亡國關慈禧蛋牛治 #慈禧太后 #晚清歷史 #義和團 #八國聯軍 #庚子事變

【大清亡國關 #吹水 蛋牛治】

😜吹水唔抹嘴，差唔多係現代政治世界嘅基本玩法，選舉前，政客為咗得到選票，許下諾言，到選舉之後，一切煙消雲散。依種情況，香港亦都見唔少。政客都係一份工，高薪厚職，立法會議員月入接近十萬，計埋津貼，十幾廿萬，去邊度搵？為咗個位，為咗份糧繼續供樓，講吓大話，都無可厚非。

😍唔講大話嘅政客好少見，今日嘅美國總統特朗Donald Trump係其中一個，佢選舉前話要保障美國人嘅就業機會，振興經濟，打擊對手中國，要響墨西哥邊境起圍牆，防止非法入境者進入。呢啲選舉諾言，佢當選之後真係去做，而佢真係做。有人話，佢係咁多個美國總統之中最差嘅一個，但我覺得，佢係一個守諾言嘅人，比起好多成頭道德光環嘅說謊者，特朗普其實更值得尊重。

😜特朗普任期已經行咗一半，我哋香港人覺得佢唔受歡迎。但其實唔係，佢最新發表嘅國情咨文，得到好多美國人支持，有七成支持度，亦係非常罕見嘅事情。我哋響傳媒睇到抹黑特朗普，其實又係另一回事，因為美國傳統，荷里活同埋傳媒都係支持民主黨傾左路線，相反，美國普羅民眾，或者年紀大個群，做生意個群，其實都係共和黨特朗普嘅支持者。

🤓作為一個國家嘅領導人，捍衛國家同自己人民嘅利益，絕對冇錯。現在香港發生緊嘅事，就係我哋當權者並冇將香港人嘅利益放喺第一位，有另一種利益，淩駕喺香港人嘅利益之上。冇辦法，作為一個妾侍，就只能夠接受妾侍嘅命運同對待，過去如是，今日亦如是。當家作主自己話事並唔容易。人生如是，政治亦如是。


♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/DYPVP

🍳https://youtu.be/4xUQTni-qmQ

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買

https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】為慈禧平反系列（一百一拾一回）

1901年嘅清國政權完全失控。八國聯軍部隊攻入北京，加上大清政權喺當時已經係宣佈玩卵完。之後延續多嘅10年迴光反照期，其實純粹運氣。大清未曾亡国，靠嘅只係一條支柱，呢條支柱係豆斗（沒有其他）。

窮途亦末路，兵敗如山倒。

八國聯軍入京前，豆斗已經帶住劉晶、皇帝玉璽同皇家重要文書，連同信任嘅下屬王公太監逃離紫禁城，著草！清國歷史上曾經有三個皇帝著草，第一個係天理教之亂嘅嘉慶帝，第二個係英法聯軍火燒圓明園嘅咸豐帝，第三個就係光緒，前兩者距離目的地都係熱河承德，而豆斗嘅目的地去到好遠，佢要西逃去西安，由著草嘅距離可以判斷，今次比上兩次絕對大獲好很多……

出到北京城外，滿目瘡痍，之前義和團所經之處，寸草不生，史書有以下記載「途經村落數處，不見一人。道旁民舍，皆為潰兵遊匪毀壞，門窗戶壁，幾無一家完整。甚有被宰雞豕尚未烹食者，縱橫地上，為鴉犬爭食。方量慘淡，目不忍睹」。呢個境況同八國聯軍冇關，全部係自己人一手做成，蔣介石講「先安內再攘外」有時冇話唔啱。

著草頭幾日真係慘到無倫，豆斗同劉晶要喺寺廟過夜，冇啖好食，有傳說話佢哋要飲井水，井裡面仲有人頭浮吓浮吓。第一個接應慈禧嘅人係曾國藩嘅孫女婿吳永，得到依個人嘅幫助，慈禧嘅著草團隊先可以穩定番小小，再向西安出發。

北京城內，八國聯軍好快控制整個局面，解救同胞佔領北京。當然中間殺燒搶掠亦無可避免。我強調過好多次，100年前嘅軍隊同今日完全唔同，離鄉別井出嚟當兵，揾條命去摶，當然要搶返夠本。而且成件事係大清唔啱，西方列強只係被動者，順帶一提，有記載八國聯軍之中，軍紀最好嘅反而係人數最多嘅日本兵，我講過，可能係同佢哋對清國嘅文化感情相關。而且當時北京成為廢墟，相信八國聯軍嘅貢獻絕對唔多，響佢哋未入京之前，我諗北京已經畀義和團班暴民打劫得乾乾淨淨。

一眾仇夷派嘅守舊官員，即係義和團嘅幕後黑手如載漪等仆街，被八國聯軍列為主要戰犯。佢哋當中，有人好似崇綺咁全家自殺殉國，亦有人即捕即殺，更有人被秋後算帳。搞屎頭棍領頭人端郡王載漪、同大阿哥漙儁事後被流放新疆充軍，天冇眼，載漪仲活到1922年張勳復辟先死，六十有六，長命過好多人。

叉開一筆，載漪響中國武術史都有貢獻，楊氏太極拳祖師楊露禪就係佢嘅人，吳氏太極拳祖師吳全佑亦係端王府侍衛出身。一張有尿跡嘅廁紙都有佢嘅用途，就係咁解。

1901年秋天，戰局大定，豆斗走咗，生死未卜。大清政權倒臺，八國聯軍接管北京，依個時候，西方列強提出一個新方案，佢哋搵咗張之洞傾新政權成立嘅可能性。

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

依本正【七不思議系列一：孽咒】
https://play.google.com/store/books/details?id=gSZnDwAAQBAJ

#常威 #大清亡國關慈禧蛋牛治 #慈禧太后 #晚清歷史 #義和團 #八國聯軍 #庚子事變

【大清亡國關 #偽造文件 蛋牛治】

😜康有為偽造光緒帝嘅密詔，老作出「圍園殺后」嘅吹水大陰謀，呢件事差唔多係近代史上一件最荒謬嘅事件之一，隨口噏，當秘笈。慈禧太后亦都係因為睇香港報紙先知道光緒要謀害自己，所以先將光緒從此遠禁，之後六君子人頭落地，唔多唔少，都同康有為偽造文件有關，歷史上從來冇人講係康有為累死六君子，六君子之中，仲有康有為親生兄弟在內，如果成件事真係佢造假，佢絕對對唔住自己兄弟。

😍近代史上，好多人相信康有為筆下戊戌政變過程，我喺Youtube裡講，寫出嚟就係真？咪玩啦翠如BB，文人多大話，自古以嚟，中國歷史上就充斥住無數咁多大話，同現今世界都好相似，凡事吹大十倍，三萬大軍，就話三十萬大軍，三國時代，曹操話率領八十萬大軍打東吳，當其時，成個中原都係得二三百萬人口，何來動員八十萬大軍？後世史書寫，曹操動員二十二萬人，但我覺得都係多咗好多，八萬左右就啱數。

😜香港都成日見呢啲事，片酬500萬，實收50萬，單工程興建費用十億，就出價100億，吹大個波，目的不外乎係搵水位偷錢，中國人有句說話叫「開天殺價，落地還錢」，單工程十億可以做好，你同政府吹100億，最後大家來回斟酌，30億成交，咁你就有20億落袋，中國人嘅智慧就係咁高！你唔信？但我常公子話你知，呢啲事每一日都喺度發生，無論乜嘢界別，只要牽涉到公帑，政府科水，就多到你唔信。你係局內人自己友，就收錢收到手軟。

🤓因此，中國人最鍾意做官，最鍾意做公務員，就係咁解。香港，勝在仲有ICAC！

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/EM8XB

🍳https://youtu.be/gj8dNeuJ-rs

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買

https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】為慈禧平反系列（一百一拾三回）

八國聯軍，真係躺著也中槍！

由細到大，上一輩都教我一個事實，就係全世界都想瓜分「中國」（粗略定義下嘅大一統中國），侵略中國，顯然中國呢個地方非常馨香，個個都想據為己有。結果全世界都係我哋嘅敵人，只有俄羅斯唔係。但係睇返歷史，侵佔得中國幾個政權最多土地嘅，就係俄國人。1901年，八國聯軍佔領北京，慈禧流亡西安，如果當時西方列強真係想瓜分清國，其實易過借火。要將成個清國分餅仔分成幾份，大家各佔一份做殖民地，亦都好正常。但係好奇怪佢哋冇咁樣做，只係由大英帝國牽頭同張之洞李鴻章傾成立新政權。

咁樣，我哋由細到大被灌輸嘅歷史事實：「西方列強八國聯軍侵略中國」呢句說話，從何說起呢？

當時西方人根本冇侵略清國嘅意圖，佢哋出精只係保護僑民同胞，中間殺燒搶掠總不能避免，事後留低要求和談同埋賠款亦都理所當然，完全符合國際法。你可以叫我做汪精衛劉少奇，但係我都係實話實說啫。而且，最敗壞道德嘅行為，應該係「將啲事實調轉嚟講呃啲無知嘅細路仔」！

1900-1901年間，清國呈現權力真空狀態，當然有唔少人希望乘勢出位，上次已經講咗唐才常嘅自立軍起義。其實，當時我哋嘅駐日本代表奪命書生孫文先生亦都有動作，佢喺1900年10月惠州搞過一場小革命唔成功之餘，亦響義和團大亂華北期間，曾經聯同一班興中會革命朋友，楊衢雲（1861-1901）、鄭士良（1863-1901）、陳少白（1869-1934）、史堅如（1879-1900）等人，去信當時香港總督卜力（Sir Henry Arthur Blake，香港第十二任港督，1840-1918），提出所謂「平治章程」，要求西方列強協助，成立新政體取代清政府，信件由卜力轉交李鴻章，但係明哲保身嘅李鴻章當然婉拒咗。史書所載，後來唔少革命黨人後嚟仲喺香港被清政府派刺客行刺身亡。但我個人認為，同唐常才嘅自立軍起義失敗一樣，二五仔未必一定係滿洲人。

1900年，各方革命力量嘅失敗經驗，令大家都知道南方漢人儒家知識份子、封疆大吏如張之洞李鴻章劉坤一等人，根本不可信任。大家都明白要革命能夠成功，必須推上一級，必須更加激烈更加血腥。又當然，暴力革命論最後都係唔成功嘅，十年後，1911年改朝換代嘅辛亥革命，基本上喺由一個封疆大吏嘅背叛先能夠成功，佢係邊個？佢咪係人人都Hi佢Aunt嘅太陽能電筒袁世凱囉。

張之洞同李鴻章係晚清名臣，係一世名儒，亦係小朋友嘅學習榜樣。反而袁世凱，就係超級大漢奸大爛人，歷史上等同於秦檜魏忠賢位置。單從呢件事就可以睇到，近代史係有幾咁墮落幾咁仆街……DSE近年越來越少考生選修中史科，其實係一件好事嚟嘅，讀書係求真知識，唔係去讀假嘢喎，香港學生真醒目！讚！比個like大家！

【大清亡國關慈禧蛋牛治】
https://play.google.com/store/books/details?id=C3hjDwAAQBAJ


#常威 #大清亡國關慈禧蛋牛治 #慈禧太后 #晚清歷史 #義和團 #八國聯軍 #庚子事變

【大清亡國關 #羅玆威爾 蛋牛治】

🤓政治上邊有好多神秘事件，呢個就係普通人唔能夠知道歷史發展嘅重要因素。戊戌政變嘅真相永遠冇人知道，清帝國亦都冇發表過任何官方檔案釐清真相，光緒皇帝係唔係要發動兵變攞慈禧條命？亦都冇人知道，好有可能，大家都只不過係誤會一場，但係按照慈禧太后嘅仁厚性格，佢唔係蔣介石同毛澤東，佢唔鍾意亂咁殺人，佢事後要六君子人頭落地，背後顯然有一個大陰謀存在，呢個陰謀，亦一定同日本人有關。

😃我個人認為，歷史上最十惡不赦嘅事，係德國納粹黨所做嘅一切，最近響Netflix睇咗套講德國集中營 Concentration Camp嘅紀錄片， 內容係講盟軍登陸諾曼第之後，向德國推進，之後解放咗唔同嘅集中營，紀錄片就係第一時間拍攝集中營之內嘅慘狀，睇完呢套紀錄片，你會對人類有一個全新嘅了解。第一個了解係，文明人係可以做出最禽獸嘅行為；第二個了解係，原來所謂人類，只係一個個臭皮囊，響死亡面前，可以一文不值。

😃一個邪惡嘅希特拉，一班心智有問題嘅變態納粹黨員，就可以做出人類歷史上最恐怖嘅屠殺行為？我唔認同。發生喺眼前嘅事，發生喺集中營嘅事，背後嘅真相係乜嘢？德國人日爾曼民族心裡面諗緊嘅究竟係乜嘢？我到今時今日都未摸清楚。

😏同大家分享一件事，話說納粹黨執政年代，黨內宣傳大師戈培爾博士要搞文化政策，於是同好多女明星有染。戈培爾老婆睇唔過眼，想補救婚姻。於是佢去搵當時渡緊假嘅希特拉投訴戈培爾嘅風流韻事，希特拉知道之後大發雷霆，捉咗戈培爾博士責駡，希特拉仲同戈培爾講，佢唔可以繼續佢嘅不道德行為，否則會撤銷戈培爾喺黨內嘅一切權力，呢一個咁重視人倫倫理道德嘅男人，就係佢，默認所有發生喺集中營內嘅屠殺行為。正如我睇過一本書講，德國軍官可以一邊聽住舒伯特嘅音樂，一邊將猶太人送入毒氣室。一句痴X線神經失常心理變態，就可以解釋上述嘅行為？我唔覺得。

😘我未認識過一個德國嘅朋友，如果有，我真係想同佢哋講吓上述嘅問題……

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/FGE5M

🍳https://youtu.be/TPDy4S7TlNc

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買

https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【常威中史】為慈禧平反系列（一百一拾四回）

未入正題之前，首先講吓十惡不赦天地不容嘅八國聯軍殺燒搶掠事件。廿幾年前，我第一次去故宮博物館，發現清代皇室真係有好多奇珍異品留低，唔少都係價值連城。我當時諗，1900-1901期間，其實八國聯軍佔領咗北京超過半年時間，當時北京係無政府狀態，如果聯軍真係要搶，相信連一條狗毛貓毛都係唔可以留低。咁而家，係臺灣同埋北京嘅故宮博物館裡邊展示出嘅珠寶文物奇珍異品，究竟係邊個留低嘅呢？抑或係清國皇宫嘅珍品多到比人搶極都搶唔曬，搶極都仲有呢？

另外仲有一個睇法，話八國聯軍當時唔搶曬所有嘢、甚至唔直接瓜分吞拚清國，係因為佢哋內部出現不和，冇辦法講得掂數，結果冇做……有啲強力愛腳膠就係永遠接受唔「洋人係好人」依種講法，喺佢哋心裡面，全世界都係中國嘅，全世界都係蝦鳩中國嘅，全世界只有中國係站於道德最高地。耶穌哥講過，你睇到別人眼中條刺，就睇唔到自己眼中碌樑木。

數還數，路還路，有啲嘢要分開講，八國聯軍之中真係有個國家當時係明目張膽侵略中國，佢哋咪我哋中國人嘅好朋友俄國人囉（friend到宜家呀）。1900年6月，大清吉林將軍長順，黑龍江將軍壽山，奉天將軍增稘等人，響應保守滅夷派，殺教士燒教堂拆鐵路，普京嘅戰鬥民族真係唔係同你講笑，一有藉口，俄國新上任沙皇亡國之君尼古拉斯二世先生即刻撳掣，十五萬大軍兵分三路，一個唔該入侵大清國，7月7號，響海蘭將6000個華商驅到江邊，集體屠殺（佢老母人命賤過泥），7月16號攻陷璦琿，8月頭打到去齊齊哈爾，壽山服毒自殺！東路俄軍亦於7月底攻陷琿春，直打到去寧古塔，9月佔領吉林城。南路大軍沿旅順直殺入嚟，傳聞仲話，俄兵完全唔駛開槍，去到邊清兵即刻扯白旗投降，並為俄軍預備食物馬車工人，真陰公。可能啲清兵都明白，反抗都係多餘，對俄軍好啲，反而仲有一線生機。9月底，俄軍未遇任何抵抗下，佔領瀋陽，整個滿洲差唔多完全落入俄人控制範圍。

咩叫侵略？上所講嘅行動咪叫侵略囉。俄國人軍隊嘅軍紀天下皆知，如果要講殺燒搶掠殺人放火打劫強姦，俄軍敢認第一，天下無人敢認第二。戰鬥民族就係唔同你講笑！

不過講返轉頭，1901年俄人佔領滿洲，之後簽訂辛丑和約後退兵，亦種下咗佢哋同日本人嘅思怨，之後發生嘅日俄戰爭，亦將整個沙俄推入墳墓。沙俄倒臺後，隨後而嚟嘅，係列寧建立嘅蘇维埃共產主義政權，而共產主義思想，亦響之後沿沿不絕輸入中國，最後開天闢地，改朝換代，建立美好新世界！

世界上有一個國家叫墨西哥，係一段好長嘅時間裡面，佢哋畀邊境接壤美國不斷欺壓同埋侵略。墨西哥人同美國人都信耶穌，19世紀時，曾經有人問一個墨西哥軍官：「點解上帝唔保佑你哋墨西哥？」當時個軍官咁樣答：「冇辦法，因為上帝距離我哋太遠，而美國距離就太近。」

下次繼續……

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

推吓先【七不思議系列二：紙紮】
https://play.google.com/store/books/details/%E4%B8%89%E5%B3%B6%E6%82%A0%E4%BA%9E_SEVEN%E4%B8%83%E4%B8%8D%E6%80%9D%E8%AD%B0?id=DSpnDwAAQBAJ

#常威 #大清亡國關慈禧蛋牛治 #慈禧太后 #晚清歷史 #義和團 #八國聯軍 #庚子事變

【星期日特別放送】社會碌葛嘅政治潔僻

社會碌葛依個團體作為整個社會最大嘅凝聚力同黏貼劑，價值連城。冇咗社會碌葛依班勁人，個社會就有可能會崩分離析，就會亂，一亂就大家仆街杏加橙！所以維持社會碌葛團體嘅人數佔社會大部份，的確係統治階層維持政權嘅重要政治任務(之一)。

社會碌葛話政治好污糟邋遢，甚至冤崩爛臭喎？

冇錯既，正解！

社會碌葛係唔應該去理政治，或者談論政治，甚至響香港政治機構立法會內亦只應該討論民生問題，唔應該牽涉政治問題！(**如果你真係有上述嘅想法，恭喜你！你已經完全進入咗社會碌葛嘅思考領域……)社會碌葛帶有「政治潔僻」，當然亦係統治階層樂於見到嘅事情。

政治本身係一個社會(或者國家)嘅「管理術」，一般市民唔去理「自己點比人管」，咁對管人班人(主人或稱統治階層)來講就梗係最perfect，甚至你唔去談論政治，覺得講吓個口都會臭，咁個社會就連小小批判聲音都冇埋！咁，統治階層就可以為所欲為，做乜都得，做乜都冇人去鬧去屌，予取予攜，偷呃拐騙，一句到尾，超正斗！

你要記住，所謂統治階層都係一群人，祇不過係同你位處唔同階級嘅一群人，人就有貪念，人就會偷錢。唔去批判或制衡統治階級嘅粗暴剝削，最後個世界就只有返番去少數貴族欺壓平民嘅原始面貌。

其次，就算統治階層皇恩浩蕩肯比你講小小，比小小言論自由你，社會碌葛本身亦冇討論或批判政治嘅能力，就算講都係鳩講，都係無補於事。冇內容、冇結構冇深度嘅意見，等於「唔係意見」，更加談唔上批判層次，對整個社會向前或改善其自身處境亦作用全無。

大家睇睇香港現在嘅高官同政客，佢地就真係深得「講咗等於冇講」嘅終極真諦，出嚟行虛無飄渺，亂搬龍門。基本上，係連正常回答問題嘅能力都欠奉，更遑論話要要求佢哋有深度同「批判能力」。一隻狗，基本上係唔識批判主人嘅，佢地識做嘅，就係主人叫佢響燈柱側邊屙尿，佢就響燈柱側邊屙尿！

😎【碌葛男人嫁得過】

https://play.google.com/store/books/details?id=e1N7DwAAQBAJ

❤download電子書，可以救地球

【常威中史】為慈禧平反系列（一百一拾五回）

農曆七月廿一，1900年8月14号，八國聯軍攻入北京。

早兩日豆斗已經做好著草準備，14号黎明佢連同劉晶同成個流亡政府離開北京。臨走前，豆斗命令太監將劉晶最愛嘅女人珍妃推落個井度做瓜佢。其實豆斗一直好憎呢個TB，響佢心目中，係覺得呢個TB教壞劉晶，早前已經提及過，TB珍妃亦唔係好人，佢同佢屋企人玩賣官鬻爵，賺到盆滿缽滿，豆斗一早就想殺咗佢。借住天下大亂，殺哂身邊唔鍾意嘅人，豆斗亦冇手軟過，珍妃一個，流放新彊嘅張蔭桓又另一個，唔聽話一堆，成班仇夷垃圾貴族又一堆，總之1900年之後，成個大清政府乾淨曬。所以先有之後嘅大清迴光返照期發生！

早前己經講過，流亡頭幾日豆斗慘過喫屎，8月16號到懷來得到曾國藩孫女婿吳永幫拖穩住局面，有啖好食。8月19号到宣化，頒布「罪己詔」，罪己詔係乜？就係皇帝發公告同天下人認錯認衰，豆斗唔係第一個，清代嘅順治帝、康熙帝（兩次）、嘉慶帝（兩次）都下過罪己詔。豆斗借光緒名義發表庚子拳亂罪己詔係第六次，之後仲有最後一次，宣統三年(1911年)九月時為緩和革命，攝政王載灃曾下詔罪己。

下罪己詔同時，執屎巨人李鴻章已經由自由城邦上海到咗北京，協助慶親王奕劻同赫德先生開始同八國聯軍啟動和談，罪己詔明顯係一份外交公關文件，豆斗响詔中深切反省自己剿匪不力，引發拳亂，導致天下大亂，並向西方各國公開道歉。本公子則認為，罪己詔嘅最大功能反而係話比全宇宙知道，我豆斗仲未死，我仲係大清帝國最高領導人，大清流亡政府仍然存在，你班友仔玩東南互保，千祈唔好玩過界。有本事就反我，唔夠吉屎取而代之就唔該繼續刷我鞋。

1900年8月30号，流亡政府進駐大同市，9月10号扺達太原。呢個時候，各地嘅官員紛紛嚟都太原，支持大清流亡政府同豆斗，人唔到禮都到，由此證明忠於大清嘅支持者，其實比我哋想像中要多好多，同時，江蘇巡撫鹿傅霖仲帶6000兵馬勤王，有兵在手，流亡政府當堂定曬，9月19号，豆斗接納鹿傅霖提議，再向西奔走，10月19号渡過黄河，10月26号停响西安，成個流亡過程歷時兩個半月。豆斗响西安穩住局面之餘，亦開始遙控北京嘅和談進程……

李鴻章同八國聯軍和談開始响北京進行，呢個亦係李鴻章一生人最後一次代表大清執屎，第二年11月7日完成任務後就瓜埋。李先生一生人同大清結下不解之緣，自己亦賺到盆滿缽滿（死後結算，身家超過折合港幣400億身家），本公子認為李鴻章係大英帝國、猶太人資本家嘅買辦白手套代言人，有冇賣國好難講。但係總之冇咗李鴻章，大清帝國根本唔可以延續到20世紀……

下次繼續……

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

依本正嘢【七不思議系列一：孽咒】
https://play.google.com/store/books/details?id=gSZnDwAAQBAJ

#常威 #大清亡國關慈禧蛋牛治 #慈禧太后 #晚清歷史 #義和團 #八國聯軍 #庚子事變

【大清亡國關 #戊戌變法 蛋牛治】

🤓變法即係改革，凡係改革，都會引發社會動盪。1997年之後，香港回歸中國，鄧小平承諾50年不變，所謂馬照跑，舞照跳。現在距離2047，仲有28年，眨吓眼，50年不變呢個承諾已經過咗一半，2047一定會變，當然點樣變冇人知道，或者連國家領導人都唔知道，但係可以肯定一點，中央已經開始為2047之變做緊準備功夫。

😃中央提出大灣區概念，將香港納入整個大灣區規劃之內，就係中央為2047所做嘅預備功夫，較早之前，上頭亦已經將大灣區規劃中未來香港嘅任務講清楚，就係搞創科同做金融融資平台，將分工攪清楚，你搞呢樣，我搞嗰樣，就叫做計劃經濟，計劃經濟一直係中華人民共和國奉行嘅基礎政策，就算佢哋背棄共產主義搞資本主義，計劃經濟嘅概念一直捉緊不放，乜嘢係計劃經濟？即係唔畀自由經濟市場主宰一切，咁計劃經濟係咪邪惡嘅物體？咁又唔係。任由資本主義瘋狂氾濫，唔通唔邪惡咩？

😃凡事都有兩面睇，你睇吓過去幾年香港樓價嘅飆升，問你驚唔驚？最後政府插手用辣招，其實亦都係計劃經濟嘅一種手段，冇政府插手？相信樓價已經升爆咗，爆煲嗰個爆。任由資本市場操縱一切，最後一定會導致大危機發生，因為經濟本身就係一個泡沫，遲早都要爆（睇吓點爆？用乜嘢形式爆？），將經濟環境控制喺一個可以控制嘅範疇裡面，亦都係地球上每個國家機器嘅主要任務之一，當然國家機器點樣去做？或者做咗之後你內心感覺舒唔舒服？又係另一回事。

😘搞大灣區計劃經濟，就令到好多香港人心裡唔舒服。但係諗深一層，自從80年代開始，香港商人蜂擁上廣東搞廠，唔少人亦都係因為咁樣發達，其實所謂大灣區概念，已經行咗30年。香港同廣東省嘅經濟命脈，其實一早已溶成一體，亦從此以後冇辦法分得開。同百幾年前發生嘅戊戌變法一樣，所謂戊戌變法全盤向西方學習，並唔係新事物，響之前，慈禧太后李鴻章搞洋務運動亦都搞咗三十年，提出戊戌變法，只係新瓶舊酒。

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/E8MXX

🍳https://youtu.be/PnMnzhhC5tM

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

【大清亡國關 #揸Fit人 蛋牛治】

😃2019年財政預算案，劏房波力推大灣區概念，全面配合大國策，全面配合計劃經濟，香港進入新嘅一頁。未來會係點？冇人知，但係可以肯定一點，香港嘅自主性將會一日一日降低，港人治港高度自治已經變成明日黃花。今集講揸Fit人，晚清時代揸Fit人一直都係慈禧太后，光緒皇帝想趁住百日維新奪權，係佢睇小咗慈禧嘅政治能量。邊個揸莊，邊個惡曬，今日香港揸莊人並唔係特首，而係中央。

🤓香港人從前擁有嘅高度自由，全因為來自香港係一個特別嘅地方，香港為當時中國帶嚟嘅經濟貢獻無比強大，但隨住中國開放改革，國力暴升，香港嘅重要性一日比一日降低，呢個係毋庸置疑嘅事實，亦係歷史嘅進程，冇得返轉頭。要知道，凡事都冇永恆，香港要重新適應自己嘅角色，亦都無可厚非。

🤔面對大時代，有人選擇留低，亦有人選擇離開，我有個朋友早幾年移民台灣，響台南開咖啡店，台灣嘅生活成本比香港低得多，但同時消費力亦比香港低得多。佢走咗幾年，佢同我講，環境都唔係咁好，最近佢打算回流香港重新起步。例子仲有更多，我生平亦都未識得一個移民加拿大嘅人，響加拿大可以飛黃騰達或者有一番新作為，反而去咗十幾二十年，悶到嘔之後，忽然回流返香港做返個香港人，就見過唔少。

🤓好多人都以為世界好大，選擇可以好多。但其實真相係，人可以選擇嘅嘢並唔係太多。我講過好多次，如果印銀紙可以解決問題，整個世界基本上冇問題，但係如果我哋只係識得用印銀紙解決問題，問題只會越嚟越大。

♎#大清亡國關慈禧蛋牛治】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/FDFYH

🍳https://youtu.be/CCyzbz9Tgrs

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram  @historysandwich

Facebook 專頁：https://www.facebook.com/historysandwich/

【常威中史】為慈禧平反系列（一百一拾六回）

1901年辛丑年，大清首都北京同陝西省西安航空距離900公里，豆斗著草到內陸，保証自身安全後，開始遙控北京和談進程。當時無線電（Wireless telegraphy）應該未應用，1909年嘅諾貝爾物理獎先頒發俾發明無線幹電實際應用嘅科學家，以大清科技水平，北京同西京亦冇電線接連，可以想像，和談期間，應該日日有快馬信差回來900公里距離嘅北京同西安，我諗依個亦係和談由庚子1900年傾到辛丑1901年嘅理由。

大清和談代表係執屎大王李鴻章同開明派慶親王奕劻，和談期間，北京由八國聯軍接管，秩序大致平靜，未有過咩大屠殺大搶掠發生。我諗當時嘅北京市民都覺得洋鬼子實在係比義和團更加可愛，起碼佢哋嘅生命財產都受到一定保障，如果當時有得公投，我相信北京市民會希望北京成為八國聯軍嘅殖民地。（死喇！又發表漢奸言論添！）

和談初期，洋人一度希望架空大清政權，但張之洞李鴻章等人堅定不移支持豆斗，甚至要以「太后人身安全」為和談第一大前題，你話豆斗幾咁把炮呢？人雖不在，權勢仍在。我諗大清當時如果有印銀紙，一定會將豆斗個相頭印喺正中間。西安方面，各地官員紛紛送錢送禮送兵支持豆斗，屎忽仲未坐暖，流亡政府已經籌到600萬兩白銀經費營運，邊個話中國人團結先？儒家哲學三綱五常系統就係有依種超強維穩威力！

處理戰犯之後，談判進入最核心嘅部份，就係戰爭賠償問題。美國、英國同日本知道大清財力有限，認為賠款額最高應該係三億兩白銀（哇！），其他各國則主張五億兩白銀以內，唯獨日耳曼民族獅子開大口，要求七億兩！喂，冇就係冇，點還呀？之後各國不停交涉，一邊調查大清最多可以賠幾多。最後達成共識，大清需要賠款6500萬英磅，折算4億5000萬兩白銀戰爭賠款！但可以分期付款，攤分39年還清，每年利息4%。由1902年1月起釘，1940年甩身。（至於依筆款項，到大清1911年倒臺之後仲有冇人認頭還錢，朕仲check緊，唔該大家知道答案就話畀我知囉……）

1901年9月7號，由奕劻同李鴻章做代表，於北京同十一國駐京公使正式簽定和約十二款，依個就係響曬朵喪權辱國嘅【辛丑條約】！除咗賠款，和約仲包含以下內容，簡單啲講埋：

1.派醇親王載灃到德國道歉。（公使遇害事件）
2.嚴懲傷害外國人嘅凶手。
3.派戶部使郎那桐到日本道歉。（公使遇害事件）
4.比中國人起墳嘅洋人要賠償及立碑認錯。
5.大清國兩年之內不得製造軍火。
6.向十一國賠款4億5000萬兩白銀，年息四厘。
7.全國城市設立使館區，區內由使館管理，中國人不得在區內居住。
8.大沽口至北京沿途一切清國軍用設施削平。
9.大沽口至北京一帶，諸國可派兵駐守防務。
10.大清答應不再仇視教會及教民，有違反者一律嚴懲。
11.開放更大通商渠道，改善河道工程，經費由清國政府支付。
12.將各國事務衙門改為外務部，淩駕於六部之前。

唔知你又覺得點呢？下次繼續……

【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

[fuck] 【七不思議系列二：紙紮】
https://play.google.com/store/books/details/%E4%B8%89%E5%B3%B6%E6%82%A0%E4%BA%9E_SEVEN%E4%B8%83%E4%B8%8D%E6%80%9D%E8%AD%B0?id=DSpnDwAAQBAJ

#常威 #大清亡國關慈禧蛋牛治 #慈禧太后 #晚清歷史 #八國聯軍 #辛丑條約

【常威中史】為慈禧平反系列（一百一拾七回）

1901年，喪滿州人權辱滿州人國【辛丑條約】簽訂，天文數字賠款分佈如下：

俄國：133,316,000兩白銀
德國：91,287,043兩白銀
法國：75,779,250兩白銀
英國：51,664,029兩白銀
日本：35,552,450兩白銀
美國：34,072,500兩白銀
義大利：27,113,927兩白銀
比利時：8,607,750兩白銀
奧匈帝國：3,979,520兩白銀
荷蘭：800,000兩白銀
西班牙：278,055兩白銀
瑞典：110,000兩白銀
葡萄牙：冇（哈哈哈哈哈哈哈哈）

合共462,538,116兩白銀

俄國不概一直以來係中國人嘅最好朋友，咬得最深，日耳曼德國人亦唔同你講笑。俄國人不但要錢，仲要地，陰公嘅大清就係同佢太接近，不過俄國佬以為任食任伶，進一步入侵清國，終於響兩年後日俄戰爭中自爆，沙俄賠上嘅代價，係total lost，所以做人千祈唔好咁貪心，貪字得個貧呀！

再補充番件八國聯軍嘅屎料，八國聯軍嘅總司令係德軍嘅瓦德西元帥（Alfred Graf von Waldersee，1832－1904），其實，佢響八國聯軍佔領北京兩個月之後,1900年10月中先嚟到北京，之前一直都冇份玩，冇計，當時未有747，A370，由漢堡坐戰艦嚟，一頭半個月都係常職吧？佢一嚟到，就要征服者嘅身份大展拳腳，施下馬威求其揾啲支那人嚟殺，仲殺咗當時嘅代直隸總督廷雍，叫佢有份縱容義和團殺害教民咁講。

依條友正一粉腸，佢生平出過本書叫【 瓦德西拳亂筆記】，內裡誇大咗其他國家喺北京殺燒搶掠行為，係由佢嚟到北京先做救世主，出手平定秩序，仆佢個雞，根本冇人玩嘢，係佢自己新官上任三把火。有件野史話瓦德西唔再殺人放火，原因係佢認識咗當時清國最出名嘅交際花賽金花（1872-1936），賽金花係當時嘅高級妓女，相頭有啲似珍妃，屈指一算，1900年嘅時候佢已經38歲，不過可能呢個世界上就係有人鍾意中女，需要驅風（但賽金花識小小德文）。所以傳說瓦德西非常之鍾意佢，亦由於佢，瓦德西先冇再殺人放火咁話。一個「風塵奇女子」以佢嘅肉體拯救咗全北京市民生命財產，亦都非常符合中國人嗰種章回式小說俠義精神嘅演繹方法……不過無論真好假好，我哋都要多謝佢！

1900至1902年期間，北京同天津兩個華北地區最大嘅城市都係由西方人統治同管理，佢哋利用自由城邦上海同埋殖民地香港嘅統治概念管理北京同上海，設立法律制度，同將會計概念帶比當時嗰班大清國嘅愚昧蟻民，大清人民終於知道西方世界制度化數字化管理國家嘅好處係啲乜嘢。前前後後八國聯軍統治咗北京同埋天津接近兩年時間，某程度上佢哋仲將呢兩個古老城市，蛻變成現代化城市。西方人嘅制度有幾好？相信唔使我多講，我哋Hongkonger最明白！九七前後，一清二楚！

有人話，西方列強十惡不赦侵略中國，但係以西方人嘅眼光嚟睇，佢哋只係覺得佢哋將現代化概念帶入一個古老野蠻的帝國裡邊，將佢改變，令佢可以融入整個世界體系，一同向前。所謂侵略，其實都有兩面嘅睇法。就好似歐洲人登陸美洲大陸一樣，屠殺當地嘅土著印第安人，建立一個偉大嘅歐化現代國家，大破之後先有大立。歷史上面嘅大劫難，伴隨而來嘅就係歷史嘅大補償！

大清國嘅真正現代化革命，亦由1902年開始！

#常威 #大清亡國關慈禧蛋牛治 #慈禧太后 #晚清歷史 #八國聯軍 #辛丑條約


【大清亡國關慈禧蛋牛治】實體購買
https://www.382now.com/product?id=87

【大清亡國關慈禧蛋牛治】
https://play.google.com/store/books/details?id=C3hjDwAAQBAJ

夜咗唔敢睇【七不思議系列二：紙紮】
https://play.google.com/store/books/details/%E4%B8%89%E5%B3%B6%E6%82%A0%E4%BA%9E_SEVEN%E4%B8%83%E4%B8%8D%E6%80%9D%E8%AD%B0?id=DSpnDwAAQBAJ

1900-1872=28 喎