三百三十七
秋兒姐姐見我呆左一呆咁,於是又補充道:「Jonathan話出面啲補習社既notes對高考既出題方向好有針對性,唔會點教多餘既課程,而且臨考之前仲可能會幫手貼題,所以先借比我睇架咋。」
「哦。」我心下不是味兒。
就算係我都知道,出面啲補習,無論係私人定補習社都好貴,我同秋兒姐姐都冇可能比得起,加上我而家先中三,唔似秋兒姐姐經歷過會考,我係對公開考試完全冇乜概念既,所以都唔知呢啲所謂既Notes有幾重要,而Jonathan肯借比秋兒姐姐又會幫佢加左幾多分。
「乜佢呢啲名校生都要補習既咩?」我覺得佢咪又係出去識女仔……
「佢話主要係想拎啲考試貼士,佢話啲導師好多時都有內幕消息。」秋兒姐姐頓了一頓,續道:「不過我都唔知係咪真。」
我有氣無力咁推開本Notes,不發一言咁飲湯。
其實我既反應係咪太過份?
只係借下Notes比秋兒姐姐啫,好大不了咩?
但我控制唔到自己既心情啊…
「熙熙?」秋兒姐姐見我突然之間唔出聲,於是開口叫我。
我抬頭望住佢。
「你都仲係咁唔鍾意Jonathan?」秋兒姐姐單刀直入咁問。
佢用「仲係」呢兩隻字,係咪以為果次接我機響巴士講左兩句,我就會覺得Jonathan係個好人下嘛?
唔係囉!
其實今日下晝食lunch佢見到我咁樣對Jonathan ,佢都應該估到我都仲係敵視佢喇!
呢條友一定係對妳有不軌既企圖!
佢仲癲過當年社長崔宏鋒呀!
不過我可以點?唔通響秋兒姐姐面前鬧佢,話Jonathan其實對妳圖謀不軌?
我覺得秋兒姐姐唔會信。
「唔……其實點解你會唔鍾意Jonathan既?」秋兒姐姐見我唔出聲,就當左我默認。
嗯,雖然佢都啱,我真係非常唔鍾意Jonathan。
「冇呀。」
「其實佢係一個好鍾意幫人既人黎,唔止對我,其實佢對任何人都好好。」秋兒姐姐笑道:「你仲記唔記得上次佢叫司機車埋阿必返屋企?明明果次佢同阿必係第一次見面,但對阿必既要求,佢完全冇表現出任何唔願意。」
死人白卡必,就係你幫Jonathan加左唔少分。
「哦。」我無精打采地回應。
秋兒姐姐微微一笑,唔再繼續講落去。
因為佢非常熟知我既性格,就算比佢繼續係咁講落去都好,佢都知並唔會因為佢既一番說話而對Jonathan改觀。
唉。
上次佢用淇淇黎同Jonathan做比喻,其實又點同?淇淇唔會對我圖謀不軌,但Jonathan會對妳有不軌既企圖啊!
叮!
咁啱呢個時候秋兒姐姐部手機響左一下,似乎係有人send訊息比佢。
秋兒姐姐冇理佢,反而繼續同我傾計。
但咁樣反而更令我在意係邊個send message比佢。
係Jonathan?
但係我總冇理由拎部手機黎睇,而我又唔想問秋兒姐姐邊個send訊息比佢。
於是我唯有悶悶不樂咁自己估估下,但估完又唔會知道答案。
本來我飲秋兒姐姐煲既湯飲得好愉快,但咁樣一搞,雖然秋兒姐姐冇直接問返我lunch件事,不過我心情又變差了。
同秋兒姐姐傾多左幾句,我都飲完湯向秋兒姐姐道別返屋企了。
*
返到屋企我即刻攤上床,望住天花板發左陣吽哣,再隨手拎起部手機望。
有幾個未讀既訊息。
係淇淇既…佢又係問我今日比賽踢成點、返到屋企休息未…
唔……白卡必send左個戇鳩笑話過黎。
你老味。
咦。
有個新訊息……
係鄭穎琳既?
“好掛住你”
……
……
……
唔知點解我諗起當年同Kitty姐姐既一日男友之約。
不過我而家心情唔係幾靚。
於是我打左句 “妳聽日出唔出黎?”
叮!
就咁send左出去比鄭穎琳。
既然秋兒姐姐覺得同Jonathan做朋友係冇問題既,我想搵邊個做我女朋友都係我既自由。
哼。
叮!
我好快收到個回覆既訊息。
“好呀 ”
叮!
“你主動約我,我好開心呀~”
妳好開心?
但我一啲都高興唔起黎。
(待續)