葉開葉開
2022-01-15 18:33:20
三百一十六
不過淇淇冇講大話,陳日朗真係有報到名參加義工。
呢樣野係響義工briefing完結我訓醒既時候分組我先知。
以佢做出黎個樣係乖學生,班主任叫佢報,佢都唔會唔敢報喇。
不過冇老師出現既場合,例如呢啲briefing,佢咪借啲咦唔黎囉。
我估。
佢負責做前線既義工,同其他都係呢一組既同學負責接待外賓導覽同解答佢地既問題。
麻煩既係淇淇同佢一樣,分埋同一個組別,都係接待外賓。
但係我就分左去後勤,即係擔擔抬抬,仲有負責報置場地既角色。
本身你叫我做乜野工作其實我都冇乜所謂,只要幫到秋兒姐姐就ok,但而家我又要保護埋淇淇,最理想就梗係同佢分埋同一組喇。
更何況而家陳日朗仲要同佢同一組添。
題外話,我竟然咁唔好彩,同鄭穎琳分埋同一組。
「咁點算呀…?」分完組之後,淇淇用求救既目光望住我。
「唔…」我諗左一諗,然後舉手。
Alex響老師枱個位望到我,於是問:「係,請問呢位同學有咩問題?」
「我想問有冇得調組?」我毫不客氣地問。
好多人都望住我,包括鄭穎琳。
「多謝呢位同學既提問。」Alex托一托佢副金絲眼鏡:「其實今次既分組,我地並唔係亂咁分,我地係按照各位同學既能力同特質黎分既,所以除非有好特別既原因,如果唔係我地並唔會接受任何調組既申請。」
屌吖。
「但你地都唔係識晒我地咁多個人啫?」我反問:「你地又憑咩覺得我地既能力適合做啲乜呢?」
Alex又托一托佢副眼鏡,冷靜地回答我:「咁呢方面我地當然有問過相關既負責老師,即係你地既班主任,所以我好有信心,我既分組係最理想既。」
「你個……」咁寸,你條四眼仔搏屌呀?
正當我仲想發作既時候,淇淇掹一掹我手臂,輕聲道:「算喇。」
我望一望秋兒姐姐,佢向我微笑咁搖一搖頭。
哼。
四眼仔。
我比面秋兒姐姐先唔郁你。
……
嗯。
「不如我返屋企問下秋兒姐姐可唔可調組喇。」我突然諗起呢個方法。
既然秋兒姐姐係學生會主席,我相信佢一定可以用佢既權力幫我調組既。
「唔駛喇。」淇淇搖搖頭,再輕輕地道:「唔好要秋兒姐姐難做。」
「但係...」我仲想講落去。
「真係唔緊要。」淇淇冇等我講完就續道:「每次要出席義工綵排或者其他活動既時候,你都陪住我返黎學校同送我返屋企就得架喇。」
咁既話妳當初搵我接送返學放學就得喇。
「況且響學校既時候,只要我需要你,熙熙你就一定會出現架嘛,係唔係?」講完之後淇淇露出甜笑。
唉。
都係既。
我響淇淇附近既話量陳日朗條仆街仔都唔敢亂黎。
於是我聳聳肩,不置可否。
*
「秋兒姐姐,個四眼仔真係問過老師關於所有義工既背景資料?」果一晚食飯既時候我又一次開口問秋兒姐姐。
老老實實,其實我唔係好鍾意佢呢種做法。
「唔…其實我都唔知…」秋兒姐姐諗左一諗:「我睇返以前既file,應該係比報名既同學自己揀左組先,真係有唔適合或者夠晒人既先會調組。」
「只係做個義工啫,點解要起人底咁?」如果唔係因為應承左秋兒姐姐同保護淇淇,就算我報左名都會即刻quit。
事實上我而家已經想quit。
秋兒姐姐微一搖頭,歉意地道:「熙熙…其實我都冇諗過佢會咁做,佢開會既時候都冇提過…令你難受唔好意思…」
「冇事既,仲有都唔關妳事。」我聳聳肩。
老實講,其實好少事。
只係我個人唔鍾意佢咁做法啫。
其實諗落,唔駛我去接客咪仲好。
一陣一個唔高興我搵粗口鬧佢地就唔好喇。
況且我手腳都靈活做開運動,要擔擔抬抬其實唔難。
對外賓先麻煩。
只係我唔滿意四眼仔既做事方法同想陪淇淇啫。
「嗯。你咁諗就好。」秋兒姐姐微微笑道:「我記得你以前好似拎過班際壁報比賽既冠軍。」
哈,果件事。
最好都係唔好提。
(待續)
葉開葉開
2022-01-16 19:34:16
三百一十七
我以前讀果間小學,高年級每年都會響舉辦一次班際壁報設計比賽。
而由小學四年級開始直至畢業,所有我果班既壁報接近90%都係我一個人做晒。
咁係因為其他同學都唔想同我一齊做。
而偏偏我既美術成績係班入面最好既(估唔到吖喱),所以老師就指定要我負責呢個比賽。
小學雞又點識反抗老師?
哈哈。
好諷刺。
果10%既成果都只係其他同學因為應酬老師而稍為出下力啫。
「我只係被逼既啫。」我從回憶中回過神來,聳聳肩答道。
「不過你攞獎果陣好開心。」秋兒姐姐微笑道:「叔叔都好開心。」
呢個班際壁報比賽係有頒獎典禮既,得獎既班別會由負責既同學響週會既時候上台領獎。
只係普通一個週會環節,唔會特別邀請家長出席,再講就算真係邀請家長出席,老豆都要返工未必得閒黎睇。
不過我領完獎之後既果一晚,總係會拎住張獎狀,好夜都唔訓等老豆放工返到黎炫耀一番。
「嗯。」我又聳聳肩:「咁可能我係為左證明比老豆睇我唔係一無是處喇。」
「你又點會係一無是處呢?所以…話唔定今次咁既分組你又可以發揮到你既長處呢?」秋兒姐姐柔聲地道:「咁你而家感覺好啲未?」
其實正如之前所講,我對自己做咩其實冇乜所謂。
接待外賓我更加唔鍾意。
只係唔滿意四眼龜既分組方法,同埋我唔可以響淇淇身邊睇住佢啫。
所以我聳聳肩,無奈地道:「Ok喇。」
「咁快啲食埋飯喇。」
「嗯。」
*
之後要返學校幫手既次數,我係仲多過淇淇既。
始終前期既報置同擔擔抬抬既野都幾多。
不過有時就算另外一組人唔駛返黎幫手,佢地都會特登返黎睇下我地呢組有咩幫手。
反正佢地都係負責記下要答來賓問題既資料,同安排禮堂入面啲擺位同管理下唔同學會既攤位、展覽板等等。
雖然另一組有唔少人都會過黎幫手,但陳日朗當然係冇黎過喇。
我覺得佢比我打撚到唔敢再過黎見我。
可能驚我再打撚柒佢。
而每次淇淇要返學校準備既時候(當然我都要返去幫手),我都會陪佢一齊返。
反而有時我要返佢唔駛返既時候,佢都會一齊幫手。
都估唔到佢幾投入。
比著係我不如返屋企訓覺算。
鄭穎琳就次次都有出席,同另一個男同學出雙入對,仲成日響我同淇淇面前行黎行去。
老實講,都幾煩。
咁多路唔行係要響我面前同另一個男同學行黎行去,好似烏蠅咁,仲要成日怒睥住我。
大姐咁妳咁唔滿意就唔好成日行埋黎喇屌。
另一方面,學生會既幹事們都好努力咁去幫手搞Open Day。
我睇得出秋兒姐姐其實都好緊張搞呢個open day。不過同Christmas Ball唔同,始終今次係學校既官方活動,學生會只係協力去搞,又唔駛開啲咩聯校會議,所以點辛苦都唔會夠Christmas Ball果陣。
有時好彩既話仲可以同秋兒姐姐一齊返屋企添。
*
好快就到左Open Day正式舉行之前既最後一個星期六,大家都如火如荼咁去幫手準備,用僅餘既最後一個週末去準備。
而我今晚仲有場球會既比賽要踢。
希望唔駛搬咁多野消耗咁多體力喇。
淇淇都有自己果組既野要搞,所以今日淨係我自己單拖去自己果組做野。
「喂,你過黎幫我搬呢箱物資去美術室。」響我專心整緊流動板上面既展覽既時候,鄭穎琳突然走過黎我面前,再指一指擺左響課室角落既一個紙箱。
屌吖,呢個係叫人做野既態度黎架咩?
妳真係同林必才一撚樣架喎。
「妳去搵妳隻兵搬喇,搵我托柒咩?」我不滿地反問。
「鈞仔係我好朋友黎咋,咩我隻兵呀?」鄭穎琳反唇相稽。
「係係係,鈞仔吖嘛?」我都冇佢咁好氣:「妳咪搵佢去幫手囉。」
「佢今日唔舒服冇返呀!」鄭穎琳答道。
我本來想指一指其他人,叫鄭穎琳收其他男同學做兵,但我呢個時候先發覺成個課室冇晒人。
佢地去晒邊?
(待續)