【常威近代史】（三百八十二回）
回頭翻返去中國近代史，1921年的確係一個轉捩點，中國共產黨成立，新文化運動波濤洶湧展開，舊嘅唔去，新嘅唔嚟。直系奉系軍閥主宰中央政府，中原地帶係民國關公吳佩孚嘅天下，孫文勢力盤踞廣東，日益坐大，大英帝國隨住禁煙令全面執行，喺中國嘅影響力江河日下，大正時代日本暫時放棄武力侵略中國方針，改爲經濟侵略，東三省一帶成為日本人天下，亦直接令奉系張作冧扶搖直上，坐大奉系野心，與此同時，共產主義思潮成為時代潮流，「第三國際」見中國奇貨可居，地緣政治關係，近水樓臺先得月，決定大規模向中國輸出革命，新一頁故事，就此展開。
喺華盛頓舉行嘅「太平洋會議」圓滿結束，西方列強對中國嘅利益分贓亦都傾好曬，日本人大獲全勝。日本亦坐定粒六，決定取代大英帝國位置，要成為中國背後嘅經濟操盤手。12月18號，中華民國大總統徐世昌允許國務總理靳雲鵬辭職，事實上靳雲鵬的內閣，傾向直系利益，張作霖同舊交通系一早想更換佢，靳雲鵬內閣倒臺後，由張作冧扶植嘅交通系首領梁士詒（1869-1933）組織新內閣上場，梁士詒成為國務總理，新內閣上臺嘅第一件事，就係宣佈撤銷對皖系軍閥政客嘅通緝令，變相增加對直系嘅壓力；第二件事，利用軍餉，即係錢，約制吳佩孚雄霸中原嘅部隊；第三件事，又係錢，同意向日本借款贖回膠濟鐵路。
咁搞法，直系當然大表不滿，直系同奉系關係進一步破裂，原本嘅盟友好快變成敵人，而解決紛爭嘅方法亦都好簡單，就係打場仗，決定邊個先係話事人？國民對於新內閣亦冇任何期望，同而家香港一樣，來來去去又係嗰班人，其實嗰個做特首咪一樣？唔想承認都要承認，換咗四件，邊件好睇過？
政治需要新面孔，因為新面孔先可以帶來新衝擊，以及為民眾帶來新希望。我講咗好多次，將來會變成好定唔好？其實冇人知。最重要嘅係你今日相信我能夠為你帶來一個更好嘅未來，氹咗你上船先，話畀你知隻船會載你到彼岸，結果在江中心，隻船入水，大家叫救命，但係已經冇辦法，因為大家已經係同一條船上，被逼攬炒。
正如當日鄧小平要收返香港，同你講「港人治港高度自治五十年不變馬照跑舞照跳」，你信佢，係因為一個希望，並唔係一個放喺你面前嘅現實。又如果你認為一個人或政治家嘅承諾，其影響力可以到達半個世紀之後，你亦未免太天真太傻。喺政治嘅世界裏面，一日都嫌太長，50年承諾，其實係天方夜譚。