【常威近代史】(二百六十六回)
袁世凱平反系列
香港人加油!
袁世凱 #21條 賣國,割讓東三省,正仆街!
之後仲想做皇帝,咁仲唔係一個十成十冚家鏟?
睇見條 #廢老 咁L墮落,本公子秉承專同衰人賤人平反風格,一於睇吓佢身邊有乜嘢人搞到佢遺臭萬年先。我講過,我哋唔可以將歷史責任推喺一個人或一小撮人身上,由今集開始,我會講吓大總統袁世凱身邊嘅 #幕僚 陣容。
袁世凱由1882年奉 #吳長慶 之命,為 #朝鮮王朝 訓練新軍開始,就開始組織自己嘅班底。我講過,呢個人有佢嘅獨特魅力,而且對朋友對下屬有責任有承擔,絕對唔係 #林鄭 689 之流,所以之後嘅日子,有唔少能人異士追隨佢,義無反顧協助佢打江山,最後推到佢做皇帝,只可惜歷史總係喜歡同人類開玩笑,有料嘅人遺臭萬年,古惑仔流芳百世,總係中華民國嘅不幸。
槍桿子出政權,唔使毛澤東 教,袁世凱一直相當明白,冇足夠嘅武力,亦唔可以爭取足夠嘅權力或談判籌碼。良知有用,和你飛飛有用,但槍支更有用。好似打機一樣,袁世凱身邊幕僚系統亦可以分為「#文官」同「#武將」兩個部份,而武將方面,則以「#北洋三傑」對袁世凱最為重要。
「北洋三傑」,分別是 #王士珍(1861-1930)、#段祺瑞(1865-1936)與 #馮國璋(1859-1919),當事人稱龍、虎、狗。呢三個人係袁世凱手中嘅軍事王牌,佢哋不約而同係由袁世凱一手提攜培養出嚟,所以對袁世凱忠心耿耿,但係最後帝制失敗,又係同呢三位仁兄有關,真係成也龍虎狗、敗也龍虎狗。
先講北洋之龍王士珍,王士珍係袁世凱喺軍事上最寵信嘅人,「亢爽有智略」,袁世凱稱佢為「第一號福將」。響清朝,佢最高嘅官職做過陸軍部大臣,響民國,曾任國務總理兼陸軍總長。論官職,佢唔及之後嘅段祺瑞及馮國璋,但係段、馮兩人,袁世凱唔係百分百信任,反而王士珍永遠義無反顧企喺袁世凱身邊支持大佬。
無論喺袁世凱生前死後,王士珍都係忠於主人,佢平生不愛弄權,幾次有機會上台執掌大權,都係接受邀請,暫作調和亂局,當時勢唔需要佢嘅時候,佢就落台(今時今日邊個做得到?)。佢平生處理衝突無數,面面俱圓,邊個都唔得罪。佢正正就係我常公仔口裏面所講嘅 #溫和派,當社會邁向衝突兩極化,就需要有中間派溫和派出嚟調和衝突。
現在香港嘅亂局,就係特區政府一直落嚟沿用「#敵我矛盾」的左派鬥爭思維,政治光譜上,唔係我嘅朋友,就係我嘅敵人,你唔係 #建制,就係 #泛民。於是乎過去嘅日子,中間派溫和派逐漸消失,有事起嚟,得田氏兩兄弟肯講人話,想搵多個人救命或者做和事老講句公道說話都冇呀陰公。
王士珍安享晚年,佢並冇因為係袁幕僚嘅第一號人物而遭受任何人迫害或攻擊,反而人人畀返幾分薄面佢,做得龍頭大佬,果然有做大佬嘅風範。
北洋之虎段祺瑞,係一個百分百嘅專業軍人代表,佢係第一批接受過日本德國 #普魯士 正規軍事訓練嘅中國軍人,喺袁世凱嘅陣營裏,佢係第一號軍事專才,北洋軍系統差唔多係由佢建立同實際領導,無可否認,作為一個軍人,佢嘅表現卓越;作為一個部下,佢亦都係袁世凱嘅最得力助手。但去到袁世凱生命最後階段,段祺瑞開始感覺自己會係袁權力嘅承繼者,權欲膨脹底下,佢開始同袁發生衝突,上集已經講過,段祺瑞唔支持21條,之後佢亦唔贊成 #洪憲帝制,袁世凱稱帝失敗,段祺瑞作用頗大。
袁世凱死後,段祺瑞果然承繼佢嘅大部份政治遺產,成為 #皖系 軍事領袖,但係作為一個專業軍人,佢80分,但作為一個政治家,佢嘅視野同埋判斷力都唔合格40分,同林鄭一樣,作為港英殖民地技術官僚,好打得冇得頂80分。但要做領導人特首,大家睇到完全失敗收場0分。歷史學家 #劉仲敬,佢咁樣評價段祺瑞:
「他這種人如果生存在比較正常的社會,很容易成為優秀的軍官,足以發揮技術能力,卻不會暴露判斷力的弱點。他客串政治家,主要是時勢所逼和資歷所致,實際上害了他,也害了他的國家。他犯下的罪行比大多數同時代人更少,犯下的錯誤卻比大多數同時代人更多。」(註)
北洋三傑中最後一個馮國璋,被人稱呼作狗,大家就知道當時嘅人非常睇唔起佢。原因好簡單,因為佢係負責帶兵嗰個,無論係 #辛亥革命 武昌前線,抑或 #第二次革命,正面打擊江西都督 #李烈鈞,主要軍事行動都係由馮國璋負責。
上得前線衝,就係要承受千夫所指,無論係勇武派抑或警察,身上所中嘅箭係最多,流嘅血亦係最多,同樣承受的罪責亦都係最多,道德光環永遠係由背後 #冷氣軍師 同 #統治階層 所獨佔,有時候前線軍人,只係依從軍令辦事,上頭叫你加重暴力,你祇有照做,否則就係違抗軍紀,戰爭時期可以即刻拉去後巷打靶。
馮國璋除咗帶兵打仗叻,佢亦係中國首批軍事教育家,北洋軍系好多軍事教科書同埋專著審稿鑒定嘅工作都係由佢主理,其實佢文武雙全。對於袁世凱稱帝,馮國璋亦都唔支持,因為馮國璋嘅政治取態,似乎係忠於清室,佢希望清室復辟搞 #君主立憲,多過袁世凱做皇帝。所以洪憲帝制期間,佢消極面對。北洋三傑,有兩個人唔buy袁世凱稱帝,咁佢老母失敗收場亦都理所當然。
袁世凱死後,北洋派分裂成以段祺瑞為首嘅皖系,同以馮國章為首嘅 #直系,兩個人鬥得難分難解,同對手段祺瑞比較,都係冇乜高低,職業軍人做政治家,等於你叫個中文教師去搞核子彈,當然冇段好睇。最後馮國璋輸嘅係壽命,佢死得早。
今集講武將,下集講吓文官。
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151