【常威近代史】（一百九十四回）
袁世凱平反系列
有人話袁世凱係一個好識投機取巧、阿諛奉承嘅世界仔擦鞋仔，所以先氹得掂榮祿同盛宣懷，畀佢響小站練兵。講呢啲嘢嗰啲人都癡溝線，個腦裝屎，生存喺個社會上，任何機會係要自己爭取返嚟，你坐響樹底，想隻兔仔衡埋嚟撞樹受死，根本完全係發夢。袁世凱只係盡力為自己爭取向上爬嘅機會，而家香港個個做緊，邊個唔想發達？邊個唔想做李嘉成？袁世凱如果放響現代社會，叫十大傑出青年。
而且比你練兵，你都要有料到先得架。搞軍隊唔係玩泥沙，一個唔小心命仔都會冇埋，但事後證明，袁世凱唔單止識練兵，佢仲練咗一個強大無比嘅軍事集團出嚟，北洋軍閥主宰咗中國以後嘅政局廿九幾年。
而家睇睇袁世凱練兵有乜竅門先？1895年，佢接手天津小站練兵之後，提出《練兵要則十三條》，係一套當時訓練新軍嘅完整設想，舉凡軍律、餉制、器械、募兵、教育等各方面。
1.賞罰要分明，軍隊要有紀律，紀律是第一優先，軍人要熟讀紀，任何事情要公事公辦，唔可以徇私。
2.出糧方面，再唔可以畀人喺中間上下其手，一切要依法辦事。唔合規格嘅人就要被革走，就算請病假都要查核清楚，一有貪汙舞弊情況，軍法處置。
3.軍用嘅器械，要每五日檢查一次，如果有生銹或者損壞唔上報，嚴予懲治，而且要時刻注意世界各地有乜嘢新武器推出，如果啱用就要即時選購。
4.清國軍事知識，比外國落後得太多。所以要響全國各地建立大量軍事學堂調教軍官，而且定期派人出外考察同留學。
5.招募新兵相當重要，「身長限四尺八寸以上，力大限一百斤以外，每一時行走限二十里以外，年自二十歲到二十五歲」（原文節錄），戶口要查三代，資料要封存妥當，以250人為一營管理。
6.士兵要以忠國、愛民為首要任務，要不斷灌輸佢哋忠誠、愛國、服從命令、死而後已嘅思想。對於軍紀，需要經常考核。要上堂，要派小冊子比距哋背誦，操練時要佢哋唱軍歌。（袁世凱新軍嘅《大帥練兵歌》，曲調其實就係普魯士軍歌《德皇威廉練兵曲》，依首歌，後來成為中國人民解放軍嘅《三大紀律八項注意》）
7.練兵主要以步法、手法、陣法、操法為要務，最重要嘅係，士兵要絕對服從上級嘅命令，唔服從指揮嘅人要軍法處置。每年要有多次演習加強操練，遇到國家有任務，就要即刻作出調動，隨時出征。
8.如果士兵請假，被炒魷魚，或者患病退役，一律要有完善措施配合，唔能夠隨便唔返工出糧，更唔可以隨便求祈搵一個人頂上原有軍藉。
9.士兵服刑期三年為一Round，三年之內，如果有事要請假，最多三個月，三個月內軍方會支付一半人工，放完假唔返嚟嘅人，即刻炒魷。如果遇上特別軍事任務，就算大姨媽到都唔可以隨便請假。
10.如果因工受傷，國家會幫你醫，人工照出。如果服役期間過勞死病死，斂葬費十兩銀，薪水多支三個月。如果戰爭陣亡者，國家一律支付至少兩年年薪撫恤家屬，另加特別撫恤金安排。
11.新軍之內，官階制度要同一般大清帝國公務員系統唔同，要分開處理，服役完畢離開軍隊後，官階或軍階亦都要即時摘去，費事俾你再搦住個朵周圍招搖撞騙。
12.每到年尾進行考核一次，表現出眾嘅軍人，會得到官位同獎賞。但係每100人，只可推舉一人得獎，以免獎賞制度被濫用，產生私舞弊情況。
13.新軍軍服亦都進行大改革，因為使用槍炮，衣服必須窄小，先至方便，之前清國軍隊闊袍大袖，睇到都唔開胃，新軍隊制服一律使用普魯士規格，規則更指明軍人平日都唔淮著中國長衫，要時刻注意軍隊形象。
其他嘅軍隊改革措施，包括同洋人教官簽訂合同嘅細則同格式、每個不同兵種嘅待遇同軍紀規則，除此之外，仲有大量新軍嘅章制、禁令、訓條同埋操練手法。所有袁世凱嘅練兵文件，到咗1898年，滙編咗一本《新建陸軍兵略錄存》印行，流通全國。而呢一本書同《練兵要則十三條》，亦都係袁世凱生平唯一嘅兩部著作。
今日寫咗咁多，只係想講一句，袁生唔係流嘅。
【常威近代史】第二部《中國一百年前第一次開放改革》
【常威近代史】第一部《大清亡國關慈禧蛋牛治》
【常威近代史】第一部《大清亡國關慈禧蛋牛治》實體購買
【常威近代史】第二部《中國一百年前的第一次改革開放》實體購買
【常威近代史】第一部《大清亡國關慈禧蛋牛治》
【常威近代史】第一部《大清亡國關慈禧蛋牛治》實體購買
【常威近代史】第二部《中國一百年前的第一次改革開放》實體購買
【常威近代史】第二部《中國一百年前的第一次改革開放》實體購買
【常威近代史】第二部《中國一百年前的第一次改革開放》電子書
