【大清亡國關慈禧蛋牛治】第一回

【常威近代史】（二百八十五回）
袁世凱平反系列

當袁世凱於1916年3月29號於總統府內焚燒842件帝制公文，企圖毀屍滅跡，避免有人秋後算賬，到底佢個心喺度諗緊啲乜嘢呢？3日前，3月26號，英國殖民地香港尖沙咀火車站大鐘樓正式啟用，從此成為咗香港嘅地標，象徵住呢個殖民地都市邁向日後欣欣向榮發展之路，直至今日。點解紅鬚綠眼做得到？中國人又做唔到？

當時嘅袁世凱會諗，滿清王朝已經被推翻，中華民國建立咗起嚟，最初兩三年自由民主法制搞到一鑊泡，國家仍然唔團結，到處軍閥割據，經濟冇辦法發展起嚟，人民自然生活得唔開心，滿肚怨言，而且中國喺外國列強面前，依然非常軟弱，日本人予取予攜，21條只係餐前美酒，早晚會吞併中國。

作為一個對中國人民有承擔、生平算係重情重義、想法合理嘅政治家袁世凱，佢當時嘅想法，就係覺得中華民國營養不良、中華不能雄立於宇宙間，係因為少咗一樣嘢，嗰樣嘢叫「#皇帝」。

類似嘅想法，其實同今日中國領導人 #習近平 先生一樣，面對整個國家山頭主義林立，經濟軍閥割據一方，表面上黨嘅領導操縱一切，但內裡危機四伏，明爭暗鬥，貪汙舞弊，吃裡扒外，國家資源被不斷瓜分，朝國外散貨。習近平上臺嘅時候，佢採用嘅解決方法係增強中央集權嘅能力，要將下放予地方嘅權力收歸中央管轄，而在最頂端上層建築裡面，佢亦唔希望所謂 #中央政治局 嘅「#集體領導」左右佢嘅深化改革，矮化其他常委，製造一人獨大局面，目的大概都係想改革貫徹始終執行，當然能否成事，係另一個問題，亦係能力問題。

勇往直前未必一定有成果，你發現國家有弊病，希望以大改革形式修補漏洞，有時候會造成反效果。如果冇 #光緒皇帝 1898年 #百日維新，我差唔多可以肯定大清國祚可以超過1911年；冇/#戈爾巴喬夫 嘅改革與新思維，蘇聯應該唔會響1991年無聲解體；要數中國歷史風雲人物，不得不題煤山上吊嘅崇禎皇帝 #朱由檢（1611-1644），佢亦都係一個有作為嘅深度改革者。

咁問題究竟出現係邊度？任由佢腐爛落去？抑或係大刀闊斧進行改革？即西方國家所謂「震盪療法」，年紀有返咁上下都會明白，做化療，一係好返，一係就會加速玩完。不過與其都係要死，做化療可能係一個比較理智嘅選擇。

踏入五月天，袁世凱眾叛親離，中華民國崩分離析，佢嘅健康情況進一步惡化，失勢嘅洪憲大帝身邊嘅人都靜靜等緊大變局出現。5月8號，南方雲南、貴州、廣東、廣西護國軍響廣東肇慶成立軍務院，作為各省護國軍統一指揮機構，分裂勢力更加強大。四省軍務院以 #唐繼堯（1883-1927）、#岑春煊（1861-1933）為首，二五仔 #梁啟超 為政務委員長，桂系 #陸榮廷（1859-1928）、#蔡鍔（1882-1916）、#李烈均（1882-1946）、#龍濟光（1867-1925）、#劉顯世（1870-1927）、#陳炳焜（1868-1927）等軍事力量連成一線，不承認袁世凱為大總統，要求副總統 #黎元洪（1864-1928）代替袁世凱成為中華民國最高領袖。

🔥香港近代史【香港關中英聯合聲明腿蛋治】系列，請大家替我廣傳，等多啲人睇到……

要保衛香港，必須要認識香港，要認識自己香港人的歷史，要明白香港人為甚麼會走到今天這個地步？認識過去，一是為了安心活在當下，二是為要擁抱未來，找尋出路。我和阿潮製作這個近代香港史系列，就係希望大家能夠認清自己是什麼……

一個連自己是什麽都不知道的人，是沒辦法築構起屬於自己的未來。我可能已經老了，會說出這樣的話來，但我是真心出發，沒有一個民族沒有歷史，只有抗爭的外殼，沒有抗爭的內容，是不能堅定和持久的。

https://www.youtube.com/watch?v=AbM3IGyrETE&list=PL0RVUAILQUOumZZXNyEKoZRynMtAuRyuS

❤認識香港史，香港人重新出發！請加入常公子嘅近代史世界！

【常威近代史】（二百八十六回）
袁世凱平反系列（完結篇）

盼中槍學生，早日康復！

袁世凱兵敗如山倒，眾叛親離，整個洪憲帝制徹底失敗，一方面未能抑壓日本人嘅侵略野心、繼而受到同伴黨徒嘅背信棄義、最後遭到全國人民普遍反抗，離心離德。同佢想做嘅團結中國大一統目的完全背道而馳，「洪憲帝制」明顯係一個錯誤嘅政治決定同計劃，就好似林奠2019年要推逃犯修訂條例一樣，錯得再無可再錯，完全係一場自我製造嘅「完美風暴」，不過前者有其崇高嘅政治目的，後者則純粹係：妹仔擦錯主人鞋。

袁先生一生人，個人感覺做好事時間多過做壞事，可惜臨門一腳射失，終於遺臭萬年，同慈禧太后、汪精衛一樣，永遠被釘在中國民間通俗歷史的恥辱柱上，永不翻身。

1916年5月尾，袁世凱臨終之前，佢千方百計想隱住局面，佢搵返段祺瑞出任國務卿，5月29號，佢向全國人民公佈帝制議案始末，鄭重道歉政治錯失，但同日，佢最親密嘅政治盟友湯薌銘（1885-1975，湯化龍之弟）亦宣佈湖南獨立，整個南方脫離中華民國，國家陷入完全分裂狀態，亦係呢個時候，袁世凱嘅生命步入尾聲。

袁世凱再世嘅最後一個星期，歷史記述甚少，睇嚟係幾唏噓嘅。袁世凱嘅死因，坊間普遍認定係「氣急暴亡」，即係做唔成皇帝，監生激撚死，呢個死因，非常符合民間章回小說式想像。但佢真實嘅死因，係中尿毒，前列腺腫脹，「袁世凱患尿毒症，攝護腺腫脹」，亦有坊間傳聞，如果當時能夠採用外科手術進行治療，袁世凱唔會有生命危險。但係喺袁世凱嘅醫療方案上，佢兩個仔分歧極大，大仔袁克定（1878-1958）主張用西醫通過手術治病，而二仔民國風流四公子之一袁克文（1889-1931）則主張用中醫，雙方僵持不下，耽誤醫療時間，最終導致袁世凱死亡。

當然一切嘅講法都冇辦法判斷真偽，總之劇本就係，袁世凱喺佢嘅歷史任務完結之後，就病死咗。The file is closed！1916年6月6號，魔鬼666，中華民國大總統袁世凱病死於北京，享年58歲（實齡56，dying young），舉國震驚。我講過，袁世凱家族成員都係短命種，家族裡面應該有種遺傳病基因存在，但袁世凱之後嘅一代，似乎擺脱咗依種家族遺傳短命基因，大仔袁克定活到80歲先釘蓋。

袁世凱之死，留低嘅係一個大分裂中華民國爛攤子，從此之後，內戰打足30年，死咗無數人命。佢想行洪憲帝制搞大一統事業，復興儒家哲學道統文化，但冇人支持冇人鍾意，國家崩分離析，陷入大混亂，中國人受苦受難，不過路係自己揀，仆街唔好喊。

回頭睇返1911年到1916年嘅世界，中華民國早期兩種政治體系，即「自由主義政治」同「獨裁統治」，似乎彼此促成咗各自嘅滅亡，1912年後大權在握嘅袁世凱，佢感覺到議會同埋省自治削弱咗民族國家嘅團結基礎，中華民國未能團結起來，就唔可以有實力抗衡西方列強（最主要係日本）嘅入侵。要提一提大家，袁世凱當政之時，佢並冇刻意靠攏或依附任何一個西方列強，呢個同之後中國所有軍閥嘅經營手法完全不同，袁世凱一直希望走嘅，係一條中華民國獨立自主之路，無論手段係乜嘢，呢個係一個崇高嘅理想且值得敬仰。不厭其煩多提一次，中國真正主權獨立，要發生喺半個世紀後，中華人民共和國同蘇聯決裂嗰一刻，1969年打烏蘇里江珍寶島戰先至真正得到完全落實。

中國人民真正站起來，雄立宇宙之間，所行嘅路實在太漫長，亦太崎嶇。

袁世凱死後，由副總統黎元洪承繼大總統權力，黎元洪所承繼嘅係袁政治權力，至於北洋系統軍事力量，則落入段祺瑞之手。6月9號中華革命黨總理孫文喺上海發表宣言，要求黎元洪恢復1912年頒佈嘅《臨時約法》，重新打造中華民國自由民主法統建設。

革命KOL孫文再次展示其無可替代嘅政治魅力，佢積極串連各方討袁力量，增加自己政治籌碼。6月11號，黎元洪回覆孫文，要求佢出山大力相助，一起為中華民國共渡時艱……不過槍桿子出政權永遠係真理，真正掌握住北京中華民國中央政府權力嘅人，係當時嘅國務卿段祺瑞，1916年6月29號，大總統黎元洪任命段祺瑞為國務總理，同日，《臨時約法》恢復執行。

故事尚未完結，新一頁正式拉開序幕。隨著袁世凱之死，預告咗軍閥時代嘅來臨。我寫嘅「袁世凱平反系列」亦到此為止，下一個部份，係1916年至1928年嘅「大軍閥平反系列」。軍閥個個都係衰人西人杏加橙？其實未必，真正嘅杏加橙，仲未出場。

#常威 #斷送共和關袁世凱蛋牛治  #袁世凱 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常公子歷史頻道205回：大清亡國關 #光緒一生 蛋牛治】

♉首先祝大家聖誕快樂🎄。今晚出外慶祝，唔畀人拘捕唔中噴噴唔食TG，已經係萬幸嘅事，估唔到短短半年間，香港會變成咁樣。

♏最近同幾個朋友傾偈，佢哋不約而同睇淡全球經濟，雖然美國股市不斷破頂，經濟空前強盛，但係大家都明白，一切都係表面功夫，只係為咗鋪排一個last party，去掠奪今個經濟循環嘅最後一轉水，之後就會資產泡沫爆破鳥獸散，即係話，距離全球爆煲嘅日子，應該唔遠，2020應該唔係爆煲年，反而會係開last party嘅一年，呢個party最少會延續一年至年半時間，之後2021中爆？2022頭爆？maybe...

♈2020年，喺美國總統大選嘅一年，Donald Trump連任應該冇問題，因為民主黨根本冇人有資格彈出來挑戰佢。大選前令到美國經濟火熱朝天，亦都有利佢連任。最近有人同我講，如果Donald Trump連任失敗，中美對敵嘅局面就會緩和落嚟。我話俾大家知，其實係唔會，對付中國圍堵中國已經成為美國嘅基本國策，Trump先生只係執行人，就算換咗其他人做總統，與中國敵對依條路線亦只會行落去。美國總統背後，仲有深層國家主宰。況且美國總統唔能夠成功連任，係極罕見嘅事情，以Donald Trump今日嘅強勢，除非佢衰十一，否則亦冇可能發生。

♑臺灣大選亦都塵埃落定，日前搗破外圍投注集圍，上盤蔡英文讓70萬票，民間智慧往往係最佳指標，準過民調千百倍。民進黨蔡英文連任，意味臺灣同中國關係會更加遠離及敵對，當然大家唔好忘記，臺灣呢個海上堡壘，其實亦係美國整個東亞大戰略圍堵中國一粒最重要嘅棋子，蔡英文連任總統，喺美國因素底下，十拿九穩。

♏香港嘅局面比較複雜，原本以為亂局平定後，林鄭月娥會好似董建華咁腳痛下臺，但而家睇情況完全唔似，中央會繼續撐住佢，當然明眼人都睇到，佢同佢個唔拍手唔唱歌嘅老公都唔想做落去，但係「辭職」嘅嘢，你係冇權決定，好好醜醜都要做滿今個特首任期，連任做多五年梗係冇可能，但係做埋餘下任期，似乎亦都冇乜懸念。

♍今日預測咗幾件事，希望唔好出錯，我唔想變「燒山」，當然youtuer燒山好受歡迎，亦有佢嘅原因。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/pvhlTVNA95w

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百八十七回）
大軍閥平反系列

2019年10天，自由香港進入軍統時代，啱曬為「大軍閥平反系列」拉開序幕……

袁世凱死，中華民國進入軍閥時代，「#軍閥」（warload）依一個字，係一個貶義詞，表示衰到冇人有，表示擁有軍事實力嘅軍人或團體或政党，割地稱王，自成一國。事實上當一個大一統政權倒臺嘅時候，就會進入軍閥割據時代，即內戰時代，原因好簡單，大佬死咗，啲細嘅就要爭上位，最後要成為新坐館。響中國歷史上，每次大一統王朝結束，就會開始大分裂軍閥割據時代，最出名嘅有漢後 #三國時代、#魏晉南北朝、唐滅後嘅 #五代十國、元朝滅後嘅中原大亂局，仲有我哋要講嘅中華民國軍閥時代。

睇返歷史都幾有趣，中國大部份軍閥時代，都係大概半個世紀50年左右就會收皮，所謂 #羅貫中《#三國演義》「分久必合，合久必分」大道理，亂得咁上下，大家都希望過返啲安樂日子，然而當人民渴望平靜生活嘅時候，佢哋往往會選擇錯誤，而且天下烏鴉一樣黑，做得軍閥邊度會有好人？作為歷史盲毛，大家可以這樣去理解。

普羅中國歷史定義中華民國嘅軍閥時代，係由1916年開始，至1927年 #蔣介石 北伐佔領上海結束清算共產党終結，中間大約祇有十年時間，呢個係國民黨史觀。

但我常公子認為，大分裂軍閥割據時代，應該由 #太平天國 清空滿清軍事力量開始計起，即係1865年左右，#曾國藩 同 #李鴻章 所創立、有外國資金投入嘅軍紳民兵制度，即係准軍同湘軍，其實已經係一種軍閥嘅統治形式，祇不過佢哋口中仍然效忠滿清中央政府，從此之後，製造南北分治，喺百年常態，中間出現過無數軍閥，佢哋用不同形式同面貌割地稱王。真正回歸大一統，其實係1949年 #中華人民共和國 建國之後。當然，如果又廣義啲去睇，到咗21世紀，其實中國仲係處於分裂狀態，因為中華民國民主自由政權仲喺臺灣存在。

軍閥成為貶義詞，係因為佢哋最後冇成爲勝利者，事實上，蔣介石國民黨係一個軍閥系統，#毛澤東 共產黨亦都係一個軍閥系統，不過佢哋最後打贏咗仗，就成為正式嘅合法政權存在於歷史嘅論述中，歷史永遠由勝利者所執筆，所以一眾袁世凱死後執政嘅北洋軍閥，最後只能成為勝利政權嘅抹黑炮灰。

我個人感覺，香港人對軍閥嘅形象介定，源於1972年 #李翰祥所執
導嘅一齣電影，叫《大軍閥》，由 #許冠文 主演，當時係全年票房總 冠軍，內裡嘅軍閥形象，鹹濕衰格，貪財懦弱。我自己個人感覺，李大導當時所諷刺嘅並非中國軍閥，而係香港嘅資本家，信不信由你。

大軍閥嘅論述，由取代袁世凱死後一切軍政權勢嘅段祺瑞開始。

#段祺瑞（1865-1936），原名啟瑞，字芝泉，安徽合肥人，出生於淮軍將領世家，祖父段珮為劉銘傳軍三營統帶，段祺瑞童年生活就喺軍營中渡過同受教育，所以佢嘅出身，就係百分百軍人純正血統，1885年佢考入李鴻章創辦嘅天津武備學堂，1889年前赴德國深造，第二年回國響北洋軍械同威海衛隨營武備學堂教書，將德國普魯士式軍隊管理概念及軍人戰術傳統，全面帶入陳舊落伍清帝國軍事系統之內，對中國之後嘅軍事發展，影響極深極遠。

1895年加入 #袁世凱 陣營，係小站練兵第一代領軍人物，袁世凱手下最得力武將，佢有個朵叫「北洋軍事學第一人」，佢長期主理北洋軍軍事學堂教學工作，大部份北洋軍將領唔係佢嘅部屬，就係佢嘅學生，就算兩者都唔係，都會係佢嘅軍學信徒。

1911年民國之後，長期擔任陸軍總長一職，涉足政界，亦有「政治不倒翁」嘅綽號，佢一直喺北京中央政府控制住北洋軍隊，袁世凱稱帝，佢唔buy，日本人易收買唔到佢。外號「#北洋之虎」，佢嘅主要競爭對手係「北洋之狗」#馮國璋。段祺瑞主內，控制住北洋軍事系統內部運作；馮國璋主外，主要領軍打仗，兩人因為地位同利益競爭，長期處於不和狀態，「兩人一來一外，均有掌握大局之資格」。段祺瑞於北洋集團內部培植咗以佢為首嘅勢力派系，我哋叫「#皖系」。「皖」指安徽合肥地帶，段祺瑞係安徽合肥人。

袁世凱中尿毒暴斃，副總統 #黎元洪 成為大總統，段祺瑞出任國務總理，前者只係虛名，中華民國中央政府軍政大權，事實上集中在段祺瑞一人手上，中國第一個大軍閥粉墨登場，之後無論佢做過乜嘢好事都好，先天註定佢係下流賤格。

#常威 #大軍閥平反系列 #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】（二百八十八回）
大軍閥平反系列

1916年袁世凱死，洪憲倒臺，我自己定義係第一次「法統重光」，自由民主法統回歸中華民國？開玩笑（普通話發音），其實係大分裂時代正式開始！蛇無頭不行，冇大臺就失控，民主機制唔完善下，就需要以領袖個人魅力製造威權，凝聚國家團結民心，你睇慈禧在位半個世紀，大清帝國得以苟然殘存，推翻滿清後，民國初期僅有嘅凝聚力，其實係來自軍政強人北洋大佬袁世凱當政，單只論政治魅力，袁世凱同慈禧比較，已經係天同地，現在袁世凱死埋，唯一凝聚國家嘅威權正式消失，冇繩綁住啲馬騮，啲馬騮就會周圍走，仲會因為爭奪資源打交，就係咁簡單。

「法統重光」後，走馬上任嘅中華民國大總統黎元洪，到達佢一生人政治事業嘅巔峰，但佢冇真正實力同個人魅力統合全國分離力量，有人話黎元洪係民國史上一個最幸運嘅人物，因為佢得到嘅權勢同埋名譽，同佢嘅實力完全不成正比，廣東話叫非常符碌。

但睇返轉頭，佢亦唔係符碌，處事面面俱圓，厚道待人，辦事周到細緻，平生以「不得罪任何人」為座右銘，做一舊「政治海綿」任人搓圓撳扁，係第一代「和理非非」代表人物，亦係佢嘅生存之道，如果中華民國多幾個黎元洪式人物，或者之後嘅歷史，亦都唔駛用鮮血而寫下。

袁世凱死後，黎元洪重新任命各省軍政長官，以「不得罪任何人」為大前題，最緊要「劣」得大家舒服。響北方北洋派系控制嘅省份，基本上沿用原班人馬，而南方西南各省，則選用護國軍領袖同地方軍閥，務求穩定為先，先行結束戰亂，其實無話錯，其實畀佢去堅做，要切換什麼人，佢亦都做唔到。

中華民國政治結構呈現前所未見嘅弱勢，日本進一步有動作，1916年7月3號，水深火熱嘅俄國，仲同日本人喺聖彼德堡訂立第三次協定及第四次密約，互補遠東利益，務求中國唔俾第三國政治支配。7月8號，日本駐華公使向中華民國外交部通告《日俄新協約》，中華民國被通知，只係得個「知」字，就係咁多。

命運驅使日本人今後三十年成為中國最大嘅敵人，1917年沙俄政權倒臺，列寧共產主義上場，西方列強亦深陷於第一次世界大戰浩劫中，從此以後，日本人單方面獨大，正式取代大英帝國，成為中國最大利益獨佔國。

但係和理非非黎元洪亦有一定作用，7月12號，廢止《懲辦國賊條例》及《附亂自首特赦令》，釋放所有喺本年7月2號之前因為政治犯罪而被拘禁嘅人，撤銷各項因為政治問題而發出嘅通緝令，減少血腥殺戮，其實係德政，要讚黎元洪！

為咗平息民憤，黎元洪響7月14號，頒布懲辦令，下令捉拿、嚴懲洪憲帝制禍首一共八人，懲辦令稱：「自變更國體之議起，全國擾，幾陷淪亡，始禍諸人，實尸其咎，楊度、孫毓筠、梁士詒、夏壽田、朱啓鈐、周自齊、薛大可、均著拿交法庭，嚴行懲辦，為後世戒。其餘一律寬免。」

追究袁世凱帝制責任，要搵依八個替死鬼治罪，南方一眾護國軍軍閥，就要求黎元洪殺曬呢班人，但係政治海綿貫徹始終和你飛飛。懲辦令發出之前，黎元洪已經通知有關人仕，楊度等人喺段祺瑞庇護下，先後安然離開北京，通而不緝，令通緝令成為一紙空文，八位代罪羔羊，冇人要付出性命作為代價，之後佢哋仲有人回歸政治舞臺，你話抵死唔抵死？

上述事件，正好反映出黎元洪「不得罪任何人」嘅個性，當時嘅人叫佢「黎菩薩」就係咁解，黎元洪雖然係軍人出身，但佢並唔係軍閥，佢反而係一個真真正正嘅政治家，好多時候，佢只係想出嚟解決問題，並非爭權奪利，單就這一點，就值得後世人尊敬。

只可惜，所有嘅屠刀已經磨利，黎元洪嘅道德高尚同風骨，冇辦法阻止人世間嗜血權欲嘅廣泛蔓延，人民再不需要和你飛飛，而係需要血腥革命。1916年下半季，黎元洪的確有機會成為「中華牌碎肉機」負責關機嗰個人，可惜中國嘅命運給予佢接觸碎肉機開關掣嘅機會，並無給予佢關上開關掣嘅能力……

你有你和理非，我有我繼續打，1916年7月3日，護國軍兵分三路進攻廣州，發起討伐廣東都督龍濟光嘅「討龍戰爭」。龍濟光長年盤據廣東，曾經積極擁護袁世凱帝制，阻撓過護國軍北伐。黎元洪嘗試出面叫停，改任陸榮廷為廣東督軍，但係雙方戰爭持續，打到8月中旬，陸榮廷領軍打到去肇慶，龍濟光被迫交權，前赴南海，討龍戰爭正式結束。類似嘅軍事衝突，之後不斷喺全國發生，天下大亂就係咁解。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常公子歷史頻道207回：大清亡國關 #慈禧之死 蛋牛治】

♉【大清亡國關慈禧蛋牛治】系列，到今集，隨住慈禧太后嘅死圓滿結束，前後做咗207回，以每回平均六分鐘計算，一共1300分鐘播放時間，要睇晒，要用21小時，都幾得人驚。成日講是時事，不如今日講下我對條Youtube Channel嘅展望。

♐【常公子歷史Youtube頻道】建立咗差唔多一年半時間，目前有大概2000個訂戶，你話成功當然係唔成功，但係亦唔算好失敗。因為畢竟係陀地家庭式手工業製作，工作人員祇有三位，包括我常公子，負責寫稿同錄音，我嘅拍檔阿潮同佢老婆，就負責影片製作，全部無償出發，背後冇金主亦無任何投資者，大家祇不過想做條粵語香港人話近代史channel，為我哋香港人同我哋嘅粵語廣東話留下一點歷史印記，費事成日俾人話我哋香港人冇文化冇歷史感。

♊2020年，會係充滿變數嘅一年。頻道嘅內容，我亦會想辦法加入新事物，首先有好多朋友勸我製作「國語版」，希望可以多啲臺灣朋友睇，但係我本身唔識講國語，亦暫時未搵到識國語嘅朋友配合錄音，但我總想喺2020年做咗佢，希望成事喇。

♏另外有個好朋友會喺觀塘開一個網台，我都會去幫手製作一啲歷史同其他節目，呢啲節目我都會放上去我條channel播，希望條channel多啲嘢睇。最近有唔少人對香港未來睇得好悲觀，我冇呢種感覺，反正本來無一物，我其實係屬於嗰隻冇乜嘢好輸嘅人，冇事冇樓亦冇撈，一直勤奮工作，亦唔關時勢好或者時勢差事，馬克思講過，人係勞動嘅動物，人類要從勞動中都找尋生命價值，我堅信不疑。

♈最後趁住今日呢個咁特別嘅日子，「東方維多利亞女王慈禧之死」，希望大家將我條channel介紹俾多啲朋友睇，廣傳開去，係咁多。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/wxYS6HsVE0M

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百八十九回）
大軍閥平反系列

最近香港嘅亂局，令我明白一個政治真理，原來如果你自己唔相信自己做嘅事係正確，咁你永遠無辦法做得好，火勢一發不可收拾，就係因為咁解……

1916年8月1號，#袁世凱 已經風光大葬入土為安，佢嘅影響力，亦因為佢嘅死而迅速消失，反映出當時中華民國仍然處於「人治」狀態（到咗今日都冇變過），中華民國國會重新響北京召開，call back番舊人回歸，甩皮甩骨頂硬上，通過議案，確定 #黎元洪 為大總統，黎元洪正式承繼袁世凱留低嘅政治權力，控制「#總統府」。但同一時間北洋軍事強人 #段祺瑞 被任命為國務總理，控制「#國務院」，「總統府」同「國務院」身份重疊，於是乎立刻出現「府院之爭」，最後要由「水晶狐狸」#徐世昌 復出調停，替雙方擬定權限，暫時解決當前政治危機。

北京中央政府政局大致喘定，雙頭馬車黎元洪同段祺瑞執掌國家最高權力，各省各地處於自治狀態，之前宣佈脫離中華民國嘅南方省份，亦相繼取消獨立，重新承認北京政權。其實1916年開始，去到1928年前，與其稱呼為「#軍閥割據」，不如稱呼為「立憲共和國聯邦制」，其模式其實同1911年中國革命後，大家想copy嘅美國政治體制非常相似。

美國嘅情況係，一個聯邦中央政府（華盛頓特區）為國家政治主體，體現國家主權，不同州份採用自治政策，行聯邦勢，各個州份有自己嘅法律同經濟政策，儘可能互不干涉，而聯邦政府會用民主選舉機制選出總統，統領整個國家，國防同外交由聯邦政府一力承擔，而每個自治州份，則需要按經濟規模按比例攤分國家整體開資。

當時嘅中國大致上都係咁樣，大家都認同有一個中央政府存在，用嚟體現國家主權，每個省份採用自治模式，其實係行緊100%聯邦制。不夠中國人做事，就有自己一套玩法，同美利堅合眾國有所唔同嘅係，自治省份從來冇答應畀錢中央政府經營，而且每個自治區，都有權擁有自己軍隊，甚至可以私下同外國建立不同程度嘅外交關係，即係話，本來只屬於中央政府嘅「#國防」同「#外交」權力，全面下放到每個自治省份手上，講真，當時中華民國行嘅聯邦制度，其實比美國更加民主自由，唔知大家同唔同意呢？

所謂民主自由，就係自己話曬事，鍾意講乜就講乜，鍾意做乜就做乜，乜唔係咩？咩咩咩。

之後嘅四年，1920年「#皖直大戰」爆發為止，其實北京中央政府係由段祺瑞為重心，即所謂「皖系軍閥」把持。響最高權力競爭中失敗嘅「#北洋之狗」#馮國璋，亦自行坐鎮南京，繼續坐大，韜光養晦，同 #曹錕（1862-1938）打造佢嘅「直系」（馮國璋係直隸河北省人）勢力，誓報一箭之仇。事實上當時1916年底，段祺瑞曾經想安撫馮國璋，叫佢入京做副總統虛職，但依招杯酒釋兵權，馮國璋就睇穿你籠嘢，離開南京大本營，萬萬不可啦，段祺瑞你發夢呀。

袁世凱帝制失敗，馮國璋嘅作用可圈可點，由於馮先生並唔相信帝制係正確嘅選擇，帝制出臺前，佢係聯名要求袁世凱撤回帝制嘅其中一個軍事將領，其後受命帶領北洋軍出外打仗對戰反帝制嘅護國軍，名不正言不順，純粹表演做Show，我個人相信，護國軍軍事上嘅勝利，其實係由馮國璋拱手相送，否則以北洋軍力量，冇可能打唔贏臨時拉雜成軍嘅護國軍勢力！

後世人，稱呼佢做「北洋之狗」，大概就係佢起袁世凱尾注依單嘢，只至話佢本人貪財好色，純屬抹黑技倆。馮國璋同段祺瑞一樣，呢兩個民國初期嘅「大軍閥」代表人物，其實佢哋都有好高水平嘅道德修養，甚至可以話係兩個正直嘅好人，段祺瑞執政期間，自己冇乜撈油水，就有「#清水總理」嘅稱呼（縱觀整個中國歷史，做到嘅人真係少之又少）；至於馮國璋，亦未見做過乜嘢衰嘢，打仗係軍人嘅天職，佢只係一直做住自己應當嘅角色。至於爭權，玩權力鬥爭，唔可以話係罪惡，玩得呢個遊戲，就會個個都係咁做，畢竟政治嘅嘢、打仗嘅嘢，唔係你死，就係我亡。

同一時間，盤踞於徐州（今日江蘇省西北部）嘅復僻派 #張勛(1854-1923)，手中擁有兩萬人嘅「#辮子兵」，亦積極擴展活動，串連滿清王候餘黨，打算復辟滿清帝制。

千萬不要忘記 #孫文 嘅「#中華革命黨」，佢都係軍閥嘅其中一支，#陳其美 被行刺，對孫文嘅武裝力量起動造成嚴重打擊，1916年中嘅孫文，勢孤力弱，政治訴求亦唔清晰，但佢始終有不世聲名，加埋真國父 #黃興 1916年10月底暴斃，孫文本身成就革命符號一體化，好容易一呼百應，喚發人民革命情緒，而且孫文意志堅定，亦係一個絕對唔會容易放手嘅人。

而東三省方面，亦都有另一個軍閥正在冒起，佢叫 #張作霖（1875-1928），我哋下一次講講佢。

#常威 #大軍閥平反系列 #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】（二百九十回）
大軍閥平反系列

1916年中，段祺瑞嘅「皖系」坐鎮北京，馮國璋嘅「直系」佔據南京，兩大軍閥陣營正式出現，逐鹿中原，長江下游地域，前「護國軍」一衆軍閥爭相割據，其他邊陲區域，亦都不斷有武裝力量趁亂插旗，局面未明朗化。樹倒猢猻散，袁世凱威權消失，中華民國正式宣佈進入大分裂時代。

而響日本人勢力盤踞嘅東北，亦有一個軍事集團無聲冒起，佢就係軍閥張作霖（1875-1928）嘅「奉系」。張作霖崛起嘅故事，相當傳奇，佢係奉天省海城人（今日遼寧），曾經讀過幾年私墊，叫做識字，之後做過唔同行業，包括獸醫，20歲左右佢加入宋慶嘅毅軍，參與過「甲午戰爭」，戰爭後退役，返回家鄉。

由於當過兵，就變咗專業人士。於是佢召集咗一群青年人，組成咗一支「富豪保安隊」（趙家廟保險隊），主要負責保護東北有錢人嘅產業，需知道天下大亂，盜賊如毛，關東士紳階層都非常明白，政府軍信唔過，要保護自己產業，就要建立自己嘅武裝力量。其實概念上，就係曾國藩李鴻章時代嘅團練、即民兵、即私人軍隊，由士紳階層有錢人一手供養同扶植。有人話張作霖係做「盜匪」起家，至於初初係「盜匪」定係「保安」，要睇你點define。

正如黑社會去夜場收陀地，你每個月交保護費，佢就會保護你，有其他人嚟踩場，佢哋就會出手，進行暴力驅散（唔使舉橙旗嘅）。做任何生意買賣，最好背後有黑社會backup幫手，因為並唔係一切事情同糾紛，都可以用正常法律途徑或警察制度解決，放喺現代資本主義社會，「收數」就係大問題，有人借錢唔還，天經地義。警察同法律可以替你擋數，但唔會幫你收數，透過法律途徑民事訴訟追數，效果非常有限。所以最佳方法，都係要用非法手段收數。你想人幫你，平日就要供養佢哋，飲茶灌水係必須，行多步定期出糧，就變成僱傭關係，私人軍隊制度就係咁樣建立起嚟。

20世紀初期庚子事變發生，義和團蹂躪東北，需要保護嘅有錢人人數劇增，於是張作霖嘅保安生意就越做越大，由最初只係服務一班老細，到後來有無數條水喉射住，之後加多場發生喺東北嘅第零次世界大戰「日俄戰爭」，清廷政府直情放棄東北地區，任由雙方戰事發生。有求就有供，張作霖勢力扶搖直上，終於自成一國，槍桿子出政權，又一佐證。

1907年局面平定後，由於清政府冇錢又冇兵，乾脆收編張作霖集團為己用，畀埋個政府認可嘅軍事牌照佢（奉天巡防營右路統領），繼續經營坐大。由「地方民兵」搖身一變，變成「政府正規軍」，亦係自19世紀中葉以來，清帝國軍事制度嘅常態，得到正式中央授權，亦並唔代表要聽中央指揮，「黨指揮槍」？要發生喺50年後，軍隊仍然係屬於張作霖自己，並唔係屬於你清帝國，我鍾意點玩就點玩。

張作霖嘅軍事集團，更加擔任警察嘅角色，其主要嘅任務係「捕匪」。呢個時候，袁世凱一手推動的大清陸軍改革已經開始，北洋新軍進駐長春，張作霖嘅民兵事業其實差唔多已經玩完，幸好攝政王載灃及時罷黜袁世凱，重新提拔張作霖坐正，抗衡袁世凱勢力，時來運到，想避都無得比。

辛亥革命後，民國成立，袁世凱任命張作霖為27軍軍長，授予中將軍銜，而張作霖得到袁世凱支持，為咗鞏固佢奉天嘅地位，佢亦支持袁世凱稱帝，1916年，袁世凱再封張作霖做「盛京將軍」，袁世凱死嘅時候，張作霖出任奉天督軍兼省長，整個奉天同東北一帶，亦正式成為張作霖嘅勢力範圍，「奉系」於始誕生。

由一個普通兵仔，到最後割據一方成為一代梟雄。個傳奇故事真係熱血激情，同時証明，向上流動真係要響亂世先有，太平盛世，就係階級分明，既得利益者唔會離座，層層抑壓，低下階層永遠冇得翻身。明白呢個道理，就會明白呢個世界點樣運作，亦都會明白，自我調節一定會出現，就算唔食煙都會患癌。

張作霖嘅故事，我哋未來再講，但係不得不提，張作霖亦同日本有千絲萬縷嘅關係，東北喺日本一直想染指嘅地方，張作霖軍事勢力坐大，冇可能冇日本人幫手同支持。不過後嚟張作霖有一個仔，並唔係張學友，係張學良。

一代playboy張學良同蔣介石關係密切，「東北易幟」亦係蔣介石國民黨專政事業重要爆發點，因此，從正統歷史中，我哋亦都好難發現張學友老竇張作霖同日本人嘅關係描述，反而最出名嘅係日本人響1928年「皇姑屯事件」中炸死張作霖。

1916年，似乎大家都在找尋緊意識形態出路，黎元洪同段祺瑞亦唔係專制獨裁式嘅人物，佢哋似乎真係想搞好中華民國政治制度，9月8號，孫文派出胡漢民（1879-1936）廖仲愷（1877-1925）入京，與國務總理段祺瑞商討國事，大家仍然有偈傾，當時撇除軍閥間軍事衝突，其實民間交流相當河蟹。

9月1號，由陳獨秀（1879-1942）創辦嘅《青年雜誌》，改名叫《新青年》，依一本係當時中國最煽動性同最具影響力嘅年青人刋物，大力宣揚共產主義及馬克思主義學説，《新青年》第一期，中國共產主義之父李大釗（1889-1927）發表【青春】一文，號召全國青年反抗，裡面咁樣寫：

『衝決過去歷史之羅網，破壞陳腐學說之囹圄，大膽向封建主義進攻，為創造一個青春的新國家而努力！』

舊嘅嘢全部都係唔好，只有新嘅嘢就係最好，所以我哋要不停換電話……

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

🔥香港近代史【香港關中英聯合聲明腿蛋治】系列

❤認識香港近代史，香港人重新出發！請加入常公子嘅近代史世界！

#Hongkonger #Hongkong

https://www.youtube.com/playlist?list=PL0RVUAILQUOumZZXNyEKoZRynMtAuRyuS

【常威近代史】（二百九十一回）
大軍閥平反系列

中華民國與日本簽訂21條後，日本勢力進一步入主東三省一帶，日本亦順理成章取代英帝國，成為中國最大利益獲得者，在之後日子，日本資本大力投資東三省，建設重工業及壟斷農業，而東三省所提供嘅各種原材料供應，更成為日本經濟國力不斷坐大嘅重要理由。

中華民國與日本的摩擦不斷增加，1916年8月，就發生「鄭家屯事件」（與鄭家純冇關）。鄭家屯位於今日吉林省，21條後，日本在該地駐扎56名士兵，並設置巡警署，8月13號，一名日本商人毆打一名中國兒童，當地中國駐軍28師士兵上前勸阻，引起爭執，之後發生武裝衝突，雙方都有傷亡。事件發生後，遼源縣知事（中華民國當地官員）親自前赴日本軍營慰問，反被扣留，中華民國軍隊被迫撤出許家屯區域。日本駐京公使更向北京政府提出嚴正抗議，要求大力處分尋釁滋事嘅中國官兵。

從上述事件可以睇到，當時日本已經一步一步侵蝕中華民國領土，類似「鄭家屯事件」嘅民間地區性衝突，響之後20年不斷發生，中日兩國仇恨，亦不斷與日俱增，到最後終於發展到二次世界大戰嘅「侵華戰爭」爆發。

在袁世凱死後，中華民國亦陷入一場「法統」危機，副總統黎元洪繼任大總統，以及段祺瑞即位國務總理，其實受到一場憲法爭論嘅挑戰。以北洋軍閥集團把持嘅北京政府為一方，西南軍閥控制嘅軍務院以及國民黨、進步黨等黨派為另一方，展開近一個月嘅激烈爭執，史稱「新舊約法之爭」。

「舊約法」係指孫中山於民國元年1911年制定公佈嘅《中華民國臨時約法》，包括係呢個基礎上修訂而成於1913年公佈嘅《大總統選舉法》；而所謂「新約法」，即係只由袁世凱一手炮製，於1914年5月公佈嘅《中華民國約法》以及同年12月公佈嘅《修正大總統選舉法》。兩者最大嘅分別係大總統嘅權力以及產生方法，尤其是喺政體、總統選舉、總統任期、總統權限等各方面規定有好大嘅差異。

咁究竟，黎同段所承繼嘅權力，係基於「新約法」抑或「舊約法」呢？如果唔承認袁世凱1914年嘅《新約法》，咁黎元洪同段祺瑞根本冇法理基礎主理中華民國中央政府？你可能覺得奇怪，乜當時1916年嘅人都要守法嘅？要談法治嘅？要追求法統嘅？冇錯！係啊！1916年嘅中華民國，仍然係一個追求法統嘅世界，大家做嘢，都需要有一個法治嘅基礎。

但點解變到今時今日咁呢？唔好講中國大陸喇（遠離理性嘅事物，我哋最好少啲討論），就講二十一世紀嘅香港，點解會變到無法無天，警察可以唔帶委任證？可以蒙面？可以隱藏身份？可以溝入外來人？可以同黑社會公開合作？可以講大話？可以打傳謀？可以濫捕、誘捕及毆打市民？事實上，歷史倒退咗100年。

新舊約法之爭，其實又係南北之爭，黎元洪係一塊「政治海綿」，佢唔希望得罪任何人，因此一直採用模棱兩可嘅態度，敷衍面對雙方爭拗，段祺瑞當然擁護新約法來加重自己嘅權力，但係佢亦唔敢太玩嘢，畢竟佢都一個合理嘅好人。