【大清亡國關慈禧蛋牛治】第一回

【常威近代史】（三百六十一回）
大軍閥平反系列

上次講過嘅「湖南獨立運動」，響1920年下旬，南北兩邊政治局面仍然動盪時，「獨立」思潮其實蔓延整個中華民國，唔少省份都有獨立嘅聲音，要求真正落實行美國「聯邦制」，放棄大一統，追求「聯省自治」，而實際情況，當時中華民國的確係處於聯邦制分治狀態，好多地方有軍閥割據，行緊自治，（兩個）中央政府根本鞭長莫及。

獨立聲音係湖南叫得最響，只不過係湖南人一直行在時代最前端，當然仲有個紅太陽毛澤東帶頭鬧事，孫悟空大鬧天宮，你估講笑？不過行聯邦制，只係屬於中華民國小部分人嘅空想，在當時全國接近九成仍然係文盲嘅中華民國農業社會中，「大一統」，「一個中國」仍然係唔少人根深蒂固相信嘅事物，情況到今日何曾有改變？唔單止要「大一統」、「一個中國」，最好仲有個皇帝出嚟話事。

成龍講錯，「中國人係需要管」並唔係事實，真相係中國人希望被「管」，做個聽教聽話嘅奴隸，乜都唔使諗，飯來張口就好。一個人口巨大嘅龐大國家，唔將佢分拆為不同部分管理實際上係非常愚蠢，所謂聯邦制，分區而治係好事，可以因應不同地理因素與不同民衆組成成分而實施相應管治手法，「一國兩制」就係最佳演繹，本來河水不犯井水咪幾好？你硬係想行「一國一制」，貫徹中央權力至地方政府，自然會引起民衆反抗聲音。而且，要大一統，要政策從上而下貫徹全國執行，要14億人follow同一個IG，唯一可以做到嘅就只有用「極權統治」手法。

所以得出嘅結論係，「極權統治」並非純粹由當權者主動施行，而係廣大民眾所要求發生，既然你咁鍾意俾人管，我就管撚住你，用廣東話俗語講，係「條路自己揀，仆街唔好喊」。

當時中華民國有冇國歌？其實有，並唔係《梅花》。

早響1913年，北洋政府將《卿雲歌》定為中華民國國歌，1915年，袁世凱稱帝前後，改以王露作曲嘅《中華雄立宇宙間》為國歌，並數次更改歌詞。去到1920年11月16號，北京中央政府教育部根據國務會議決議通過，自明年7月1號起，以《卿雲歌》為國歌歌詞，《卿雲歌》出自《尚書大傳虞夏傳》，而曲譜則用「國歌研究會」會員蕭友梅所作嘅樂譜。

卿雲是一種祥瑞之雲，司馬遷《史記·天官書》有記載：「若煙非煙，若雲非雲，鬱郁紛紛，蕭索輪囷，是謂卿雲。卿雲，喜氣也。」

《卿雲歌》歌詞如下：

「卿雲爛兮，糺縵縵兮。日月光華，旦復旦兮。日月光華，旦復旦兮。」好深？係！古文來的。

白話語譯為：「祥雲燦爛，曲折而瀰漫。太陽與月亮的光輝照耀在天地之間，日復一日。太陽與月亮的光輝照耀在天地之間，日復一日。」其實語譯咗白話都好X深……

一首國歌，代表一個國家嘅國格，以及國民對國家嘅期望，中華民國北京政府用古文《卿雲歌》，可以睇得出當權者（嗰班十惡不赦嘅北洋軍閥）對儒學哲學同中國傳統文化，念念不忘。歌詞溫和但渾厚，包含儒家哲學最高境界世界大同嘅理想，係華夏文明嘅優良傳統。

只不過，用深奧文言文做國歌歌詞，民眾讀都未識讀？知鳩你講乜咩屌？就好似同日日狗衝返大陸叫雞沖涼搭骨嘅男人講「女權主義」一樣，雞同鴨講。事實上中國傳統儒家哲學文化，有其博大精深美好嘅一面，但係普羅大眾能夠領略嘅實在係唔多，你要講古語文言文四書五經，話要敦厚化育萬民，就好似偽ABC夾硬要講英文一樣，普通人只係覺得厭惡同扮嘢，除此以外沒有其他。

反觀後來嘅中華人民共和國國歌《義勇軍進行曲》就簡單易明得多，而且充滿畫面同動作，夠曬煽動性，扮高檔，未必一定贏，尤其是喺亂世。正如疫情當前，同我講新型冠狀病毒DNA結構，對我生活其實毫無幫助，我反而想知道NPL仲有幾耐先完？同埋政府派嗰一皮野幾時入落我戶口？「政治」其實冇可能離地，高不可攀嘅政治理念，只可以成為現實生活的包裝紙同安慰劑，講多次，「存在決定意識」。

講開國歌，唔爭在講埋，1926年，中國國民黨開始響廣東使用孫文嘅演講詞《三民主義歌》作為國歌。蔣介石北伐之後，1928年國民政府統一全國後，正式廢除《卿雲歌》。後來日軍扶持之中華民國臨時政府及中華民國維新政府亦使用《卿雲歌》作為國歌，直到1940年，汪精衛政權在南京成立後，方恢復使用《三民主義歌》。至今臺灣中華民國政府，仍然使用《三民主義歌》為國歌。

孫文作詞，程懋筠作曲《三民主義歌》歌詞如下：

「三民主義，吾黨所宗。以建民國，以進大同。咨爾多士，為民前鋒。夙夜匪懈，主義是從。矢勤矢勇，必信必忠。一心一德，貫徹始終。」

白話語譯為：「三民主義是我們的黨所共同遵從的指導方針。我們要用三民主義建立並建設中華民國，促進民主大同的實現。諸位志士們！要做全民的楷模表率。從早到晚都不懈怠，遵從三民主義。立誓要勤奮努力、勇往直前。一定要信守、忠誠。大家團結一致，共同努力。自始至終，不斷地努力，徹底實踐。」

黨國合一，要聽我（孫文）話，大家共同信奉一個主義，建設美麗新世界，understand？

無分彼此，世界大同，另附上田漢作泀、聶耳作曲的中華人民共和國國歌《義勇軍進行曲》，歌詞如下：

「起來！不願做奴隸的人們！把我們的血肉,，築成我們新的長城！中華民族到了最危險的時候，每個人被迫著發出最後的吼聲！起來！ 起來！ 起來！我們萬眾一心，冒著敵人的炮火前進！冒著敵人的炮火前進！前進！前進！進！」

終於唔使語譯，試比較三首國歌《卿雲歌》、《三民主義歌》同《義勇軍進行曲》，由深到淺，高下立判。

#常威 #大軍閥平反系列  #大軍閥 #民國歷史



【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常公子歷史頻道277回：斷送共和關 青島爭霸戰 蛋牛治】

♉中美關係持續惡化，令人對未來感到擔憂，亦係無可厚非之事，對中美關係的詮釋，坊間有兩種看法，第一種係中美真係交惡，無論係因為公義或者意識形態之爭，兩者愈行愈遠，最後甚至斷交，發展成戰爭狀態；第二種睇法係中美之間祇不過係進行緊大國博弈，大家各自維持自己嘅利益同對方周旋，即係話，其實彼此冇仇恨或敵意，祇有利益瓜葛，表面鬥爭，內裏不斷進行枱底交易，因此永遠唔會打仗，兩國甚至乎會不斷喺敵人同朋友之間彈出彈入，不斷改變立場。

♈上述兩種看法，我相信大部分人傾向後者，只有少數一兩成人相信前者，情況亦都相當正常。中國同美國之間，的確正在博弈中。但係雙方是否不存在敵意？我就唔贊成。中國係想彎道超車，希望打破美國或美金壟斷世界嘅霸者地位，從而將冒昇中嘅國力再上一層樓，而美國亦都睇到中國彎道超車嘅野心，因此要響你羽翼未豐盛之前打殘你，打到你臣服為止，回復到以前一向和諧相處嘅從屬單向剝削狀態。雙方嘅敵意，來自於此。若然冇一方願意妥協或放手，呢份敵意一定會愈滾愈大。

♒要以東風壓西風，要打破西方人壟斷世界嘅局面，中國唔係第一個做，早響20世紀初期，日本帝國已經想做，而且做咗。今日大家可能有一個錯覺，覺得日本國力好一般，但歷史講比我哋知，由20世紀20年代開始，當希特拉納粹德國仍未響歐洲崛起之前，其實世界兩大強國喺美國同日本，無論經濟上或軍事上亦然。經過第一次世界大戰戰火洗禮，歐洲英國同法國兩大強權沒落，日本同美國就取而代之。

♈細讀歷史，你會發現當年日本同美國，同今日中國同美國嘅關係非常相似。日本嘗試彎道超車，最後想同美國競逐太平洋嘅主導權，結果爆發太平洋戰爭攤牌，最後日本慘敗，輸到一棟都冇，本土被投下兩個原子彈，更被美國登陸佔領，明治天皇要向麥克阿瑟跪低，第一次東風壓西風嘅嘗試，徹底失敗收場。

⛎足足100年後，東風壓西風遊戲再一次展開，今次嘅主角唔係日本，而係中國，結果會係點？我完全唔可以預測，一切留待歷史肆意發展，希望在本人有生之年，可以睇到結局。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/hevMVMf-tgI

【常威近代史】（三百六十二回）
大軍閥平反系列

20世紀20年代，共產主義思潮終於脫離高級知識份子學術象牙塔，以政黨形式進入中國社會，共產黨正式響中國登場，從此以後成為中國政治版圖中一股新生力量，而且因緣際會，不斷壯茁成長，最後成為大亂世中終極勝利者。去到1949年，終於打造出一個全新共產中國，揭開一個新時代序幕，改變中國歷史之餘，同樣改變整個世界歷史，波及蔓延至今時今日。

所以論述中共歷史，其實先係近代史最重要部份。

無論你點樣厭惡共產黨，叫佢做「匪」又好，又話佢「竊國」又好，但亦都不得不承認一個事實：中共先係最後嘅勝利者。勝利並無僥倖，歷史其實好少苻碌情況。蔣介石國民黨政權最後一敗塗地，敗走臺灣，某程度上係咎由自取，況且由一開始將共產黨扶持起來嘅人就係佢自己。上帝搦起舊石頭砸自已隻腳，希臘神話普羅米修斯盜火，美國政府壯大阿爾蓋達，其實一樣道理，歷史充滿因果關係，前日埋炸彈，後人一定會踩中。

響背後金主「第三國際」支持下，北京同上海兩個中國南北最大嘅城市，共產黨開始建立雛型。北京以李大釗為核心；上海則由陳獨秀作主理人，共產黨本身就係一個「意識形態」政黨，即係用意識形態串聯招攬同道中人加入，並非以「民族」、「群體」、「國家」或「共同利益」等傳統觀念作招攬，所以共產主義基本上並無國族之分，呢個亦係「英特納雄奈爾」（international）嘅意義，要解放嘅不單止係俄國同中國人民，而係全世界嘅無產階級，最起碼當時列寧同托洛斯基真係咁樣諗，亦真係身體力行付諸實行。

放棄「英特納雄奈爾」，係列寧死後、托洛斯基被放逐、一代暴君史大林上臺之後嘅事，佢亦係迫不得已，生存問題當前，要搞掂自己，先可以攪人哋。史太林當權嘅時代，俄共由「國際主義」漸變成為「國家主義」（雖然佢口講唔係，但係身體係誠實嘅）。不過宣稱以一個國家為單位行社會主義嘅先驅者，其實係德國納粹嘅希特拉。某程度上，希特拉係向史太林學習，兩者有師徒關係，最後作為師傅嘅打低徒弟，都係有理由。

佢兩位實際上亦係惺惺相惜嘅朋友，雖然生平從沒有見過面（侷限神交狀態），否則亦唔會心靈相通一齊瓜分波蘭，好可惜一山不能藏二虎，最好嘅朋友亦係最大嘅敵人，兩人攜手，終於亦打造咗史上多場死得人最多嘅殘酷戰爭。

叉遠咗，去返1920年11月，中國共產黨發起制定《中國共產黨宣言》，呢份文件亦都係中共早期組織內一份最重要嘅文獻。宣言包括三個部份：

第一，提出共產主義者理想，即係消滅資本主義剝削制度，廢除資產階級政權，最終消滅階級分野，建立大同世界。

第二，共產主義者嘅目的，就係按照共產主義者嘅理想，創造一個全新嘅社會，為咗達成上述目的，必須使用「階級鬥爭」（Class struggle）為方式，剷除現在嘅資本主義制度，從資本家手裡奪取政權，並將政權交附喺工人同農民手上。

第三，「階級鬥爭」必然導致「無產階級專政」（所謂一黨專政嘅必然），俄羅斯無產階級革命嘅勝利就係榜樣，只有實行無產階級專政，先能夠鞏固無產階級嘅勝利，實現共產主義。無產階級專政嘅歷史任務，係繼續消滅資本主義勢力嘅餘跡，制定共産主義嘅建設法規，組織大規模嘅勞動生產。

《中國共產黨宣言》明確規定咗中共嘅指導思想，同埋共產主義嘅理想以及奮鬥目標，從資產階級手上奪取政權係最終目的，而採用嘅手法係「階級鬥爭」，模仿嘅對象係俄國布爾什維克，一切清楚明白，並冇 Alternative，你信奉嘅，你同意嘅話就可以加入，一齊奮鬥拋頭顱灑熱血；你唔buy，就可以稱呼我做「匪」。

上述指導思想，亦都係當時吸納黨員嘅標準（並唔係用出身、背景，或今日用嘅社會地位資產數目，純粹同你講意識形態），上海中共陳獨秀起草臨時黨綱，亦都對全國各地建黨起咗重要嘅指導作用。

單論黨綱而言，當時整個中華民國國內冇一個政黨及得上中共，意識形態理論建構嘅齊全完備，除咗歸功馬克思同恩格斯，實在要多謝列寧同托洛斯基，尤其是後者托洛斯基，後世人實在太睇小佢嘅影響力。

意識形態重要，文宣更重要。11月7號，上海共產主義小組創辦嘅半公開刊物《共產黨》月刊，同埋北京共產主義小組創辦嘅《勞動者》週刊出版。響刋物之內，「共產黨」大旗出現，大力向民間宣傳共產主義者嘅主張，以及有關共產黨嘅知識。

同時宣傳一個概念，叫「勞工神聖」，強調產業工人喺社會上嘅重要性，並非只係一群純粹出賣勞力以獲取生存所需嘅賤民，「工人階級」一直被「資本主義」同「資本家」所踐踏同矮化、奴役，工人階級要得到解放，就必須團結起嚟同組織起嚟，合力攜手推翻現存制度，實現社會主義，文宣向工人指明咗明確嘅鬥爭方向。

初期中共文宣，大力向知識分子階層同產業工人宣傳共產主義，但上述階層只係佔當時中國口數比例極少數，中國人口結構，有90%以上仍然係文盲嘅農民；第一代中共領導人並無將佢哋放入眼內，亦唔覺得佢哋嘅存在對實現共產主義有任何幫助。最後睇透當中關鍵嘅人，就係毛澤東，但係起動同向文盲的農民發動文宣，究竟可以點做呢？（佢哋唔識字個喎……）

你做唔到，毛澤東偏偏可以做到，有時候贏，就係贏一個鼻位。

#常威 #大軍閥平反系列  #大軍閥 #民國歷史

【常公子歷史頻道278回：斷送共和關 二十一條 蛋牛治】

♉歷史永遠由勝利者所寫低，所謂正義和黑白亦係由勝利者所判斷，是非善惡，並無一定準則。繼慈禧太后之後，袁世凱係一個比歷史抹黑得最犀利嘅大人物，日本企圖奪取中華民國控制權嘅《二十一條》，呢隻死貓就由袁世凱一人吞下，認識歷史嘅人都知道，所謂二十一條，其實係日本一直資助中國革命事業要索取報酬同紅利，否則點解要幫你推翻滿清政權？事成之後，自然就要收取對家報酬，報酬就係控制你新生中華民國嘅大部份經濟利益及部份領土.....

♉之後發生嘅日本侵華戰爭，其實係由無數事情堆積起嚟，並唔係日本人軍國主義上腦突然發神經要侵略你中國，而係由1895年馬關條約簽訂之後累積咗二三十年嘅恩恩怨怨，不過歷史將真相簡化，總之有忠有奸，黑白分明，你OK我OK大家就OK！大家放心閱讀歷史，習以為常。所以我成日認為中小學歷史科唔應該存在，人應該上大學、成年了，有一定嘅獨立思考能力同判斷力、或社會經驗先開始接觸歷史比較恰當。否則口講以為真，以為文人寫落嚟嘅就係事實，其實唔係讀歷史，係一個洗腦過程，係一個意識形態（被）操作過程。

♍進入互聯網時代，資訊太氾濫，手握一部智能電話，每日look look look，接觸大量從唔同渠道而嚟嘅資訊，當中幾多係真？幾多係假？大家應該心知肚明，以前嘅報紙或電視電臺，仲有個叫編輯把關，但今時今日，每個人用自己嘅智能電話就可以發表自己嘅意見或者輸出資訊，寫字錄音拍片悉隨尊便，真正身份又不需要核實，社交媒體因為資訊量太龐大，亦無從可以作出任何有效監察及過濾，結果謠言滿天飛，真真假假，真假難分，社會愈來愈混亂，大家無所適從。

♎於是乎，權威不再存在，所謂公信力亦慢慢消失，最後冇人為你把關，咁就要靠你自己把關。個人獨立思考能力變得更加重要，真假對錯是非黑白，要由個人獨立思考能力、或common scence所判斷，當然獨立思考能力並唔係個個有，就算有，彼此層次上亦有所分別，我認為之後世界會變得更混亂，就係呢個原因。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/l7PaxTDS2Io

👉最新上架⏩【常威近代史】第五部《霹靂大忠臣對決無敵大買辦》Round two
http://shorturl.at/dW145

世界不斷嚮前行，可能新玩法會取代舊玩法，我自己唔敢肯定，但係睇返歷史，「金主」呢個角色一定會存在，而且喺每一場革命之中都會擔當著非常重要嘅角色，世界上，總有人希望出錢唔出力，總知一句到尾，千萬唔可以輕視或無視金錢嘅威力，要謹記，「政治」本身就係「經濟」；「經濟」本身就係「政治」，兩者密不可分。只談政治不談經濟一定係鳩講，相反只談經濟不談政治就係無知嘅表現。

「鳩噏」同「無知」，其實幾大件事。

經過長達三個月嘅粵桂戰爭，廣西軍閥陸榮廷被逐出廣東，廣東軍民歡迎孫文返回廣州重組軍政府，11月25號，孫文偕同伍廷芳、唐紹儀等人離開上海，28號經香港到達廣州，當晚孫文發表演說，指出「吾國必須統一，唯以民治為統一方法，武力不過輔助民治之不及，非不得已，不宜輕用」。

真相卻係，槍桿子出政權，「武力」先係最重要，11月29號，孫文重組軍政府，召開首腦政務會議，推定各部門首腦人選，孫文自己兼任內務部長，任命唐昭儀、伍廷芳、唐繼堯、陳炯明分別兼任財政、外交、交通及陸軍部長；李均烈、湯廷光、徐謙分掌參謀、海軍、司法部；馬君武為軍政府秘書長。之前被廣西軍閥流放嘅部份親孫文國會議員，亦相繼返番廣州，預備重新召集國會非常會議。

孫文重整旗鼓，重新制定軍政府未來政策，首先就係要打廣西，統一兩廣，繼而北伐，由南方打上北方，推番北京中華民國中央政府，統一全國。

當然個project咁大，第一時間就係錢嘅問題，冇人冇錢，點樣可以打低陸榮廷？又如何可以北伐挑戰直系同奉系呢？終於問題歸結到，又係搵金主嘅問題，究竟金主喺邊度？1920年11月嘅孫文，仍然未有任何頭緒。國際社會都認同北京中華民國政權存在，包括孫文最好嘅朋友日本人在內，佢哋無可能出錢俾孫文玩北伐？海外華僑捐獻嘅金錢，數目亦都唔夠發動一場大型戰爭。不過金主好快會出現，唔需要買關子，就係第三國際，布爾雜什克，俄國共產黨，列寧加托洛斯基。

孫文新軍政府另一個面對嘅問題係軍權問題，粵桂戰爭係陳炯明打嘅，而前科己經表明，粵軍軍頭陳炯明並唔係孫文最信任嘅人，孫民當時最信任嘅人係蔣介石，之前佢已經嘗試將蔣介石插入陳炯明軍隊內奪權，但唔成功。之後孫文會繼續嘗試，因為軍隊一定要操縱喺自己最信任嘅人手上，否則乜嘢都唔駛玩，你想玩亦冇得玩。

景願往往係美好嘅，而實際操作永遠係殘酷嘅。抵受得住抹殺良心，先好玩政治，如果唔得，就做返鍵盤戰士，一樣係打杖啫。

#常威 #大軍閥平反系列  #大軍閥 #民國歷史

【常威近代史】（三百六十四回）
大軍閥平反系列

每個人只會相信自己相信的事物，世界是個人想像出來嘅表象，去到20世紀，「直接面對的現實環境實在是太龐大、太複雜、太短暫了，我們並沒有做好準備去應付如此奧妙、如此多樣，有著如此頻繁變化與組合的環境。雖然我們不得不在這個環境中活動，但又不得不再能夠駕馭它之前使用比較簡單的辦法去對它進行重構。」（註一）

即係講，冇人能夠完全瞭解世界本身，亦冇人可以飛到足夠嘅高度縱覽全景，你睇吓今時今日發生嘅武漢肺炎，世界停擺，人人莫衷一是，冇人知道會發生乜嘢事，就算單係估聽日恒指升定跌，基本上亦冇人知道，世界就變得「太龐大、太複雜、太短暫」，所有人都只一隻隻綁住雙眼嘅綿羊喺度過河……甚至冇石頭畀你摸。

我常公子年輕嘅時候，非常之唔明白第一次世界大戰同第二次世界大戰點解會發生？我亦曾經講過，我心裡有兩大疑問，第一，係「納粹屠殺五百萬猶太人」；第二，係「中國發生喺60年代初期史上死得人最多嘅大饑荒」點解可以發生？這幾年漫遊近代史，加上身處嘅年代發生喺身邊嘅事情（尤其是2019極權運動同武漢肺炎），我終於有啲頭緒。

當歷史要殺到埋身，當關乎生死存亡，原來一切固有嘅秩序同道德底線都可以在極短嘅時間之內拋棄，極短嘅時間可以指謂一念之間，一切小說戲劇，講人類入魔行惡，係需要有太多理由同背景，其實現實情況係完全唔需要，衹要有一個藉口，不論藉口是真是假，都可以立刻改變人類嘅思想同埋行為模式，同有冇讀書亦都無關，「生存意欲」同「墮落傾向」先至係人性本質。

世界上最聰明嘅猶太人愛因斯坦講得冇錯，有兩樣嘢係無限（infinite）嘅，第一係宇宙，第二係人類嘅愚昧，而佢自己唔確定嘅係前者。

20年代相信共產主義，並且投身革命嘅人，大部份都係好人，甚至係社會上極小數道德價值非常崇高嘅知識分子，包括毛澤東、鄧小平同周恩來在內，佢哋同一般人唔同嘅地方係，佢哋對共產主義嘅堅實信仰，恒久不變。佢哋大部分人，將「改變世界為全人類帶來幸福」選項放於生命第一優先，甚至喺自己生存意欲之上，烈士是這樣煉成的，鋼鐵也是這樣煉成的。

睇返歷史，共產主義運動嘅興起，就係靠一班連命都可以唔要嘅人不斷奮鬥，共產主義最後成功佔領半個地球，並非因其理論比其他政治理論優秀，而係共產主義吸納嘅人才，比其他人更加唔怕死唔怕蝕底，最後能夠為組織犧牲更加係一種光榮。所以20世紀共產主義革命嘅成功，並唔係馬克思同恩格斯嘅理論功勞，而係列寧同托洛斯基嘅行動綱領。「實踐係檢驗真理嘅唯一方法」，明白未？

【常公子歷史頻道280回：斷送共和關 北洋三傑 蛋牛治】

♉2020年7月1日，註定是另一個時代的開始，國安法來臨，香港將會出現一個全新嘅政治局面，過去一啲行咗二十幾三十年固有嘅遊戲規則亦都會徹底轉變，有人對此感覺絕望非常，覺得香港經已玩完，一鋪清袋；相反亦有人感覺事情終於平靜落嚟，彼此都有全新嘅出路，或者撕裂減少，畢竟所謂世界只係人類想像力產物，每個人可以對眼前嘅現象有不同嘅理解同詮釋，相由心生，境隨心轉，萬法唯識，在乎一念之間。

♑具體嘅情況係，普通市民大概會生活如常，言論自由收窄，大膽預測未來一兩年經濟甚至可能會幾好景（當然係相對於世界其他地方，同有大量個別情況），大方向係「一國」共榮，「兩制」靠邊站，香港同內地將會進一步接軌一體化，實踐所謂第二次「精神」回歸。係好事定壞事？我並唔知道，畢竟凡事都係雙面刃，傷人同時傷己，香港呢個地方，如果長期成為兩大強權博弈嘅橋頭堡，我諗對香港人就最為不利，政治問題其實係經濟問題，要看得清楚，一切以識形態鬥爭只係經濟狀況嘅包裝紙。

♉走？冇得走。因為窮，冇得棟！而且天大地大，又走得去邊？生與斯長於斯，亦冇辦法。有啲嘢叫命運，命運冇得你揀。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/dpxqz5Ovih8

👉最新上架⏩【常威近代史】第五部《霹靂大忠臣對決無敵大買辦》Round two
http://shorturl.at/dW145

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常公子歷史頻道281回：斷送共和關 串燒三兄弟 蛋牛治】

♉七月一日，港版國安法訂立，但依然有人上街抗爭，警方大刀濶斧，逮捕超過300人，更有人涉嫌違反國安法被捕，我睇見好心噏，好心痛……做事應該經過深思熟慮，承擔嘅後果可能好嚴重，可能我真係好鵪鶉，但係坐監唔係講玩，有案底唔會令到人生更精采，反而會令人生變成好黑暗。親身經歷，我認識過幾個坐過監嘅人，佢哋都好後悔坐監，請大家不要再送頭，好嗎？

♐尋日銅鑼灣街上，出現新標語「我哋真係好撚鍾意香港」，可圈可點。其實我真係好鍾意香港，係好撚鍾意香港，因爲我都係香港出世讀書成長揾食結婚生仔，我係低下階層，出身清貧，冇資格有加拿大英國護照，我響元朗郊區同深水埗貧民區長大，住過木屋徙置區天台屋，我細個嘅時候好羡慕其他同學有公屋住，公屋單位對我嚟講已經係天堂境界。我讀Band 5中學，學校有好多黑社會，亦有從男童院女童院嚟嘅同學，我讀嗰間中學老師質素參差，仲成日打我（打面），一日到黑話我哋班窮人子弟係廢物垃圾，永冇出頭天，成世要做低下階層。

♎我中二嘅時候，老母叫我唔好再讀書（因爲我讀中文中學），叫我拿拿林去髮廊做洗頭仔，希望將來能夠做髮型師有一技傍身唔使餓死。我亦俾人踢過入黑社會，去過調景嶺交三十六個六跟大佬（後來先知道原來大佬係假），我又試過返學對黑鞋爛曬冇錢買，結果要著人字拖返學俾人記小過，我又試過因為自愧形慚，唔敢入髮型屋剪頭髪，結果喺髮型屋門徘徊咗一粒鐘on 99……

♈以上所講係我嘅青少年記憶，雖然壞事多過好事，但係我好懷念，因為一切都係發生係我土生土長嘅香港，香港係我唯一嘅故鄉，係我唯一嘅家，如果冇咗我同香港嘅記憶，我什麼都不是。我珍惜香港，希望香港可以變得更好，我亦希望所有香港人可以放下爭執同仇恨，共同響前行，迎接更好嘅未來……

⛎無論如何，就算我對某啲事情改變立場都好，我都好鍾意香港，係好撚鍾意香港，永遠唔會變，如果呢度真係如某啲人所講會消滅同消失，我就同佢一齊消失，因為由一開始，我同香港已經無辦法分開。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/ehZSnff0CFM

【常威近代史】（三百六十五回）
大軍閥平反系列

時間線去到1921年，距離辛亥革命發生已經有十年時間，如果你身處依十年做一個中華民國國民，無論身處南方定北方，你只會有一個感覺，就係：立立亂，七國咁亂！十年過去，南北繼續分裂，有兩個中央政府，甚至更多地方各自為政，又試過袁世凱洪憲稱帝，國內不停爆發內戰，如果相對前十年，即係1901-1911年，相信好多人會懷念慈禧太后老佛爺或清帝國晚期國泰昇平嘅景象。

正如今日嘅香港，好多人會懷念英殖時代，甚至退而求其次，懷念董建華當政嘅時代，當日老董在場，邊個唔屌到佢仆街？世事嘅嘢，從來一蟹不如一蟹，你以為攀過咗座山，山後風光如畫，但係往往，山後面只有一個更高嘅山。

上集講過留法勤工儉學計劃，一代偉人鄧小平同周恩來都啱啱出發去咗法國，其實當中又有壇嘢，1921年2月28號，響巴黎有400多個中國勤工儉學嘅學生，喺北京政府駐法國公使館進行請願示威，爭取「生存權」同「求學權」，點解？一字咁淺，唔夠錢使囉！示威者被法國軍警驅散！

原因係直至1920年年底，已經有1600個人參加勤工儉學計劃去咗法國，但係因為冇工作，所以生活出現困難，只能夠靠「法華教育會」所發放嘅每日五法郎渡日。1月，蔡元培曾經飛過去法國考察，認爲「法華教育會」無法維持對學生嘅資助，連5法郎一日都cut埋，學生完全乾塘，於是乎發動示威集會，要求中國政府每月發放400法郎入學津貼，但你窮我更窮，經過一輪擾攘，為咗舒緩學生情緒，5法郎一日嘅津貼繼續發放，頂住先。

依一段歷史好少人講，其實某程度上，「勤工儉學計劃」係賣豬仔，有志青年畀政府呃咗去法國食西北風，學又冇得返（冇錢），工又揾唔到（可能係簽證問題），咁點銀樣「勤工儉學」呀？於是日日冇嘢做，窮L又冇可能溝女，成班唯有聚埋一齊on 99飲啤酒捱面包吹水，咁嘅局面，班學生難免會成為馬克思主義信徒？加入埋共產黨亦係理所當然，「存在決定意識」嘛，好似鄧小平咁，去完法國一轉，成個人完全赤化，回國後堅信馬克思主義共產主義，成為革命者，好有可能係同佢喺法國嘅經歷有關。況且當時嘅法國巴黎，根本就係歐陸共產主義信徒嘅集中地同避難所，列寧同托洛斯基之前都喺法國渡過咗一段漫長日子先回俄國搞紅色革命，凡事都唔係偶然，你要明白。

仲有一點，鄧小平同周恩來就係響法國成為朋友或革命同志，從而建立咗佢哋之後長達半個世紀嘅親密同志（應該唔係Gay）關係，依份關係，足以改變整個中國歷史走向，尤其是係20世紀80年代中國嘅開放改革，毛澤東死後，鄧小平向華國鋒奪權重新執政，三起三落都鬥佢唔死，其實亦都同周恩來嘅友誼有關。人世間嘅友誼亦都係一樣，患難見真情，身處谷底交嘅朋友先至係真正朋友（生力），你大撚把錢，自然有好多人埋嚟痴金糠做菠蘿雞，所以今日中共，亦都好識響香港分開邊啲先係真正朋友，邊啲係埋嚟攞著數？

去返廣州，驅逐廣西軍閥後，孫文重新執政，重組軍政府。當中出錢出力最多嘅陳炯明，被任命為廣東省省長。2月13號，廣州軍政府陣腳未定，就決定繼續從高雷、欽廉、肇慶、梧州四路出兵，攻入廣西，追打陸榮廷殘部，陳炯明繼續係總司令，但隨著孫文回歸，佢嘅頭馬蔣介石亦成為總參謀長。

2月15號，陳炯明認為廣州市政規劃建設，刻不容緩，廣州市政廳正式成立，並且委任孫中山個仔孫科（1891-1973）為廣州市市長，孫科正式登場。

孫科出生於1891年中山翠亨村，係孫文長子，母親係孫文元配夫人盧慕貞。年幼時候隨著孫文流亡海外，高中畢業於孫文第二故鄉美國夏威夷檀香山聖路易斯學校，後赴美國本土，響美國柏克萊加利福尼亞大學畢業（University of California, Berkeley；UC Berkeley），1917年回國，係一個真正嘅鬼仔，真西人，可能因為佢真係受過美國高等教育，所以份人零舍唔同啲，一生平平穩穩，活於巨人父親孫文陰影之下，冇乜行差踏錯已屬萬幸。

可能亦都係因為佢係孫文個仔，後嚟嘅蔣介石對佢都非常尊重佢，總之你唔好搞我玩越權，我就唔會搞你等你豐衣足食，1949年並冇跟隨蔣介石去臺灣，反而選擇移居美國，1964年先返臺灣，仍然位居要職多年，響中華民國史上，孫科係首位先後當過五院制之下不同院院長嘅人。亦曾代表國民政府去蘇聯談判，簽訂《中蘇互不侵犯條約》同《中蘇商務條約》。

孫科成為廣州市長後，擬定美國式市委員制方式，制定《廣州市暫行條例》，該條例定廣州市為廣東省省會，市政機關為市政廳，市政廳設市政委員會、市參事會及市審計會。因為佢喺美國係讀管理學，真正學以致用。追加一隻花邊，其實當時孫文係反對孫科從政，可能孫文自己知道搞政治實在太危險太凶險太血腥，不過響好戰友胡漢民同廖仲愷力薦之下，孫科始終跟隨父親踏上政治之路，當上廣州市市長嘅孫科，當時仍未夠30歲。

成功真係要靠父幹。

#常威 #大軍閥平反系列  #大軍閥 #民國歷史

【常公子歷史頻道282回：斷送共和關 財神到 蛋牛治】

♉「你的班底是什麼，決定了你是什麼。」閱讀歷史時，我哋通常一個錯誤的見解，就係會將歷史同某一個人掛勾，例如係慈禧太后令到晚清民不聊生，又例如係孫文推翻滿清帝制，又例如係袁世凱要行洪憲帝制想做皇帝？但真相並唔係咁樣，有時候歷史人物往往成爲咗代罪羔羊，佢哋嘅意志同選擇固然相當重要，但係歷史進程，並非係由一個人嘅個人意志所能夠主導，呢個係真相。

♉事實上歷史本身，牽涉到無數人嘅選擇同決定，尤其是喺歷史人物身邊嘅人，佢哋嘅行為同意志，可能先係歷史事件發生嘅主要決定因素，但係人世間嘅事同實際操作，可以被文字真正記述落嚟，並且流傳後世，又有幾多呢？

♉有一個好好嘅例子，佛經開頭通常都係「如是我聞」，即係「我聽到佛陀所講，所述如下……」，但係每一本佛經內裏嘅內容，根本就唔會係佛陀所講，佛陀釋迦牟尼生於2500年前，當時嘅印度一帶仍然冇任何文字苻號存在，印度嘅「梵文」文字系統出現且完善於約2000年前，已經係釋迦牟尼入滅後500年「第二次集結」時代，而佛陀在生嘅時候，所用嘅語言亦唔係梵文，而係另一種古代語言「巴利文」。咁究竟佛陀嘅説話，又有幾多係真實從佢口中講出嚟呢？如果我冇估錯，甚至可能係——冇。

♎所謂佛學，其實係經過好漫長嘅時間、跨越咗無數時間同空間、由大量不同語言文化嘅人口述筆錄、代代傳承、跨域傳播而出現。佛陀釋迦牟尼只係一個起點，係一個代表人物，係一個象徵性符號，而並非佛學本身。用佛學等同釋迦牟尼，本身就一種錯誤；同樣道理，用一個歷史人物行事所為嚟涵蓋整個歷史進程，一樣非常咁荒謬。不過，世人所認知嘅一切歷史知識，大部分都係以呢種「約定俗成」嘅方法去理解。你話有錯？其實又無錯……

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/ibtBMO9JW0Q

【常威近代史】（三百六十六回）
大軍閥平反系列

要多謝網友Chauhung Lui提醒，1921年頭孫文得到陳炯明粵軍之助，重掌廣州軍政府，立刻將頭馬蔣介石插入粵軍成為總參謀長（向陳炯明奪權），其實之前兩年，蔣介石同陳炯明鬧翻，蔣介石已經離開軍隊，返番去上海做股票經紀炒股票，坊間傳聞佢係炒燶股票輸大錢，所以先返轉頭搞政治，但上述嘅傳聞，正史並沒有記載，當然我是相信的。孫文同佢其實都係百足咁多爪，佢哋兩位亦都實踐咗「政治經濟學」大原則，政治同經濟必須連結埋一齊進行，冇錢冇金主無辦法做嘢，股票或期貨，並唔係投資嘅最高境界；戰爭同政治先係投資最高境界，會贏最多錢！事實上亦都證明，蔣介石嘅投資選擇係正確嘅，之後佢甚至贏咗整個中國返嚟。

蔣介石本身就代表咗江浙一帶財閥嘅利益，響之後嘅日子，大家會清楚見到。好多時候，所謂政治本身，其實就係唔同財閥同資本家嘅分贓遊戲，列寧托派嘅共產黨想玩嗰套，某程度上亦都係想打破依種原有嘅資本主義壟斷式遊戲規則。不過有錢的確係大曬嘅，響共產主義未能夠取消貨幣制度之前（到咗今日仲未得），有錢人仍然繼續可以呼風喚雨，如果冇「第三國際」嘅無上限科水，中共亦唔可以建立起嚟；冇來自俄共嘅資金，單靠江浙財閥嘅財力，蔣介石亦冇可能喺1926年北伐統一（60%）江山；就算去到國共內戰，亦有財閥資本家支持共產黨打，最出名嘅例子就係江蘇無錫嘅榮熙泰家族，榮家投資正確，改朝換代後，風生水起發到今時今日，仲記唔記得0267中信泰富榮智健隻馬王「活力先生」？相反國共內戰期間投資於蔣介石一方嘅財閥，就收場慘淡，有啲仲畀佢夾埋過臺灣，嘿嘿……（得啖笑囉）。

所以到咗最後，仍然等於買股票，或者買馬或者買波，買中就贏錢，買錯就輸錢，簡單到不得了，政治本身就係最大嘅投機活動，注碼巨大，有時候包括生命同血酬，但注碼愈大，當然贏得愈多，世界上冇免費嘅午餐，大家要記住。

叉開，將事情複雜化（或學術化），係統治階層一種意識形態技術性手段，目的係大民眾遊花園，令民眾永遠行唔到去終點，亦睇唔到真相係乜嘢？近年我就睇到唔少讀書人嘅文章，尤其是係關於人文科學、社會文化、哲學及政治學嘅文章，一大堆只有行內人（或讀過嗰個系）先明白嘅term滿天飛，寫出嚟好似非常高檔，好有內涵，但實際上空洞無物，純粹堆砌（同我常公仔啲Cheap文一樣）。

但係我哋呢個社會，仲仍然停留喺20世紀六七十年代嘅視野同眼界，總之篇文有一大堆英文term，加埋自己完全睇唔明，咁就係高檔貨勒。相反，自己睇得明，知道佢講乜，就會衝出嚟柒彈一句『屌！我自己都寫到啦，駛撚睇你咩？』，概念完全調轉曬。正如當年，如果響中環見到一個著西裝會講英文嘅西人，你會當佢係神，甘心食洋腸，甚至碰上去過美國野雞大學讀過書（玩咗四年）嘅偽ABC，你就會以為佢會飛！正如今時今日，入到大學聽見啲講師普通話同英文夾雜講學，就認定佢係高級學者？情況都係一樣，離地永遠有市場，將自己放得愈高，離地愈遠，你就愈驚。in my opinion，唔敢挑戰權威只係階級性問題，有部份香港人蠢成咁，抵佢地成世比人呃。

我愈深入歷史，我愈感覺簡單，希望大家儘快有我嘅覺悟。

去返1921年3月，共產國際（即第三國際）執委會響西伯利亞城市伊爾庫茨克成立共產國際遠東書記處，由共產國際駐遠東局全權代表舒米亞茨基同明斯克負責，遠東書記處按國別設立支部，由各國共產黨人主持工作，中國支部應運而生，當時中國支部嘅負責人係年青人張太雷（1898-1927）。

遠東書記處嘅工作係解決有關中共同共產國際嘅聯繫問題，向中共同蘇俄提供情報，並且向中共傳達共產國際執委會嘅指示。張太雷畢業於天津北洋大學，1919年參與過五四運動，係學生領袖，1920年春天，共產國際代表維金斯基，即吳廷康，抵達北京同李大銜討論籌建共產黨時，張太雷就係吳廷康嘅翻譯，之後張太雷亦都係第三國際另一個指導「聯俄容共」政策嘅重要人物鮑羅廷（1884-1951）嘅翻譯，其重要性可圈可點，張太雷1928年死於廣州暴動，死嘅時候未夠30歲。

1921年3月，仍然係立立亂嘅廣州，亦都成立咗共產主義小組，陳獨秀1921年1月到達廣州，連同譚平山、沈玄廬、李季、袁振英、包惠僧等人，建立中共廣州支部，呢個支部非常重要，因為之後兩三年，佢哋響鮑羅廷指導下，會同孫文嘅廣州軍政府，達成「聯俄容共」政策，通力合作發動一場巨大內戰。

共產主義嘅勢力，響1921年不斷南下滲透，繼廣州成立中共支部後，連英國殖民地香港亦不能倖免，1921年3月6號，香港中華海員工會聯合總會成立，由蘇兆征、林偉民立持，該工會組織係響俄國十月革命同世界性普遍爆發工人運動影響下誕生，組織海員水手抗爭，要求加人工及改善待遇，工會迅速擴大，而且喺之後嘅香港，海員工會更加掀起咗一系列嘅罷工高潮，1925年6月至1926年10月粵港大罷工，該組織就係策劃者之一。

#常威 #大軍閥平反系列  #大軍閥 #民國歷史

【常公子歷史頻道283回：斷送共和關 星光熠熠 蛋牛治】

♉港區國安法立法，香港無疑進入了一個新時代，好多人感覺難以接受，但畢竟政治鬥爭就係常態，既然要大家打殲滅戰，就係生同死嘅問題，戰時狀態係唔使計較所謂法律同遊戲規則，只需要計較勝利和失敗。當然事情一下子去到如此嚴峻地步，亦都出乎好多人想像以外。但響互聯網資訊爆棚嘅新時代，好多事情都會發生得好快，並且會消失得好快，隨時殺你一個措手不及，天下武功，唯快不破。

♐我仲記得以前有人講，政治與我無關，但過去一兩年，大家都應該有一個覺悟，其實政治同每個人息息相關，就算你唔想去理佢，佢都會主動埋身擁抱你。今時今日，難道仲有人可以講，我活在政治之外麼？應該是沒有了。

♈政治操作真係好奇怪，正如一年前嘅今日，如果要企出嚟承認自己係「藍絲」，會承受千夫所指，響街頭甚至會無端端被陌生人「私了」；但衹是區區一年過去，情況已經出現180度逆轉，千萬唔好跟車太貼，凡事要保障自己，苟全性命於亂世，不求聞達於諸侯。

♊亂世已經成形，亦唔係獨獨係香港嘅問題，由21世紀開始，其實早有人預見今日世界嘅境況，畢竟冰封三尺非一日之寒，整個世界原本嘅運作方式，其實一步一步將整個世界推向爆煲境地，大家千方百計，令世界個煲一直延後唔爆住，個煲就只會愈谷愈大，當爆炸嘅時候，自然一發不可收拾。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/uACqcplrTpo

【常威近代史】（三百六十七回）
大軍閥平反系列

時間去到1921年4月，南北雙方都在處理權力交替嘅穩定問題，北方政府由皖系換上直奉二系，即曹錕及張作冧話事，南方軍政府孫文東山再起，重整旗鼓，忙到不得了，「第三國際」共產主義勢力趁你病、不斷以各種途徑滲透中國，好有三國時代氣氛，但當時中國並非祇有三國，而係七國咁亂，北方形勢係直奉分贓，而南方則係六省內鬥。

孫文主政嘅廣東省軍政府，其實省內仲有陳炯明、李烈鈞（1882-1946）同許崇智（1887-1965）三股軍事力量互相角力，千萬唔好忘記實力最強粵軍陳炯明身邊仲有個蔣介石；被驅逐出廣東嘅廣西軍閥，除咗實力最強的陸榮廷睇相（1856-1928），省內仲有沈鴻英（1871-1938）、陳炳焜（1868-1927）、莫榮新（1853-1930）、譚浩明（1871-1925）、林俊廷（1876-1933）、林虎（1887-1960）等新舊桂系勢力，或敵或友，敵我難分；廣東省對上嘅毛澤東劉少奇故鄉湖南省，有譚延闓（1880-1930）同趙恆惕（1880-1971）、程潛（1882-1968）派系爭權；隔籬貴州省，有王文華（1887-1921）VS劉顯世（1870-1927）；對上嘅大省四川，有劉存厚（1885-1960）對熊克武（1885-1970）；四川接壤嘅雲南省，亦有顧品珍（1883-1922）同唐繼堯（1883-1927）之爭。

皖系段祺瑞雖然被打巢，暫時退隱，但各省皖系勢力仍在，李厚基（1869-1942）控制福建省，盧永祥（1867-1933）控制浙江省，問你死未？除咗上述呢啲軍閥，千萬唔好忘記山西仲有個閻錫山（1883-1960）坐定粒六、甘肅省係馬家軍馬福祥（1876-1932）嘅，青海省係馬麒（1869-1931）地盤，對落有個陳遐齡（1873-1950）守住蜀道難，新疆被楊增新（1864-1928）所控制，西藏係十三世達賴喇嘛圖登（加鹽）嘉措（1876-1933）話事，蒙古處於半分離狀態。

上面所講就1921年中華民國嘅基本政治格局，講真，係大分裂，仲越分越細，呢個亦係中學生史觀所謂嘅混亂軍閥時代。但用正能量嘅說話，就係行緊聯邦制，分州自治，各有各搞，美國今日有53個州（States），當時嘅中國亦未必有53個分離勢力；祇不過今日嘅美國各州認同華盛頓聯邦中央政府，華盛頓亦絕對有外交同軍事嘅主宰權。而當時嘅中華民國，並冇一個受所有人尊敬並認同嘅中央政府，北京中央政府好想做呢個角色，但一直未能夠做到，袁世凱死前唔得，袁世凱死後更加冇一個人可以做得到。

其實要自插一嘢，我成日用南北有兩個中央表述大局，一個係北京中央，另一個係廣州南方軍政府，好似成個南方，得廣州軍政府（不論有冇孫文在內）有power逐鹿中原，其實都係錯，錯嘅原因係廣州軍政府之後會成為勝利者，因此留下嘅歷史描述比較多同詳細，即係爭取到政治話語權，其實放返入1921年前後，廣州軍政府都只不過係眾多割據山頭嘅軍閥之一，他日成功「meet」去軍閥呢個標籤，全因為佢哋打贏咗其他軍閥（北伐成功）。因為佢哋打贏咗，所以亦唔係軍閥，所以亦有權撰寫歷史。

當年，其他軍閥嘅故事其實多到數都數唔曬，要全部寫落嚟，用100年時間都唔夠，但係因為佢哋最後都係失敗者，所以佢哋嘅故事同歷史冇辦法被留低，統統只係響所謂「正史」中三言兩語被帶過，蜻蜓點水，鏡花水月，或忠臣或奸臣，留低一副白臉同黑臉就算。

更可怕嘅係，之後嘅蔣介石國民黨政權同毛澤東嘅共產黨政權，隨意篡改歷史，隨意銷毀歷史文獻，為自保其政權嘅清白同合法性，不惜大量抹黑其他對手，中國人治史，衰過一篤屎，你想找尋歷史真相，亦根本冇可能，因為所有嘅資料已經全部被消失。最經典嘅例子，莫過於60年代初期中國餓死咗3000萬到5000萬人、人類古往今來歷史上規模最大嘅一場大飢荒，今日能夠搵到嘅歷史資料文獻又有幾多？當日冇人留低，就算留低過亦被大規模銷毀，如果唔係鐵血丹心中共黨員楊繼繩寫下一本《墓碑》，世界上知道依場大饑荒來龍去脈嘅人又有幾多？

發生係1946年臺灣、屠殺臺灣人嘅「二二八事件」慘劇，如果唔係民進黨成功上臺執政，恐怕今日亦唔會個個知道。

最近因為工作需要，要讀70年代臺灣飲食文學作家唐魯孫（1907-1985）嘅作品，先至發覺原來記載民國二三十年代飲食資料嘅人，當今世上，除咗唐魯孫一家之外，其餘也是寥寥可數，零星落索，唐魯孫憑記憶所書寫的二三十年代民國飲食資料，甚至成為今天唔少專著或學術論文嘅「第一手史料」來源，若果當日唐魯孫退休後，真係養狗種花打發時間，唔搦起枝筆寫文，咁喺一個缺乏影象同訊息嘅古代世界，所有民國飲食歷史將會灰飛煙滅。

歷史就係咁嘅一回事，我常公子做嘅，就係用廣東話將近代史行一轉，無論之後有用或者無用，都起碼留低咗一個使用香港土話作為母語嘅香港人對近代史嘅某啲睇法。（講到自己懶偉大咁，收皮啦！）

#常威 #大軍閥平反系列  #大軍閥 #民國歷史

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】（三百六十八回）
大軍閥平反系列

1921年中係一個轉接期，南北雙方都響處變化中，大家重整旗鼓再打過！4月7號廣州非常國會再度召開，自己友圍威喂，取消軍政府稱呼，改總裁制為總統制，換個牌頭，孫文獲選為中華民國廣州政府非常大總統，正式宣佈東山再起，擺正堂軚，矛頭直指北京中華民國中央。一句到尾，我合法你唔合法，一個國家，南北兩個中央（其實唔止兩個，仲有好多個，不過其他冇話自己係大曬啫），正所謂一山不能藏二虎，明眼人都睇到，一場更大嘅內戰醞釀發生。

孫中山就任廣州中華民國政府非常大總統後20日後，曹錕、張作冧、王佔元、吳佩孚等30餘人聯合通電反對廣州國會決定，並認為孫文就任非常大總統為不合法行為，不過你有你講，我有我繼續做！一個已經冇咗皇帝（慈禧太后）嘅時代，冇人有最高決策權、即冇人可以話事！亦冇所謂終審法院作最後裁決。

民主共和憲政，冇人可以獨大，最大嘅係一部憲法，大家要根據憲法行事，白紙黑字。好可惜當時中華民國仲未有一部憲法受到各方面承認，正如你認為聖經係至高無上，我就認為係般若心經，亦有人話聖經係偽書，可蘭經先係堅，就算認同聖經，新教徒亦唔承認舊約，只承認新約，同樣相信可蘭經，亦有遜尼派同十葉派，大家信佛，亦有人可以玩到性交驅鬼。世界永遠冇可能有統一嘅意見，當有一日所有意見（被）統一，你就會話係極權統治Tyranny，要推翻佢，如此不斷循環，永無止息，直至所有人類滅絕為止，上述所講，叫真理。

孫文上位，同月推出個人英文著作《實業計畫》宣傳新政府，用洋文寫，全世界鬼佬睇得明，你吹咩？我諗當時成班北方軍閥，好少人可以用英文寫作（用日文應該就大把），唔好成日屌國父，國父真係有料到，起碼喺宣傳工作上，佢一直領導潮流，其他人輸足九條街。我個人覺得，國父咁醒爬，全因為佢自1895年起到1911年聖誕節，一直喺國外居住，時間長達16年，如果依16年佢喺中國住，我諗佢會變蠢……

有句說話我好銘記於心，幾年後蔣介石北伐成功，打敗其他軍閥，有限度地統一全中國，有人問佢南方軍贏喺邊度？佢當然唔會講出真相係贏喺俄共嘅資助同埋軍備，所以蔣介石講，南方軍係贏在有個「口號」、有個「口實」，而北方冇，南方軍有意識形態打底，即係話你知，最後可以贏，係打贏文宣戰，係打贏意識形態戰爭！冇個口號，冇個口實，或者衰啲講句，冇個藉口呃細路，好難叫年青人上前線衝或掘地雷，如果你明白，世事會更加清楚。

補充一單花邊新聞，真係好花邊。話說我哋嘅民國關公直系吳佩孚，為人靚仔有文化又打得就個個都知，佢英俊嘅外貌，竟然引來狂蜂浪蝶追求，話說有一個喺德國大使館工作嘅日爾曼小姐露娜，對吳佩孚心儀已久，竟然專程嚟到吳佩孚嘅根據地洛陽同佢見面，響見面途中秋波頻送，但吳大帥不為所動，草草結束咗接見。

露娜小姐返返北京後，幾次寫信向吳佩孚表白愛意，其中一封信僅有一句德文講，「吳大帥，我愛你，你愛我嗎？」非常坦白，但吳佩孚睇咗之後大笑不止，並在原信上批了四個大字：「老妻尚在」，拒絕一番美意回信比露娜。單新聞上過國際頭條，吳佩孚聲譽再上一層樓。當時中國眾多軍閥，邊個唔係三妻四妾？孫文當然唔使講，就係吳佩孚一個，堅守一夫一妻制，真正忠誠勇毅，叫得做關公，你估easy？

5月5號，孫文響廣州得宣路原督軍處改建嘅總統府中，宣誓就任中華民國非常大總統，孫文嘅計畫係「捍除汙穢不堪之北京政府，建設良好乾淨的正式政府」，認為現在係最好時機，重整革命力量，同北方軍閥抗衡，積極培養勢力，他日發動內戰，誓師北伐。

司馬昭之心，路人皆知。幫助孫文東山再起、出力最多嘅粵軍軍頭陳炯明，被任命為新政府嘅內務總長兼陸軍總長，但係佢一直唔buy孫文，更加唔buy佢想繼續發動內戰玩北伐，陳炯明係民主自由嘅ture believer，民主自由絕對擁護者，一直行嚟，始終冇變。佢嘅先進思想早已經警告佢，孫文同蔣介石根本唔係想行民主自由，而係想行黨國合一、獨裁統治、軍國主義，即係玩俄共列寧托洛斯基嗰套。於是陳炯明暗中同湖南軍閥趙恒惕通訊，實行聯省自治，湘粵聯防互不侵犯。

之後嘅日子，大家覺得陳炯明有冇好日子過呢？得罪方丈，佢唔係第一個，方丈點做人？駛X你教，你唔想北伐？你要玩聯省自治？咁你即係唔係自己人，唔係自己人就係敵人，邏輯非常簡單。正如今日北京地產大亨任志強狠批習近平著皇帝的新衣，你同我對著幹，我就要你人間蒸發，就算你係自己人或你老竇係自己人都好，只要你今天不服從我，不依從我的路線走，你就係敵人，極權統治Tyranny就係噉解，否則就係開善堂，唔係行極權統治。今日有習主席，當年有孫總統，其實大家做緊同一件事。

不過要同孫文平反，陳炯明最後可以保住一條賤命到香港終老，活到1933年，佢嘅故事，我哋之後再有機會講。

#常威 #大軍閥平反系列  #大軍閥 #民國歷史


【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

如果 飲食史嘅話
仲有逯耀東

新教徒都承認舊約
新約同舊約嘅分別係猶太教只承認舊約唔承認新約