【大清亡國關慈禧蛋牛治】第一回

【125回：大清亡國關 #東交民巷 蛋牛治】

😄1900年進入20世紀，人類邁向一個真正嘅文明時代，但係最唔文明最野蠻嘅事卻喺中國裡面發生。大清帝國下聖旨要求全國人民殺盡洋人，保家衛國。件事本身已經好奇怪，我常公仔亦都用咗好多篇幅分析過點解慈禧太后會咁樣做？總之當時北京城裡面嘅幾千個外國人，就聚集咗喺東交民巷使館區一帶保命。使館區已經成為一座孤島，外邊有清兵嘅正規部隊，亦有幾萬人嘅義和團圍攻，老實講，如果真係要屠殺洋人，使館區一個洋人都唔會有機會留低。

😄唔少外國人後來都寫回憶錄記載這件事，中譯本好似冇出版過，我未睇過，所以具體情況對我嚟講仍然未完全清楚。我淨係知道清兵同埋義和團都冇諗住真係殺曬使館區嘅洋人，由頭到尾都係戲一場。有人要做戲俾滅夷派仇洋派睇，有人亦都知道，如果真係殺曬民巷裡面嘅洋人，之後大清帝國一定會畀外國軍隊夷為平地。多方面條件配合下，先至產生咗「東交民巷保衛戰」依一件咁荒謬嘅事情。

😃呢件事亦都反映出中國人嘅一貫做事方式，即係所謂講一套，做一套。表面上殺洋人，實際上救洋人。表面上玩高科技，實際上係玩上市；表面上係做善事，實際上係想逃稅；表面上係個大明星，實際上係個炒家；表面上係一個領導人；實際上係一條狗。陰陽兩面，左右逢源，表裡不一。由細到大，我自己本人非常唔欣賞中國人依種性格。人生存喺個世界上，只有短短幾十年，鏡花水月嘅人生應該要活出真我。凡是鬼鬼鼠鼠，藏頭露尾，為咗自身利益戴住假面具做成世人，究竟為咗啲乜？唔通中國人真係除咗錢同利益，冇嘢想得到？我唔知道。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/oXGBvmVfbyI

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威中史】慈禧平反系列（一百六十八回）

今日叉開一筆，講另一啲嘢，我講講咩叫「革命文體」。喺20世紀初期，書本報紙雜誌嘅力量大得出奇，有人話第一次世界大戰，日本侵華戰爭，都係由媒體催谷出嚟（信不信由你）。我之前講過，1903年上海租界大同書局曾經出版咗一本鄒容（1885-1905）寫嘅書，叫《革命軍》，《革命單》係鄒容十七歲寫嘅反動書籍，其後因為呢本書，鄒容被判入獄，病死響租界獄中，享年二十歲。

呢本書當時清政府評價係：「此書逆亂，從古無有」。

就係咁犀利，所以一向唔搞文字獄嘅豆斗都要搞搞佢。呢本書對中國革命事業影響好深，尤其是鄒容之後嘅死，更加成就咗本書。但係《革命軍》並唔係一本講解革命理論嘅專書，佢只係一本口號式嘅即食快餐宣傳刊物，大家不妨睇睇書中一段：

「掃除數千年種種之專制政體，脫去數千年種種之奴隸性質，誅絕五百萬有奇披毛戴角之滿洲種，洗盡二百六十年殘慘虐酷之大恥辱，使中國大陸成幹凈土，皇帝子孫皆華盛頓，則有起死回生，還命返，出十八層地獄，升三十三天堂，鬱鬱勃勃，莽莽蒼蒼，至尊極高，獨一無二，偉大絕倫之一目的：曰「革命」。巍巍哉，革命也！皇皇哉，革命！擲爾頭顱，暴爾肝腦，與爾之世仇滿洲人，與爾之公敵愛新覺羅氏，相馳騁於槍林彈雨中……」

上面一段《革命軍》文字，大家有咩感覺呢？用今日嘅角度講，就算以20世紀初嘅水平嚟講，都係唔得嘅。更簡單啲講，就係「殺殺殺殺殺，血血血血血」，水平低到爆，完全唔文明，完全係野蠻落後。同期列寧同埋托洛斯基喺歐洲《火星報》上登出嘅一連串鼓吹革命文章，理論水平就高得太多太多（雖然列寧托洛斯基都係鼓吹暴力革命）。但偏偏中國人就係受「殺殺殺殺殺，血血血血血」呢一套，其實鄒容本書主要係鼓吹暴力主義、簡單主義，要建設民主漢本位新中國，就必須殺絕所有滿州人，作為滿洲人唔搞你就奇啦？

呢一種「革命口號式文體」其後更加響中國發揚光大，完全冇內容冇理論基礎，齋講口號煽動人群，響之後中國近代史兩個精神導師蔣介石同毛澤東手上更加被運用得出神入化。去到60年代的文化大革命，更加將口號式文體嘅力量發揮到淋漓盡致。

其實到咗今日，中國人社會裡面仍然充斥住大量呢一種「革命口號式文體」。我哋似乎唔需要理論基礎，我哋更加唔需要知道真實情況係乜，我哋只相信片面嘅宣傳口號，合埋雙眼追求政治正確，勇往直前為統治階層政權服務，呢個就係中國人嘅弊病所在。

其實中國人一啲都唔尊重知識（所以同時亦唔尊重知識產權），有人話英美世界行嘅係實用主義，其實中國人先係實用主義嘅擁戴者。100年過去，其實好多嘢都冇改變過，五四運動所鼓吹嘅「德先生同賽先生」（德先生即Democracy，賽先生即Science）其實一直冇出現，民主精神固然係冇（完全冇），對自然法則嘅遵守，對科學精神嘅貫徹，更加只係停留喺實用主義嘅表面層次上。

超英趕美？開玩笑啫。今日中國嘅強大，足以同美國二分天下，平起平座，老實講唔係大家實力已經接近，只係一條千古不變嘅真理作用其中：

「劣幣驅除良幣」

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威中史】慈禧平反系列（一百六十九回）

革命係流血嘅事情，其實一啲都唔浪漫。

一個社會要行到革命呢一步，代表咗個社會同人民已經係水深火熱。早幾年有小部份香港人不斷提出所謂「革命」會出現，其實大家喺度講緊啲乜呢？

革命嘅定義係一個階級推翻另一個階級，全盤推翻之前嘅社會制度同埋階級結構（好似辛亥革命，就係用民主共和體制推翻封建皇朝統治），嚴格嚟講係翻天覆地嘅大變動，革命嘅發生，一定係社會上大部份民眾處於極度水深火熱同被壓迫嘅處境，用簡單嘅語言去講，就係要去到冇得食同埋就快死，大家就快斷氣前，真正嘅暴力革命先會發生。所以以香港嘅世界頭十位富裕物質條件，唔好講死講斷氣，我哋距離真正嘅貧窮同飢餓仲有一段非常非常之大距離，因此香港並冇任何革命嘅條件，你夾硬話有，我都冇辦法。記住，革命唔係請客食飯。

同埋輕易將革命掛響口邊，其實極度不負責任。因為如果暴力革命真正發生，係會有巨大嘅人命傷亡。革命如果齋講，又真係幾浪漫，但係如果堅做，就係好血腥。香港人所講嘅「革命」，其實只係希望「改革」，「革命」同「改革」根本係兩回事，我哋只係希望響統治階層政治體制上作出內部調整，從而得到一個更符合民意嘅政治運作體系。所以我懇請大家，唔好再濫用「革命」呢個辭彙。

1911年發生響中國嘅辛亥革命，其實係一次非常成功嘅革命。甚至乎係全世界革命事件中一個典範例子，點解咁樣講？因為辛亥革命流嘅血死嘅人係最少。相對18世紀末期法國大革命之後嘅嚴重暴力血腥，或者1917年俄國十月革命後發生嘅一切，如果單以流血同埋人命去計數，辛亥革命無疑非常成功，以小量人命犧牲，就推翻咗二百幾年滿清皇朝封建統治，成功建立共和。

當然中國嘅革命係唔係已經成功咗？好多人有唔同嘅睇法，包括奪命書生孫文在內，孫文死嘅時候輓聯係「革命尚未成功，同志仍需努力」。由此可見孫文都係覺得佢搞嘅「革命」仲未成功，咁孫文心裡面嘅真正革命到底係乜嘢呢？我哋無法否認，孫文其實係一個理想社會主義者（甚至乎我覺得佢係一個百份百共產主義者），單就「平均地權」四個字就知道，除咗推翻封建皇朝（驅逐韃虜），佢仲想喺中國建立一個平等均富嘅社會（創立合眾政府）。

如果從上述定義去睇，孫文嘅革命理念要去到1949年先算係真正成功。但如果用呢個定義去睇，咁中國革命同法國大革命俄國革命完全冇分別，因為始終都係要付出超乎想像巨大嘅人命損失作為革命代價。

孫文作為中國嘅國父，由佢代表嘅三民主義並非共產主義概念，但係孫文嘅行事為人，或者佢嘅所做嘅嘢，絕對係一個二十世紀初共產主義者嘅行事方式。到最後中國變成一個共產主義國家，其實某程度上係實踐咗孫文嘅意志，所以話佢係國父，其實一啲都冇錯。



🔥【常威近代史】第二部《中國一百年前的第一次改革開放》實體書正式上架！

🔥請大家支持我常公子的近代史寫作計畫，Facebook專頁、Youtube、電子書、實體書，我希望用唔同嘅新媒體，令香港人或用粵語為母語嘅朋友認識或加深對近代史嘅認識，過程會好艱辛，但係我唔撚怕，我會努力落去，直至寫到王光美接劉少奇骨灰為止，我會用我嘅母語廣東話，寫下香港人眼中嘅近代史，為香港人響歷史上留下一個小小腳印。

🔥請大家支持我，到書局買本實體書！download咗電子書嘅朋友，亦請多買幾本實體書，送禮自奉，大家一齊推廣香港人保存粵語文化運動！有你有我！高山流水，沒齒難忘！

【126回：大清亡國關 #鬥而不破 蛋牛治】

😄中國人鍾意鬥，天下皆知。點解要鬥？為咗錢為咗權力為咗啖氣。其實唔單止中國人，人類都鍾意鬥，否則點會有咁多戰爭同埋紛爭出現？冇辦法，人類並唔係啲乜嘢十分高尚嘅生物，我哋都只係由哺乳類動物進化而來，其實我哋係黑猩猩係恆河猴，為咗爭地盤，為咗爭食物，為咗爭交配嘅權力，可以鬥生鬥死，其實一啲都唔需要覺得奇怪。

😄人類同石梨貝水塘裡面嘅馬騮最大嘅分別，或者人類展現智慧嘅一面，就係我哋雖然鍾意鬥，但係我哋識得「鬥而不破」，鬥還鬥，千祈唔可以鬥死對方，否則冇咗對手，就冇人可以同你鬥。鬥而不破，你可以理解為：為鬥而鬥，唔著重結果，只在乎過程。用正能量嘅講法，就係人需要競爭對手，需要有競爭對手鞭策自己不斷向前。所以你嘅敵人亦都係你嘅朋友，你嘅同事亦都係你嘅敵人。

🤔近幾十年，無數內鬥喺中國共產黨內發生。好多人唔明白點解，但係我可以話比大家知，中共本身，就係以「階級鬥爭」為背後理念建立起嚟嘅一個組織，「鬥」呢個字，係重中之重。如果唔鬥，組織就會失去動力，冇辦法再膨脹再向前。所以太平盛世嘅日子，都要無風起浪，鬥生鬥死。但係大前提係鬥而不破，無論黨內人與人之間點鬥，組織嘅生存同埋擴張先至係最重要，因此無論如何，都要鬥而不破。明白依一點，你就會明白我哋國家好多事情。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/2kKFkXcL5XI

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威中史】慈禧平反系列（一百七十回）

1902年後，清帝國全面對外開放改革，由豆斗領導嘅清廷政府全面同世界接軌，國内亦都大刀闊斧配合大時代步伐，其實之後幾年，大清帝國基本上欣欣向榮，財政收入增加，人民生活得以改善，國家逐步現代化，對外嘅形象亦都明顯好轉，我真係夠膽講一句，如果豆斗長命少少，唔係1908年香，又如果接班人醒少少，成個局面根本係第二個版本。

Q：咁阿常公子你係唔係認為推翻滿清唔X啱呀？

A：我並冇咁講。把口生喺我嗰度，我有權表達自己意見。

但係要提一提，革命當時係世界潮流。同我哋現代人玩手機一樣，玩革命先係前衛，發生響1905年至1907年嘅第一次俄國革命，其實影響波及全世界，當時嘅歐洲，革命思想同馬克思主義不斷擴散，唔少國家紛紛成立社會主義政黨或共產黨，資本主義帝國主義對群衆嘅剝削亦喺當時到達巔峰，歐洲呢個火藥庫，累積嘅火藥越來越多，終於之後爆曬出嚟，而且一發不可收拾。

你可能會問，點解當時咁多人選擇革命同共產主義？我哋事後睇番，梗係一清二楚，但係如果身處當時，面對一個醜陋嘅世界，任何仁一定會選擇推翻佢，希望建立一個更美好嘅世界，有早知，冇乞衣。同我哋做人一樣，我哋好多時候都想改變現狀，希望有一個更好嘅未來，但係未來係點？其實冇人知道。

前面有座山，山後面你以為有一個美好嘅世界存在，但係有一日你攀過呢個山，你睇到嘅，或者只係另一個山。

去到20世紀初，其實奪命書生孫文已經好清楚自己嘅地位同埋重要性，作為當時最強嘅革命KOL，佢將自己同太平天國嘅洪秀全，放響相同位置上，佢覺得自己做嘅嘢同洪秀全其實係一樣，佢亦都經常用太平軍嘅革命經驗嚟啟發洪門兄弟。1902年佢就指示過忠誠嘅革命信徒劉成禺撰寫太平天國史記，劉成禺響1904年春季用筆名漢公出版咗兩冊嘅《太平天國戰史》，呢本書亦都係少數中國人寫嘅太平天國歷史。

中國人唔鍾意寫自己歷史（除咗官方逼不得已之外），但係中國人好鍾意扭曲歷史。中國係一個「活在當下」嘅民族，我哋往往只係睇到眼前嘅利益同埋溫飽，對於過去我哋缺乏感情，對於未來我哋亦都缺乏信仰。解決眼前發生嘅事係當務之急，有人話英國同美國係「實用主義」（Pragmatism），但我同你講，中國人先係貫徹實用主義嘅忠實信徒。

同大家講下哲學，實用主義嘅根本綱領係：把確定信念作為出發點，把採取行動當作主要手段，把獲得實際利益當作最高目的。

利益就係一切，就係最後目的，特別係眼前嘅利益。中國人重視「利益」，相信唔使我再多描述，大家身處喺香港呢個社會，邊度唔係利益掛帥？

今集又吹多咗，下次繼續比較孫文同洪秀全……

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【127回：大清亡國關 #八國聯軍 蛋牛治】

😄20世紀第一年，1900年國際社會第一號大事，就係八國聯軍攻入北京拯救同胞。響西方人嘅角度，當時嘅清帝國係一個野蠻落後封建愚昧嘅低級世界。我諗個感覺，就好似我哋今日對印尼、菲律賓、孟加拉一樣。早幾年有朋友親口同我講，佢想請一個新嚟、冇工作經驗嘅印傭用，我問佢點解？佢話新嚟嘅、冇工作經驗就唔識得去玩，所以星期日可以唔使放假，一個星期就可以做足7日。我當時諗，點解可以咁樣對人？世界上竟然有員工可以唔使放假？如果你老細唔俾你放假，你又會點？

😄香港人點樣對待傭工，世界知名。2015年Erwiana 被殘酷虐打案，上曬國際頭條。冇錯，人係有階級之分，有高等人，亦有低等人，世界上有窮人有有錢人，雖然大部份人口裡面唔承認狗眼看人低，但係其實每一個人心裡面都有階級嘅分別，每個人都有對狗眼，用嚟看低人。就算係世界上最自由民主多種族共融嘅美國，入讀哈佛長春藤系大學嘅白人比率仲係高到得人驚。

😃我哋由細到大都被社會國家機器灌輸一個知識，或者叫一個信仰或意識形態。就係努力讀書，勤勤力力，克勤克儉，就會有美好嘅前途，就可以脫離原本嘅階級晉升另一個階級，簡單啲講，即係會發達，會成為有錢人。但係真相係唔咁？社會上嘅有錢人，有幾多真係靠住自己嘅實力同埋學識爭取返嚟？相信過咗35歲嘅你、響社會上碌咗十年以上嘅你，就會一清二楚，「資本」比「個人能力」遠遠來得重要，社會上，或者全世界存在住唔同嘅階級，階級由資本財富決定，並唔係用個人能力或道德文水平決定。依一點大家要清楚，弊傢伙，越拉越遠添……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/R11q-5-FHxg

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

【常威中史】慈禧平反系列（一百七十一回）

今節我講講孫文同埋洪秀全嘅比較，將兩樣風馬牛不相及嘅嘢擺埋一齊比較，作出結論其實冇乜用。不過「比較」係我哋人類嘅一種基本思維模式，就好似打飛機，本身係有一定嘅生理意義。

孫文多次將洪秀全當作偶像同埋模彷對象，中華人民共和國建國前後，亦都非常推崇洪秀全，話佢係中國農民革命嘅先鋒。事實上太平天國運動係一次空前成功嘅革命活動，佢瓜分咗大清半壁江山，若然唔係內部鬥爭咁激烈，洪秀全同東王楊秀清冇反目，大英帝國又冇插手戰事嘅話，中國其實喺18世紀中葉已經改朝換代。

革命除咗係武裝流血衝突，亦都係意識形態上面嘅轉移，凡係革命，都需要有一個「主義」同一套與現行政權completely唔同嘅「意識形態」喺背後支持。「主義-ism」要係全新嘅，要係給予人民希望嘅，洪秀全所用嘅係基督教，佢利用基督教義將群眾歸邊，從而抗衡大清皇朝嘅封建力量；而孫文所用嘅，就係民主共和，即係佢口中嘅「三民主義」，仲有漢本位「中華民族」民族國家主義；之後嘅中共，更加打正旗號，用「馬克思主義」「世界革命」團結民衆起義。

洪秀全、孫文及毛澤東，佢哋係革命領袖，但同時亦都係一個宗教嘅教主，佢哋最大嘅用途係處理意識形態問題，但係所產生嘅問題係，人民最後信奉嘅並唔係宗教本身，而係信任教主本人。反觀現代世界所行嘅資本主義制度，都係一套意識形態宗教，但係資本主義並冇教主，如果夾硬要搵個教主出嚟，咁資本主義嘅教主就係「金錢」本身。

教主嘅問題好麻煩，因為教主本身都係一個人，並唔係神，一個活著嘅人性格上係會隨著年紀而不斷產生變化。洪秀全定都南京（天京）之後，就發佢嘅皇帝夢，導致太平天國依個人民公社式嘅革命團體內部嚴重分裂；毛澤東更加唔使講，1949年之後為咗鞏固權力同埋繼續發共產主義美夢，引發嘅災難，世上前所未有。

孫文其實都係一樣，辛亥革命之後，佢得唔到應有嘅實際權力。於是最後南下廣州，聯俄容共，將黨國合一思潮引入中華民國，從此以後，亦斷送咗中國嘅民主同埋共和。孫文係一個反對獨裁統治而出現嘅革命人物，但到最後佢為中國帶嚟嘅，係另一次更獨裁更血腥嘅統治環境。

當然佢係冇心，佢只係好心做壞事，世界上好心做壞事嘅人太多。每一場革命出發點都係美好嘅，但事情發展落去，往往就會變質。變質嘅係人心，係人類對權力嘅慾望，「旗未動，風未，是人的心在動」。

我推崇黃興，係因為佢係革命嘅真正執行者，係負責衝嗰個，但係革命成功之後，佢選擇功成身退（先不論係自願或非自願），其實又好少人能夠做得到，有份耕田，冇份收割，講就容易，你同我都一定做唔到。

嚟到21世紀，獨裁者、教主式嘅時代已經過去，雖然我哋仍然見到有人千方百計將權力集中於一身，但我想同嗰個人講，太多權力響自己身上，只係自尋煩惱。人類係要為咗開心而活著，何必自尋短見呢？當然佢又一定唔會明白，佢會同我講，我只係做緊好事。我同佢講返：你係好心做壞事囉。


【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威中史】慈禧平反系列（一百七十二回）

時間繼續停留係1905年，依一年係重要一年，日俄戰爭結束，俄國第一次革命發生，孫中山同黃興組成同盟會，1905年亦係愛因斯坦業餘進修獲得博士學位嘅一年，同年佢發表咗關於光電效應、布朗運動、狹義相對論、質量和能量關係四篇論文，依一年被後人稱為「愛因斯坦奇蹟年」，最著名解釋世界嘅公式（E = mc2）亦係呢一年出現。

1905年嘅大清帝國，現代化改革不斷發生，其中女權運動嘅興起，亦同時發生，之前豆斗已經發出諭旨，容許滿漢通婚，鼓勵女性唔再紮腳，紮腳呢樣嘢，真係人類歷史上一樣最變態最殘酷最不知所謂嘅事情（下刪粗口一萬字），偏偏又係中國人發明，偏偏喺中國行咗成700幾年（傳聞發明紮腳係中國最偉大詞人南唐李後主，睇見紮腳嗰隻三寸金蓮，真係隔夜飯都嘔），二十世紀初，豆斗冇強行禁止紮腳，因為當時國民士大夫階層仍然反對，依種虐待婦女嘅變態傳統，喺民國期間仲未消失，真係要去到1949年中共取得江山，強行禁止，中國婦女先從呢種咁殘酷變態嘅傳統裡面完全解放出嚟。

同期婦女開始能夠進入學校讀書，1905年一個滿族女性惠興（1870-1905），唔係劉慧卿，佢籌款響杭州興建一間女子中學，但中學建成之後，原本答應畀錢嘅人冇畀錢，於是惠興女士憤然吞生鴉片自殺，死諌詢學，呢件事震動咗成個清國，惠興女士亦成為中國女權運動嘅先驅者。之後豆斗大力推廣女權運動，1907年奏定女學堂公布，清國嘅女性，開始同男性一樣擁有接受教育的基本人權。

1907年，任職兩江總督嘅新派官員端方（1861-1911），派出第一批女性前赴美國留學，呢批留美女性中間，有畢業於喬治亞洲威斯利安女子學院（Wesleyan）、後來成為孫中山夫人嘅宋慶齡，仲有佢個妹，畢業於麻塞諸塞州衞尼斯學院（Wellesley）嘅宋美齡，佢後來係蔣介石老婆。

1905年豆斗派出端方、載澤（1876-1929）、戴鴻慈（1853-1910）、徐世昌（1855-1939）同紹英（1861-1925）五大臣出洋考察，出門之前，佢哋經過正陽門車站遭到革命黨嘅炸彈襲擊，不得不改由海路由上海出發，五大臣遊歷日本、美國、英國、法國、德國、丹麥、瑞典、挪威、奧地利、俄國十國，1906年8月返國，呢次考察空前成功，五大臣將西方各國嘅憲政模式同豆斗報告，而在同一個時間，清帝國亦開始君主立憲嘅預備工作。

同期，豆斗委任前李鴻章幕僚、我哋香港人之光法學博士伍廷芳（1842-1922），大力改革大清法律制度。之前講過，科舉制度亦響1905年壽終正寢。當然唔怕再提一次，廢除科舉我覺得係大清亡國嘅主因，因為呢個變動實在係太巨大太震撼。用當時嚴復（1854-1921）嘅講法係「自從商鞅廢井田，開阡陌以來，華夏還沒有領教過如此巨變」。20世紀初期清帝國嘅現化化改革係二千幾年嚟，中國所前所未見。一個封建傳統野蠻落後嘅帝國終於要邁向現代化之路，融入整個大世界。

你可能會問，一切都太遲了，豆斗做得太遲了。但我想同你講，其實20世紀初期嘅現代化大改革，只不過係洋務運動2.0嘅終極版，洋務運動由豆斗一上臺開始已經展開，只不過之前有太多障礙物存在，有太多守舊嘅人阻頭阻勢，豆斗同清帝國向前邁進真正嘅大改革，係要等呢批人死曬先可以出現。

最後想補充一句，首尾呼應吓今日篇文，20世紀初期你派人出國留學讀大專，去考察外國憲政制度嘅時候，人哋德國猶太人愛因斯坦已經發現咗狹義相對論，利用上帝嘅眼睛去解構時間同空間嘅秘密，彼此個距離真係好闊，闊到幾千光年咁闊……

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【128回：大清亡國關 #一路向西 蛋牛治】

😄1900年，慈禧狗向西奔走，一路向西，由北京去到西安。航空距離係900公里。但係慈禧領導嘅流亡政府，可以講得係近代史上一個最成功嘅流亡政府，雖然權力核心遠離北京，但係權力仍然牢牢操縱響慈禧太后手上，冇人敢反佢，亦都冇人敢代替佢，一年半之後，仲能夠風風光光、大搖大擺返番北京，重掌最高權力，為大清帝國開啟現代新政，進入最後迴光返照大興盛期。

🙄簡單啲講，就係慈禧太后魅力沒法擋。當時統治大清接近半個世紀嘅佢，其實已經成為清帝國嘅代名詞，與其話當時嘅人接受清帝國統治，不如講佢哋接受慈禧嘅統治。身為中國人，我哋非常明白，我哋從來對人不對事，人際關係係我哋DNA裡面最重要構成社會嘅意識紐帶，乜嘢民主自由、乜春法律制度、甚至乜柒憲法主義、通通響人之後。中國儒家哲學係講「天人合一」，係「人本主義」，凡事以仁為本，由人出發，所以將人放喺第一位，一啲都唔需要奇怪。

😄所以我哋嘅世界，從來都係「人治」，我哋口講「法治」，其實心裡面係相信「人治」，做奴隸永遠比做選民來得舒服，中國人要管，如果唔管，中國會爆炸，其實係一番語重心長嘅金石良言。1911年辛亥革命之後，袁世凱稱帝，想復辟帝制，其實佢又冇錯。「法統」「法治」呢啲嘢，根本唔啱我哋胃口。我哋需要嘅一個「皇帝」，一個「明君」，帶領我哋，邁向光輝燦爛嘅未來……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/hmfbZ4ISn9A

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

【常威中史】慈禧平反系列（一百七十三回）

豆斗派出五大臣出洋考察，為君主立憲做預備功夫，其實都係順應大潮流趨勢，我真係唔明佢咁樣做後世人都屌，究竟係乜嘢道理？1905年，慈禧已經七張嘢，嗰頭近，佢明顯想喺死前再為清帝國做一啲貢獻。籌備君主立憲之前，佢委任當時清帝國駐美大使，正宗百分百香港人伍廷芳（1842-1922）負責深度改革大清法律制度，一切都係為咗全新局面作預備功夫。

1905年，美國總統羅斯福(Theodore Roosevelt Jr.，1858－1919）個女愛麗斯（Alice Roosevelt，1884-1980）訪問清國，伍廷芳就係負責翻譯嗰位。仲有呢一年係慈禧70大壽，佢冇大搞，當時由於言論自由風氣比今天更盛，社會上已經出現咗唔少抹黑慈禧嘅黑材料，呢啲材料大部分來自革命黨同外國勢力（日本主力）。但真相係，清帝國內其實擁戴慈禧嘅人仍然佔大多數，我常公仔之前已經講過，清帝國人民雖然對滿清王朝非常唔滿意，但佢哋仍然係相信慈禧嘅統治，依一點同後世嘅理解完全相反。所以慈禧一日在生，滿清王朝一日唔倒臺，佢一死，就得返三年命仔。

事實上由1903年開始，清帝國社會上嘅輿論已經開始提倡立憲，當時《大公報》社論咁樣寫：

『居今日而欲振興中國，採五大洲之良規，剔四千年之積弊，貧一變而為意，弱一變而為強，其必以君主之國而行立憲之法，最為當務之急。』

五大臣1906年夏天返到北京，即刻飛去頤和園向慈禧遞交報告，並交出考察資料，呢次五大臣出洋考察，絕對係貨真價實，絕無欺騙公費旅遊成份。1906年9月1號，係一個非常重要嘅日子，亦都係一個劃時代嘅日子，因為豆斗響當日借光緒帝之名發佈上諭，「奉太后懿旨」，清國開始仿行憲政，預備立憲。大家當然知，清帝國嘅君主立憲最後無成功到，因為1908年豆斗香咗，1911年清帝國已經倒臺收皮，之後發生嘅事之後再講。

有好多人話，清帝國嗰場君主立憲叫「假立憲」？講真我就唔明點解？立憲就立憲，邊有真同假呀？後來，滿洲國又話人偽滿洲國，汪精衛政權又話係偽南京政權，共產黨又叫做匪，乜都講曬啦你哋，全世界得你哋啱曬？

其時，攻擊清帝國嘅革命黨話，依一場假君主立憲，政權仍然掌握喺滿清皇族之手，佢哋根本冇將權力下放比平民百姓同公衆。嘩 ！大佬，你好！凡事都係要循序漸進嘅，權力冇可能一下子全面開放，如果真係咁做，唯一肯定會發生嘅事就係暴動同內戰。以日本做例子，日本人明治維新行君主立憲，應該由1867年德川幕府大政奉還嗰年開始計起，但要去到1895年先有明治國會民選議員產生，前後都相隔咗成30年。做嘢係要一步一步嚟，唔可以心急，由1903年開始起計，到1906年宣佈搞立憲運動，1908年上馬，其實豆斗已經做得好快同好有效率。


都係要屌？


搵香港做例子囉，香港人夠曬文明同靚仔啦，但係香港嘅民主路途行咗幾多年呀仆街？由1984年中英簽署聯合聲明開始，大英帝國知道香港一定要放手，所以玩嘢係時候，普選制度先由英國人引入香港，嗰陣時香港人先知道乜叫做選票呀！到咗今日，35年過去了，香港人有真正嘅民主未呀？行左30幾年，都係行得嗰少少咋，你問吓自己，你咁樣甩皮甩骨嘅身世，仲去屌慈禧太后唔畀民主中國人？傻的嗎？好心你啦屌……






【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

🔥【常威近代史】第二部《中國一百年前的第一次改革開放》實體書正式上架！

🔥請大家支持我常公子的近代史寫作計畫，Facebook專頁、Youtube、電子書、實體書，我希望用唔同嘅新媒體，令香港人或用粵語為母語嘅朋友認識或加深對近代史嘅認識，過程會好艱辛，但係我唔撚怕，我會努力落去，直至寫到王光美接劉少奇骨灰為止，我會用我嘅母語廣東話，寫下香港人眼中嘅近代史，為香港人響歷史上留下一個小小腳印。

🔥請大家支持我，到書局買本實體書！download咗電子書嘅朋友，亦請多買幾本實體書，送禮自奉，大家一齊推廣香港人保存粵語文化運動！有你有我！高山流水，沒齒難忘！

【129回：大清亡國關 #張之洞 蛋牛治】

😄今集講張之洞，半個西人，陰陽兩面。佢大概就係今日年青人稱呼為「道德撚」嗰種人，攞曬光環，名垂千古，家財億萬。背後壞事做盡，我乜嘢都唔講，我淨係講1900年嘅唐才常，唐才常係張之洞門生，佢哋自立軍起義運動，其實張之洞一定背後有所支持或默許，但係佢係死於張之洞之手。對出賣自己友嘅人，我完全冇好感。

😄歷史學家劉仲敬對佢嘅評價係：既要名譽，又唔敢冒風險。即係我哋俗語講又要威，又要戴頭盔。其實東南互保期間，慈禧太后著草千里外嘅西安，李鴻章死埋，張之洞如果有其氣魄，同西方列強傾得掂數，建立一個全新嘅國家又有何難？可惜張之洞冇咁樣做，佢仍然選擇效忠大清，效忠慈禧太后。講真，就係唔敢冒險，唔想負上出賣主人嘅惡名，我叫佢係「奴性重」，現代人嘅講法可以係「理智嘅選擇」。

😄但係凡事太理智，並唔係一件好事。人生需要熱情，需要一團火去做嘢。如果我常公仔太理智，我亦唔會選擇寫近代史，件事就係咁解。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/CqagS-N4gN4

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

【常威中史】慈禧平反系列（一百七十四回）

1906年9月豆斗訂立政治改革嘅大方向，君主立憲火車頭開動（雖然好快就撞山）。亦係呢個時候，豆斗開始身體唔好。慈禧一直係一個身體非常之好嘅人，相對於長期漏精冇神冇氣嘅光緒帝，慈禧的確保養得好好，1905年豆斗70歲嗰陣，史料記載佢仲可以健步如飛，每日工作時間亦超過八小時以上。大家千祈唔好以為國家最高領導人冇嘢做，其實忙到黐膠線，如果可以嘅話，千祈唔好打呢種工。

大清確立咗立憲嘅大原則後，1906年9月2號，慈禧任命咗一班官員嚟商討政府機構改革，作為建立君主立憲嘅第一步。討論嘅結果，係將原本老撚土嘅「六部」擴大成11個現代化政府部門，目的係要提高效率同埋加強現代立憲政體嘅形象工程。

但係聰明嘅豆斗不愧為一個馬基維利主義者，政府改革嘅第一輪討論，佢立刻就將五個部門排除出討論議題之列，五個部門分別係軍機處、內務府、八旗、翰林院同太監。似乎豆斗有意將紫禁城內嘅貴族權力同清帝國國家權力分開。豆斗咁樣做，無非係要保障滿洲貴族統治階層嘅絕對利益，其實係無可厚非。

而且豆斗由一開始，根本就係維護滿洲貴族利益嘅代言人，佢對佢呢個政治任務，從一而終，終生不渝。加上中國人做事嘅傳統，就係一定要保住自己利益為先，冇錯嘅。

香港公務員都識得保住自己利益，唔係咩叫鐵飯碗？

你睇吓今日，有政府官員倡議將退休年齡押後到65歲，講真，香港私人機構退休年齡冇一定嚴格限制，你做得嘢90歲都照出糧比你，相反退休年齡喺公務員體制就係一個重要問題，目前公務員文職職系人員嘅退休年齡為60 歲， 而紀律部隊職系人員為55歲或57 歲；至於選擇延長服務年期嘅文職職系人員退休年齡為65 歲， 而紀律部隊職系人員( 不論職級) 均為60 歲。咁即係話，如果押後五年退休，咁做公務員隨時可以做到70歲，社會上亦會出現65歲嘅警察。

政府講得好好聽，鼓勵押後退休年齡，話係想釋放社會上嘅勞動力，增加香港競爭力，其實明眼人都睇得出，提出延後退休嗰班人又係公務員，呢個講法只不過係為咗佢哋可以玩耐啲鋪路。仲有一點大家無講，97年前入職嘅公務員退休大部份可以咬長糧，但97年後已經改變好多，有啲有得咬，有啲冇得咬，延期退休玩多五年，即係可以出多五年糧，咁叫做除笨有精。

好心喇，上曬岸嘅人唔好再霸住啲高位喇，搵夠就乖乖地退休養狗種花啦，香港唔係冇咗你哋唔得架？而且白色恐怖下，香港後生一輩已經冇乜希望，畀啲空間佢哋上位喇好心。

豆斗政體改革嘅步伐行得好快，1906年11月7日，重整政府架構為 11個部門。不過事情並非表面咁簡單，中國人做事，一定會明爭暗鬥，一場改革背後，其實又係滿人同漢人之間嘅鬥爭，又係南北之間嘅鬥爭。


王家衛套一代宗師講南北之爭，我細讀歷史下，真係回味無窮，一條長江劃界，南北有別。今時今日嘅香港政局，香港人同阿爺嘅關係，其實又係南北問題，一個百幾年嚟都冇解決過嘅終極問題。


下次繼續大清君主立憲改革……

【常威中史】慈禧平反系列（一百七十五回）

1906年豆斗搞嘅 #君主立憲 運動同近年嘅香港政局都好相似，政治改革係人心所趨，上層建築統治階層拋出方案，但方案嘅內容同民間嘅希望明顯有極大的差異，香港嚟講，香港市民希望「#真普選」，係指謂一人一票選出行政長官同埋全體立法局議員（利申：我個人支持真普選）。但中央點會比你咁樣做？香港特別行政區作為中華人民共和國嘅一部份，如果選出一個有異心唔願意效忠共產黨嘅特首，事情會係相當尷尬。

#權力 就係權力，權力嘅意思就係「利用恐懼產生秩序」。一個冇秩序嘅世界先係最危險嘅世界，警察能夠維持治安，唔係因為佢哋著住警察制服，而係因為佢哋「陀鐵」，同樣道理，一個政權之所以能夠維持，係因為有「軍隊」backup，有絕對武力令民眾產生恐懼，「#槍桿子出政權」係大道理，明白依一點，面對世事就會easy好多.......

講返豆斗嘅君主立憲運動，自從1906年上馬，清帝國政府推行咗一系列嘅預備工作，包括改革法律、推廣西式普及基礎教育、向公眾宣傳憲政大綱、以及建立現代化嘅警察制度維持治安。之前五大臣出國考察後提出嘅報告，都將日本同埋英國嘅君主立憲制度視為典範參考。

但係豆斗始終都係滿清權貴同埋貴族嘅代表人物，一邊搞君主立憲同時，一邊又靜靜雞將權力收歸滿人手上。我之前再三強調，晚清嘅政治格局係 #南北之爭（而家都係），即係滿人同埋漢人之間嘅權力鬥爭，隨著 #李鴻章 去世，滿清貴族好希望響南方漢人士大夫集團手上收番一切權力。上集講過，1906年11月將六部改為11個現代化政府部門嘅大改革，但重整之後，漢人響政府高層佔據不足三份一位置，相反更多滿洲人皇族成員被提拔上位，依一點其實擴大咗當時漢人同滿人之間嘅歷史裂縫，正正亦都命中咗 #革命黨 口號「驅除韃虜，恢復中華」嘅宣傳策略。

革命黨最成功嘅地方，就係成功創造咗無堅不摧嘅利器「#中華民族」（這一點真係要多謝 #章太炎），奪取咗政治話語權，將群眾歸邊，中華民族其實即係漢族，亦即係清帝國之內嘅大多數人民，利用民族區分，將漢人同滿人完全分隔出嚟，各自代表不同嘅利益，而革命黨自稱係代表漢人利益，滿清王朝則代表滿人利益。

同一時間，地方政府中滿洲人嘅權力都進一步鞏固。1907年朝廷通過直接任命各省嘅司法、警察、同農工商局長嚟約束各省 #總督 同巡撫嘅權力，其實某程度上就係對地方總督削權，朝廷會任命（空降）各省嘅財政部長管錢，亦將各省嘅軍隊移交比新成立嘅「軍部」管理。

哇……唔俾你管錢，唔俾你管兵，咁就即係架空你啦。#馬基維利主義者 豆斗實在太聰明，利用君主立憲運動作掩體，一步一步收返本來喺漢人士大夫手上面嘅地方權力。最聰明嘅策略，就係懂得表面做一件事，其實內裡行緊另一件事。好似今日香港嘅四任特首，表面服務香港人，其實內裡替中央政府打工，就係咁解。當時豆斗已經72歲，身體狀態開始滑落，嗰頭好X近，臨死之前，佢仍然努力維持滿清皇族同貴族嘅利益。

當然聰明人都有破綻，就係聰明反被聰明誤。

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【130回：大清亡國關 #港督卜力 蛋牛治】

😄八國聯軍侵華嘅問題，講咗百幾年。實際上係冇一件咁嘅事，冇人侵略你清帝國，完全係幻想，完全係謠言。1900年當時清國天地大亂，義和團仇殺洋人，外國人組織軍隊救援同胞，理所當然。當然，當年希特拉入侵其他相鄰國家，都係用拯救區內德國人同胞為藉口。但係八國聯軍真係冇咁做，佢哋拯救完同胞，佔領咗北京差唔多兩年，小小殺燒搶掠，1902年頭，就將北京交返俾大清帝國慈禧太后，和平撤出，當然清國需要簽下天文數字賠款嘅《辛丑條約》。

🤔成件事，係清國人唔啱，義和團暴民嘅出現，同西方世界無關。義和團秩序嘅失控，亦都係清政府自己嘅問題。當然你可以話，大規模民變係貧窮嘅問題，做成清帝國普遍貧窮背後嘅元兇係西方列強控制咗清角嘅銀根，所以仇洋有道理咁話。但係如果你咁樣諗，就犯咗思考邏輯上嘅問題，我哋唔可以將問題無限伸延，否則最後嘅元兇應該係上帝，因為係由佢創造萬物。

😄最近有人同我討論「究竟讀書有冇用」呢個命題。同樣道理，我哋唔可以將個問題無限伸延……而且一開始，首先要搞清楚「有有用」到底係乜嘢意思？如果你認為「有用」等於發達，而發達嘅定義係有一億港幣身家以上，咁我可以同你講，讀書應該係冇用嘅，就算俾你響牛津讀到PHD，你想搵一億都好難。但另一方面，讀書其實係有用，因為讀書可以令人頭腦清晰，變得更加聰明，遇上惡劣環境有更大的適應能力同求生能力。而且仲有一點，「究竟讀書有冇用」呢個命題究竟有冇普遍性呢？每個人嘅經歷唔同、背景唔同、本質唔同、命運唔同，好難一概而論。因為你無論得出任何結論，都有其他個別例子顯示出相反嘅答案。

😃好似最近的熱門話題引導條例，有人話係為咗「正義」而立法，又有人講，立法會後有嚴重嘅政治動機。一個頭腦清晰嘅人，當然知道真相係乜嘢，尤其係讀過歷史近代史，知道大洪水要到，其實係避無可避。就算畀你守得住一時，亦守唔到2047。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/TiF0gPDj0lQ

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

【常威中史】慈禧平反系列（一百七十六回）

聰明反被聰明誤，機關算盡，最後係自食其果。

豆斗借住推動君主立憲為名，逐步將分散於南方漢人手上嘅權力收歸於滿清皇族自己友手上。所謂君主立憲，大前提係釋放皇權勢力到民間，建立民主議會行代議政制，但豆斗1906年之後做嘅嘢，明顯係背道而馳。大概佢當時係咁樣諗，身為馬基維利主義者嘅佢非常明白一旦君主立憲開始推行，滿清貴族王朝好有機會靠邊站（因為滿人喺成個清帝國人口比例實在太低，約不足3%），最後失去主導權同話事權。所以真正推行立憲之前，佢想將皇族嘅權力造大，為整個滿清貴族響未來新時代爭取更大生存空間。

作為一個至死不渝代表皇族利益嘅代言人，慈禧嘅行為並冇道德上錯誤，當然佢咁樣做，最後係自食其果。又不過佢未食呢個蘋果之前，佢已經死咗，所謂大洪水到關人撚事。

地方政府安插大量滿人，收番財政同埋軍事嘅地方行政權力。不但如此，佢仲將矛頭直指向當時權傾朝野嘅太陽能電筒袁世凱！咁樣做真係大錯特錯！槍桿子出政權，袁世凱當時手握清帝國最大嘅武裝力量，所謂北洋六鎮新軍，我哋睇睇袁世凱嘅軍事力量點樣不斷坐大先……

1895年，甲午戰爭後，清廷派遣胡燏棻響天津編成十營「定武軍」；同年10月袁世凱接手定武軍，響天津小站練兵。袁世凱仿照德國同日本陸軍建制對定武軍進行改編，由4000人擴編至7000人，並定名「新建陸軍」，簡稱「新軍」。1898年，新軍被編入守衛京師之一嘅武衛右軍，後嚟跟隨袁世凱前往山東鎮壓義和團，並擴編至20000人。八國聯軍入京，武衛軍諸路損失慘重，唯有袁世凱嘅武衛右軍保存完整實力，成為清朝北方碩果僅存嘅新軍武力。

1902年，袁世凱持續建設武衛右軍，改名「北洋常備軍」，至1904年轄有三鎮。1905年5月，清廷以北洋常備軍、京旗常備軍為基礎新建三鎮，與舊三鎮合稱「北洋六鎮」，並改名為陸軍第一鎮至第六鎮，又稱「北洋新軍」，負責拱衛京畿，袁世凱把持嘅北洋系統正式成形。六鎮新軍之中，全部都係袁世凱嘅自己人，呢班人大多數出洋留學接受正式軍事訓練，佢哋亦都成為咗1911年辛亥革命之後中國嘅軍閥，佢哋嘅事日後大把機會講。

凡事凡物都有一個發展模態，就係起初一定係好事，但過咗蜜月期就會變成壞事，打工如是，婚姻如是，做生意如是，政治如是，人生亦如是，活過40歲嘅人應該知道我講乜。北洋六鎮軍事力量，到咗1905年左右，變成咗滿清權貴眼裡邊嘅眼中釘，佢哋唔想袁世凱成為另一個曾國藩或者李鴻章，於是1907年，袁世凱失去咗佢六鎮北洋軍中嘅四鎮，勢力大大減弱。

仲未夠喉，1907年8月，清政府發出最後一擊，就係將兩個最有權勢嘅漢族總督張之洞同埋袁世凱，調到北京中央，入軍機處擔任軍機大臣，袁世凱同時成為外務部部長（外交部長）。這一招叫明升暗降，調你去中央，就即係將你調走，離開你本來嘅山頭。

1949年中華人民共和國成立，毛澤東就將各路嘅軍事指揮官逐步調返曬去北京中央任職重要位置，仲封咗佢哋做「十大元帥」，個名就好聽，其實就係杯酒釋兵權，驚你繼續擁兵自重會作反。同樣退守臺灣嘅蔣介石，亦都用呢招攞走曬其他人，好似桂系國防部長白崇禧嘅軍權。

去到更遠嘅歷史，岳飛（1103-1142），中國嘅第一號民族英雄，其實都係衰依瓣，手握重兵岳家軍，抗金戰無不勝，唔聽皇帝支笛，敢仲得了？用金牌召你返中央，你唔肯返，叫咗你12次（十二道金牌），你先返，咁皇帝可以點做？人頭落地係39歲嘅岳飛自己攞嚟，與人無尤。你死咗，就係轟轟烈烈嘅民族英雄，如果最後係岳飛帶兵返中央推翻宋朝，佢就係另一個趙康胤，歷史就係咁嘅一回事……

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

推一推

【131回：大清亡國關 #佔領北京 蛋牛治】

😄今年一個話題好heat，就係西方果套民主自由議會政治，其實唔適合中國國情，中國要發展自己一套嘅政治模式，大概就係「有中國特色嘅社會主義」。類似嘅講法，二三十年前全無市場，因為當時中國好窮，係第三世界發展中國家水平，但係隨住最近30年，中國經濟強勁崛起，到而家同美國平起平坐，大家打貿易戰。今時今日，中國要有自己一套符合自己國情政治模式嘅講法，大把擁躉，起碼喺香港就有唔少。

😄平心而論，中國近二三十年經濟嘅強大發展，的確係同鐵腕統治有關，冇咗中共森嚴制度下，強大嘅控制資源分配手段，中國經濟亦都冇可能響咁短嘅時間內高速向前。你唔認同都冇辦法，事實擺響眼前，冇得抵賴。好多人盲目相信自由市場經濟，覺得政府或者上層建築儘量減低干預、減少操控，任由市場發展，就會無往而不利。但事實上，資本主義嘅弊病亦都喺呢度，當整個社會由少數人嘅財富所操控，就會造成極度嘅貧富不均同不公平現象，你要例子，你就睇吓香港嘅樓價囉，最後，亦都要政府插手干預調控。

😜好！寫到呢度，咁我係咪認同現代中國嘅政治制度有其優越性？當然唔係。我只係想同大家講，分析事物，往往好難一概而論，針冇兩頭利，凡事有利亦有弊，有up side亦有down side，世界唔係只有黑色同白色，其實只有一種顏色，就係灰色。今時今日，中國經濟非常強橫，但係普羅民眾能夠分配到嘅實際利益又有幾多？普羅民眾係咪活喺一個快樂嘅社會裡面？我唔知道。讀歷史有一個結論，就係一個美好嘅世界，其實從來冇出現過。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/2xz4HvoFLIQ

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

【常威中史】慈禧平反系列（一百七十七回）


慈禧一方面將漢人削權，一方面大力推行立憲運動進程，1907年8月，張之洞，袁世凱調入軍機處擔任軍機大臣，第三個新任嘅軍機大臣係載澧（1883-1951），載灃當時毛都未出齊，只有23歲，係新一代滿清皇族開明改革派嘅代表，豆斗嘅意圖非常明顯，佢係想選擇「年青有為」嘅載灃成為佢嘅繼承人，因為豆斗已經發現自己72歲嘅身體狀態開始滑落，當然載灃亦唔係什麼好料子，但係當時整個滿清皇族中，實在無人可用（其實都幾陰公）。豆斗一年後死咗，亦係載澧弄權逼退袁世凱，間接（直接）導致大清亡國。


事後睇返，一條廿三四歲也文也武嘅富九代，竟然同 手握重兵嘅北洋軍閥系統大佬袁世凱爭權，唔收皮就有鬼。歷史無如果，但如果豆斗死後，載灃肯同袁世凱好好合作，成件事可能會有更好嘅發展，當然亦有一個可能性，就係袁世凱會更加快做皇帝。一件事好定唔好，其實係有多個角度去睇。


繼續講立憲運動進程，1907年8月清帝國成立憲制局，籌備君主立憲工作，1907年9月派遣三名官員到日本、德國同英國，進一步學習立憲政體，國內亦都頒佈法令開始籌備國會，成立省、懸地方議會。


豆斗搞君主立憲，某程度上係想舒緩民間嘅革命思潮。相同嘅情況亦發生喺沙俄，1905年「血腥星期日」大屠殺後，人民革命情緒升溫，沙皇尼古拉二世亦開始籌辦國會選舉（杜馬，杜馬一名源自俄語動詞「думать」（dumat），意解作「考慮」或「思考」）嚟替社會動盪降温。當然清帝國同俄國一樣，搞民主政治改革，不但唔能夠紓緩革命思潮，反而帶嚟反效果，馬騮甩繩，自然更加生猛，兩個帝國先後在1911年同1917年崩潰。


清帝國同俄國嘅遭遇，話咗畀之後好多獨裁者獨裁政權知道，群眾係受硬唔受軟，要建立秩序，要政權穩定，一定要用恐懼行先，放權畀你？不如先鎮壓你，斬草除根，問你點發威？歷史上最偉大嘅馬基維利主義者，毛澤東同史大林，我相信佢哋係深深理解到依一點。


呢個時候流亡日本以梁啟超為首嘅立憲改革派，亦都希望加入清帝國嘅立憲運動，佢哋拋出願意同清廷合作嘅興趣，可惜豆斗同袁世凱唔睬佢哋。呢件事，令到梁啟超嘅立憲改革派成為中間派，難聽啲講，係兩邊都唔係人。清帝國覺得佢哋係狗，海外華僑覺得佢哋立場兩頭擺，屙尿屙到成地都濕曬，之後中間派仲越做越頹，唔少本來支持康有為、梁啟超立憲派嘅海外華僑，轉而支持立場更加鮮明嘅孫文黄興同盟會嘅暴力革命派。

寫到嚟呢度真係有啲心酸，尤其是我哋呢一代喺六四事件成長過來嘅香港人，香港嘅民主派（或稱泛民），曾經意志堅定，立場統一，以反對派自居，抗衡極權統治。可惜2012年，中聯辦副主任李剛就政改方案與民主黨三名核心成員何俊仁、劉慧卿及張文光會面，民主派自愿行入中聯辦，從此接受國家收编，之後嘅結局，就係民主黨立場兩頭擺成為中間派，引發內部分裂，激化矛盾，成個泛民陣營越做越頹，卒之到咗今日嘅境地，俾上頭監生醃死。


講返清朝，自從豆斗一聲令下要搞立憲，民間亦都有大量社會賢達響應，甚至滿蒙貴族中間亦有人加入催動君主立憲陣營，一批又一批來自全國各地嘅代表團分別到達北京，要求早日頒佈憲法。終於響1908年8月27號清帝國發佈「憲法大綱」（ Agenda），正式訂立君主立憲時間表。


憲法大綱詳程我哋下次再講，但係預先通告，8月27號頒布大綱，11月15號慈禧就歸西……世界上有樣嘢，叫時不利兮。


【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威中史】慈禧平反系列（一百七十八回）

響豆斗安排下，清帝國政府響1908年8月27號發佈咗「憲法大綱」，清帝國行君主立憲正式進入程序化。「憲法大綱」同基本法一樣，首先維護皇權，劈頭第一款就係：

「大清皇帝統治大清帝國，萬世一系，永永尊戴。」

你可以即屌，但係講明最後話事係邊個？其實又冇錯。《基本法》都係一樣，總之香港特別行政區作為中華人民共和國嘅一部份，最終權力歸於人大（所以先有人大釋法，亦只有人民代表大會先有最終權解釋基本法內容權力），清代「憲法大綱」亦有三權分立精神存在，大綱咁講「君上有統治國家大權，凡立法、行政、司法，皆歸總攬，而以議院協贊立法，以政府輔弼行政，以法院遵律司法」，三權分立，係西方自由民主精神嘅基礎，大清搞君主立憲亦都要遵從基本守則。但今時今日香港，竟然有人話要行政干預立法，政治淩駕司法，過去百幾年，我哋中國人真係鳩搞一趟，返屋企食屎吧啦。

「憲法大綱」亦寫明，君主與百姓，貴族與平民，在憲法面前人人平等，同時亦都保障咗基本人權，大綱咁寫「臣民之財產及居住，無故不加侵擾」；「於法律範圍以內，所有言論、著作、出版及集會、結社等事，均准其自由」。睇到呢度係咪想喊呀？係啊，我常公仔都寫到眼濕濕，原來百九幾年前，清帝國頒佈嘅第一部憲法大綱，已經講到明私有財產不能被侵吞，人民有言論出版結社集會自由。講多次，仆你個雞，今時今日究竟做乜鳩？行咗百幾年，真係鳩做。來生不做中國人，啱嘅。因為下一世，你都未必有言論出版結社集會嘅自由，把撚啦。

另外，「憲法大綱」列明人民有投票權，只要符合資格，任何人都有選舉權同被選舉權，「選舉用投票之法，以投票多數而合例者，方准當選」。百九幾年前，份大綱冇講過可唔可以DQ民選議員？你知道呢個世界嘅嘢，有選民嘅選票當選唔代表你一定可以做議員，你講嘢唔啱聽，態度唔好，或者樣衰，乞人憎，年紀太細，都有可能被DQ，DQ你就DQ你，唔使講理由，亦唔洗講合唔合法。其實，仲選舉嚟托柒咩？

清帝國「憲法大綱」下次繼續講，今日真係扯曬火。

其實香港由2016年第一次DQ立法局民選議員游惠禎與梁頌恆、姚松炎、羅冠聰及劉小麗開始，我已經覺得玩卵完，特區政府睇見市民冇乜反應，DQ完一個又一個，以為覺得好好玩，其實特區政府嘅所作所為，已經摧毁咗過去30年千辛萬苦建立起來嘅啲啲民主制度，DQ議員係現象，破壞嘅係核心價值，粉碎嘅係人民對國家嘅信心。好似將一個現代人，夾硬帶返去茹毛飲血嘅時代，牛扒一成熟都照食，當然覺得飽就冇問題，我哋嘅社會上面，就大部份人覺得冇問題。

冠冕堂皇嘅說話我唔識講，我淨係覺得，白色恐怖嘅時代其實一早已經來臨，大家仲唔醒覺，一來奴性太重，二來覺得火未燒到埋身，但係我講多次，我講咗好多次，只要碎肉機一經開動，任何人都唔撚使旨意獨善其身，大家覺得冇乜嘢，覺得我吹水，唯有講句：

等著瞧，等著齊齊食香蕉。


【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

❤《YouTuber重新手到網紅》實體書正式全城上架！

🔥請大家支持我常公子同其他三位年青作者合著的新書！Go！Go！Go！

【132回：大清亡國關 #罪己詔 蛋牛治】

😄今集講罪己詔，清朝好多個皇帝都頒發過罪己詔，就係公開向人民道歉，表達自己唔啱，企圖挽回民意。1900年八國聯軍入京，搞到國破家亡咁滯，慈禧就用光緒嘅名義頒佈罪己詔，責備自己。似乎係中國古代，皇帝某程度上都需要民意支持。但係好奇怪，歷史行咗100年，今時今日嘅中國政府，從來唔會向人民道歉，你話奇怪唔奇怪？

🤓最近逃犯條例出場，霸王硬上弓，點都要通過。睇住件事發生，眼都直埋，民意從來唔係政府考慮嘅因素之一，現代政治嘅實踐，近二十年香港係一個非常之好嘅反面教材，自由民主、言論自由一日一日倒退，白色恐怖用唔同嘅方法同渠道殺埋身。97年前我哋擔心嘅問題，逐漸成為現實，更由現實變成習慣。目前香港有好多人已經唔再理會政治，唔再關心身邊發生嘅一切，一心只希望搵多啲錢，可以移民最好，如果唔係送仔女入國際學校，遠離制度對下一代嘅污染。依一點，我都好明白，甚至理解（甚至自己都想做，可惜冇錢）。

😳97年前，香港總督彭定康曾經講過，佢最擔心嘅事情，並非中共會扼殺香港人嘅自由，而係香港人自己本身心甘情願斷送自己嘅自由。一語成讖，彭定康的確好犀利，亦好有遠見，佢真係知道石梨貝水塘嘅馬騮係鍾意食香蕉、唔鍾意食橙。未來會係點？我真係唔知道，又借用我最喜愛歷史學家霍布斯邦嘅觀點：「人類總係選擇向最壞嘅方向走」。香港目前，正朝最壞嘅方向走緊。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/wOapdDaMaB4

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

【常威中史】慈禧平反系列（一百七十九回）

1908年頒布嘅「憲法大綱」內容，響國會議院未開始之前，成立「資政院」作為過渡機構，情況好似1997年前，香港成立「臨時立法會」一樣，為九七回歸作好接軌安排。事實上係1907年，清帝國內好多重要嘅省份已經成立咗「諮議局」。資政院模仿當時西方議會制度，分成上、下議院，各佔一半議員。上議院議員由皇上指定，即欽點產生，佢哋大多數係滿蒙貴族皇室階層；而下議院則由各省地方「諮議局」議員選出，而「諮議局」議員則由民衆直接選舉產生。

其實情況同香港都好相似，香港特別行政區內閣最高權力機關就係「行政會議」，而行政會議成員，則由特首決定欽點（當然背後係中央話事），香港市民能夠參與嘅選舉，只係立法局議員普選部份，至於立法局功能組別係唔係普選？就要睇你點睇。上下議院制度，亦即係貴族院同平民院嘅分別，依套議會制度響西方世界沿用到今時今日，好似美國嘅參議院同衆議院，就係由上下議院演變而嚟，當然目前美國參眾兩院議員都係經由民主普選產生。

而過渡機構「資政院」嘅《選舉章程》同時響1908年7月22號向全國頒布。咁係咪一人一票呀？梗係唔係啦，今日都唔係啦，何況百鳩幾年前？《選舉章程》規定，選民要係男性，25歲以上，仲要有一定數目嘅產業（有屋有田，咪即係地主囉）先可以有權投票，咁又唔係有錢佬地主奴隷主大曬嘅；《選舉章程》又補充，如果你冇資產同房地產backup，只要你喺地方辦學或者其他公益事務滿三年成績超卓者（即係所謂社會賢達，公共知識份子），都有投票權；其他有權投票嘅人，包括喺國內國外獲得中學以上學歷而有畢業文憑在手嘅知識份子，或者擁有之前舊學制舉貢生員以上出身者（即通過舊學制中鄉試縣試嘅讀書人）；或曾經任職文官七品或武官五品以上，又未被革職者（咁即係九品芝麻官包龍星冇份），都有權入票站投票。

而被選舉嘅人，則要年滿30歲以上，其他條件同選民差唔多，本身係官吏、軍人、巡警或小學教師都唔可以參選。

一句到尾，響1908年頒佈嘅選舉章程中，有份投票嘅人或有份被選舉嘅人，其實都係社會上嘅貴族階層或精英知識份子。喺當時嘅社會，呢啲人只係占社會嘅極少數，要知道，20世紀初期嘅清帝國，仍然有99%以上嘅人口係文盲，咁嘅選舉，一定唔會有民主喇？

但係實情係，一個唔識字嘅人的確係冇可能參加民主選舉。喂，比張選票你，你連名都唔識讀？名又唔識簽？咁你老母選條毛咩？就算今日嘅香港，文化水平較低嘅人口，佢哋嘅盲目投票意欲亦足以造成一連串民主災難，呢啲嘢過去幾十年大家都睇到，我唔想再多講喇。好多大愛左膠強調普選一定要一人一票，人人有份投票，但真正一人一票來臨嘅時候，可能就係大洪水到嗰一刻。

聰明絕頂嘅豆斗，點會睇唔到呢一點？佢非常明白，民主選舉必須要普及教育行先，人民起碼要識字，有一定文化水平先可以投票。其實基本上冇錯，所以「憲法大綱」擺出時間表，真正嘅國會成立要喺九年後實施，即係1917年，十月革命嗰年。豆斗係希望用九年時間普及全國教育，提高人民嘅識字率，令國會選舉可以順利發生。革命黨人話，豆斗要等九年先肯開國會，其實係拖字訣偽立憲，但唔該大家講句公道說話，豆斗有冇錯先？其實佢冇。之前我常公仔講過，日本明治維新由大政歸還開始，足足隔咗30年，到1895年先召開第一屆國會選舉，日本先有第一個民選議員產生，日本人用30年籌備，豆斗只係想用9年，其實已經快咗好X多。

我諗，豆斗真係希望佢有生之年可以睇到國會成立，君主立憲成真.......可惜佢自己都等唔到，大清帝國更加等唔到。豆斗就快死，下一集我哋會回帶，講吓1908年之前，仲有乜特別嘅歷史事件發生。

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87