【常威近代史】（三百五十五回）
大軍閥平反系列
冇料到就唔可以衝出嚟柒，除非你想做林鄭月娥！企圖擔當直系同皖系之間磨擦嘅和事老，係奉系嘅張作霖（1875-1928），1920年嘅大分裂時代，張作霖獨當一面，自成一系，同鮑貴卿、孫烈臣控制北方天然資源豐盛嘅東三省一帶（即現代遼寧、吉林、黑龍江三省），自成一國，管轄區內經濟欣欣向榮，財政健全，加埋食正日本人條水，有日本海陸大軍保護，事實上，響1920年之後，張作霖嘅成就可能更加巨大。
今日用少少篇幅，講講張作霖，張作霖喺清帝國毅軍當過兵，兵仔出身，參與過甲午戰爭，退役後，成立保險隊，保護關外嘅土豪紳士，好聽就叫做民團私人保安隊，其實就即係馬賊土匪、黑社會，收你陀地用武力保護你，你唔科水就踩你場冧你友。喺大混亂時代，當政府軍同警察都可能係賊嘅時代，依種生意越做越大，其實好有理由。
香港六七十年代，黑社會嘅勢力其實相當驚人，兵賊不分，某日聰明的周顯一語道破，與其話廉政公署ICAC成立，係為咗肅貪倡廉，不如話，係英國殖民地政府將失控嘅龐大地下勢力收編，使其制度化，要黑社會放下老牛，著返套西裝昇格做上等人，社團納入建制，其實理念上又冇錯。
張作霖嘅經歷亦都大同小異，由最初做土匪馬賊黑社會收陀地，生意越做越大，政權亦不得不面對現實，與其派正規軍打你取而代之，不如乾脆將你收編入建制，反正你可以繼續做自己嘢，只是名相改變咗。
響1911辛亥革命之後，天下大亂，貧窮脆弱嘅中華民國中央政府（兼且不是唯一），亦只有用呢個方法治理全國，其實係行緊一種美國聯邦制模式，同美國唔同嘅係，當時中國嘅軍閥式聯邦，每個軍閥自治區冇上繳稅款比中央政府運作嘅義務，而自治區亦可以擁有自己軍隊、立法、收稅甚至發鈔嘅權利。
本公子睇返歷史，當時似乎冇乜人深入去探討中國行聯邦制嘅可能性，好多當權者仍然停留喺皇帝封建時代，覺得所謂一個「國家」，必須係一個「大一統」嘅國家，必須有一個強大嘅中央政府對廣大地域實施強而有力嘅控制及管治，否則就是國不成國，其實呢個中國人心裡面嘅強大「中央政府」，就係傳統「皇帝」概念，分州聯邦自治，點解美國人做得到？而中國人永遠冇辦法做得到？我諗同某啲傳統根深蒂固喺我哋心裡面嘅意識形態相當有關。
今時今日，仍然有人口口聲聲要「武統臺灣」，「統一國家」，香港人要放棄「高度自治」，好似澳門咁就最正，最effective，證Chinese DNA真係有問題......其實我口中用「Chinese」依個set表述狀況，我自己都有問題，不過係依一個Mental Disease氾濫嘅廿一世紀，其實邊個冇問題先？
民國成立，袁世凱任命張作霖為27師師長，授中將軍銜，袁世凱去世，張作霖出任奉天都軍兼省長，直至後來其最大競爭對手馮麟閣加入張勳復辟失敗後，張作霖先完全控制奉天。
