【大清亡國關慈禧蛋牛治】第一回

1001 回覆
108 Like 23 Dislike
2018-11-19 12:00:52
我常威死咗後,響母體遇上難滾死於花柳病嘅同治帝載淳,佢叫我寫篇嘢幫佢老母伸冤,皇帝叫到,照做囉。

佢老母係慈禧太后。

好多人都將大清亡國瀨落佢親生老母慈禧身上,話佢把持大清帝國最後五十年政權,7事做盡,令成個國家被西方列強瓜分,直頭係民族罪人,到底真相係唔係咁呢?

同治叫同治,因為一場辛酉政變,1861年咸豐帝病死熱河,慈禧夥同慈安太后扳倒八位顧命大臣奪權成功,六歲幼子載淳繼位,兩個女人響背後操縱朝政,垂簾聽政,共同統治大清,故稱「同治」,慈禧知書識禮,得勢時年僅24歲,從此大清國運就同依個年輕女人連結埋一齊。

慈禧得到嘅權力可同唐朝武則天相題並論,但係武則天接手嘅係中國歷史上數一數二嘅大唐盛世(一部法拉利);比較下,慈禧接手嘅只係一部單車,仲要係(一部共享單車)。

1861年嘅大清帝國已經係五癆七傷,外乾內乾,得番半條人命。事實上真正為清國送上棺材嘅係大英帝國,1840年第一次鴉片戰爭,講咗比全世界知清國嘅軍事實力係停留響十八世紀,滯後於世界大約一百年,幾隻戰艦幾千名次級遠征僱傭兵,就可如入無人之境予取予攜,割地賠款(香港島,九龍半島界限街以南),乜都肯滯白痴仔咁,你估其他國家會點諗?

二十年後,1860年第二次鴉片戰爭爆發,英法聯軍又入嚟大清洗劫一次,仲打到去北京火燒圓明園,姦淫擄掠無所不為,咸豐帝走佬避走熱河,衰到亡国咁滯。同一時間,1850開始國內爆發civil war,洪秀全揸住上帝之子旗號,太平天國佔領半壁江山,立都南京(天京),清國堅守先打自己人再打外國人原則,集結所有兵力,1860年前後建立江南大營同江北大營,企圖阻止太平天國繼續北上……

外憂內患,慈禧接手政權後,面對嘅就係一個咁嘅死局,十三張手揸兩個碌,點好呢?

関於為慈禧平反,下次繼續……

2018-11-19 12:02:51
【常威中史】為花柳治替慈禧平反(一)

今日繼續同同治老母慈禧平反。1861年接手大清政局嘅慈禧面對內憂外患,未講外患,先談內憂。蔣介石1931年講過「抗日必先勦匪,攘外必先安內」,中國人最叻打自己人維穩,當年嘅大清亦唔例外,英法聯軍任由佢殺燒搶掠縱橫九洲,全部滿清軍力則集中成一碌,對抗太平天國。

太平天國自1850年十二月初六於廣西金田村起事,1853年攻克南京改稱天京,但中國人就係唔鬥唔X舒服,1856年天王洪秀全與東王楊秀清反目,一場「天京事變」令太平天國急轉直下,自相殘殺之餘,強將四散,大清逐將所有可以動用嘅兵力集結於江南江北兩個大營,圍剿天京,剿匪有望之際,洪秀全阿哥耶穌仲照住佢,1859年洪秀全老表正宗Hongkonger洪仁玕抵達天京,為太平天國注入殖民地新思維,響「朝中無將,國中無人」絕境下,洪秀全被逼起用陳玉成(英王)同李秀成(忠王)兩個廿歲左右嘅年輕農民將領壓陣。

世事就係咁奇怪,陳玉成(綽號四眼狗,傳説中華第一美男)及李秀成(此人更加不得了,我哋目前所知嘅太平天國史料,就係來自佢被擄後獄中所寫下嘅第一手資料「天朝十誤」)依兩位後生仔原來係軍事天才,佢哋用農民靈活嘅游擊戰略打到清兵一楝都冇,先後大破江南同江北大營,五六十萬清兵主力土崩瓦解,徹底粉碎大清軍事力量!

大清至此,其實已經玩卵完,此後同太平天國嘅戰爭,只能倚靠民間團練曾國藩嘅湘軍同李鴻章嘅淮軍,一個政府要靠地區財閥嘅私人軍隊平亂,後果可想而知,從此以後,權力正式由北方嘅滿清貴族手裡轉移到南方士大夫手上,慈禧得到依架大清爛單車亦變成一架共享單車,就係咁解。

太平天國嘅土炮農民革命最後雖然失敗收場,但佢哋嘅革命經驗影響深遠,七十年後嘅另一場由中国共産党領導嘅農民革命,最終就取得偉大光榮勝利,為中国開展一個新時代一個新世界。

1861年,24歲嘅慈禧面對嘅國內環境已經咁惡劣,至於國外,就更加係唔得笑,下次繼續同佢平反。



2018-11-19 12:04:03
【常威中史】為花柳治替慈禧平反(三)


1861年,英法聯軍大肆搶掠,再逼北京答應增開通商口岸、開放長江、外判海關同外國公使駐京等條款後撤走,大清已經係一間市值仙股嘅空殼公司,冇兵又冇錢(個殼仲值錢嘅),仲俾洋人踩到上心口。毛主席講過「槍桿子出政權」,冇槍在手只能食屎。事實上最終能夠平定太平天國之亂,主要係靠民間團練曾國藩嘅湘軍同李鴻章嘅淮軍,曾(湖南人)、李(安徽人)、左中棠(湖南人、楚軍)等一批來自南方嘅漢族官員,立下大功保住大清江山,自己亦逐漸掌握地方大權,事實上中央政府已經冇能力控制佢哋,反過來係佢哋唔駛再聽中央政府枝笛。自此以後大清嘅權力核心已由北方轉移至南方、由滿洲人轉移至漢族人手上,之後半個世紀,由慈禧主理嘅北京滿清貴族中央政府實際權力有幾多?我唔知,但一定冇你想像咁多囉。


有燈就有人,有兵就有權,滿清中央政府軍隊瓦解(八旗滿蒙系統)後,民兵私人軍隊制度冒起,奠定咗後來民國軍紳政權嘅基石(袁世凱、北洋軍閥系統),從十九世紀晚期開始,地方軍隊再不一定效忠中央政府,中央政府對地方軍隊亦無絕對嘅領導權力。曾國藩同李鴻章之流,響1860年前後,絕對有能力自己插旗割地稱皇,或者推翻大清亦有可能,正史亦有記載淪為階下囚嘅忠王李秀成曾經煽動曾國藩叛變大清,但曾國藩並冇咁做,曾李依亭漢族官員明顯係100%愛國人仕,亦係儒家哲學嘅忠實發燒友,佢哋重名節大於權力,鍾意比人讚比皇帝讚,太平天國之亂結束後,佢哋選擇解散自已話事嘅私人軍隊,繼續效忠大清做其門口狗就係最佳例子。


順帶一提,平定太平天國同英法軍隊都有直接關係,當中有不少重要戰役係由英法軍隊參予而得到勝利,當初英法對天平天國採取中立態度,但後來佢哋發現保住大清依個垃圾政權仲有著數,於是決定幫大清平亂,而且曾李等人經營私人軍隊嘅錢,除咗向土豪劣紳募捐(勒索)得來之外,亦有部份係向外國銀行借貸,由此可見,外國勢力響當時已經係無孔不入干涉緊中國嘅內政。


風高浪急下,慈禧以24歲妙齡執政,首先令曾國藩李鴻章杯酒釋兵權,繼續為大清依間空殼公司賣命,足見手段之高明。


大清股價跌到落一仙停牌咁滯,究竟點樣重組架構令股價反彈?下次繼續……


2018-11-19 12:05:10
【常威中史】為花柳治替慈禧平反(五)

繼續停留響1860年,窮是禍根,一般相信大清當時之窮,係同「鴉片貿易」掛鉤,鴉片製造嘅貿易逆差,令大清白銀大量流出,當時市民向政府繳稅要用白銀交易,民間一般使用銅錢,白銀短缺,造成水脹船高,產生惡性通脹,民不聊生。

但另有一個見解係,當時大清土地稅收嘅徵斂能力非常薄弱,大清財源響十九世紀中葉之前,大部份由向土地使用者(地主,自耕農)徵稅得來,但要從民間徵稅到中央庫房,官吏對民間嘅控制能力一定要強,但滿清官僚系統經過百多年嘅腐敗同膨脹,已經到達慘不忍睹同失控嘅地步,稅項收唔收到手係一個問題,收到手之後你偷幾多我偷幾多又係另一個問題,舊錢貪污要分比幾多個勢力又係再一個問題,瞞上欺下、上下其手,七除八扣下,響一個資訊不發達、科技極度落後、賬目概念混亂嘅封建舊世界裡面,你可以想像最後中央收到嘅稅款會有幾多?但中央政府要出糧(俸祿)比全國官吏,打仗需要軍費,紫禁城裡滿清皇族要錢享樂揮霍,咁,錢從何來?

簡單一句,係稅源嚴重不足,「同治中興」更具體嘅內容係揾到新嘅水喉,水源係「關稅」,大清響打咗幾次敗仗後,尤其係火燒圓明院之後,終於要全面開放對外貿易,同整個世界嘅資本主義市場接軌,同時,大清亦響洋腸身上學嘵咗徵收商業關稅嘅概念同技術,貨品出入口,經過海關徵收關稅,天經地義,奈何響赫德先生出現之前,成個中国冇人做依件事做得好,「中國海關」之前只係對外開放貿易口岸官員同買辨階層用嚟貪污舞弊嘅借口,北京中央政府完全冇錢落袋。天朝當時貴為全球三份一人口聚居之地,中央政府蠢成咁,真係羞恥。

赫德(Robert Hart,1835-1911,字鷺賓),北愛爾蘭人,與慈禧同年。1854年嚟到中國撈翻譯,1863年以一個28歲英國人身份受聘於大清政府成為「海關總稅務司」,大清海關最高負責人,官階二品,英國洋人Robert明顯係一個天才,接手大清海關短短幾年間,竟然將舊屎變成世上最廉潔(注意:係「廉」字,唔係「窮」字)同最有效率嘅海關機構!洋人就係強!你吹得佢脹麼?同治中期,大清嘅稅收總收入竟然超過之前康雍乾三朝盛世,到達史無前例高峰。財政恢復穩定,大清元氣先漸漸回復返嚟,之後Robert掌管大清海關逾四十年,直至退休,告老歸田,返英才辭世。Robert一生以清廉見稱,歷史對佢評價甚高,佢嘅故事,令我想起70年代管治香港嘅麥理浩爵士(Crawford Murray MacLehose,1917-2000)。

兩袖清風?中国人似乎從來都唔知係乜嘢嚟?吓?食風呀?

慈禧起用Robert掌管中國海關,而且同佢建立咗40幾年良好嘅僱傭關係,剩係依件事,你可以話慈禧係一個冇見地冇內涵冇遠見嘅大媽嗎?答案,唔該自己諗。

下次,我哋再將眼光拉闊啲,睇吓同治年間成個世界發生緊咩樹?

2018-11-19 12:05:46
【常威考証】為花柳治替慈禧平反(六)

初初得到最高權力嘅西太后慈禧,正身處於一個急劇變化中嘅世界,佢自己並唔知道。相信佢同其他大清皇帝一樣,以為自己係世界中心。我常威死咗後,浪盪於無邊無際嘅母體之中,我反而睇得更清楚,今集拉闊眼界,睇吓1860年左右中國以外嘅世界局勢。

十八世紀末葉有兩件事改變咗成個世界,第一件係大英帝國嘅工業革命,工業革命徹底改變咗人類嘅生產方式同生活方式,將地球人由農業社會帶入工業社會,資本主義新玩法取代一切舊事物,金權取代皇權,世界進入全新格局;第二件係法國大革命,皇帝貴族階級被平民推翻,自由、平等、博愛等現代政治必備概念同普世價值(Sor,不適用於中国国情)出現,政治全新玩法,舊世界過去,新世界來臨,人類邁步進入十九世紀翻天覆地嘅文明時代……

十九世紀歐洲(英法)先係世界中心,大清唔係。歐洲雙元革命發生後,法蘭西仲出咗個拿破崙,依位五尺三吋不足、小肥同嗰樣有小小「嘟」嘅科西嘉人,炮兵出身,最後橫掃歐洲大陸。佢嘅貢獻,第一,戰爭打仗依回事,由佢大革新,因為拿破崙,整個世界軍事思想同技術向前行咗一大步;第二,佢頒佈嘅「拿破崙法典」奠定咗近代西方世界嘅法治基礎同基本嘅道德模態(婦女單方面可以離婚都係拜拿破崙所賜)。

(**帶開一筆,拿破崙先生曾經講過中國只係一隻訓著咗嘅獅子,佢明顯係中國人嘅朋友或收過嘉慶錢。)

人哋歐洲翻緊天覆緊地嘅時候,大清做緊乜?

踏入十九世紀嘅清帝國,依然鎖國,對外界事物不聞不問,以為自己仍然係全宇宙最叻最惡嗰個,仍然係一個君君臣臣、父父子子嘅中央集權宗法社會。真相係十全老人乾隆加埋和坤駛曬大清康雍乾三代盛世嘅積蓄,國家愈來愈窮同時,人口急劇膨脹,四處有作反暴亂,踏入十九世紀時,天理教之亂,暴民打到入北京,嘉慶帝著草離開紫禁城。中原人口自明末大約一億五千萬,到嘉慶年間翻咗一翻到三億。康雍乾太平盛世150年,戰亂減小、國泰民安係人口急昇嘅理由之一。另一個理由係番薯!冇錯係番薯!依一種容易栽種、極度粗生兼含有高澱粉熱量嘅農作物自十七世紀從歐洲(蕃邦)傳入中國,餵飽咗唔少人,直接令中国人口暴脹!(關於番薯依個冷門小小嘅論點,大家可以自行查核吓)

妖!寫到離曬題添,下次要兜返去同治老母度先得。

#常威 #慈禧太后 #晚清歷史 #工業革命 #法國大革命#拿破崙 #食洋腸救大清

2018-11-19 12:06:06
【常威考証】為花柳治替慈禧平反(七)

向1860進發……

響工業革命同資本主義帶動下,歐洲經濟高速發展,大量工業產品出現,需要向全世界傾銷獲利,產品需要市場同時,亦需要原材料供應地同廉價勞工,導致嘅後果係,歐洲諸國傾力將勢力拓展到全世界,爭先撂奪地盤,海上霸權時代開始。

英國人當時以其最強海軍力量同最先進航海技術先飲頭談湯,響世界各地佔領重要戰略位置橋頭堡,紛紛建立殖民地政權,1837年維多利亞一世女皇登基,大不列顛帝國步上最輝煌年代,成為當時世界上第一號霸主!不落日帝國誕生!

中国同現在香港一樣,嚴重滯後於國際大形勢,問題係,典解大清嘅資本主義冇辦法發展起來?貨品唔得?其實唔係,單單絲綢同茶葉兩樣產品已經夠通殺全世界,尤其係茶葉,茶葉當時只有中國製造,但成個歐洲美洲人人都鍾意飲中國茶,十八世紀末,英國從中國進口茶葉,每年單單係英國政府向商人抽取嘅茶葉入口稅已達300英磅,相等於皇家海軍半年軍費。如果大清政底識玩遊戲,唔係單單響廣洲賣茶葉比外國商人轉售,直接同歐洲諸國建立資本主義式嘅貿易渠道,建立關稅制度,大清單單靠茶葉貿易已經發咗好耐。

大清不但不重「商」,而且仲嚴重眨低「商人」依種職業。情況一如幾個世紀之前嘅歐洲,基督教勢力禁止基督徒做兌換貨幣借貸嘅生意(銀行業務),上帝認為係貪婪同不潔嘅行為,結果猶太人獨攬銀行生意,最後到咗十八九世紀,全世界最有錢嘅人都係猶太人(到咗今日都係呀陰公)。大清以外族身份推翻明朝,滿蒙八旗子弟以統治者自居,為咗塑造滿蒙貴族統治階層高高在上嘅尊貴型象,大清政府規定滿蒙人仕不得務農,不得從商!吓?唔俾人耕田又唔俾人做生意,咁做乜?只能做官或做大地主收地租食鴉片享受人生囉。依個極其愚蠢嘅豬兜政策,令大清最有錢嘅一群人從來冇辨法由大地主變成資本家,於是大清嘅資本主義亦從未有起過步,蠢到咁,冇人幫到你啦!

十九世紀初大清人口約有三億,滿蒙貴族人口佔其中1000份之3,即係話,成個國家有大概100萬依種大地主寄生蟲,無所事事,坐食山崩靠地租靠農奴過活,政策冇辦法釋放佢哋手中嘅龐大資本投入商業市場,大概係大清衰亡嘅重要理由之一。

歷史係一面鏡,可以睇到自己有幾咁醜陋,今日嘅香港亦係,各大地主只顧繼續起樓賣樓炒樓玩地產霸權,唔投資高科技工業,21世紀香港科技滯後於世界,其實又係自己攞嚟衰。

只去到1837,仲未返到1860……大時代風起雲湧,仲有一個巨人要響中間登場。

佢叫Karl Marx,卡爾·馬克思!下次繼續。



2018-11-19 12:06:30
【常威考証】為花柳治替慈禧平反(八)

我常公子上次話要講馬克思,但唔地府少老友叫我hold住先,費時愈來愈離罩,我順從民意唔提佢住,只講半句,馬生嘅重要性在於佢提供咗人類社會運作嘅另一條路比大家揀,而整個二十世紀嘅世界格局亦由此形成,到咗今日,炒到慶烚烚北韓問題、中美關係、美俄關係全部都關馬克思事……

去返【資本論】出版嘅1860年,自1840第一次鴉片戰爭開始,西方列強要求大清繼續「開放改革」,但大清睬你都有味,仍玩自己嗰套,並冇積極履行同洋人簽訂嘅各項條款同外交協定,又繼續放縱抽釐金制度(唔係正式海關關稅,只係各地官員私自設定關卡向商人索取過路錢),洋人見冇計透過談判取消釐金制,即生意冇辦法做大,於是打住「懲罰大清依個野蠻落後國家」嘅旗號,組成英法遠征大軍直攻入大清心臟,其時大清面對強權來犯,竟然採取「不戰不和不守,不死不降不走」嘅「古之所無,今亦罕有」態度應對,你話死唔死?咸豐著草、火燒圓明園,最後又係割地賠款瀨到應一應……

我常公子當時係個細路仔,經常有個疑問,其實英法聯軍佔領北京,點解唔乾脆吞拚成個冇錢又冇兵嘅中國,將中國變成一如印度嘅殖民地統治?(佢哋當時完全有能力咁做喎)打完就走不特止,反而仲幫大清平定太平天國之亂,由此可見,西方列強嘅著眼點的確係「市場」同「貿易」,洋人最緊要有生意做,其他嘢唔好諗咁多。

幫大清打洪秀全,穩定局面,亦有一種說法如下:

1860年,世界上百份之二十嘅貨品由英國制造,雄霸全球嘅大英帝國,靠嘅係一個全球性貿易網,當中最重要就係紡織業,而提供紡織業原材料棉花嘅地方,就係美國。(吓?又關Trump事?係呀!)現在,我哋睇下英國佬點玩個Game,以下嘅描述有啲難度,大家可以細味英國人當時嘅精湛財技。

首先英國人用匯票向美國購入綿花,美國人將英國匯票兌換後去中國購買茶葉,並開出自己嘅匯票付款,中國人將美國匯票兌換後去購買英國人嘅鴉片,英國人將售賣鴉片之所得,向中國購買茶葉運回歐洲銷售,所值遠遠超過本來用作購買美國綿花所開出嘅匯票……唔明?唔緊要,簡單講,綿花美國生產,茶葉中國生產,英國人作為中間人左右逢源,空手入白仞,反而係賺得最多嗰個囉……

1861年慈禧上陣,英軍仍響大清境內活動,大清同太平天國進入最後決戰階段,同一時間,美國嘅Civil War亦正式開打(唔係iron mam打美國隊長嗰次),南北戰爭!大英帝國兩個揾食對象,中國同美國,同時發生內戰!

即係話,英國正面對綿花同茶葉嘅供應短缺,冇綿花同茶葉,英國就算齋食鴉片都會死……明天繼續!

2018-11-19 12:07:05
【常威考証】為花柳治替慈禧平反(九)

繼續停留在19世紀60年代,英國人一向非常聰明(到今日亦係),亦係全世界最精明嘅投注者,中國同美國一齊發生內戰,英國只選擇幫大清打太平天國,而響美國南北戰爭中則堅持中立角色。

太平天國起事初期,英國同歐洲諸國都係中立狀態,加上洪秀全用耶穌哥掛頭牌,洋人甚至like佢多啲啲,但當天國佔領長江中下游蘇杭一帶江南最富裕、亦係盛產茶葉之地後,由於戰亂頻繁,茶葉生產大幅下降,而茶葉失收,就會攞英國人命!上文已經提及過嗰條大英帝國全球貿易期貨交易鏈,美國棉花同中國茶葉根本係大英帝國身體運行嘅血液。

自十八世紀後,英國人酷愛飲中國茶,茶葉成為咗英國人生活必需品(中國人咁都攞唔到英國人著數,真係低能),英國政府向商人徵收100%茶葉進口稅,成為稅收主力。所以穩定中國茶葉出口對英國非常重要,條數好簡單,冇錢買美國棉花,紡織廠就會停產,工廠收皮,失業率就會上昇,就會有更多人信馬克思,信馬克思人多咗,個社會就會亂,就會有革命。冇錢俾皇家海軍開銷,戰艦就要停駛,軍隊冇錢維穩,咁整個橫跨世界嘅大英帝國就會癱瘓!原來中國冇茶葉出口,大英帝國就會收皮?係呀!剩係大清自己唔知喳嘛……

至於干預美國內戰有乜好處先?無論傑佛遜嘅南軍贏定林肯嘅北軍贏,美國人都係要賣棉花嘅,棉花由黑奴種定白人種,我諗英國人冇乜所謂。1861-1864年英國大力幫助大清平定太平天國,一方面係要儘快結束中國內戰,穩定番茶葉出口,另一方面要繼續維持白痴政權大清統治中國,咁就可以一直呃儍仔呃落去,繼續向大清身上發大財,一箭雙鵰一石二鳥,當時嘅英國人就係聰明絕頂!(抑或係中國人太蠢太On9?)

好嘞,話題始終可以返番慈禧度,1862年11月申酉政變後,恭親王奕訢拒絕當攝政王,只掌管軍機處(大清內閣),同治八歲仔,東西太后垂簾聽政,慈禧開始掌權,曾國藩李鴻章嘅洋務運動開始。而歐洲列強自己國內都鬼死咁多嘢攪(1861年普法戰爭開打,日耳曼民族掘起),自顧不暇,暫時冇乜時間再攪中國,英國人攞曬著數同時,亦幫大清繼續四個現代化,大清終於可以喘番條氣,關稅稅收增加,國內環境稍為好轉,同治中興降臨大地。

當時慈禧二十六七歲,老公死咗幾年,下次滿足小數人希望,講慈禧秘密生活……(冇甜)




2018-11-19 12:07:24
【常威考証】為花柳治替慈禧平反(十)

好多野史都有記載慈禧有一個情人叫安德尊,Sor!係安德海,安德海係咸豐皇帝嘅近身太監,細慈禧八歲,因為響辛酉政變時候做二五仔,將遺詔密報慈禧太后立咗大功,慈禧就昇咗佢做太監總管,十七八歲就統領成個紫禁城所有太監,少年得志(語無倫次)。

從此,佢同慈禧形影不離,雖然正史無記載佢哋有冇私情,但好多証據都顯示慈禧對佢嘅感情超越咗主僕關係。其時同治中興緊,慈禧自覺走在當時時代嘅尖端,洋務運動如火如荼,大清仲派人去歐洲美國考察睇吓洋人典解咁威,三十歲前嘅慈禧似乎真係想擺脫舊世界嘅束縛,1869年,佢做錯咗一件事,害死咗安德尊。

1869年同治十三歲,毛都未出齊時,根據祖訓,就要籌備大婚,春天,全國選秀(獸)會開始,各省佳麗爭相入宮服侍皇帝,位於蘇州嘅皇家織造廠亦開始預備大婚禮服同婚紗,依個時候慈安派安德尊前去「採辦龍袍」,依個行為其實多舊魚,野史話慈禧只係想揾個借口比安德尊出宮玩吓,放鬆吓,雖知大清規定太監不可私自出宮,除非係做非常重要嘅任務。

七月,安德海於是攜同家人(佢仲有老婆添)同幾個太監friend一齊出發,沿途招搖過市,毫不低調,仲有樂隊歌女助慶,當正自己真係TVB大明星安德尊,好多市民都未見過太監,紛紛上前圍觀。不過依個行為,震動咗中央守舊派官員嘅神經。佢哋紛紛上疏投訴安總管,山東巡撫丁寶楨以順治帝祖訓「宦豎非經差遣,不許擅出皇城」為名,命泰安縣知縣何毓福將安德尊逮捕,派人向慈安太后請示,要求處理安德尊生死。

慈禧當然唔想殺安德尊,但守舊派群臣壓力下,輿論一面倒,佢亦冇能為力,而且如果佢替安德尊強出頭,分分鐘會自己火燒後欄,最後由慈安太后下諭旨,處死安德尊。安德尊被斬首,其他六個太監七個隨從亦被處死,安先生家人流放黑龍江為奴。傳說安德尊死後仲要曝屍三日俾人欣賞屍體,証明佢係冇J。

件事發生咗,下一次我常公子再深入探討一下依單嘢……



2018-11-19 15:14:06
太多字了 建議唔好貼得咁密 一日一篇左右應該好啲
2018-11-19 15:54:29
2018-11-19 21:41:03
2018-11-20 00:00:10
因為已經係講故台連載咗一段時間,而家轉戰學術台,需要加速,做到同步
2018-11-20 11:36:51
【常威考証】為花柳治替慈禧平反(十一)

空穴來風,並非無因,安德海之死,一般認為冇咁簡單。

事實上慈禧同大王有嘢,宮中應該一早有人吹風,1869年年初,翁同龢(同治光緒老師,國子監祭酒,即國立大學校長,全國儒家知識分子領袖)就曾上書講慈禧「近年以來,精勤之意稍遜於前」,話慈禧「沉緬逸樂」,矛頭似乎直指豆斗同大王安德海單嘢。

其後大王於山東斷正,翁同龢同一衆大臣堅決要即時處死大王,就地正法,當時宮中,就算慈安太后出面求情都冇用,由此可見,單嘢背後的確存在另一場政治鬥爭,翁同龢幕後大老細係醇親王奕譞(咸豐另一個細佬),奕譞屬於保守派仇夷派,痛恨洋腸,而慈禧同恭親王奕訢係洋務派,堅持洋務運動,開放改革,兩股勢力早就水火不容,奕譞借大王開刀,打擊急劇上昇緊嘅開放派慈禧勢力,亦係常理。

豆斗有幾愛大王?

從安德海被斬首後嘅幾件事可以睇到,大王被斬殺,慈禧立刻要求將大王衣物送返宮中保存,並派內務府專人查辦事件,四個字:「睹物思人」;另外大王有個太監friend叫王添福,響宮內唱豆斗派大王出宮結果害死大王,豆斗一聽到即刻殺咗佢!其時史書亦有記載,慈禧果排成日發脾氣,將怒火發洩響身邊嘅人身上,同時聲言痛恨嗰啲逼死大王嘅王公大臣。之後,慈禧仲大病一場,成個月訓響張床度差啲瓜咗,史上有書當時豆斗「少食不寐,胸滿嘔水,耳鳴頭悶……嘔水多黑……頭痛發暈……」,御醫診斷為「肝氣上逆」(乜呀?),但明眼人都睇到,兩個字已經鑿咗響豆斗額頭度,「失戀樣」呀!非常明顯,係失戀令到豆斗精神同生理狀態接近崩潰邊緣,辛酉政變期間生死相搏,周旋於歷史大局中慈禧都可以鎮定面對,如今死咗個太監仔就咁大反應,咁你話豆斗愛唔愛佢吖?

響豆斗心中,害死大王嘅人係醇親王,下諭旨殺大王嘅係慈安太后,依兩個人,佢都唔會放過。

君子報仇,十年未晚。

慈禧唔係普通人,佢好快回復心情,重新上路,繼續籌辦同治大婚,同埋安排同治快將親政事宜,同治皇帝親政,垂簾聽政時代就會結束,慈禧就會完成歷史任務退下……

大王死後,佢原本一個手下小李子被慈禧提拔成為新一任太監總管,佢就係我常威契爺李連英,李連英同大王一樣,以靚仔有型見稱,之後幾十年,佢一直陪住慈禧終老。可能有過安德海事件,契爺一生行事非常小心謹慎,絕對唔行差踏錯,而且得罪人小稱呼人多,最後以一個好人名字結束一生,平安終老。


可惜1966年文化大革命,李連英被紅衛兵響個墳處起咗出嚟斬首,紅衛兵仲用個屎兜兜住佢個頭當波踢,個頭之後仲不知所縱……

2018-11-20 11:37:10
【常威考証】為花柳治替慈禧平反(十二)

人死咗都會感冒你聽過未?我常公子病咗兩Day冇帖出,真係唔好意思。今日繼續同西太后慈禧平反。

1861年慈禧執政以來,一直非常勤力,其實做「大清皇帝」依份工,勤力就可以,每日不外乎睇吓email覆吓email(奏章),簽個名開吓九會同啲大臣九噏幾句,史書記載慈禧每朝大約五點開工,下晝四點左右收工,十一小時工作,同一個普通香港人嘅工時差唔多,話太辛苦亦唔係。

前文提過慈禧執政初期,咸豐細佬恭親王奕訢可能先至係大清最高領導人。事實上亦係,奕訢最初亦冇將二十四五歲嘅西太后慈禧放入眼內,1865年,慈禧就借同治(黃一山)之手發放一道聖旨,攻擊奕訢「從議政以來,妄自尊大,諸多狂傲,依仗爵高權重,目無君上……」,最後攪到奕訢要響慈禧腳邊「伏地痛哭」,慈禧先原諒佢,經過依場小風波,從此冇人敢睇小慈禧,佢亦將實權一步一步收入自己手裡面,加上一齊「垂簾聽政」嘅東太后慈安太后冇乜野心,文化水平勤力度亦不及慈禧,到咗1870左右,慈禧的確掌握咗大清嘅實質政權。中國5000年大歷史中,唯一能夠同佢比較嘅女性,亦只有盛唐嘅武曌武則天。

中国人就係叻。

太平之國內戰,係世界歷史上一場死得最多人嘅內戰,2000萬人瓜咗,同期美國南北戰爭死60萬人,係中國內戰嘅三十份之一,第一次世界大戰死1500萬,第二次世界大戰加埋原子彈希特拉屠殺猶太人都係多太平天國小小,你話係咪勁抽吖?單從死亡人數,你就知道太平天國內戰其實有幾很咁大鑊,大清半隻腳已被拉入棺材中。

帶開一筆,最近翻讀史料發現有件咁嘅事,太平天國戰爭後期,話説軍事天才忠王李秀成帶領6000兵馬突襲杭州,其實佢只係想引開敵人兵力,冇打算真係入城,但杭州城內嘅女人怕太平軍入城將佢哋污辱,為保貞節,城內竟然有數萬女性上吊服毒自殺?咁又死幾萬,死得人多就係咁解,一件「小事」可反映出當時中國內戰嘅殘酷同野蠻,當然仲有中國人嘅愚昧同無知,仲有,自己人打自己人就係最叻。仲有仲有,中国人就係命賤如此!?

就算慈禧有幾叻幾勤力政治手腕有幾聰明都好,要佢救返肺Can三期嘅大清已經冇可能。開展洋務運動,的確為五癆七傷嘅大清帶來小小新氣象,不過中國人繼續唔生性,一邊學習洋人,一邊又仇視洋人,加上上層建築中以醇親王奕譞為首嘅「滅夷派」推波助瀾,製造輿論蒙騙國民,民間對洋人洋物洋腸洋娃娃有嚴重錯誤理解,終於又爆出1870年嘅「天津教案」,局內人借力打力,矛頭直指洋務運動大將曾國藩。

明日再講洋鬼子殺中国孤兒……


2018-11-20 11:37:20
2018-11-20 15:46:32
你Youtube我有睇
2018-11-20 19:47:47
【常威考証】為花柳治替慈禧平反(十三)

政治博奕嘅最高技巧,係殺人於無形。

平定太平天國之亂,出力最多嘅人係曾國藩同李鴻章,仲有大英帝國女王伊莉沙白一世,因為係佢大力主張出兵扶清。曾生係百份百愛國人仕,正途出身儒家忠君愛國(党)哲學支持者,出錢出力組織湘軍打洪秀全,打贏之後就立刻解散湘軍大部份主力,擺明車馬幫大清,慈禧見佢咁乖,昇到佢做直隸總督,令南方江浙系漢族仕紳勢力到達顛峰,北京班大食懶滿清貴族會唔會妥佢?你話呢?

洋務運動佢係領頭人,從外國購買機器,連同李鴻章響上海設立「江南製造總局」,用機器仿造西式軍用武器,重新裝備心口得個「勇」字嘅清軍。慈禧同奕訢係佢背後嘅大力支持者,可惜一場「天津教案」就擺咗佢上神檯。

兩次鴉片戰爭割地賠款,火燒圓明園,太平天國又攞住「基督教」三個字起義,死成二千萬人,普羅民眾仇視洋人就係理所當然,民間愚男愚女亦最like人話乜佢話乜(到今日都係)。同治九年1870年,天津發生反洋教事件,事源法國天主教傳教士響天津望海樓強佔民地起教堂,積聚民怨。其時天津又有拐帶幼兒案件發生,拉到嘅拐子佬又話自已係法國神父主使,加上傳教士主理嘅育嬰堂因傳染病(天花)死咗三四十個孤兒,於是群情洶湧,成萬人包圍教堂,最後殺人放火,二十個傳教士同洋商被監生打死,身首異處!

事件即刻昇格上外交層次,英美法等七國聯名向清政府集體抗議,並集結軍艦於天津外圍港口示威。好嘞,咁點拆先?放火係你?打死人又係你喎?同埋你又冇軍艦?又唔夠惡又唔夠打?拆條毛咩?但大清就偏偏派咗曾國藩去拆依單嘢!(對佢真係好嘞……)

拆?

肇事者20人斬頭,充軍25人,天津知府流放黑龍江,派人去法蘭西道歉加賠錢,盛惠50萬兩白銀(折算今日一兩白銀值$300蚊港元左右購買力,即付1億5000萬港元)。吓?咁仲唔係賣国賊?仲唔係漢奸?仲唔係汪精衞?仲唔係劉少奇?輿論同全國上下一致狂隊曾國藩,之後佢仲被燉瓜菇由直隸總督變番兩江總督,曾(蔭權)硬食依隻政治死貓,有口難言,鬱住鬱住,過咗兩年1872年仲死埋,享年六十有一咋。

講真,曾生明顯係政治鬥爭嘅犧牲品,天津教案單嘢邊個傾就邊個死,同埋根本亦冇得傾。歷史上有兩個觀點,第一個係北京以奕譞為首嘅「滅夷派」推曾生去死,目的為咗削弱慈禧太后為首「洋腸派」嘅勢力。第二個觀點係滿清貴族集團(包括慈禧在內)要對付江南不斷坐大嘅漢人士大夫集團勢力,所以要揾蔭權嚟祭旗。

我信前者,1869年有「安德尊事件」,1870年有「天津教案」,兩者明顯衝住慈禧而來,典解?因為同治一日一日長大,就快出場親政,改朝換代日子嚟緊,新一輪權力交替快將上演。

下次繼續……

2018-11-20 19:48:10
【常威考証】為花柳治替慈禧平反(十四)

踏入十九世紀七十年代,眨吓眼,慈禧已經管治咗大清差唔多十年時間,頭十年,佢嘅成就有目共睹,大清由一個肺Can三期病人退返到二期尾,面色稍為好轉,未死得住。慈禧作為一個三十歲左右嘅女人,能夠有效平衡各方勢力,曾李嘅親西方羊腸運動繼續進行(泛民),滿清貴族集團滅夷保守派(愛港力量)亦唔敢玩嘢,可以話,都係慈禧嘅權謀運用得宜嘅結果,後世人話佢係個冇用低能嘅大嬸,依個説法其實已經完全可以推翻曬。


不過權力鬥爭仍暗中進行,「安德尊」事件令慈禧仇視慈安同奕訢,「天津教案」,以醇親王奕譞為首嘅「滅夷派」成功斬去慈禧洋腸運動左右手之一嘅曾國藩,加上同治皇帝親政在即,慈禧要開始籌備點樣退落嚟(或者有咩方法唔退落嚟連任多幾屆)。


同治帝載淳(細龜)係慈禧親生仔,自幼比翁同龢教導正統儒家哲學思想,立心要做個救民於水深火熱嘅好皇帝,不過佢嘅能力明顯好低,翁同龢就響日記透露過同治「寫字唔靚」「成日唔想返學」「見書就怕」「唔識作文」「思路不開」……,如果我冇估錯,同治應該係…………低能嘅!唔係,有小小「讀寫障礙」啫,佢唔鍾意讀書最鍾意玩,鍾意聽歌(戲曲),仲成日同啲親王friend(恬親王)太監你夜晚偷偷出宮去蒲,史稱「微服叫雞」!


以慈禧性格同智慧,佢冇可能like有小小seven嘅細龜,一定覺得佢爛泥扶唔上壁,1872年初,同治要結婚,有兩條女佢揀邊個做皇后,第一個係慈安揀嘅阿古特氏(唔係曼城前鋒阿古路),另一個係慈禧心水富察氏,但同治偏偏唔聽親生老母話,揀咗前者,慈禧當然唔like,因為阿古特氏外公係端華,即係辛酉政變中八個顧命大臣之一,慈禧發動政變時被賜令自盡!但冇計,皇帝揀皇后係大曬嘅,不過依件事令兩母子關係正式破裂,有史書記載慈禧甚至發脾四,唔俾細龜住響中宮,同老母再冇嘢講嘅同治,更加放縱自己,出宮夜蒲次數更密(根本唔駛理由嘅,佢鍾意滾吖嘛)。

洋曆1873年2月23日,同治正式親政,大清嘅最高權力落入一個17歲喜愛夜蒲嘅年青人手中,而慈禧同慈安亦結束「垂簾聽政」局面,正式退番入後宮,理論上不再涉足政治,只能安心終老。

嗰一年,慈禧38歲,正值人生智慧同歷練最高峰之際,要一下子放低曬所有權力退隱後宮,其實冇咩可能,況且大清響佢手上剛剛恢復過嚟,交俾有小小低嘅細龜打理,唔死有鬼?但慈禧要再上場,必需有一個特定條件:

細龜要死!



2018-11-21 11:12:50
【常威考証】為花柳治替慈禧平反(十五)

響中國家長式中央集權嘅帝制系統內,最高權力成日會無厘頭落入一啲seven-head手中,同治就係個好例子,佢能夠做皇帝,只因為血統(天命)同運氣,以佢嘅能力,睇怕響鳳來樓做個龜公都未必勝任。

登基之後,同治細龜仍然要返學,成個大清皇宮裡嘅高級知識份子仍然想細龜有出色小小,但細龜依然故我,返學時「毫無神采,且多嬉笑」,一放學就想辦法去玩,事實上佢嘅表現同一般十六七歲嘅二世祖(富九代)冇咩分別,但好衰唔衰,佢係一個人口接近三億古老帝國嘅最高統治者。

初初登基頭幾個月,細龜仲扮正路,但後來就成日偷懶日日射波,因為喜愛夜蒲,結果好晏起身,接見官員嘅人數愈來愈少,有時甚至一日見得一兩丁友,辦公枱上嘅文件(奏章)堆積如山,佢根本睇唔曬,好多亦唔睇就批,用朱砂筆寫句「知道了」(康熙名句)「依議」就算數,根本冇心處理,好好哋大清 嘅一場開放改革就咁樣開始放慢步伐……

響後宮仍然牢牢掌握大清實權嘅武則天慈禧唔會唔知道佢啲衰嘢,佢嘅失望情緒一定不斷昇溫。但阿細龜仲唔知死,除咗成日「微服叫雞」外,親政之後,更將京城妓女(唔知如煙有冇份?)帶返紫禁城內尋歡作樂,佢個終於朵臭曬,全個北京城,人人都知道大清出咗個叫雞皇帝,Yeah~~~!

響佢任內,法國人入侵越南,中國派兵幫拖(唔駛講又係慘敗收場)。對面海另一個年青人(另一件治),1852出生,當時20歲出頭嘅明治天皇就真係有為青年嘞,1867年德川幕府大將軍德川慶喜「大政歸還」,明治天皇重掌最高權力,勵精圖治,活力十足,能力超卓,大日本帝國正式掘起,1874年擴張領土,第一個目標係大清領土臺灣,同治下旨增強臺灣防務,或者當時同治與大清上下(包抬慈禧)仍未覺悟,大清嘅最大敵人已經稍稍出現鳥…………

細龜呢?響依個時候,佢發表咗佢任內最大嘅一個政績工程,就係修建国仇家恨云集一身嘅圓明園……人哋明治想辦法努力揾錢,你同治就諗埋啲屎橋努力駛錢,唯有一句,Hi Aunt!

唔怕貨比貨,做人真係唔好比較咁多……下次carry on!




2018-11-21 11:13:11
【常威考証】為花柳治替慈禧平反(十六)

同治細龜用現代詞彙去形容,叫廢青。

佢親政前後唔夠兩年,最偉大嘅政績工程係提出重建圓明園,但大清庫房根本唔夠錢,工程進行咗一排就要斷尾。同治為此扯火好嬲,仲因此公開Hi恭親王奕訢Aunt,攪到要慈禧出面去拆。重建圓明園工程收皮,同治並未放棄其「逃離紫禁城」生活嘅夢想,又開始修建「西苑」(即今日中南海)。

點解又重建圓明園同西苑?原因好簡單,並唔係咩重建大清聲威,以雪國恥,廢青就係冇咁大嘅夢想架,細龜只係想學明朝荒淫大帝正德朱厚照一樣,興建「豹房」居住,永遠逃避紫禁城內親生老母同嗰班大臣嘅約束,全宇宙都知,細龜最鍾意玩同滾,成日比人管住,又要讀書又要睇文件又要開會,佢又點會Happy先得架?要玩就要玩盡啲玩顛啲,晚晚帶女返來,就唔可以繼續住響紫禁城內,起個新竇比自己住,就係十八歲嘅細龜嘅終極夢想。

響同治壓力下,修建西苑工程馬上撥款動工,1874年夏天至冬天,同治成日去視察工程進度,絶對唔俾好似高鐵同港豬噢大橋一樣死拖難拖……

直到有一日,佢冷親,病咗。

1874年12月8號,同治開始出疹,御醫判斷為生天花,之後病情加劇,全身出水泡滲血,大鑊喇。國家唔可以冇人話事,同治病重期間,慈禧已經重新出關審批奏章,第十六日,細龜病情有好轉跡象,但好快又「腰間紅腫潰破,浸流膿水」,拖到1875年1月12日蒙主寵召正式去見努爾哈赤。依個短命皇帝死嘅時候得18歲,有人話佢係死於花柳(梅毒),但係佢亦有可能真係死於天花,因為同治姐姐亦響2月5日死於天花。同治駕崩,成日陪佢花天走地嘅一班friend同太監都被重罰,有人被開除貴族資格,亦有人充軍黑龍江。


同治死後,佢老婆曼城前鋒阿古路亦展示其儒家哲學嘅偉大情操,絕食殉夫,3月27日監生餓死自己於宮內,阿古路絕食身亡,相信被逼成份居多,傳聞佢仲有身孕,一屍兩命添,佢唔死,生個仔出嚟,慈禧咪冇得重新執政?如果阿古路生咗仔承繼皇位,咁佢先係皇太后,係佢「垂簾聽政」唔係慈禧喎……。左睇右睇,同治杏加橙後最大得益者係邊個?咪佢親生老母慈禧囉,因為同治最後冇仔生,冇人承繼皇位,慈禧「唯有」選擇醇親王奕譞同慈禧細妹生嘅仔載湉繼承大清皇位,佢就係之後夜祭珍妃嘅光緒帝,光緒嗰陣三歲仲未識自已屙屎,咁嘅局面,唯有有請小鳳姐再出場。


慈禧同慈安響群臣嘅巨大「壓力」下,被逼再次「垂簾聽政」,重新執掌大清政權。廢青瓜柴,明君回歸,成個大清舒服曬,當時人人都係咁諗。究竟係唔係慈禧一手安排害死親生仔同治?(權力面前,親生仔都冇情講)冇人知囉,但我信,因為慈禧絕對有動機咁做,佢亦有能力咁做,下次分析吓我依個論點。




2018-11-21 11:13:22
2018-11-21 11:16:32
常公子進軍連登
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞