葉開葉開
2022-01-10 19:14:52
三百一十三
雖然阿必想去搵鄭穎琳,但佢都好認真咁同我熱埋身先行過去。
而且……
……
……
……
屌你老味拖埋我過去係乜撚野玩法!
死基必!
我唔撚拖男人手架!
阿必痴Q左線咁推開其他隊友:「穎琳bb!」
「咦?必必你都過左黎?」鄭穎琳先係望左我一下,然後先對住阿必講,然後眼尾再不屑咁望下我。
屌吖,妳咁望我咩意思!
仲有,必必係咩一回事!
「係呀穎琳bb,特登黎見下妳吖嘛。」阿必淫邪地笑地道:「係喎穎琳bb妳今日又會黎睇我地比賽既?」
「必必你真係識講野!」鄭穎琳笑道:「我有幾個朋友今日都比賽,佢地邀請我黎睇吖嘛,所以我咪過黎支持下佢地囉!」
嘩仲必必?乜撚野必必呀,好撚難頂屌。
「嘩咁就啱喇,一陣妳就睇我地表演...嘩!好痛!好痛!放手!」阿必都未講成句,就比八婆儀走過黎扯住耳仔走...
BTW,睇我地表演?
表演比人大炒?
「死人頭,熱身就熱身喇,走去撩女仔!」八婆儀一邊扯住阿必耳仔,一邊轉向鄭穎琳,用個有啲誇張既語氣:「唔好意思喎打搞到妳,呢個人成日都係咁,話足佢咁多年都唔改。」
鄭穎琳露出一個甜美既笑容,道:「唔緊要,我完全唔介意,我同必必都好close架。」
嘩,呢句說話好似有骨咁既?
八婆儀狠狠咁𥇣左笑咪咪既鄭穎琳一眼,然後再大大力咁扭住阿必既耳仔走開…
「喂!痴線!好痛!甩喇!放手,我仲要踢波架……」阿必一邊比八婆儀拖住走一邊慘叫。
顧問老師馬sir同其他隊友饒有趣味咁望住呢一幕…但絲毫冇出手相救既打算…
就響呢個時候,仲響場入面熱身既隊友唔小心將個波省出場外面……
而又咁啱呢個波向住鄭穎琳飛緊過黎。
「小心呀穎琳bb!」狗公隊友們急忙提醒鄭穎琳。
不過……
似乎鄭穎琳都係發覺得太遲喇。
「啊!」鄭穎琳竟然嚇到合埋雙眼。
低鳩能,其實向側邊行一步已經可以避開喇,合埋眼係咩玩法?
就響個波就黎省中鄭穎琳之際,我好自然反應咁一個車身窩利將個波踢返走。
鄭穎琳真係死好彩,咁啱阿必夾硬拖埋我過去搵佢吹水,但八婆儀扭住阿必耳仔走既時候將我留響原地,咁啱隊友又將個波亂咁踢過黎我地附近既方向,我先咁啱企響一個可以窩利踢中個波既位。
鄭穎琳聽到聲,打開雙眼,一對妙目再望實我,好似仲未回到魂。
「穎琳bb妳冇事吖嘛!」
「哎呀嚇死我喇,幾驚整親穎琳bb!」
「穎琳bb冇事冇事,有我響度!」
你老味真係成班狗公,淨係識到扮晒野咁關心鄭穎琳,啱啱成班人就咁得個睇字。
「喂小心啲喇,爭啲省到人喇!」當然都有人屌鳩場入面既隊友。
其實佢地唔係應該屌鄭穎琳行入球場邊咩?
好似淇淇佢地咁坐響觀眾席上面唔好咩?
「唔想比波省中就躝返上觀眾席睇波喇屌。」我不屑咁向鄭穎琳拋低一句。
鄭穎琳淨係望實我都未有反應,我啲狗公隊友們(但今次阿必唔響入面,因為佢仲比八婆儀扭緊耳仔)已經鬧鳩我:「喂!阿熙你咁就唔啱喇,有乜理由咁話個受害人呀?」
「係囉,你踢走個波救左穎琳bb大晒咩!」
「阿熙你快啲道歉呀!」
真係戇鳩,我救左鄭穎琳都要比佢啲狗公s屌。
我都廢撚事理呢班廢柴,自己轉身行返入球場繼續熱下身仲好,留底班狗公響後面奉承鄭穎琳就算。
「我都要熱身呀…比我走啦…」觀眾席果邊好似傳黎阿必既慘叫聲…
*
呢場波既比數唔好提喇,總之就係我響前面入埋都唔夠後面輸,即使阿必已經憑佢個人之力清左唔少波。
完場之後,我同阿必照舊同淇淇、八婆儀同鄭海欣去食tea。
阿必想狗衝過去鄭穎琳果度道別既時候,已經比八婆儀扭住耳仔拉走左。
btw唔知係咪我既錯覺,我覺得鄭穎琳好似成日望過黎我度咁,當我望返過去既時候佢又好快擰開視線。
屌,奇撚怪怪咁。
睇邀請妳黎睇波果班friends喇屌。
之後兩場,鄭穎琳都有黎睇波,不過我就同佢冇乜交集,而阿必想狗衝既時候都會比八婆儀拉走。
其實好撚好笑。
就係咁,輸鳩埋果兩場之後,我地學界就已經三戰全敗分組賽畢業了。
(待續)